USƐFANÍYA 3 - Ubáyíbu kú Idɔma

Ācɛ kú Ujerúsālɛm le íne bīya

¹ Ācɛ Ujerúsālɛm, aá le jī ɛɛ́. Ó wɛ igelī nɛ̄hi nōo le bīya mla ucē obɔ̄bí mɛ́mla īkpɛ̄yí olɔfú ō yá. É klla gē yá ācɛ ɔlɛ́ uwā ŋmó.

² É tá kéē jāhɔ̄ lɛ ɛlā kú Ɔwɔicō. É gē mīyɛ ɛlā okpaakpa nēé gē nwū uwā ā ŋ́. É lɔtūce Óndú ā ŋ́. Ɛ́ɛ́ nēé gē dɔɔ̄ka kóō tá uwā abɔ̄ dɛ̄ɛ̄ ŋ́.

³ Aígabɔ̄ kú nū lɛbɛ̄ɛka ágábá nōo yɔ̄ ī tōoje ā. Ācohɛ́pɔ̄ kú nū lɛbɛ̄ɛka odumú kú ɔ̄nɔ̄ɔ̄nɛ̄ nɛ̄ ágágā ō hɛ́ í cɛ̄ lɛ ɔ́ habɔ̄ ikpokwú éékpó tá gbɔ́ɔ̄cī ŋ́ mā.

⁴ Ācomɛ́ɛbɛ kú nū wɛ ācoyípú, nēé lɛ ɛlá wu ācɛ ɔlɛ́ uwā ŋ́. É klla tōō lɛ ɔtūce ŋ́. Ācogwɛ́ɛya kú uwā gē je ɔdā nōo tīihɔ ā nyílá. É klla gē je íne gbájí klla ī cɛ̄tra ɔdōbɔ̄bí kú uwā, cɛ́ɛ́ kéē lé itene ŋmá anú.

⁵ Amáŋ Óndú ā yɔ̄ ipú igelī nɛ̄hi ā kpɔ́ ɛ́ɛ́. Ó géē yá ɔdā nōo lɔhi klla le kpaakpa ā. Ó gē yá ɔdōbɔ̄bí ŋ́. Eko dóódu, ó gē hɛ́pɔ̄ okpaakpa péee lɛ ācɛ ɔlɛ́ nū. Amáŋ ācobɔ̄bíipú ā bá ī yá ɔdōbɔ̄bí kpɔ́, é gē yúwēyī ŋ́.

⁶ Óndú ā kahíníī, “N le ācɛ éwo odunkwulu alɛwa kpó yíífi ɛɛ́. N le aígelī nɛ̄hi kú uwā kpó yíífi klla le igá olɔfú mɛ́mla aínɔ̄ɔda ɔkplɛ́fú kú uwā ca tāajɛ. N le yá kú aúláyi kú ɔlɛ́ uwā kóō má táncā, ɔ̄cɛ dúú í hile anú ŋ́. Aígelī kú uwā le pīya alácɛ̄ nɛ̄ ɔ̄cɛ dóódu í lā anú ŋ́.”

⁷ Ohígbū aɔ́dā nēe yá nēe bá ā, n gbɛlá ka ācɛ ɔlɛ́ um géē lɛ ojīlīmā ce um mɛ́ɛnɛ, cɛ́ɛ́ kéē lɛ odée jé ŋmá odúúdú italā nɛ̄ n yá uwā a. Amáŋ, eko kpií é gbɔɔ́ ō yá ucē obɔ̄bí fíyɛ́ dúú ā.”

⁸ Óndú ka é gbēyī anúɔ. Ó keé gbēyī ɛ̄cī nɛ̄ anúɔ géē kpó ɛlā ce aéwo ā. Ó klla ka anúɔ le ɔtū kú anúɔ yéékpó kú anúɔ lɛ odúúdú aéwo mla aajɔ̄ɔ̄cɛ́ túbá, ká anúɔ bī ícɔ̄nū nɛ̄hi kú anúɔ ā lɛ italā yá uwā. N géē cɔ̄nū nɛ̄hi í kpó aéwo ā yíífi ŋmá ajɛ.

⁹ Óndú ka eko ɔ́ɔmā ā, anúɔ géē je ucē kú ācɛ pīyabɔ̄ ga ucē nōo le yēŋēē, nɛ̄ odúúdú uwā í bī lɛ gbɔ̄ɔkɔ lɛ anúɔ ōfōōfū anúɔ. Cɛ́ɛ́ é gáā gbɔ̄ɔkɔ lɛ aɔ́wɔ ɔhá gɛ ŋ́. Ó keé géē lɛyítáajɛ lɛ anúɔ ŋmá ɔtū ékpónú.

