UJƆ́NI 18 - Ubáyíbu kú Idɔma

Aótrɛ̄yí kú ācɛ Ujíyu le aícɔ́ɔja tɛ̄hɔ̄ kéē lɛ Ujísɔ̄si kwú

¹ Eko nɛ̄ Ujísɔ̄si lɛ ɛlā nēe bá āa ka kwɛyí ā, ó le yɛ mla ayíkpó kú nū le gla ɔgblɛga kú Ukídrɔn. Ɛhɔ̄ éyi yɔ̄ abɔ́ɔ, anɔ́ɔ Ujísɔ̄si mɛ́mla ayíkpó kú nū le tá abɔ́ɔ á.

² Ujúdasi, oyíbīyājɛ ā, kē jé abɔ́ɔ dúú, ohígbū ka Ujísɔ̄si mɛ́mla ayíkpó kú nū gē jīla abɔ́ɔ ojigógó.

³ Anɔ́ɔ Ujúdasi kwú ɔ́wá kú aícɔ́ɔja kú Uróm mɛ́mla aídengéli nɛ̄ aótrɛ̄yí kú ācogwɛ́ɛya mɛ́mla ācɛ Ufárisīi tɛ̄hɔ̄ āa. É wā abɔ́ɔ mɛ́mla ulámpu mɛ́mla ɛmu mɛ́mla iyɔ́fú.

⁴ Ɛ́gɛ́nɛ̄ Ujísɔ̄si jé ɔdā dóódu nōo géē yá ɔ̄ á, ó nyɛ̄ɛ̄ ga ɛcɛ gaá da uwá ɔ̄kā kahíníī, “Ɔ̄nyɛ nɛ̄ aá ī dɔɔ̄kā ā?”

⁵ É tá ɔ̄ ohi kahíníī, “Ujísɔ̄si ɔ̄cɛ Unásārēti ā nɛ.” Ujísɔ̄si da uwá kahíníī, “Ami wɛ anú á.” Ujúdasi oyíbīyājɛ ā háyi mla uwá.

⁶ Eko nɛ̄ ó da uwá kahíníī, “Ami wɛ anú a a, é kwúcē yɛ igbīīgbīhi gaá gwōnū bá ajɛ.

⁷ Anɔ́ɔ ó klla da uwá ɔ̄kā igbɔhá kahíníī, “Ɔ̄nyɛ nɛ̄ aá ī dɔɔ̄kā ā?” Anɔ́ɔ é kahíníī, “Ujísɔ̄si ɔ̄cɛ Unásārēti ā.”

⁸ Ujísɔ̄si tá ohi kahíníī, “N da aá ka ami wɛ ɔ̄cɛ nɛ̄ aá gē tíne á. Ɔ́dāŋ́ ka ó wɛ ami nɛ̄ aá yɔ̄ ī dɔɔ̄kā á nɛɛ, ayíka aá cɛ lɛ ācɛ nēe bá ā kéē nyɛ̄ɛ̄.”

⁹ Ó ka ɛ̄nyā ká ɛlā nōó tɛtɛ ka ā kóō le yá jīla, “O ŋmá ipú ācɛ nāa kpó gā um ā, ɔ̄cɛ odúúmā kú uwā í héyībí ŋ́.”

¹⁰ Anɔ́ɔ Usáyímɔ̄ni Upíta nōo bī ɔkpacaŋ́gelī ā, lɛ ɔ́ pi ŋmá apɛ́, lɛ ahɔ̄ abɔ̄lɔ́ná kú ɔ̄cocɛ̄hɔ̄ kú otrɛ̄yí kú ācogwɛ́ɛya ā hɛ́. Iyē kú ɔ̄cocɛ̄hɔ̄ ā lé ka Umálikɔ̄si.

¹¹ Anɔ́ɔ Ujísɔ̄si da Upíta kahíníī, “Kwú ɔkpacaŋ́gelī kú uwɔ ú wu apɛ́. A gbɛlá ka ń gáā mā ɛdɔ kú ōwē nɛ̄ Ádā um miya gā um ka n̄ má ā ŋ́ nɛɛ?”

¹² Abɔ̄ ó lɛ ā, ɔ́wá kú aícɔ́ɔja kú Uróm mɛ́mla aótrɛ̄yí kú uwā mɛ́mla aídengéli kú ācɛ Ujíyu lɛ Ujísɔ̄si kwú, lɛ ɔ́ abɔ̄ gbō.

¹³ É lɛ ɔ́ bī gé lɛ Ánāsi aflɛ́yí. Anú wɛ ádā kú ɔnyā kú Ukayáfāsi, nōo wɛ otrɛ̄yí kú ācogwɛ́ɛya iháyí ɔ́ɔmā ā.

¹⁴ Ukayáfāsi wɛ ɔ̄cɛ nōo da ācɛ Ujíyu ka ó cɛgbá ká ɔ̄ce éyi kóō gekwú ohígbū ɛjɛ̄ɛ̄jī ācɛ ā á.

