URÚTU 2 - Ubáyíbu kú Idɔma

Urútu nyɔ̄ í tɔ́ɔpla īkpɔ̄dɛ̄hɔ̄ ɛhɔ̄ ɔlɛ́ Ubówāsi

¹ Unaómi lɛ ɔmáapu ɔbá éyi nēé hī ka Ubówāsi. Ó wɛ ɔ̄cɛ olɔdu nɛ̄hi, ó klla wɛ ɔ̄cɛ ipɔ́ɔnū kú ɔlɛ́ ɔbá nū, Ɛlímɛ́lɛ̄ki.

² Ɛ̄cī éyi, Urútu da Unaómi ka anúɔ nyɔ̄ ɛhɔ̄ gaá tɔ́ɔpla īkpɔ̄dā nōo gē hɛ́ ācɛ nēe gē cɔ̄dɛ̄hɔ̄ ā abɔ̄ wāajɛ ā. Ó ka anúɔ géē má ɔ̄cɛ éyi nōo géē cɛ̄ ká anúɔ tá ɔ̄ igbīhi Unaómi tá ɔ̄ ohi ka ɔ́ɔ̄ nyɔ̄, ɔyí anúɔ.

³ Anɔ́ɔ Urútu le yɛ tá ɛhɔ̄ gaá gbɔɔ́ ō yɛ igbīhi kú ācoyúklɔ́ ɛhɔ̄ ā, yɔ̄ ī yā ɔdɛ̄hɔ̄ nōo hɛ́ uwā abɔ̄ wā ajɛ eko nēé bá ī cē ɔdɛ̄hɔ̄ ā. Ɛhɔ̄ nɛ̄ Urútu nyɔ̄ ā klla kwú pīya ɛhɔ̄ kú Ubówāsi, ɔmáapú kú Ɛlímɛ́lɛ̄ki, ádā ɔbá nū.

⁴ Igbīhāajɛ ā, Ubówāsi, abɔ̄yī nū gā ŋmá Ubɛ́tilɛhɛm. Ó da ācoyúklɔ́ ā ka Óndú ā ká ɔ̄ hɔ́hā ce uwá. Anɔ́ɔ é tá ohi ka Óndú ā kóō kē hɔ́hā ce ɔ́ dúú.

⁵ Ubówāsi da otrɛ̄yí kú ācoyúklɔ́ kú nū ā ɔ̄kā ka ɔ́ncɛ́nyā nyá ɔ́ɔ yɔ̄ abɔ́ɔ ā?

⁶ Anɔ́ɔ ɔ̄cɛ ā tá ɔ̄ ohi ka ɔ́ncɛ́nyā kú éwɔhá nōo wā mla Unaómi ŋmá ajɛ Umówābu ā yɔ̄ abɔ́ɔ á.

⁷ Ó ka ɔ́ɔ mīyɛ ɛga ŋmá ɛgiyí anúɔ ka anúɔ tá ācoyúklɔ́ ā igbīhi, cɛ́ɛ́ ká anúɔ yā īkpɔ̄dɛ̄hɔ̄ nōo géē hɛ́ ācɛ o cɔdɛ̄hɔ̄ ā abɔ̄ wāajɛ ā. Ó klla da ɔ́ ka ɔ́ɔ húmáyī ī yúklɔ́ ŋmá ɔ̄cɔ̄ɔ̄cī jāā kwu eko nyā. Ka, oklɔ́dɔ́ɔ́ nɔ́ɔ gáā mlɛ́nyɔ́ lígíí ipú áklɔ̄kpɛ á.

⁸ Anɔ́ɔ Ubówāsi da Urútu ka anúɔ lɛ ɛlā éyi nwū uwɔ. Anɔ́ɔ ó da ɔ́ ka ɔ́ɔ̄ híī ga ɛhɔ̄ ɔhá í yā īkpɔ̄dɛ̄hɔ̄ gwō ɛga nɔ́ɔ wā nyā gɛ nóó. Ó da ɔ́ ká ɔ̄ klá abɔ́ɔ mla ācɛnyā kú ɔlɛ́ anúɔ, cɛ́ɛ́ ká ɔ̄ yúklɔ́ kú nū.

