URÚTU 3 - Ubáyíbu kú Idɔma

Urútu le ɔbá éyi má

¹ Anɔ́ɔ Unaómi da Urútu ka anúɔ géē dɔɔ̄kā ɔbá éyi lɛ ɔ́, cɛ́ɛ́ kóō lɛ ɔlɛ́ abɔ̄yī nū lɛ.

² Anɔ́ɔ ó da ɔ́ kɔ́ ɔ̄ bla ka Ubówāsi ɔ́ɔmā, nɔ́ɔ húmáyī yúklɔ́ mla anyā ɔlɛ́ nū ā, wɛ ɔmáapu aá, nɛ̄ ō cíkā ō je aá anyōkwū. Anɔ́ɔ Unaómi da Urútu ká ɔ̄ jāhɔ̄, ɔ̄nɔ̄ɔ̄nɛ̄ ícííci ɔ́ɔmā, Ubówāsi ɔ́ɔ géē yɔ̄ ī tá īkpɔ̄dā kú nū owu.

³ Anɔ́ɔ Unaómi da Urútu kɔ́ ɔ̄ lɛ iyē gwā, kɔ́ ɔ̄ lɛ ɔtulalī tū iyē, kɔ́ ɔ̄ klla lɛ īlī kú nū nɔ́ɔ lɔhi fíyɛ́ kpɛ́mm ā kpó wu iyē. Cɛ́ɛ́ kɔ́ɔ̄ nyɔ̄ ɛga nɛ̄ Ubówāsi ɔ́ɔ gē tá īkpɔ̄dā owu ā. Ó da ɔ́ ka amáŋ, ɔ́ɔ cɛ̄ lɛ ɔ́ jé ka ɔ́ɔ yɔ̄ abɔ́ɔ ŋ́ jāā gbéeko nɔ́ɔ lɛ ɔdōlé lé, klla le enyi gwá.

⁴ Ó klla da Urútu ka eko nɛ̄ Ubówāsi ɔ́ɔ gaá gwutá, ɔ́ɔ lɛ eyī bī ɛga nɔ́ɔ gáā gwutá ā. Eko nɔ́ɔ gbɔɔ́ ō gbiyɔ̄lā, ɔ́ɔ je īlī nɛ̄ Ubówāsi le klá iyē ā gicō, cɛ́ɛ́ kú ɔ̄ má gwutá igbīhi nū. Ó ka ɔ́ɔ géē da ɔ́ ɔdā nɔ́ɔ géē yá ā.

⁵ Anɔ́ɔ Urútu tóohi ka ɔdā dóódu nɛ̄ anú, Unaómi ɔ́ɔ ka lɛ anúɔ ā, anúɔ géē yá ɔ̄.

Unaómi gaá jila Ubówāsi

⁶ Anɔ́ɔ Urútu le yɛ tá ɛga nēé gē tá īkpɔ̄dā owu ā, anɔ́ɔ ó le yá ɛ́gɛ́nɛ̄ ɛ́nɛ́ ɔbá nū da ɔ́ ā.

⁷ Eko nɛ̄ Ubówāsi lɛ ɔdōlé lé klla le enyi gwá kwɛyí ā, ɔtū le he ɔ́ nɛ̄hi. Anɔ́ɔ ó le tá ɛga nēé tá ácí kú īkpɔ̄dā ā bá ā, gaá gwutá kóō gbiyɔ̄lā. Anɔ́ɔ Urútu le plla ga abɔ́ɔ wɛɛlɛ, je īlī nɛ̄ Ubówāsi le klá iyē ā gicō, anɔ́ɔ ó má gwutá pī yɔ̄ á.

⁸ Ahāpōtú ā, Ubówāsi le héyī, pīyeyī kpánáá. Anɔ́ɔ ó hɛ́gilígilí ka ɔnyā éyi ɔɔ́ gwutá ablīkpó kú anúɔ ā.

⁹ Anɔ́ɔ Ubówāsi da ɔɔ́ ɔ̄kā ka ɔ́ɔ wɛ ɔ̄nyɛ nɛ? Anɔ́ɔ Urútu tá ɔ́ ohi ka anúɔ Urútu nɛ̄, ɔkpani. Anɔ́ɔ ó da Ubówāsi ka ɔ́ɔ cíkā ō leyīkwu anúɔ, abɔ̄ ɔ́ɔ wɛ ɔmáapu ɔbá anúɔ ajaajɛ ā. Ohígbū ɔ́ɔmā ɔ́ɔ lɛ anúɔ lɛ ɔnyā nū mɛ́ɛnɛ.

¹⁰ Anɔ́ɔ Ubówāsi tá Urútu ohi ka, Óndú ā kú ō hɔ́hā ce ɔ́. Ka, ucē olɔhi nɔ́ɔ mafú nyā klla lɔhi fíyɛ́ ɛ̄nɛ̄ ɔ́ɔ yá tá ɛ́nɛ́ ɔbá nū ā á. Abɔ̄ ɔ́ kwu tá ɔyípōklóbīya nōo lɛ ɔdu ámāŋ ogbɛhá ɔkwu, cɛ́ɛ́ kóō lɛ ɔ́ lɛ ŋ́ mā ā.

