UJƆ́NI 19 - Ubáyíbu kú Idɔma

Upáyílēti kwú Ujísɔ̄si ú lɛ ācɛ Ujíyu

¹ Anɔ́ɔ Upáyílēti le ɔ́da je kéē lɛ Ujísɔ̄si gɔ́ mla itali.

² Aícɔ́ɔja ā bī ɔcúújē lɛ ɔfulā kú ɔcɛ́ yá, anɔ́ɔ é kwú ɔ̄ í wu ɔ́ ɛyí, anɔ́ɔ é kwú awulú kú ɔgalúlā bllábllá ú klá anú iyē á.

³ É gā ɛgiyí nū, anɔ́ɔ é da ɔ́ kahíníī, “Ágábáidu, Ɔcɛ́ kú ācɛ Ujíyu!” Anɔ́ɔ é lɛ akwū tū ɔ̄ á.

⁴ Upáyílēti le tɛ́ɛcɛ igbɔhá kpɔ́, klla le da ɛwa ā kahíníī, “Aá mā ɔ̄, n gē bī ɔ̄ wɛ̄ɛcɛ gé lɛ aá, ká aá lé je ka ń má ɔdā ō bī le ŋmá ɔ̄ ɛpɔ̄bí ŋ́.”

⁵ Anɔ́ɔ Ujísɔ̄si le bēhé wɛ̄ɛcɛ, lɛ ɔfulā kú ɔcɛ́, nēé bī ujē tá ā, kwu ɛyí, mɛ́mla awulú ɔgalúlā bllábllá ā. Anɔ́ɔ Upáyílēti da uwá kahíníī, “Aá má ɔ̄ ɔ̄cɛ ā yɔ̄ á!”

⁶ Eko nɛ̄ aótrɛ̄yí kú ācogwɛ́ɛya ā mla áidengéli le ɔ́ má, é dɛ̄gba kahíníī, “É lɛ ɔ́ nyɔ́kpá! É lɛ ɔ́ nyɔ́kpá!” Upáyílēti da uwá kahíníī, “Aá kwú ɔ̄ ú kú aá lɛ ɔ́ nyɔ́kpá abɔ̄yī aá, ohígbū ka ń má ɔdā ō bī lɛ ŋmá ɔ̄ ɛpɔ̄bí ŋ́.”

⁷ Ɛwa kú ācɛ Ujíyu ā tá ɔ̄ ohi kahíníī, “Ɛ́gɛ́nɛ̄ íne kú alɔ le ā ó cíkā ō gekwú, ohígbū ó ka anúɔ wɛ Ɔyínɔ̄nyīlɔ kú Ɔwɔicō á.”

⁸ Eko nɛ̄ Upáyílēti lɛ ɛlā nēe bá ā pó ā, ó gbɔɔ́ ō yúufi fíyɛ́.

⁹ Ó le tá ipú agbla ā, anɔ́ɔ ó da Ujísɔ̄si ɔ̄kā kahíníī, “Iní nāa ŋmá ā?” Ujísɔ̄si í tá ɔ̄ ohi dúúmā ŋ́.

¹⁰ Upáyílēti da ɔ́ ɔ̄kā kahíníī, “Á tá um ohi ŋ́ nɛɛ? Á jé ka n lɛ íkwu ō hɛ́ uwɔ tá, mɛ́mla íkwu ō lɛ uwɔ nyɔ́kpá ā ŋ́ nɛɛ?”

¹¹ Ujísɔ̄si tá ɔ̄ ohi kahíníī, “A lɔfú lɛ um nyɔ́kpá glá ohígbū ka Ɔwɔicō je ɔfú ɔ́ɔmā gā uwɔ á. Anɔ́ɔ ɔ̄cɛ nōo je um gā uwɔ ā anú lɛpɔ̄bí kú ínoōbīya fíyɛ́ dúú á.”