⁹ Ubówāsi da ɔ́ ká ɔ̄ gbō uwā, ká ɔ̄ má ɛga nēé géē bá ī cē ɔdɛ̄hɔ̄ ā, cɛ́ɛ́ kú ɔ̄ klá mla uwá. Ó klla da ɔ́ ka anúɔ le ɔ́da je lɛ ācɛnyīlɔ kú ɔlɛ́ anúɔ kéē híī je unwalu lɛ ɔ́ ŋ́. Eko dóódu nɛ̄ ijēnyi ɔ́ɔ gbɔɔ́ ō ŋmó ɔ́, ɔ́ɔ nyɔ̄ gaá gwá éŋkpɔ̄ ŋmá ipú ɔjá nēé hɛ́ éŋkpɔ̄ tū ɔ̄ ā.

¹⁰ Anɔ́ɔ Urútu le eyī pīya klá ajɛ iyɔ̄bū Ubówāsi, anɔ́ɔ ó da ɔ́ ka ɔdíyá nɛ̄ ɛlā kú anúɔ ɔ́ɔ kwú ɔ̄ iyē yɔ̄ dúú ā? Ɔdíyā nɔ́ɔ gbonɛnɛ nɛ̄hi lɛ anúɔ, ɔ̄cɛ éwɔhá yɔ̄ dúú ā?

¹¹ Ubówāsi tá ɔ̄ ohi ka ɔdā dóódu nɔ́ɔ yá lɛ ɛ́nɛ́ ɔbá nū, ŋmá eko nɛ̄ ɔbá nū ɔ́ɔ kwú ā, ɛ́ɛ le kpó ka lɛ anúɔ kpɛ́mm ɛɛ́. Ubówāsi ka anúɔ jé ɛ́gɛ́nɛ̄ anú, Urútu ā nyɛ̄ɛ̄ hi ádā nū mɛ́mla ɛ́nɛ́ nū mɛ́mla éwo kú ɔlɛ́ nū tá lɛ ā. Ó ka, ɔ́ɔ klla gaá lā ipú ācɛ nɛ̄ ɔ́ jé jéjéē ɛ́ɛ́ ŋ́ mā.

¹² Ó da Urútu ka Óndú ā ɔ́ɔ géē cíla anú ulé kú ɔdā olɔhi nɛ̄ ɔ́ yá ā. Ó klla da ɔ́ ka Ɔwɔicō kú Ísrɛ̄lu nɔ́ɔ wā ɛgiyí nū ā kóō gbō ɔ̄ cɛ́ɛ́ ká ɔ̄ cíla anú ulé olɔhi ā omōōmu.

¹³ Urútu tá ɔ̄ ohi ka ɔ́ɔ gbonɛnɛ lɛ anú, nááná nɛ̄ anúɔ í kōō gaajɛ éyi kú ɔ̄cocɛ̄hɔ̄ nɔ̄nyā kú nū ŋ́ mā ā.

¹⁴ Eko nɛ̄ eko o lé ɔdōlé ɔlɛ́ɛnɔ le yá ā, Ubówāsi da Urútu ká ɔ̄ wā gaá mīyɛ igbō ká ɔ̄ lɛ nwū ejé ā lé. Anɔ́ɔ Urútu gáā gbɔɔ́ ō lé ɔdōlé mla ācoyúklɔ́ ā. Anɔ́ɔ Ubówāsi kwú igbō kú īkpɔ̄dā ō ŋmɔ́lá ú lɛ ɔ́ kóō lé. Ó lé igbō ā gbóógbó gbéeko nɛ̄ ó le ipú nū. Igbō ā kē hile kpɔ́.

