UJƆ́NI 2 - Ubáyíbu kú Idɔma

Ɔnyā nēé lɛ ajɛ kú Ukéna

¹ Ɛ̄cī ɔmɛtá, é yɔ̄ ī lɔnyā igelī nɛ̄ŋcɛ́ kú Ukéna kú Ugálīli. Ɛ́nɛ́ Ujísɔ̄si yɔ̄ abɔ́ɔ.

² É le Ujísɔ̄si mɛ́mla ayíkpó kú nū hīigwú dúú.

³ Anɔ́ɔ eko nɛ̄ ejé mɛɛ ā, ɛ́nɛ́ kú Ujísɔ̄si da ɔ́ kahíníī, “Ejé kú uwā mɛɛ́ n.”

⁴ Anɔ́ɔ Ujísɔ̄si da ɔ́ kahíníī, “Ɛ́nɛ́, eko kú um í kē yá ɛ́ɛ́ ŋ́.”

⁵ Ɛ́nɛ́ nū da ācocɛ̄hɔ̄ ā kahíníī, “Aá yá ɔdā dúú nōó da aá ā.”

⁶ Ɛtɛ́ ɛhīlī nēé bī ɛcɔ̄ yá bá abɔ́ɔ ohígbū ka uwá nɛ̄ ācɛ Ujíyu gē bī le yá uculo kú iyē o gwu ācɛ anú á.

⁷ Ujísɔ̄si da ācocɛ̄hɔ̄ ā kahíníī, “Aá lɛ éŋkpɔ̄ kpó tū ipú ɛtɛ́ nēe bá ā.” Anɔ́ɔ é le éŋkpɔ̄ kpó tū uwā kwu ɔkɔ kpɛ́mm á.

⁸ Anɔ́ɔ ó da uwá kahíníī, “Aá hɛ́, ká aá bī gé lɛ otrɛ̄yí kú ucɛ ā mɛ́ɛ́nɛ.” É le éŋkpɔ̄ ā hɛ́ bī nyɔ̄.

⁹ Eko nɛ̄ otrɛ̄yí kú ucɛ ā lɛ okónu kwu éŋkpɔ̄ nōo je pīya ejé ā, nɛ̄ ó jé ɛga nɛ̄ ó ŋmá ŋ́ mā (Amáŋ ācocɛ̄hɔ̄ nēe hɛ́ éŋkpɔ̄ ā jé ɛga nɛ̄ ó ŋmá ā) otrɛ̄yí kú ucɛ ā le olɔnyā ā hīgwú,

¹⁰ anɔ́ɔ ó da ɔ́ kahíníī, “Ɛ́gɛ́nɛ̄ ó gē lɛ ā, ācɛ dóódu gē lɛ ejé olɔhi ā tū lɛ ācɛ le gwá gbɔbū, cɛ́ɛ́ eko nēé le gwá lɛ ipú nū, ɛ́ɛ́ nēé gē bī ejé obɔ̄bí ā wɛ̄ɛcɛ kilɔ́dɔ́ɔ́ á. Awɔ ā lɛ ejé olɔhi ā tū jāā gbéeko nyā.”

¹¹ Ɛ̄nyā wɛ úklɔ́ idáagó ká aflɛ́yí nɛ̄ Ujísɔ̄si yá Ukéna kú Ugálīli á. Anɔ́ɔ ó le ɛgahi mɛ́mla ɔfú kú nū mafú, o ŋmá lɛ ɔdā nɛ̄ ó yá nyā á. Anɔ́ɔ ayíkpó kú nū cɛ̄ɛ̄lā nū á.

¹² Igbīhi ɛ̄nyā ā ó le yɛ tá Ukapánɔm mla ɛ́nɛ́ nū, mɛ́mla ayínɛ́ nū, mɛ́mla ayíkpó kú nū. É gbojī abɔ́ɔ ŋ́.

