ĀCƐ URÓM 7 - Ubáyíbu kú Idɔma

É bī ɔbá lɛ yá ocābɔ̄

¹ Ayínɛ́ um nɔ̄nyā mɛ́mla ayínɛ́ um nɔ̄nyīlɔ, aá géē jɛ́yí ɛlā nɛ̄ n gáā ka ā, ohígbū ka odúúdú aá jé íne ā lɔɔlɔhi. Íne ā gē nā ācɛ nēe yēeyī ā tɔ́ɔwɛ eko nēé yēeyī ā ōfōōfūnū nɛ̄ n.

² Ɔdā nōó wɛ ā yɔ̄ á, íne ā ka ɔnyā olɔbá géē yɔ̄ mla ɔbá nū piíí, ɔdā nōo yá ɛ́ɛ́ nɛ̄ ɔbá nū yēeyī ā. Amáŋ ɔ́dāŋ ka ɔbá nū gekwú, ó le hɛ́tá ŋmá íne ā.

³ Ohígbū ɔ́ɔmā eko nɛ̄ ɔbá nū yēeyī ā, é géē hī ɔ̄ ka ogbajā, ɔ́dāŋ kóō gaá yɔ̄ mla ɔ̄cɛ ɔhá. Amáŋ ɔ́dāŋ́ ka ɔbá nū gekwú, ó géē wɛ ɔ̄cɛ̄nyā nōo lɛ iyī nū ɛgiyí íne ā, é kē gáā hī ɔ̄ ka ogbajā ŋ́, ɔ́dāŋ́ kóō lɛ ɔbá ɔhá lɛ.

⁴ Ɛ́gɔ́ɔmā nōó lɛ lɛ aá dúú á ayínɛ́ um nɔ̄nyā mɛ́mla ayínɛ́ nɛ̄ um nɔ̄nyīlɔ. Ɛjī kwɛjī lɛ íne ā nɛɛ, ɛ́gɛ́nɛ̄ ɔ̄cɛ ī kɛla, aá gekwú dúú ohígbū ka aá wɛ ābɔ̄ kú ɔkpíyē kú Ohɔ́nyɛtá ā. Anɔ́ɔ abālɔbányā é le aá piyatɔ̄há mla ɔ̄cɛ nēé je héyī ŋmá ɔlékwū ā, o yá ɛ́ɛ́ ká ālɔ̄ yá ɔdā olɔhi ohígbū Ɔwɔicō.

⁵ Ohígbū ka, eko nɛ̄ alɔ lā ɛdɔ kú oyēeyī nɛ̄ alɔ dɔɔ̄kā ā, íne ā gē cɛ̄ lɛ alɔ gē yúnwū kú ínoōbīya. Ó gē yá ābɔ̄ kú iyē ká alɔ dóódu kóō yúnwū ɔdā obɔ́bí ō yá, ɛ̄nɛ̄ o ī ŋmɛ́yí tá ikwū.

⁶ Amáŋ, abālɔbányā é lɛ alɔ hɛ́tá ŋmá íne ā ɛɛ́, ohígbū ka alɔ gekwú ɛgiyí ɔdā nōo tɛtɛ tū alɔ agbá ā, cɛ́ɛ́ ká ālɔ̄ yúklɔ́ ɔwɛ nɛ̄ncɛ̄ lɛ íne ō tá tāajɛ ā gɛ ŋ́. Amáŋ ká ālɔ̄ yúklɔ́ ipú oyēeyī ɛ̄yīpɛ̄ kú Alelékwū Ihɔ ā.

Íne mɛ́mla ínoōbīya

⁷ Ɔdí nɛ̄ alɔ ī ka mɛ́ɛ̄ ā? Íne ā abɔ̄yīnū wɛ ínoōbīya nɛɛ? Ó lɛ ɔwɛ ŋ́! Ɔ́dāŋ́ kóō wɛ íne ā ŋ́ nɛɛ, ń géē yɛ í jé ínoōbīya ŋ́. Ɔ́dāŋ́ ka íne ā í kahíníī, “Á híī leyīkwu ɔdā ɔ̄cɛ ŋ́ nɛɛ”, ń géē yɛ í jé ɔdā nɛ̄ eyī ō kwu ɔdā ɔ̄cɛ wɛ ā ŋ́.

⁸ Amáŋ o ŋmá ɛgiyí íne nɛ̄ ínoōbīya má ɛga je ɛdɔ kú únwū ɛyɛ́ɛyɛ́yí tá ipú ɔtū kú um á. Ɔ́dāŋ́ kóō wɛ íne ā ŋ́ nɛɛ, ínoōbīya í géē yɛ í lɔfú dúúmā ŋ́.

⁹ Ami abɔ̄yī um yēeyī eko nɛ̄ íne dúú í yɔ̄ nēe ī da um ka amíɔ̄ɔ̄ híī yá ɔdā ōhī ŋ́ mā, amáŋ eko nɛ̄ n gaá le íne ā jé ā, ínoōbīya le kwu um ɔtū nwuné,

¹⁰ anɔ́ɔ n gekwú á ɛ́gɛ́nɛ̄ ɔ̄cɛ ī kɛlā ā. Anɔ́ɔ íne piíí nōo cíkā ō yá ká n̄ yēeyī ā, le ikwū bī gé umá.