Upíta le híhó ka anúɔ í jé Ujísɔ̄si ŋ́

¹⁵ Usáyímɔ̄ni Upíta mɛ́mla ɔyíkpó ɔhá kwūce Ujísɔ̄si. Otrɛ̄yí kú ācogwɛ́ɛya ā jé ɔyíkpó ɔhá ā, anɔ́ɔ ó kwúce Ujísɔ̄si ga ipú agbla kú otrɛ̄yí kú ācogwɛ́ɛya ā.

¹⁶ Anɔ́ɔ Upíta háyi ɛcɛ pī okómpīinu ā. Anɔ́ɔ ɔyíkpó ɔhá ā nɛ̄ otrɛ̄yí kú ācogwɛ́ɛya ā jé ā, nyɛ̄ɛ̄ tɛ́ɛcɛ gaá le ɛlā ka lɛ ɔnyā nōo ī gbɔ̄ɔwɛ ā, anɔ́ɔ ó lɛ Upíta bī wā inu á.

¹⁷ Amáŋ ɔnyā nōo gē gbɔ̄ɔwɛ ā da Upíta kahíníī, “Á wɛ ɔ̄cɛ éyi kú ayíkpó kú ɔ̄cɛ ā ŋ́ nɛɛ?” Anɔ́ɔ ó kahíníī, “Ń wɛ nóó.”

¹⁸ Ajɛ i hīlaŋdɔ́ anɔ́ɔ ācocɛ̄hɔ̄ mla aídengéli ā lɛ ɔlá gwó, anɔ́ɔ é bá gē jɛ̄ ɔlá á. Upíta háyi pī uwā dúú yɔ̄ gē jɛ̄ ɔlá.

¹⁹ Anɔ́ɔ otrɛ̄yí kú ācogwɛ́ɛya ā da Ujísɔ̄si ɔ̄kā lɛyíkwu ayíkpó kú nū mɛ́mla ɔdā nōó nwū ā.

²⁰ Ujísɔ̄si tá ɔ̄ ohi kahíníī, “N gē kɛlā tɛ́ɛcɛ foóó ojigógó ipéeyī ɛjɛ̄ɛ̄jī ācɛ, n gē nwɛ̄lā ipú Agblīihɔ nɛ̄ŋ́cɛ́ mɛ́mla Agblīihɔ-nɛ̄hi eko dóódu, ɛga nɛ̄ ācɛ Ujíyu dóódu gē jīla ā, ń ka ɔdā dúúmā otayínū ŋ́.

²¹ Ɔdí yá nāa da um ɔ̄kā ā? Da ācɛ nēe pó ɛlā kú um ā ɔ̄kā. Da uwá ɔ̄kā ɔdā nɛ̄ n da uwá ā, é jé ɔdā nɛ̄ n da uwá ā.”

²² Eko nōó lɛ ɛ̄nyā ka ā, éyi kú aótrɛ̄yí kú aícɔ́ɔja ā lɛ abɔ̄ fīyɛ̄ ɔ̄ ábáa. Anɔ́ɔ ó kahíníī, “Ɔwɛ nēé gē tá otrɛ̄yí kú ācogwɛ́ɛya ohi ā yɔ̄ ā?”

²³ Anɔ́ɔ Ujísɔ̄si tóohi kahíníī, “Ɔ́dāŋ́ ka n le ɛlā obɔ̄bí dúúmā ka, lɛ ijáalí kú ɛlā obɔ̄bí ɔ́ɔmā cɛ̄ tū um. Amáŋ ɔ́dāŋ ka ɛlā ɔkwɛ̄yi nɛ̄ n ka á, ɔdíyā nāa lɛ abɔ̄ fīyɛ̄ um ā?”

²⁴ É lɛ ɔ́ abɔ̄ gbō kpɔ́, anɔ́ɔ Ánnāsi kwú ɔ̄ ú tɛ̄hɔ̄ gé lɛ Ukayáfāsi nōo wɛ otrɛ̄yí kú ācogwɛ́ɛya ā.

²⁵ Usáyímɔ̄ni Upíta háyi abɔ́ɔ gē jɔ̄lá. Anɔ́ɔ é da ɔ́ ɔ̄kā kahíníī, “Á wɛ éyi kú ayíkpó kú nū ŋ́ nɛɛ?” Anɔ́ɔ ó tóohi kahíníī, “Ń wɛ nóó.”

²⁶ Éyi kú ɔ̄cocɛ̄hɔ̄ kú otrɛ̄yí kú ācogwɛ́ɛya nōo wɛ ɔmáapú kú ɔ̄cɛ nɛ̄ Upíta hɛ́ ɔ̄ ahɔ̄ ā kahíníī, “Ń má uwɔ mla anú ipú ɛhɔ̄ ā ŋ́ nɛɛ?”

²⁷ Igbɔhá Upíta le híhó, anɔ́ɔ ɔkwɔɔkwu ɔ́ɔmā ɔbúgwū lɛ ogwú tū.