¹⁰ Óndú ka ācɛ ɔlɛ́ anúɔ nēe pahīla bá ɛga o ligbó gwū ísu kú Itiyópīya tá ā, géē bī ɔdā ɛ̄gbā gé lɛ anúɔ.

¹¹ Ó ka ɛ̄cī ɔ́ɔmā, uwēyī ó gáā kwú uwā, ohígbū īkpɛ̄yí olɔfú nēé yá tá anúɔ ā gɛ ŋ́. Ohígbū ka anúɔ géē kpó ācɛ oyɔ́bɔ́cɛ mla ācɛ nēe gē gɔ̄ ā, ŋmá ipú uwā. Cɛ́ɛ́ kéē hīīī yíīkpɛ̄yí olɔfú ɛyí ɛfu otīihɔ kú anúɔ ā ɛ́ɛ́ gɛ ŋ́.

¹² Ó ka ohígbū ka anúɔ géē habɔ̄ ācɛ o bɔ́ɔtū mɛ́mla ācɛ o tá iyī uwā wāajɛ ā tá abɔ́ɔ. Ó ka é géē wā kú anúɔ tá uwā abɔ̄.

¹³ Ó ka ācɛ nēe hile Ísrɛ̄lu ā, í gáā yá ɔdōbɔ̄bí gɛ ŋ́. Ɛ́ɛ́ nēé gē kɛ̄mgbɛ̄ gɛ ŋ́. Ó ka é gáā plla ɔ̄cɛ dúúmā gɛ ŋ́, ohígbū ka é géē bá ī jɛ̄ gɔbū, klla í lā ɛbɔ́. Ó ka ɔ̄cɛ dúúmā í gáā tū uwā ufi gɛ ŋ́.

Ijē kú éeyē

¹⁴ Ācɛ kú Ísrɛ̄lu, aá gwéeyē, ká aá gwíijē gbōmgbōm, Ācɛ kú Ujerúsālɛm, aá gwéeyē mla odúúdú ɔtū kú aá.

¹⁵ Óndú ā kwú italā kú ɛpɔ̄bí nɛ̄ aá lé ā, ú ŋmá aá ɛyí ɛɛ́. Ó lɛ aólɛlā kú aá kpó nū ŋmá ɛgiyí aá ɛɛ́. Óndú, nōo wɛ ɔcɛ́ kú Ísrɛ̄lu ā yɔ̄ mɛ́mla aá. Aá gáā yúufi gɛ ŋ́.

¹⁶ Ɛ̄cī ɔ́ɔmā ā, é géē da ācɛ Ujerúsālɛm kahíníī, “Aá híī yúufi ŋ́, igelī kú Usáyɔn. Aá híī cɛ̄ lɛ abɔ̄ hɛ́ aá iyē gɛ ŋ́.

¹⁷ Óndú, Ɔwɔicō kú aá ā, gē cɛ̄ lɛ ɔ̄cɛ yálé glá á. Ɔtū aá he ɔ́, ihɔtū kú nū kē í cɛ̄ lɛ ɔ́ je oyēeyī ɛ̄yīpɛ̄ lɛ aá. Ó gē gwííjē gbōmgbōm klla í gwéeyē ohígbū aá.”

¹⁸ Óndú ka, “N géē je ákanya mla ámíyā ŋmá ɛgiyí aá, ká uwēyī kóō kwú aá ɛ́ɛ́ gɛ ŋ́. Cɛ́ɛ́ aá í bá ī gwéēyē bɛ̄ɛka ɛ̄cī kú ucɛ ā.

¹⁹ “Má ɔɔ̄, eko gē wā, nɛ̄ n géē yá ācɛ dóódu nēe gē lɛ abɔ̄ da aá ɛyí tāajɛ ā ōwē. N géē nya ācɛ onyɔ́nyí ā tá, klla í kpó ācɛ nēe bá ajɛ kú ɔfiyɛ ā kwúcē wā ɔlɛ́. N géē je uwēyī kú uwā pīya ojīlīmā. Odúúdú ɛcɛ géē cɛ̄tra uwá.

²⁰ Eko ɔ́ɔma ā, n géē kpó ācɛ ɔlɛ́ aá nēe fíyákátā ā wā ɔlɛ́. Eko nɛ̄ n lɛ aá túbá tɔhā kwɛyí, n géē yá kú aá le lóofu odúúdú ipú ɛcɛ nyā, ká odúúdú ācɛ kéē cɛ̄tra aá. N géē yá kú aá jɛ̄ gɔbū, kú aá klla le gbagbénú kpɔ́.” Abɔ̄ Óndú ā ka lɛ a á.