URÚTU 4 - Ubáyíbu kú Idɔma

Ubówāsi le Urútu lɛ

¹ Ubówāsi le tá ɛyɔ́ɔ́pu kú Okónɔɔwɛ kú igelī nɛ̄hi ā gaá cīce abɔ́ɔ. Anɔ́ɔ ɔmáapú kú Ɛlímɛ́lɛ̄ki, ɔ̄cɛ nɛ̄ Ubówāsi kɛlā nū lɛ Urútu ā wā gaá yɛ. Anɔ́ɔ Ubówāsi lɛ ɔ́ hīgwú kɔ́ɔ̄ wā amānyā oklóbīya anúɔ kɔ́ɔ̄ má cīce. Anɔ́ɔ ɔ̄cɛ ā gaá cīce á.

² Anɔ́ɔ Ubówāsi lɛ anyākwɔ́cɛ igwó ɔhá hīgwú wā í cīce abɔ́ɔ dúú. Eko nɛ̄ uwá má cīce ā,

³ Ubówāsi da aɔ́máapú nū ā ka abɔ̄ Unaómi ɔ́ɔ pīyɛyí ŋmá Umówābu ā, ó dɔɔ̄kā ó je ajɛ kú Ɛlímɛ́lɛ̄ki, ɔmáapú aá ā lá.

⁴ Ó ka anúɔ gbɛlá ka ɔnyīlɔ ā ɔ́ɔ jé odée lɛyíkwu ɔ́. Ó klla da ɔ́ ka ɔ́dāŋ ka ɔ́ɔ dɔɔ̄kā ō lá ajɛ ā, ɛ́mba ɔ́ɔ le lá ipéyī anyākwɔ́cɛ nēe bá ā. Ɔ́dāŋ́ ka ɔ́ɔ dɔɔ̄kā ō lá ajɛ ā ŋ́, ayíka ɔ́ɔ le ka amānyā, ohígbū ka anú ɔ́ɔ lɛ íkwu kóō lá ajɛ ā aflɛ́yí á, ɛ́ɛ́ nɛ̄ ɔgba ɔ́ɔ gē wā ī ce anúɔ á. Anɔ́ɔ ɔ̄cɛ ā tá ohi ka anúɔ géē lá ajɛ ā.

⁵ Anɔ́ɔ Ubówāsi da ɔ́ ka ɔ́dāŋ́ ka ɔ́ɔ lɛ ajɛ ā lá ŋmá ɛgiyí Unaómi, Urútu, ɔnyōkwū kú ɔyi kú Unaómi ā kwú pīya ɔnyā nū, cɛ́ɛ́ ká ajɛ ā kóō yɔ̄ lɛ ipɔ́ɔnū kú ɔlɛ́ okwūmā ā kpɔ́.

⁶ Anɔ́ɔ ɔ̄cɛ ā tóohi ka ɔ́dāŋ ka ɔ́ɔ lɛ ā nɛɛ, ayíka anúɔ géē habɔ̄ íkwu ō lá ajɛ ā tá. Ohígbū nɛ̄ úgwū kú ayí anúɔ ɔ́ɔ géē cē nyɛ́ fíyɛ́. Anɔ́ɔ ó da Ubówāsi kóō lɛ ajɛ ā lá mɛ́ɛ́nɛ, ka anúɔ í gáā lá gɛ ŋ́.

⁷ Ɔdā nɛ̄ ācɛ kú Ísrɛ̄lu gē yá eko nɛ̄ncɛ̄ ā, wɛ ka oyá ká ācɛ kéē jé ka é kwú odée kú uwā ú lá, amáŋ ka ofūlabɔ̄ kú agbénú kú uwā ā, yɔ̄ á. Ɔ̄cɛ nōo gē je odée kú nū lá ā, géē je ikpó áblákpá kú nū éyi plá ŋmá ikpó lɛ ɔ̄cɛ nōo gē lá odée ŋmá ɛgiyí nū ā. Ɔwɛ nyā nɛ̄ ācɛ kú Ísrɛ̄lu gē mafú ka aá kwú odée kú aá ú lá, amáŋ o kwú ɔ̄ ú fūlabɔ̄ á.

⁸ Eko nɛ̄ ɔ̄cɛ ā da Ubówāsi ká ɔ̄, lɛ ajɛ ā lá ā, ó kwú ikpó áblákpá kú nū éyi ú plla lɛ Ubówāsi.

⁹ Anɔ́ɔ Ubówāsi da anyākwɔ́cɛ mɛ́mla ācɛ o hile ɔhá nēe bá abɔ́ɔ ā ka odúúdú uwā ɛ́ɛ wɛ ijáalí kú anúɔ ícɛ nyā, ka anúɔ lɛ ajɛ ā mɛ́mla ɔdā dóódu nēe wɛ ákú Ɛlímɛ́lɛ̄ki, Ucílīyɔn mɛ́mla Umálɔn ā lá ŋmá ɛgiyí Unaómi ɛɛ́.