É le Ujísɔ̄si bī nyɔ̄ iyɔ̄bū Upáyílēti igbómína kú Uróm

²⁸ Ofúlɔ̄cī é le Ujísɔ̄si bī ŋmá ɔlɛ́ Ukayáfāsi gā ipú agbla kú Upɔ́ntīyɔsi Upáyílēti. É tíne kéē bēhé ga ipú agbla ā ŋ́ ohígbū kéē tíne ō lɛ iyī uwā tīihɔ, ō yá ɛ́ɛ́ kéē lɔfú lé ɔdōlé kú ucɛ kú onyatá ā.

²⁹ Anɔ́ɔ Upáyílēti le tá ɛgiyí uwā ɛcɛ, anɔ́ɔ ó kahíníī, “Ɛlā nyá nɛ̄ aá kpó ce ɔ̄cɛ ā a?”

³⁰ É tóohi da ɔ́ kahíníī, “Ɔ́dāŋ́ ka ɔ̄cɛ ā í wɛ ɔ̄cɛ o yá obɔ̄bí ŋ́ nɛɛ, alɔ í gáā bī ɔ̄ wā ɛgiyí uwɔ ŋ́.”

³¹ Anɔ́ɔ Upáyílēti da uwá kahíníī, “Aá kwú ɔ̄ ú abɔ̄ aá kú aá kɛpɔ̄ tū ɔ̄ ɛ́gɛ́nɛ̄ íne kú aá lɛ ā.” ācɛ Ujíyu ā tá ɔ̄ ohi kahíníī, “Alɔ í lɛ íkwu ō ŋmó ɔ̄cɛ dúúmā ŋ́.”

³² Ɛ̄nyā le yá lɛ ā cɛ́ɛ́ ká ɛlā nɛ̄ Ujísɔ̄si ka lɛyíkwu ɛdɔ ikwū nōó géē kwú ā kóō le yá jīla.

³³ Upáyílēti le tá ipú agbla ā, anɔ́ɔ ó le Ujísɔ̄si hīgwú lɛ ɔ̄kā da ɔ́ kahíníī, “Awɔ wɛ ɔcɛ́ kú ācɛ Ujíyu ā nɛɛ?”

³⁴ Ujísɔ̄si tá ɔ̄ ohi kahíníī, “Awɔ da ɔ̄kā nyā abɔ̄yī uwɔ á kɛ̄ɛ ka ɔ̄cɛ éyi le odée da uwɔ lɛyíkwu um?”

³⁵ Upáyílēti tóohi kahíníī, “N wɛ ɔ̄cɛ Ujíyu nɛɛ? Ācɛ ɔlɛ́ uwɔ mɛ́mla aótrɛ̄yí kú ācogwɛ́ɛya bī uwɔ wā ɛgiyí um á. Ɔdí nāa yá ā?”

³⁶ Ujísɔ̄si tóohi kahíníī, “Ɔ́dāŋ ka ajɔ̄ɔ̄cɛ́ kú um yɔ̄ ipú ɛcɛ nyā nɛɛ, ayíkpó kú um géē yɛ í le unu nu, cɛ́ɛ́ ká ɔ̄cɛ dúúmā kóō híī je um tū ācɛ Ujíyu abɔ̄ glá ŋ́. Ehée ajɔ̄ɔ̄cɛ́ kú um í yɔ̄ ipú ɛcɛ nyā ŋ́!”

³⁷ Anɔ́ɔ Upáyílēti da ɔ́ ɔ̄kā kahíníī, “Ó lɛ ā a wɛ ɔcɛ́ kɛ̄ɛ?” Ujísɔ̄si tóohi kahíníī, “Awɔ ka ami ɔ́ɔ wɛ ɔcɛ́ á n. É ma n wā ipú ɛcɛ nyā ká n̄ yá ɔdā ékpó nyā, ká n̄ kɛlā lɛyíkwu ɔdā nōo wɛ ɔkwɛ̄yi ā. Ɔ̄cɛ dúúmā nōo cɛ̄ɛlā ɔkwɛ̄yi ā gē pó ɔkɔ kú um.”

³⁸ Anɔ́ɔ Upáyílēti da ɔ́ ɔ̄kā kahíníī, “Ɔdí wɛ ɔkwɛ̄yi ā?” Eko nɛ̄ Upáyílēti lɛ ɛ̄nyā ka kwɛyí ā, ó le tɛ́ɛcɛ ɛgiyí ācɛ Ujíyu igbɔhá, anɔ́ɔ ó da uwá kahíníī, “Ń má ɔdā ō bī le ŋmó ɔ̄cɛ ā ɛpɔ̄bí nóó.

É le Ujísɔ̄si ŋmɛ́pɔ̄bí kéē lɛ ɔ́ ŋmó

³⁹ Ó wɛ uculo ká aá kéē lɛ ɔ̄cɛ éyi hɛ́tá lɛ aá eko kú ucɛ kú onyatá ā, aá tíne ká n̄ lɛ Ɔcɛ́ kú ācɛ Ujíyu hɛ́tá lɛ aá nɛɛ?”

⁴⁰ Anɔ́ɔ é dɛ̄gba ka, “Ó wɛ ɔ̄cɛ ā ŋ́, amáŋ Ubárābasi nɛ.” Ubárābasi wɛ ɔ̄coyíkpala.