¹⁵ Eko nɛ̄ Urútu nyɛ̄ɛ̄ gaá gbɔɔ́ ō yá īkpɔ̄dɛ̄hɔ̄ ā, Ubówāsi le ukɔ́ tū ācoyúklɔ́ lɛ ɔ́ ā kéē jɛɛga lɛ ɔ́ ká ɔ̄ bēhé yā īkpɔ̄dā ōhī nōo kōō bá pī ɛ̄wɛ̄ īkpɔ̄dā nēe bá ajɛ ā. Ó da uwá ka ɔ̄cɛ dúúmā ká ɔ̄ dɛ̄gba tū ŋ́.

¹⁶ Ubówāsi klla da uwá kéē lɛ īkpɔ̄dā ōhī pi báajɛ lɛ ɔ́ ŋmá ipú ɛ̄wɛ̄ īkpɔ̄dā ā. Ó ka ɔ̄cɛ dúúmā ká ɔ̄ junwalu lɛ ɔ́ ŋ́.

¹⁷ Urútu yā īkpɔ̄dā ā jāā gbó ɔ̄nɔ̄ɔ̄nɛ̄. Eko nōó lɛ ɛ̄nɛ̄ ó yá ā wú ā, ó wɛ omōōmu ómbilí nɛ̄hi éyi.

¹⁸ Ó kwú īkpɔ̄dā kú nū ā ú le tá ɔlɛ́, gaá le ɔ́ mafú lɛ ɛ́nɛ́ ɔbá nū. Ó klla kwú igbō nōó lé hile ā ú lɛ ɛ́nɛ́ ɔbá nū dúú.

¹⁹ Unaómi da ɔ́ ɔ̄kā ka iní nɔ́ɔ yā īkpɔ̄dā ícíícɛ ɔ́ɔmā āa? Ɛhɔ̄ kú ɔlɛ́ ɔnyɛ nɔ́ɔ húmáyī ī yúklɔ́ ā? Ó da ɔ́ ka Ɔwɔicō kóō hɔ́hā ce ɔ̄cɛ nōo lɛ ɛlá kwu ɔ́ ɔ́ɔmā. Anɔ́ɔ Urútu da ɛ́nɛ́ ɔbá nū, Unaómi ka anúɔ húmáyī yúklɔ́ ipú ɛhɔ̄ kú ɔlɛ́ ɔ̄cɛ éyi, nēé hī iyē kú nū ka Ubówāsi ā.

²⁰ Unaómi da Urútu ka Ɔwɔicō ká ɔ̄ hɔ́hā ce Ubówāsi. Ó ka Ɔwɔicō ɔ́ɔ gē lɛ okónu nɔ́ɔ ce mla ācɛ nēe pɛ́kwú mɛ́mla ācɛ nēe oyēeyī ā tū. Anɔ́ɔ ó da Urútu ka ɔ̄cɛ ɔ́ɔmā wɛ ɔmáapú aá ajaajɛ. Ó da ɔ́ ka ɔ́ɔ klla wɛ ɔ̄cɛ éyi nōo gē je aá anyōkwū glá dúú.

²¹ Anɔ́ɔ Urútu da ɛ́nɛ́ ɔbá nū ka ɔ̄cɛ ɔ́ɔmā ɔ́ɔ da anúɔ ka anúɔ yɔ̄ ī yā īkpɔ̄dā mla ācoyúklɔ́ lɛ anúɔ jāā gbéeko nēé lɛ ɔdɛ̄hɔ̄ ā cē kwɛyí.

²² Unaómi da Urútu ka ɔ́ɔ lɔhi abɔ̄ nɔ́ɔ nyɔ̄ ɛhɔ̄ ɔlɛ́ Ubówāsi gaá yā īkpɔ̄dā mla ācɛnyā ipú ɛhɔ̄ ā. Ó da ɔ́ ka ācɛ ɔ́ɔ lɔfú tínɛ́lā nū eko nɔ́ɔ le yɛ tá ɛhɔ̄ ɔlɛ́ ɔ̄cɛ ɔhá.

²³ Anɔ́ɔ Urútu yúklɔ́ mla uwá jāā gbéeko nēé lɛ ɔdɛ̄hɔ̄ ā cē kwɛyí. Urútu kē lā mla ɛ́nɛ́ ɔbá nū Unaómi kpɔ́.