¹¹ Ínoōbīya ā bī íne ā, lɛ um plla, anɔ́ɔ ó le ikwū bī gé um á.

¹² Ohígbū ɔ́ɔmā íne ā tīihɔ, ɔ́da ā kē tīihɔ, ó le kpaakpa ó kē lɔhi.

¹³ Ayíbɛ, ɔdā nōo lɔhi ā bī ikwū gé um mɛ́ɛ á ŋ́? Ó lɛ ɔwɛ ŋ́! Ínoōbīya yɔ̄ ī yá ká n̄ gekwú á. Ikwū bī ɔdā nōo lɔhi le um ŋmó, o yá ɛ́ɛ́ kéē lɛ ɛdɔ ɔdā nɛ̄ ínoōbīya wɛ kpócíí ā mafú, anɔ́ɔ íne nēé je ká ɔ̄cɛ kóō bīyíne gɛ ŋ́ mā a, klla cɛ̄ lɛ íne ōbīya kwú pīya ɔdōbɔ̄bí fíyɛ́ á.

Unu kú ipú ɔtū kú ɔ̄cɛ

¹⁴ Alɔ jé ka íne ā ŋmá ɛgiyí Ɔwɔicō. Amáŋ ami ā wɛ ɔ̄cɛ ɔlamu icííci nɛ̄ n, ɔ̄cɛ nēé kwú ɔ̄ ú lá bɛ̄ɛka ɔfiyɛ ā lɛ ínoōbīya.

¹⁵ Ń jé ɔdā nɛ̄ n gē yá ā gɛ ŋ́, ohígbū ka ń gē yá ɔdā nɛ̄ n tíne ō yá ā ŋ́, amáŋ ɔdā nōo ī wú um ɔtū ā nɛ̄ n gē yá á.

¹⁶ Abɔ̄ n gē yá ɔdā nɛ̄ ń tíne ō yá ŋ́ mā, ɛ̄nyā mafú ka íne ā lɔhi.

¹⁷ Ó lɛ ā, ayíbɛ, ó wɛ ami abɔ̄yī um gē yá ɔdā ɔ́ɔmā gɛ ŋ́, amáŋ ínoōbīya nōo lā ipú ɔtū kú um ā nɛ.

¹⁸ N jé ka ɔtū kú um í jɛga gā um kú um yá ɔdā olɔhi dúúmā ŋ́, ɔ́ɔmā lé ka ipú ɔtū kú um, n dɔɔ̄kā ō yá ɔdā olɔhi, amáŋ ń kē lɔfú yá ɔ̄ glá ŋ́.

¹⁹ Ń gē yá ɔdā olɔhi nɛ̄ n dɔɔ̄kā ō yá ā ŋ́, ikɔkɔ ɔ́ɔmā ɔdōbɔ̄bí nɛ̄ ń dɔɔ̄kā ō yá ŋ́ mā nɛ̄ n gē yá á.

²⁰ Ó lɛ ā, ɔ́dāŋ ka n gē yá ɔdā nɛ̄ ń dɔɔ̄kā ŋ́ mā ā, ayíbɛ, ó wɛ ami abɔ̄yī um ī yá ɔdā ɔ́ɔmā gɛ ŋ́, amáŋ ínoōbīya nōo yɔ̄ ipú um ā nɛ.

²¹ Anɔ́ɔ n le jé ka íne nyā wɛ ɔdā nōo ī yúklɔ́ ipú ɔtū kú um á, eko nɛ̄ n dɔɔ̄kā ō yá ɔdā olɔhi nɛɛ, ɔdōbɔ̄bí ā gē yɔ̄ kwu um ajaajɛ ō yá á.

²² Ohígbū ka ipú ɔtū kú um íne kú Ɔwɔicō he um ɔtū.

²³ Amáŋ n gē má íne ɔhá ipú ɔkpíyē kú um, nōo gē nuunu tá íne kú ɔtū kú um ā, nōo kē je um yá alagbá kú ínoōbīya ā, nōo yɔ̄ ipú ɔkpíyē kú um ā.

²⁴ N gebí ɛɛ́! Ɔ̄nyɛ géē hɛ́ um tá ŋmá ɔkpíyē nōo yɔ̄ ī yá ká um gekwú ā?

²⁵ N tá Ɔwɔicō ahínyá, nōo géē bī Ujísɔ̄si Ohɔ́nyɛtá, Óndú alɔ le hɛ́ um táā! Āhɔ̄ kú um ā yɔ̄ mɛ́ɛ̄ ā, ami abɔ̄yī um gē bī ɔtū kú um ī lɛ íne kú Ɔwɔicō tū, amáŋ n kē bī ɔkpíyē kú ɔlɛcɛ kú um gē lɛ ínoōbīya tū.