¹¹ Anɔ́ɔ ó da Urútu eko ɔ́ɔmā kɔ́ɔ̄ híī je unwalu lɛ iyīnū gɛ ŋ́. Ó da ɔ́ɔ ka anúɔ géē yá ɔdā dóódu nɔ́ɔ tíne ā lɛ ɔ́. Ohígbu ka odúúdú ācɛ kú Ubɛ́tilɛhɛm jé ka ɔ́ɔ wɛ ɔnyā olɔhi.

¹² Ubówāsi da ɔ́ ka ɔ́ɔ wɛ ɔkwɛ̄yi nɛ, ka anúɔ wɛ ɔmáapu ɔbá nū ajaajɛ, nōo klla cíkā ō je ɔ́ ɔnyōkwū. Amáŋ, ɔ̄cɛ ɔhá ɔ́ɔ yɔ̄ abɔ́ɔ nōo wɛ ɔmáapu ɔbá nū ajaajɛ fíyɛ́ anúɔ kpɔ́

¹³ Anɔ́ɔ ó da ɔ́ kɔ́ɔ̄ mlɛ́nyɔ́ amānyā otú ā ɛ́ɛ́ mɛ́ɛ́nɛ. Ɔ̄cɔ̄ɔ̄cī kú oŋmɔ́ɔ̄cī nū, ɔ́ɔ géē jé ɔ́dāŋ́ ka ɔ̄cɛ ā géē je ɔ́ ɔnyōkwū, ámāŋ ka ɔ́ gáā je ɔ́ ɔnyōkwū ŋ́. Ó klla da ɔ́ ka ɔ́dāŋ́ ka ɔ́ɔ kwú ɔ̄ ú ɔnyōkwū, ɔ́ɔ lɔhi. Ɔ́dāŋ́ ka ɔ́ kē je ɔ́ ɔnyōkwū ŋ́, anúɔ le ɔkpá ce iyī anúɔ O ŋmá lɛ iyē kú Ɔwɔicō nɛ̄ ɔ́ yēeyī ā, anúɔ géē je ɔ́ ɔnyōkwū. Anɔ́ɔ ó da Urútu ká ɔ̄ má gwutá kɔ́ɔ̄ klá abɔ́ɔ gbó ɔ̄cɔ̄ɔ̄cī mɛ́ɛnɛ.

¹⁴ Anɔ́ɔ Urútu má gwutá ablīkpó kú nū gbɔ́ ɔ̄cī á. Amáŋ, ó cāŋjɛ ofúlɔ̄cī, ohígbū ka Ubówāsi í dɔɔ̄kā ká ɔ̄cɛ dúúmā kóō jé ka ɔ́ɔ wā abɔ́ɔ ŋ́.

¹⁵ Anɔ́ɔ Ubówāsi da ɔ́ ka ɔ́ kwú īlī otōhí kú nū éyi ú pīya klá ajɛ. Anɔ́ɔ ó kwú īlī ō tōhí kú nū éyi ú pīya klá ajɛ á. Anɔ́ɔ Ubówāsi le īkpɔ̄dā fú tū ɔ̄ lɛ ɔ́ nɛ̄hi, nɛ̄ ogbɛnú kú nū lɛbɛ̄ɛka ákú okoolo ofɛhɔ̄ ā. Anɔ́ɔ ó kwú ɔ̄ ú ce Urútu ɛyí á. Urútu pīyɛyí wā Ubɛ́tilɛhɛm mla īkpɔ̄dā ā.

¹⁶ Eko nɛ̄ Urútu pīyɛyí wā ɛgiyí ɛ́nɛ́ ɔbá nū ā, ó le ɔ̄kā da ɔ́ ka abɔ̄ ɔ́ɔ yɛ lɛ ɔ́ ɔyí anúɔ nɔ̄nyā? Urútu le ɔdā dóódu nɛ̄ Ubówāsi yá lɛ ɔ́ kpɛ́mm ā kpó ka lɛ ɛ́nɛ́ ɔbá nū.

¹⁷ Urútu klla da ɛ́nɛ́ ɔbá nū ka Ubówāsi ɔ́ɔ da anúɔ ka ó cíkā kú anúɔ tá abɔ̄ áncā ga ɛgiyí ɛ́nɛ́ ɔbá anúɔ, Unaómi ŋ́. Anú yá ɛ́ɛ́ nɛ̄ ó fú īkpɔ̄dā ā lɛ anúɔ á.

¹⁸ Anɔ́ɔ Unaómi da Urútu ka ɔ́ɔ gbēyī cíí mɛ́ɛ́nɛ, jāā gbéeko nɔ́ɔ lɛ ɔdā nōo géē bɛ̄cɛ ŋmá ipú ɛlā ā má. Ó ka Ubówāsi ɔ́ gáā mlɛ́nyɔ́ ícíícɛ ɔ́ɔmā ŋ́, jāā gbéeko nɔ́ɔ lɛyí kú ɛlā ā má.