¹² Eko nɛ̄ Upáyílēti le ɛlā nɛ̄ Ujísɔ̄si ka ā pó ā, ó cēyītīkwū kóō lɛ ɔwɛ éyi má kóō lɛ Ujísɔ̄si hɛ́tá. Amáŋ ācɛ Ujíyu dɛ̄gba kahíníī, “Ɔ́dāŋ́ ka a lɛ ɔ́ hɛ́tá, ayíka á wɛ ɔyā kú Usísa gɛ ŋ́. Ɔ̄cɛ dúúmā nōo lɛ iyī nū pīya ɔcɛ́ wɛ ɔ̄cɛ o bɛ́yíkwu ɔcɛ́ abɔ̄ nōo lɛ̄ ajɛ dóódu ā.”

¹³ Eko nɛ̄ Upáyílēti lɛ ɛlā nēe bá ā pó ā, ó kwú Ujísɔ̄si ú wɛ̄ɛcɛ. Anɔ́ɔ ó má yāajɛ ɛyí úgādā ɛpɔ̄ ɛga nēé hī ka úbɔ́-ɛcɔ̄, ɛ̄nɛ̄ é hī ka “Ugabáta”, okónu kú Uhíbru.

¹⁴ Ó lɛbɛ̄ɛka ɛplá oje igwɛ́ɛpa kú ɔlɛ́ɛnɔ gbɔbū lɛ ɛ̄cī kú ōtútū kú ucɛ kú onyatá ā. Anɔ́ɔ ó da ācɛ Ujíyu kahíníī, “Aá má ɔcɛ́ kú aá.”

¹⁵ Anɔ́ɔ é dɛ̄gba kahíníī, “Lɛ ɔ́ bī nyɔ̄! Lɛ ɔ́ bī nyɔ̄! Lɛ ɔ́ nyɔ́kpá!” Anɔ́ɔ Upáyílēti da uwá ɔ̄kā kahíníī, “N̄ lɛ ɔcɛ́ kú aá nyɔ́kpá nɛɛ?” Aótrɛ̄yí kú ācogwɛ́ɛya ā tóohi kahíníī, “Alɔ í lɛ ɔcɛ́ dúúmā ŋ́ ayíka Usísa ōfūnū nɛ.”

¹⁶ Anɔ́ɔ Upáyílēti kwú ɔ̄ ú lɛ uwá kéē lɛ ɔ́ nyɔ́kpá á.

É le Ujísɔ̄si nyɔ́kpá

¹⁷ Aícɔ́ɔja ā le Ujísɔ̄si bī tá nyɔ̄. Ó bī ɔcóōnyɔ́kpá kú nū gɛɛcɛ ga ɛga nēé hī ka Ɛga kú Ákōklɔ̄ ɛyí.” (Ācɛ Uhíbru hī ɔ̄ ka Ugɔ́lgɔ̄ta.”)

¹⁸ É le ɔ́ nyɔ́kpá abɔ́ɔ. É klla le ācɛ ɛpa ɔhá nyɔ́kpá mla anú, ɔ̄cɛ éyi yɔ̄ abɔ̄lɔ́ná, ɔ̄cɛ ɔhá yɔ̄ abɔ̄lúfīyē.

¹⁹ Upáyílēti lɛ ɔ́dée tá, kwú ɔ̄ ú bá ɛyí ɔcóōnyɔ́kpá ā. Ɔdā nōó tá ā wɛ, “Ujísɔ̄si ɔ̄cɛ Unásārēti, ɔcɛ́ kú ācɛ Ujíyu.”

²⁰ Ācɛ alɛwa kú Ujíyu jé ɔdā nēé tá ā, ohígbū ka ɛga nēé je Ujísɔ̄si nyɔ́kpá ā yɔ̄ kwu Ujerúsālɛm ajaajɛ. É tá ɔ̄ okónu Uhíbru, Ulátin mɛ́mla Ugríisi.

²¹ Anɔ́ɔ aótrɛ̄yí kú ācogwɛ́ɛya kú ācɛ Ujíyu ā da Upáyílēti kahíníī, “Ā híī tá ka, ‘Ɔcɛ́ kú ācɛ Ujíyu ŋ́’, amáŋ ka, ‘Anú ɔ́ɔ ka ka anúɔ wɛ ɔcɛ́ kú ācɛ Ujíyu á.’”

