UJƆ́NI 17 - Ubáyíbu kú Idɔma

Ɔkɔ nɛ̄ Ujísɔ̄si gbā ā

¹ Eko nɛ̄ Ujísɔ̄si lɛ ɛlā nēe bá ā ka kwɛyí ā, ó je eyī gicō leyī pīya kwu ɔkpáncō anɔ́ɔ ó kahíníī, “Ádā, eko ā gā ɛɛ́, le mafú lɛ ācɛ ɛ́gɛ́nɛ̄ Ɔyínɔ̄nyīlɔ kú uwɔ wɛ idáagó lɛ āa, cɛ́ɛ́ ká n̄ lɔfú mafú lɛ ācɛ ɛ́gɛ́nɛ̄ a wɛ idáagó lɛ ā.

² Ohígbū ka a lɛ íkwu je lɛ ɔ́ kóō gbō ācɛ dóódu ā, kóō je oyēeyī opiyóó lɛ ācɛ dóódu nāa kpó lɛ ɔ́ ā.

³ Ɛ́gɛ́nɛ̄ ācɛ géē yēeyī piyóó ā wɛ kéē jé awɔ nōo wɛ Ɔwɔicō ā, é kē jé Ujísɔ̄si Ohɔ́nyɛtá, nāa tɛ̄hɔ̄ ā.

⁴ N le ojīlīmā kú uwɔ mafú o ŋmá lɛ úklɔ́ nāa je gā um nɛ̄ n yá ɔ̄ kwɛyí ā.

⁵ Ádā, lɛ ojīlīmā ce um abālɔbányā, ɛdɔ ojīlīmā nāa le ce um gbɔbū ká ā yá ɛcɛ ā.

⁶ N le ɛdɔ kú ɔ̄cɛ nɛ̄ a wɛ ā mafú lɛ ācɛ nāa kpó gā um ŋmá ipú ɛcɛ ā. É wɛ ákú uwɔ, awɔ kpó uwá gā um á, é kē lɛ ɛlā kú uwɔ tū.

⁷ Abālɔbányā é jé ka ɔdā dóódu nāa je gā um ā ŋmá abɔ̄ kú uwɔ.

⁸ Olɛhɔ̄ nāa je gā um ā, n le cɛ̄ lɛ uwá, uwá kē mīyɛ ɛlā ā ɛɛ́, é le jé ɔkwɛ̄yi ka n ŋmá ɛgiyí uwɔ, é kē cɛ̄ ka awɔ tū um ɛhɔ̄ á.

⁹ N gē gbɔ̄ɔkɔ gā uwɔ ohígbū uwā, ń gē gbɔ̄ɔkɔ gā uwɔ ohígbū ācɛ ɛcɛ ŋ́, amáŋ ohígbū ācɛ nāa kpó gā um ā, ohígbū kéē wɛ ákú uwɔ.

¹⁰ Ɔdā dóódu nēe wɛ ákú um wɛ ákú uwɔ, ɔdā dóódu nēe wɛ ákú uwɔ, kē wɛ ákú um, é gē mafú ɛ́gɛ́nɛ̄ n wɛ idáagó lɛ ā.

¹¹ Abālɔbányā n yɔ̄ ī wā ɛgiyí uwɔ ɛɛ́, ń yɔ̄ ipú ɛcɛ gɛ ŋ́, amáŋ uwá bá ɛcɛ. Ádā otīihɔ, lɛ uwá tū o ŋmá lɛ ɔfú kú iyē kú uwɔ nāa je gā um ā. Cɛ́ɛ́ kéē kwú pīya ékpó mla ɔ́mpa uwā ɛ́gɛ́nɛ̄ ami mla awɔ wɛ ékpó ā.

¹² Eko nɛ̄ n yɔ̄ mla uwá ā, n lɛ uwá tū ŋmá ɔfú kú iyē kú uwɔ nāa je gā um ā. N lɛ uwá tū, ɔ̄cɛ dúúmā kú uwā í kē bī ŋ́, ń táafú ŋ́ ɔ̄cɛ nōo í nyíleyī piíí ā nɛ̄ n, odúúdú aɔ́dā nēe bá ā, le yá cɛ́ɛ́ kú ɛlā nēé tá ipú ɔkpá ɛlɔ̄ɔwɔicō ā kóō le yá jīla.

