UJÓNA 1 - Ubáyíbu kú Idɔma

Ujóna tá ɛhɔ̄ kú Ɔwɔicō yɔ̄ ī kwu ga ajɛ Utásisi

¹ Ɛ̄cī éyi, Óndú ā le ɛlā ka lɛ Ujóna, ɔyí kú Amítāyi ká ɔ̄,

² nyɔ̄ ga Unínīfɛ, ɔlɛ́ nɛ̄hi ɔ́ɔmā, cɛ́ɛ́ kɔ́ɔ̄ lɛ ɔna tá lɛ ācɛ ā ka anúɔ nōo wɛ Ɔwɔicō ā jé ɛ́gɛ́nɛ̄ é bɔ̄bíipú lɛ ā.

³ Amáŋ, Ujóna cāŋjɛ, gbɔɔ́ ō kwu ga Utásīsi ŋmá ɛgiyí Ɔwɔicō. Ó le yɛ tá Ujɔ́pa, anɔ́ɔ ó le úgbéenyi éyi má yɔ̄ ī nyɔ̄ ga Usipéni, ó lɛ ije kú úgbéenyi ā gbā, anɔ́ɔ ó le tá ipú nū kóō ga Utásīsi mla ācɛ ā, ɛga nɛ̄ ó í yɔ̄ ligbó ŋmá ɛgiyí Óndú ā ā.

⁴ Amáŋ, Óndú ā le owu nɛ̄hi tɛ̄hɔ̄ ga eyī ísu ā, owu ā gbɔɔ́ ō tá nɛ̄ɛ̄nɛ̄hi bā ɔdā nɛ̄ úgbéenyi ā gáā je pīya tū enyi ā.

⁵ Anɔ́ɔ ācɛ nōo í pɛ úgbéenyi ā gbɔɔ́ ō yúufi nɛ̄ɛ̄nɛ̄hi, gbɔɔ́ ō je ikwū klá ɔwɔ kú uwā kóō tá uwā abɔ̄. Ɔnyɔɔnyɛ jikwū klá ɔwɔ kú nū. O yá ɛ́ɛ́ ka úgbéenyi ā kóō dēē cē fékéé ā, é lɛ iyó nēe bá ipú úgbéenyi ā kpó tá tū ipú éŋkpɔ̄. Amáŋ eko nyā ā, Ujóna le yɛ tá ɛháajɛ kú ipú úgbéenyi ā yɔ̄ ī gbiyɔ̄lā lipú lipú.

⁶ Otrɛ̄yí kú úgbéenyi ā lɛ ɔ́ pīyɛ̄ abɔ́ɔ, anɔ́ɔ ó da ɔ́ ɔ̄kā ka, ɔdí nɔ́ɔ gbɛlá ā nɔ́ɔ yɔ̄ í gbiyɔ̄lā ā? Anɔ́ɔ ó da ɔ́ kɔ́ɔ̄ cāŋjɛ kú ɔ̄ gbɔ̄ɔkɔ lɛ ɔwɔ kú nū, eko ōhī ɔ́ɔ géē ményinyi aá, cɛ́ɛ́ ó lɛ aá nyatá, cɛ́ɛ́ aá í yíífi gɛ ŋ́.

⁷ Anɔ́ɔ ācɛ nōo ī pɛ́ úgbéenyi ā da íyī uwā kahíníī, “Ālɔ̄ lɛ ūlī tá, ká ālɔ̄ jé ɔ̄cɛ nɛ̄ ɔdōbɔ̄bí kú nū ī bī unwalu nyā gé lɛ alɔ ā. É le ūlī tá, anɔ́ɔ ūlī le Ujóna kwú á.

⁸ Anɔ́ɔ é da Ujóna ɔ̄kā kahíníī, “Ka lɛ alɔ, ɛgí ɔ̄nyɛ nɛ̄ ɔdobɔ̄bí nyā ŋmá wā í klá alɔ ā? Úklɔ̄ nyá nāa gē yá ā. Iní nāa ŋmá ā, a wɛ ɔ̄cɛ ipɔ́ɔma nyá?”

⁹ Anɔ́ɔ Ujóna tá uwā ohi kahíníī, “N wɛ ɔ̄cɛ Uhíbru, n gē yúufi klla ī gbā Óndú ā, Ɔwɔicō kú ɔkpáncō nōo yá ɛcɛ mla ísu ā ɛ̄gbā.

¹⁰ Anɔ́ɔ ó da uwá ka anúɔ yɔ̄ ī kwu ŋmá ɛgiyí Óndú ā. Ufi nɛ̄hi le ācɛ nōo gē pɛ́ ugbéenyi ā kwú. Anɔ́ɔ é dɔɔ̄ka kahíníī, “Ɔdí nāa yá yɔ̄ ā?”

¹¹ Anɔ́ɔ é da ɔ́ ɔ̄kā kahíníī, “Ɔdí nɛ̄ alɔ géē yá uwɔ ká owu ā kóō mā ō tá āā? Ohígbū ka owu ā yɔ̄ ī tá lɔfú lɔfú fíyɛ́.

¹² Anɔ́ɔ ó da uwá kahíníī, “Aá kwú um ú tá ga ipú éŋkpɔ̄ ā, cɛ́ɛ́ kú ísu ā kóō mā oō tá úgbagwú, ohígbū ka n jé ka ohígbū um nɛ̄ owu ā yɔ̄ ī tá ísu úgbagwú á.”

¹³ Nááná ā, ācɛ o pɛ́ ugbéenyi ā cēyītīkwū kéē lɛ úgbéenyi ā pɛ́ wā ajɛ okónu ísu ā, amáŋ ó tɔ́ɔtɛ ŋ́ ohígbū ka owu ā yɔ̄ ī tá lɔfú fíyɛ́.

¹⁴ Ohígbū ɔ́ɔma é gbɔɔ́ ō dɛ̄ hī Ɔwɔicō kahíníī, “Alɔ ī ba uwɔ, ó! Óndú, ā cɛ̄ lɛ alɔ pɛ́ yíífi ohígbū ɔ̄cɛ ā ŋ́, káā je ɛpɔ̄bí kú nū ce alɔ ɛyí ŋ́. Ohígbū ka ɔdā nōo he uwá ɔtū ā nēé yá ɔ̄ á.

¹⁵ Anɔ́ɔ, é kwú Ujóna ú tá ga éŋkpɔ̄ ipú ísu á, anɔ́ɔ ísu á í tá úgbagwú gɛ ŋ́ má.

¹⁶ Anɔ́ɔ ācɛ ā yúufi Ɔwɔicō nɛ̄ɛ̄nɛ̄hi á. É le ɛya gwó lɛ Óndú ā klla le okónu ce ka aá géē gbā ɔ̄ ɛ̄gbā.

¹⁷ Anɔ́ɔ Ɔwɔicō lɛ ɛbéenyi nɛ̄hi éyi fu kóō kwú Ujóna ú mulɛ. Anɔ́ɔ Ujóna yɔ̄ ipú kú ɛbéenyi ā ɛ̄cī ɛtá á.