Ujísɔ̄si ga ipú Agblīihɔ-nɛ̄hi ā

¹³ Eko nɛ̄ ucɛ kú onyatá kú ācɛ Ujíyu le bá ā, Ujísɔ̄si le tá Ujerúsālɛm.

¹⁴ Anɔ́ɔ ipú Agblīihɔ-nɛ̄hi ā, ó má ācɛ nēe bā gē je aɛ́na mɛ́mla aálá mɛ́mla ɔklɛ́bɛ́tɛ lá mɛ́mla ācɛ nēe bá ī fūla ije abɔ̄ bá ulɔ kú uwā.

¹⁵ Anɔ́ɔ ó lɛ itali kú ɔ́ŋgba ōjíla yá. Anɔ́ɔ ó lɛ aálá mɛ́mla aɛ́na nū ŋmá Agblīihɔ-nɛ̄hi ā bá ɛcɛ á. Anɔ́ɔ ó lɛ ije kú ācɛ ofūla ije abɔ̄ ā pīya bónū, anɔ́ɔ ó lɛ ítéblu kú uwā cē gwōnū á.

¹⁶ Anɔ́ɔ ó da ācɛ nēe gē je ɔklɛ́bɛ́tɛ lá ā kahíníī, “Aá lɛ ɔdā nēe bá ā kpó. Aá híī yá inu kú Ádā um bɛ̄ɛka inu oōtɔ́hí ā ŋ́.”

¹⁷ Ayíkpó kú nū le bla keé lɛ ɔ́ tá kahíníī, “Ɔtu caca kú Agblīihɔ-nɛ̄hi kú uwɔ ā yɔ̄ ī yi um ɔlá nɛ̄hi.”

¹⁸ Ohígbū ɔ́ɔmā ācɛ Ujíyu da ɔ́ ɔ̄kā kahíníī, “Ocābɔ̄ ɔdí nāa tínē ká ā mafú lɛ alɔ ŋmá ɔdā nāa gē yá nyā ā?”

¹⁹ Anɔ́ɔ Ujísɔ̄si tóohi da uwá kahíníī, “Aá lɛ Agblīihɔ-nɛ̄hi nyā ca, ipú ɛ̄cī ɛtá n géē gwó ɔ́ gicō.”

²⁰ Ācɛ Ujíyu da ɔ́ ɔ́kā kahíníī, “A ka anúɔ lɔfú gwó ɔ̄ ɛ̄cī ɛtá nāa ka āa? Ó je alɔ iháyí ofɛpa cɛhīlī ɛ́ɛ́ nɛ̄ alɔ gwó Agblīihɔ-nɛ̄hi nyā á.”

²¹ Amáŋ Agblīihɔ-nɛ̄hi nɛ̄ Ujísɔ̄si kɛlā nū ā wɛ ɔkpíyē kú nū.

²² Ohígbū ɔ́ɔmā eko nēé kwú ɔ̄ ú héyī ŋmá ɔlékwū ā, ayíkpó kú nū le bla ka ɔ́ɔ tɛtɛ le ɛlā nyā ka, anɔ́ɔ é cɛ̄ ɔdā nēé tá tū ɔkpá kú ɛlɔ̄ɔwɔicō ā mɛ́mla ɛlā nɛ̄ Ujísɔ̄si ka ā á.

²³ Eko nɛ̄ ó yɔ̄ Ujerúsālɛm ohígbū kú Ucɛ kú Onyatá ā, ācɛ alɛwa cɛ̄ɛ̄lā nū, abɔ̄ é le ɔdā ō hídáagó nōó yā ā má ā.

²⁴ Amáŋ Ujísɔ̄si abɔ̄yī nū í lɔtūce uwá ŋ́, ohígbū koó jé ɔ̄cɛ dóódu.

²⁵ Ó tínē ká ācɛ dúúmā kéē cɛ̄ ijáalí lɛ ɔ́ ŋ́, ohígbū ka anú abɔ̄yī nū jé ɔdā nōo yɔ̄ ipú ɔtū kú ācɛ ā.