²² Upáyílēti tóohi kahíníī, “N lɛ ɔdā nɛ̄ n tá ā tá ɛɛ́.”

²³ Eko nɛ̄ aícɔ́ɔja ā le Ujísɔ̄si nyɔ́kpá kwɛyí ā, é kwú úwé kú nū ú púla lɛ ɔ́ kɔ̄ ɛga ɛnɛ, anɔ́ɔ aícɔ́ɔja ā lɛ āyā kú nū éyééye á. É le awulú kú nū nōó lɛ ɛgɔ́ dúúmā ŋ́, nēé tá ŋmá icō jāā wā ajɛ ā kpó dúú.

²⁴ Abɔ̄ ó lɛ ā, anɔ́ɔ é da iyī uwā kahíníī, “Ālɔ̄ híla anú ŋ́, amáŋ ālɔ̄ lɛ ūlī tá, ká ālɔ̄ jé ákú ɔ̄cɛ nōó géē wɛ ā.” Ɛ̄nyā yá lɛ ā cɛ́ɛ́ kú ɛlā nēé tá ipú ɔkpá ɛlɔ̄ɔwɔicō kahíníī, “É le aúwé kú um kpó kɔ̄ lɛ iyī uwā, anɔ́ɔ é le ūlī tá ce awulú kú um á,” kóō le yá jīla. Aícɔ́ɔja ā kē le yá tá ɔdā nēé tá nyā yíílí.

²⁵ Ācɛnyā nēe háyi pī ɔcóōnyɔ́kpá kú Ujísɔ̄si ā wɛ ɛ́nɛ́ nū, mɛ́mla aɔ́máapú ɛ́nɛ́ nū nɔ̄nyā, Umerí nōo wɛ ɔnyā Uklópāsi, mɛ́mla Umerí Umagidalíni.

²⁶ Eko nɛ̄ Ujísɔ̄si lɛ ɛ́nɛ́ nū mɛ́mla ɔyíkpó nōo he ɔ́ ɔtū nɛ̄hi ā má abɔ̄ é háyi ā, ó da ɛ́nɛ́ nū kahíníī, “Ɛ́nɛ́, má ɔyí uwɔ nɔ̄nyīlɔ.”

²⁷ Anɔ́ɔ ó da ɔyíkpó kú nū ā kahíníī, “Ó wɛ ɛ́nɛ́ ɔ̄.” Anɔ́ɔ oŋmá éko ɔ́ɔmā ɔyíkpó ā kwu ɛ́nɛ́ ā ú kóō gaá lā ɔlɛ́ nū.

Ikwū kū Ujísɔ̄si

²⁸ Ujísɔ̄si le jé ka abālɔbányā ɔdā dóódu ɔ́ɔ le yá jīla ɛɛ́. Anɔ́ɔ o yá kú ɛlā nēé tá ipú ɔkpá kú ɛlɔ̄ɔwɔicō kóō le yá jīla ā, Ujísɔ̄si kahíníī, “Ijēēnyi gē ŋmó um.”

²⁹ Ɔjá kú ejé omákáká háyi abɔ́ɔ, anɔ́ɔ é le isosō wu ejé omákáká ā, é lɛ ɔ́ gbō bá ɔcí, anɔ́ɔ é lɛ ɔ́ kwu ɔ̄ okónu á.

³⁰ Eko nɛ̄ Ujísɔ̄si lɛ ejé omákáká ā gwá ā, ó kahíníī, “Ó mɛ ɛɛ́.” Ó tá ɛyí kpɛɛ́, anɔ́ɔ ó mā owu á.

