ĀCƐ URÓM 6 - Ubáyíbu kú Idɔma

Alɔ yēeyī ohígbū Ohɔ́nyɛtá

¹ Ɔdí nɛ̄ alɔ ī ka mɛ́ɛ̄ ā? Ālɔ̄ yɔ̄ ī bīyíne cɛ́ɛ́ ká Ɔwɔicō kóō yɔ̄ ī ményinyi alɔ tōōtɔ̄ɔ̄ nɛɛ?

² Ó lɛ ɔwɛ ŋ́! Alɔ lɛbɛ̄ɛka okwū ā ɛgiyí íneōbīya mɛ́ɛ́nɛ, ɔwɛ nyá nɛ̄ alɔ gē yēeyī yɔ̄ gē bīyíne kpɔ́ ā?

³ Aá jé ka odúúdú alɔ nēé yá alɔ ubatísim wā ipú opīyatɔ̄há mla Ohɔ́nyɛtá Ujísɔ̄si ā, eko nēé yá alɔ ubatísim ɔ́ɔmā ā, alɔ gekwú ɔwɛ ékpó bɛ̄ɛka ɛ̄nɛ̄ Ujísɔ̄si kwú ā.

⁴ Ubatísim nēé yá alɔ ā, wɛ ɔdōcābɔ̄ ka alɔ gekwú mla anú, anɔ́ɔ é lɛ alɔ nyi tɔ̄há mla anú, cɛ́ɛ́ ka ɛ́gɛ́nɛ̄ ɔfú nɛ̄hi kú Ádā ā je Ohɔ́nyɛtá héyī ŋmá ɔlékwū ā, ɛ́gɔ́ɔmā nɛ̄ alɔ lɔfú lā oyēeyī ɛ̄yīpɛ̄ dúú á.

⁵ Ohígbū ka, ɔ́dāŋ kéē lɛ alɔ pīya tɔ̄há mla anú ipú ikwū nōo lɛbɛ̄ɛka ákú nū ā, é géē pīya alɔ tɔ̄hā mla anú ipú ohéyī ŋmá ɔlékwū nōo lɛbɛ̄ɛka ákú nū piíí ā.

⁶ Alɔ jé kéē lɛ oyēeyī otɛtɛ kú alɔ ā nyɔ́kpá mla Ohɔ́nyɛtá, cɛ́ɛ́ kéē lɛ ɔfú nōo gē cɛ̄ lɛ alɔ ī bīyíne ā yíífi, o yá ɛ́ɛ́ ká ālɔ̄ híī wɛ ɔfiyɛ kú ínoōbīya gɛ ŋ́.

⁷ Ohígbū ka ɔ̄cɛ nōo gekwú ɛɛ́ mā le ŋmúla ŋmá ɔfú kú ínoōbīya.

⁸ Abɔ̄ alɔ gekwú mla Ohɔ́nyɛtá ā, alɔ cɛ̄ ka alɔ géē yēeyī mla anú dúú.

⁹ Ohígbū ka alɔ jé kéē kwú Ohɔ́nyɛtá ú héyī ŋmá ɔlékwū ɛɛ́, ó gáā kwú gbóógbóō gɛ ŋ́. Ikwū í klla lɔfú dúúmā ɛgiyí nū gɛ ŋ́.

¹⁰ Anɔ́ɔ abɔ̄ ó gekwú kóō kwú igbɔhá gɛ ŋ́ mā, ɔfú kú ínoōbīya dúú í lɛ ɔ́da ɛgiyí nū gɛ ŋ́. Anɔ́ɔ abālɔbányā ó yēeyī yɔ̄ ī lé tɔ̄há mla Ɔwɔicō.

¹¹ Ɔwɛ ékpónú ɔ́ɔmā, ɛjī kwɛjī lɛ ɔfú kú ínoōbīya nɛɛ aá géē je iyī aá ka aá gekwú ɛ́ɛ́, amáŋ aá yɔ̄ ī yēeyī ī lé tɔ̄há mla Ɔwɔicō ipú opīya tɔ̄há mɛ́mla Ohɔ́nyɛtá Ujísɔ̄si.

¹² Aá cɛ̄ lɛ ínoōbīya kóō lɔ́ɔcɛ́ odo ká aá ŋ́. Alɔ kē jé ka alɔ í kwú piíí, ohígbū ɔ́ɔmā, alɔ híī bī Unwɔ̄dā ō yá kú iyē kú alɔ le yúklɔ́ ŋ́.

