UHOSÍI 1 - Ubáyíbu kú Idɔma

¹ Ɛ̄nyā wɛ olɛhɔ̄ nɛ̄ Óndú ā je lɛ Uhosíya ɔyí kú Ubíyɛ́rí, ɛ́pléeko ɛyɛ́ɛyɛ́yí nɛ̄ Usíya, Ujɔ́tam, Áhāsi mɛ́mla Uhɛsɛkíya wɛ aɔ́cɛ́ kú Ujúda, nɛ̄ Ujérobōwam, ɔyí kú Ujówāsi, wɛ ɔcɛ́ kú Ísrɛ̄lu ā.

Ɔnyā kú Uhosíya mla ayí nū

² Eko nɛ̄ Óndú ā kɛlā aflɛ́yí bū okónu kú Uhosíya ā, ó da ɔ̄ kóō nyɔ̄ gaá lɛ akwuna nōó gē gbaajā lɛ. Ó da ɔ́ ka ɔ́ɔ ké í ma ayí nōo lɛbɛ̄ɛka anú ā lɛ ɔ́. Óndú klla ka ka ɔwɛ ékpónú nɛ̄ ɔnyā ā ɔ́ɔ nyɛ̄ɛ̄ ŋmá ɔlɛ́ ɔbá nū gaá gbaajā tú ācɛnyīlɔ ɔhá ā, ɛ́gɔ́ɔmā nɛ̄ ācɛ ɔlɛ́ anúɔ ɔ́ɔ́ nyɛ̄ɛ̄ ŋmá ɛgiyí anúɔ gaá gbā aɔ́wɔ ɔhá lɛ á.

³ Anɔ́ɔ ó nyɔ̄ í lɛ Ugóma, ɔyínɔ̄nyā kú Udíblém lɛ á. Ɔnyā ā le ipú yɔ̄, le ɔyínɔ̄nyīlɔ éyi ma lɛ ɔ́.

⁴ Anɔ́ɔ Óndú ā da Uhosíya kóō kwú iyē ú lɛ ɔyí ā ka Ujésiríilu. Ɔwɔicō ka iye ā ɔ́ɔ lɔhi ohígbū ka, eko kpií anúɔ géē yá ācɛ ipɔ́ɔnū kú ɔcɛ́ kú Ísrɛ̄lu italā ohígbū ācɛ nɛ̄ aádáádā uwā Ujéhu kpó ŋmó ajɛ kú Ujésri ā Ó ka anúɔ géē je ɔcɛ́ ō lé ŋmá ɔgba ɔcɛ́ kú nū gwū

⁵ Ɛ̄cī ɔ́ɔmā, ó ka anúɔ géē je ɔfú ō kpɛ́fú kú ācɛ Ísrɛ̄lu yíífi ɔpɛ́ kú Ujésiríilu.

⁶ Ugóma klla le ipú yɔ̄, le ɔyínɔ̄nya éyi ma. Anɔ́ɔ Óndú ā da Uhosíya kóō kwú iyē í ce ɔyí ā ka, Eyinyinyi í yɔ̄ ŋ́. Ɛyí kú iyē ā wɛ “Ń ményinyi uwɔ ŋ́.” Ó ka ohígbū ka anúɔ ɔ́ɔ gáā ményinyi ācɛ kú Ísrɛ̄lu igbɔhá gɛ ŋ́. Ɛ́ɛ́ nɛ̄ anúɔ gē je obɔ̄bí kú uwā yá uwā ɛhi ɛ́ɛ́ gɛ ŋ́.

⁷ Amáŋ, ó ka anúɔ géē ményinyi ācɛ kú Ujúda klla géē hɛ́ uwā tá. Ó ka amáŋ, ɔ́ɔ gáā wɛ ɔwɛ kú ɛfú ō kpó nēé ī bī ɔkpacaŋgelī ámāŋ ka ɔtā mɛ́mla ɔyī, ámāŋ ka ɔnya mɛ́mla ācokpɛ́fú ɔnya ŋ́.

⁸ Eko nɛ̄ ɔyí nɛ̄ ó le hī “Ń ményinyi ŋ́” mā, le amɛ̄ hɛ́ ā, Ugóma klla le ipú yɔ̄ igbɔhá kpɔ́, ó lɛ ɔyínɔ̄nyīlɔ ɔhá ma.

⁹ Óndú ā da Uhosíya kóō kwú iyē ú ce ɔyí ā kahíníī, “Ó wɛ ɔ̄cɛ kú um ŋ́,” ohígbū ka ācɛ kú Ísrɛ̄lu í wɛ ācɛ kú um ŋ́ ɛ́ɛ́ nɛ̄ n gē wɛ Ɔwɔicō kú ūwā gɛ ŋ́.

Ísrɛ̄lu le lūgwū

¹⁰ Nááná ayí kú Ísrɛ̄lu klla géē lɛ ācɛ alɛwa bɛ̄ɛka ɔjɛ kú ipú ísu nɛ̄ ɔ̄cɛ dúúmā í miya anú ɛ́ɛ́ nɛ̄ ó gē gbo ɔ́ áluka glá ŋ́. Abālɔbányā Ɔwɔicō hī ūwā ka, aá wɛ ācɛ ɔlɛ́ um ŋ́. Amáŋ eko ɔ́ɔmā ó géē hī ūwā ka ayí kú Ɔwɔicō nōo yēeyī

¹¹ Ācɛ kú Ujúda mɛ́mla Ísrɛ̄lu géē túbá tɔ̄ɔ̄há klla í fu otrɛ̄yí ékpónú kóō gbō uwā, é í wɛ ācɛ olɔfú klla lɛ agbénú nɛ̄hi, ohígbū ka ɛ̄cī kú Ujésri ā géē nwuné nɛ̄hi.