É le ɔ́kpa gwū Ujísɔ̄si áklō

³¹ Aótrɛ̄yí kú ācɛ Ujíyu le ɛga mīyɛ ŋmá ɛgiyí Upáyílēti kéē lɛ ikpó kú ācɛ nēé nyɔ́kpá ā kpó cē, cɛ́ɛ́ kéē lɛ uwá kpó wāajɛ ŋmá ɔcóōnyɔ́kpá ā. É ba ɛba nyā ohígbū kóō wɛ ɛ̄cī Ajúmā, é kē tine kú ācɛ ā kéē playicō abɔ́ɔ jāā gbó ɛ̄cī Usábāti ŋ́, ofíyɛ́ dúú abɔ̄ Usábāti nōo ī wā ā wɛ ɛ̄cī otīihɔ ā.

³² Anɔ́ɔ aícɔ́ɔja ā gā gaá le ikpó kú éyi cē, é klla lɛ ákú ɔ̄cɛ ɔ́mpa nēe nyɔ́kpá mɛ́mla Ujísɔ̄si ā cē.

³³ Amáŋ eko nēé gā ɛgiyí Ujísɔ̄si nēé má kóō gekwú ɛɛ́ mā, é cē ikpó kú nū dɛ̄ɛ̄ gɛ ŋ́.

³⁴ Éyi kú aícɔ́ɔja ā lɛ óbō gwū ɔ̄ áklō, anɔ́ɔ ɔkwɔɔkwu ɔ́ɔmā oyī mɛ́mla éŋkpɔ̄ le pɛ́ wɛ̄ɛcɛ á.

³⁵ Ɔ̄cɛ nōo má ɔ̄ ā cījáalí kú nū, ijáalí kú nū ā wɛ ɔkwɛ̄yi, ó kē jé kóō kɛlā ɔkwɛ̄yi, ká aá lɔfú cɛ̄ dúú.

³⁶ Ohígbū ka ɔdā nēe bá ā yá ká ɛlā nēé tá ipú ɔkpá ɛlɔ̄ɔwɔicō kahíníī, “Ikpokwú kú nū dúúmā í gaá cē ŋ́ mā,” kóō le yájīla.

³⁷ Ó lɛ ɛgɔhá kú ɔkpá ɛlɔ̄ɔwɔicō nēé klla tá kahíníī, “É géē je eyī má ɔ̄cɛ nēé lɛ óbō gwō ɔ̄ ā.”

É le Ujísɔ̄si nyi

³⁸ Igbīhi ɛ̄nyā Ujósɛ̄fu, ɔ̄cɛ Arimatéyi, ɔ̄cɛ nōo wɛ ɔyíkpo kú Ujísɔ̄si tayínū ohígbū kóō gē yúufi ācɛ Ujíyu ā, ba Upáyílēti kóō kwú okwū kú Ujísɔ̄si ú lɛ anúɔ. Anɔ́ɔ Upáyílēti cɛ̄ á. Ujósɛ̄fu wā gaá kwú okwū kú nū ú.

³⁹ Unikɔdímɔ̄si ɔ̄cɛ nōo wā ɛgiyí nū otú ā gā dúú. Ó bī ocēkplá kú ɔdā nēé hī umáar mɛ́mla álo nōo lɛbɛ̄ɛka okolo ofɛhɔ̄ ā.

⁴⁰ É kwú okwū kú Ujísɔ̄si ú, lɛ ɔ́ gbō mla īlī ahilíki nɛ̄hɛ́ mɛ́mla ɔdōkpócu ā, ɛ́gɛ́nɛ̄ uculo kú okwū ō nyi kú ācɛ Ujíyu lɛ ā.

⁴¹ Ɛhɔ̄ éyi yɔ̄ kwu ɛga nēé nyí Ujísɔ̄si ɔkpá ā. Ipú ɛhɔ̄ ɔ́ɔmā únóji ɛ̄yīpɛ̄ éyi yɔ̄ abɔ́ɔ, nɛ̄ okwū dúúmā í gwutá ipú nū jéjéē ɛ́ɛ́ ŋ́.

⁴² Ɛ́gɛ́nɛ̄ ó wɛ ɛ̄cī otútū kú ucɛ kú ācɛ Ujíyu ā, anɔ́ɔ abɔ̄ únóji ā kwu abɔ́ɔ ajaajɛ ā, é kwú Ujísɔ̄si ú gwutá ipú nū lɛ ɔ́ gwū.