¹³ Aá híī je ābɔ̄ okpíyē kú aá dúúmā táajɛ kéē bī ɔ̄ le bīyíne ámāŋ́ ko bī ɔ̄ le bɔ̄bíipú ŋ́. Ikɔkɔ ɔ́ɔmā aá kwú iyī aá ú lɛ Ɔwɔicō bɛ̄ɛka ācɛ nēé je héyī ŋmá ɔlékwū ā, cɛ́ɛ́ aá kwú iyī aá ú lɛ Ɔwɔicō dúúdú, cɛ́ɛ́ kóō bī aá lɛ yúklɔ́ kú ɔdā nōo lɔhi.

¹⁴ Aá gáā jɛga lɛ ínoōbīya kóō gbō aá ɛ́gɛ́nɛ̄ ɔcɛ́ gē gbō ācɛ ā ɛ́ɛ́ gɛ ŋ́. Ohígbū ka eyīnyinyi kú Ɔwɔicō gē gbō aá mɛ́ɛ̄ á, ó wɛ íne gɛ ŋ́.

Alɔ wɛ ɔfiyɛ kú olɔhi ō yá

¹⁵ Ɔdí wɛ ɛyí kú aɔ́dā nēe bá nyā ā? Ālɔ̄ klla gbɔɔ́ ō bīyíne kpɔ́ mɛ́ɛnɛ, ohígbū ka Ɔwɔicō gē bī eyīnyinyi nɛ̄hi kú nū gē lɛ gbō alɔ mɛ́ɛ̄ á nɛɛ? Ó lɛ ɔwɛ ŋ́.

¹⁶ Aá jé ka ɔ́dāŋ ka aá kwú iyī aá ú lɛ ɔ̄cɛ dúúmā ká aá cɛ̄ ɔ̄ ɛhɔ̄, ɛlā ɔkwɔ̄ɔ̄kwɛ̄yi, aá kwú pīya ɔfiyɛ kú ɔ̄cɛ nɛ̄ aá ī lɛyítáajɛ lɛ ɔ́ ā. Ó kōō wɛ ákú íne ō bīya nōo ŋmɛ́yí tá ikwū, ámāŋ ákú ɛyí ō táajɛ nōo ŋmɛ́yí tá o kagwó mla Ɔwɔicō ā.

¹⁷ Amáŋ alɔ í tá Ɔwɔicō ahínyá piíí! Ohígbū ka otɛtɛ ā aá lɛbɛ̄ɛka ɔfiyɛ kú ínoōbīya, amáŋ abālɔbányā aá bī ɔtū kú aá kwú ɛyí ú táajɛ lɛ ɔdā nēé nwū aá ɛɛ́.

¹⁸ É kē lɛ aá hɛ́tá ŋmá ɔfiyɛ kú íne ō bīya, anɔ́ɔ aá kwú pīya ɔfiyɛ kú Ɔwɔicō o yá ɛ́ɛ́ kú yá ɔdā olɔhi.

¹⁹ N gē bī ɔdā nɛ̄ aá jé glá ā le yá ɔdōcabɔ̄ lɛ aá ohígbū ka aá ī jɛ́yí odée fíya ŋ́. Eko éyi aá kwú iyī aá ú bɛ̄ɛka ɔfiyɛ kú ɔdīcííci mɛ́mla aɔ́dā dóódu nēe bɔ̄bí ā. Ɔwɛ ékpó ɔ́ɔmā aá kwú iyī aá í pīya ɔfiyɛ abālɔbányā, cɛ́ɛ́ ká aá yá ɔdā nēe tīile.

²⁰ Eko nɛ̄ aá wɛ ɔfiyɛ kú ínoōbīya ā, aá le nwūla ŋmá o yá ɔdā olɔhi nɛ̄ Ɔwɔicō dɔɔ̄kā ā.

²¹ Ɔdí kē wɛ ile nɛ̄ aá lɛ ŋmá ɔdā nɛ̄ aá yɔ̄ ī yá nɛ̄ abālɔbányā nōó ī tū aá uwēyī ā? O ŋmɛ́yí kú aɔ́dā nēe bá abɔ́ɔ ā wɛ ikwū.

²² Amáŋ abālɔbányā Ɔwɔicō lɛ aá hɛ́tá ŋmá ínoōbīya, anɔ́ɔ aá kwú pīya aɔ́fiyɛ kú Ɔwɔicō. Ile kú aá wɛ o je oyēeyī kú aá táajɛ lɛ ɔ́ dúúdú, nɛ̄ o ŋmɛ́yí kú nū kē wɛ oyēeyī nōó ī mɛ ŋ́.

²³ Ohígbū ka ɔ́dāŋ ka ɔ̄cɛ le íne bīya ɔdā nōo tá ɔ̄ ɔkwu ā wɛ ikwū, amáŋ ɛhi nɛ̄ Ɔwɔicō ī je alahá ā wɛ oyēeyī nōó ī mɛ ŋ́ ipú o pīyatɔ̄há mla Ohɔ́nyɛtá Ujísɔ̄si Óndú alɔ.