¹⁰ Ó klla da uwá ka Urútu, ɔ̄cɛnya kú Umówābu, ɔnyōkwū kú Umálɔn ā kwú pīya ɔnyā anúɔ dúú ɛɛ́. Ó ka ɔ́ɔ géē lɛ agbénú ā tū iyē kú aókwūmā ā, cɛ́ɛ́ kú ipɔ́ɔma mɛ́mla ipɔ́ɔnū kú uwā í yɔ̄ ī gɔbū lɛ ācɛ ɔlɛ́ uwā mɛ́mla ipú ɔlɛ́ kú uwā. Ó ka odúúdú uwā ɛ́ɛ wɛ ijáalí kú ɛ̄nyā ícɛ nyā.

¹¹ Anɔ́ɔ anyākwɔ́cɛ ā mɛ́mla ācɛ o hile ā tá ɔ̄ ohi ka aá wɛ ijáalí. É ka Óndú ā kɔ́ɔ̄ lɛ ɔnyā nōo gē wā ɔlɛ́ nū ā yá bɛ̄ɛka Urécɛ̄lu mɛ́mla Ulɛ́ya, nēe ma ayí alɛwa lɛ Ujékɔ̄pu ā. Kóō le gbagbénú ipú ipɔ́ɔma kú Éfrāti, cɛ́ɛ́ kɔ́ ɔ̄ klla fāajɛ Ubɛ́tilɛhɛ̄m

¹² Ka ɔyí nɛ̄ Óndú ā géē je lɛ ɔ́ bū ipú kú ɔnyā ā, kɔ́ɔ̄ lɛ ipɔ́ɔnū kú ɔlɛ́ nū yá bɛ̄ɛka ipɔ́ɔnū kú Upɛrɛ́si, ɔyí kú Ujúda mɛ́mla Utáma ā.

Ubówāsi mɛ́mla ayááyí nū

¹³ Anɔ́ɔ Ubówāsi kwú Urútu ú ga ɔlɛ́ nū, anɔ́ɔ ó kwú pīya ɔnyā nū á. Óndú ā le ɔhá hɛ́ ce Urútu, anɔ́ɔ ó le ipú yɔ̄ lɛ ɔyí ɔ̄cɛnyílɔ éyi ma á.

¹⁴ Anɔ́ɔ ācɛnyā kú Ubɛ́tilɛhɛm ā da Unaómi kɔ́ɔ̄ cɛ̄tra Óndú ā, nɔ́ɔ le ɔyí kú ɔyí nōo géē lɛ ɛlá kwu ɔ́ je lɛ ɔ́ ɛɛ́ ā. É cōkónu lɛ ɔyí ā ká ɔ̄ le fāajɛ nɛ̄hi ipú Ísrɛ̄lu.

¹⁵ É ka ɔyí ā ká ɔ̄ kwú oyēeyī ɛ̄yīpɛ̄ ú lɛ Unaómi, kɔ́ɔ̄ klla leyīkwu ɔ́ eko kú ókplícī kú nū. Ohígbū ka ɔnyā ɔyí nū nɔ́ɔ yíihɔtū tá ɔ̄ nɛ̄hi ā, le ɔyí kú ɔyí ma lɛ ɔ́ ɛɛ́. É da ɔ́ ka anú ā, ɔ́ɔ kōō yá odée lɛ ɔ́ fíyɛ́ ɔdā nɛ̄ ayínɔ̄nyīlɔ ahāapa lɔfú yá lɛ ɔ́ glá ā.

¹⁶ Unaómi le ɔyí ā fō, ŋmá ɛgiyí ɛ́nɛ́ nū, anɔ́ɔ ó le ɔ́ bī jɛ̄ á.

¹⁷ Ācɛnyā nēe wɛ aólajógbe kú nū ā kwú iyē ú ce ɔyí ā ka Óbɛ̄di. Anɔ́ɔ é yɔ̄ ī ka lɛ ɛjɛ̄ɛ̄jī ācɛ kéē le ɔyínɔ̄nyīlɔ éyi ma lɛ Unaómi ɛɛ́. Óbɛ̄di nyā wɛ ádā kú Ujɛ́se, nōo wɛ ádā kú Udéfīdi ā á.

Ipɔ́ɔma kú ɔlɛ́ Udéfīdi

¹⁸ Ɛ̄nyā wɛ aípɔ́ɔma kú Upɛrɛ́si gaá kwu Udéfīdi á. Uperési wɛ ádā kú Uhɛ́srɔn á,

¹⁹ Uhɛ́srɔn wɛ ádā kú Urám, Urám wɛ ádā kú Amínādabu,

²⁰ Amínādabu wɛ ádā kú Unássɔn, Unássɔn wɛ ádā kú Usálmɔ̄n.

²¹ Usálmɔ̄n wɛ ádā kú Ubówāsi, Ubówāsi wɛ ádā kú Óbɛ̄di,

²² Óbɛ̄di wɛ ádā kú Ujɛ́si, Ujɛ́si wɛ ádā kú Udéfīdi á.