¹³ Amáŋ abālɔbányā n gē wā ɛgiyí uwɔ ɛɛ́. N le aɔ́dā alɛwa kpó ka lɛ uwá eko nɛ̄ n yɔ̄ mla uwá ā, cɛ́ɛ́ ká ɔtū kóō he uwá dúúdú ɛ́gɛ́nɛ̄ ɔtū he um dúúdú ā.

¹⁴ N le olɛhɔ̄ kú uwɔ cɛ̄ lɛ uwá ɛɛ́. Ācɛ kú ɛcɛ gē wɔ́tū uwā ohígbū kéē wɛ ákú ɛcɛ gɛ ŋ́, ɛ́gɛ́nɛ̄ ń wɛ ákú ɛcɛ ŋ́ mā.

¹⁵ Ń yɔ̄ ī ba uwɔ ka lɛ uwá kpó ŋmá ipú ɛcɛ ŋ́, amáŋ ká lɛ uwá gbō ŋmá ɛgiyí ɔ̄cɛ obɔ̄bí ā.

¹⁶ É wɛ ákú ɛcɛ gɛ ŋ́, ɛ́gɛ́nɛ̄ ń wɛ ákú ɛcɛ ŋ́ mā.

¹⁷ Lɛ uwá yá tīihɔ ŋmá lɛ ɛlā ɔkwɛ̄yi kú uwɔ nāa í nwū uwā ā.

¹⁸ N yɔ̄ ī tū uwā ɛhɔ̄ ga ipú ɛcɛ ɛ́gɛ́nɛ̄ a tū um ɛhɔ̄ wā ipú ɛcɛ ā.

¹⁹ N kwú iyī um í táajɛ gā uwɔ ohígbū uwā, o yá ɛ́ɛ́ kéē lɔfú je iyī uwā táajɛ ɔkwɔ̄ɔ̄kwɛ̄yi gā uwɔ.

²⁰ Ń gē gbɔ̄ɔkɔ ga uwɔ ohígbū ayíkpó nēe bá ā ofū uwā ŋ́, amáŋ ohígbū ācɛ nēe géē lɔtūce um ŋmá olɛhɔ̄ kú uwā nēé í cɛ̄ ā.

²¹ N gē gbɔ̄ɔkɔ gā uwɔ kéē le pīya ɔ̄cɛ ékpónú ɛ́gɛ́nɛ̄ awɔ mɛ́mla um wɛ ɔ̄cɛ ékpónú ā. Ádā! kéē le piyatɔ̄há mla alɔ, ɛ́gɛ́nɛ̄ n pīyatɔ̄há mla uwɔ nāa kē pīyatɔ̄há mla um ā. Cɛ́ɛ́ ká ācɛ kú ɛcɛ géē cɛ̄ ka awɔ tū um ɛhɔ̄ á.

²² N kwú ojīlīmā nēé je gā um ā ú lɛ uwá ɛɛ́, cɛ́ɛ́ kéē le pīya ékpó, ɛ́gɛ́nɛ̄ ami mɛ́mla awɔ wɛ ékpó ā.

²³ N le pīyatɔ̄há mla uwa, a kē le pīyatɔ̄há mla um, kéē le pīya ɔ̄cɛ ékpó, cɛ́ɛ́ kú ācɛ kú ɛcɛ kóō le jé ka awɔ tū um ɛhɔ̄ á. Ká ɛcɛ kóō kla le jé ka a yíihɔtū tū uwā ɛ́gɛ́nɛ̄ a yíihɔtū tū um ā.

²⁴ Ádā! A le uwá kpó gā um ɛɛ́, n tínē kéē bá mla um ɛga nɛ̄ n yɔ̄ dúú ā, cɛ́ɛ́ kéē lɛ ojīlīmā kú um nāa je gā um ā má ohígbū ka a yíihɔtū tū um gbɔbū nēé yá ɛcɛ á.

²⁵ Ádā ō yá olɔhi, ācɛ kú ɛcɛ ā í jé uwɔ ŋ́, amáŋ n lɛ uwɔ jé ɛɛ́, aɛ́nɛ̄ e bá ā kē le jé ka awɔ tū um ɛhɔ̄ á.

²⁶ N le yá kéē lɛ uwɔ jé, n klla géē yɔ̄ ī yá kéē jé uwɔ, ká ihɔtū nāa lɛ ɛgiyí um ā kóō yɔ̄ lɛ uwā, ká n̄ kē ī piyatɔ̄há mla uwá.”