ĀCƐ URÓM 5 - Ubáyíbu kú Idɔma

Ɔwɔicō lɛ alɔ kagwó mla iyī nū

¹ Abɔ̄ Ɔwɔicō le ɛpɔ̄hi hɛ́ lɛ alɔ ohígbū ka alɔ cɛ̄ɛ̄lā nū ā, alɔ kē bá ɛbɔ́ mla anú ohígbū ɔdā nɛ̄ Ujísɔ̄si Ohɔ́nyɛtá, Óndú alɔ yá lɛ alɔ ā.

² Ohígbū ka alɔ cɛ̄ɛ̄lā kú Ohɔ́nyɛtá ā, ó le yá ká alɔ lɛ ɛ́gɛ́nɛ̄ Ɔwɔicō gē je ɛhi lɛ alɔ alahá lɛ ā má. Alɔ gē gwéeyē nɛ̄hi ohígbū ka alɔ jé cāā ka alɔ géē lɛ ukpɛ̄ kú ɛgahi mɛ́mla ojīlīmā kú Ɔwɔicō.

³ Ó wɛ ɔ́ɔmā ōfūnū ŋ́, amáŋ alɔ ī gwéeyē ohígbū ɛ́kɛma nɛ̄ alɔ ī má ā, ɛ́gɛ́nɛ̄ alɔ jé ka ɛ́kɛma í yá ká ālɔ̄ le ɔtū lé ā

⁴ Ɔtū nɛ̄ alɔ ī lé ā gē yá kú Ɔwɔicō kóō cɛ̄tra alɔ. Ocɛ̄tra kú nū ī yá ka alɔ lɛ eyīyōce.

⁵ Eyīyōce ɛ́gɛ́nyā í kē já alɔ kwɔwɛ ŋ́, ohígbū ka Ɔwɔicō lɛ ɛ́gɛ́nɛ̄ alɔ he ɔ́ ɔtū nɛ̄hi lɛ ā mafú o ŋmá lɛ ō je Alelékwū-Ihɔ nōo wɛ ákú nū ā lɛ alɔ.

⁶ Ohígbū ka eko nɛ̄ alɔ í lɔfú i tá iyālɔ abɔ̄ glá ŋ́ mā, Ohɔ́nyɛtá gekwú ohígbū alɔ nēe wɛ ācɛ ɔ́bíipú ā eko nɛ̄ Ɔwɔicō miya ka ɔ́ɔ cíkā ā.

⁷ Ó lɔnɔ ká alɔ gbɛlá ka ɔ̄cɛ í kwú ohígbū ɔ̄cɛ o lɛ íne tū. Ekōhī ɔ̄cɛ géē lɔtū í kwú ohígbū ɛ́nɛ́nɛ̄ ɔ̄cɛ glá.

⁸ Amáŋ Ɔwɔicō le ɛ́gɛ́nɛ̄ alɔ he ɔ́ ɔtū lɛ ā mafú lɛ alɔ, oŋmá lɛ ō tū Ohɔ́nyɛtá wā ipú ɛcɛ nyā kóō gekwú ohígbū alɔ eko nɛ̄ alɔ wɛ ācobīyíne kpɔ́ ɛ́ɛ́ mā ā.

⁹ Abɔ̄ oyī kú nū le yá kéē lɛ ɛpɔ̄hi hɛ́ lɛ alɔ ā. Ɔdā ɔhá nōo fíyɛ́ ɛ̄nɛ̄ ó yá nyā wɛ o nya alɔ tá ŋmá ícɔ̄nū kú Ɔwɔicō.

¹⁰ Alɔ tɛtɛ wɛ aólɛlā kú nū, amáŋ ó kwú alɔ í pīya aóklóbīya nū, o ŋ́má lɛ ikwū kú ɔyí nū. Abālɔbányā nɛ̄ alɔ le pīya aóklóbīya Ɔwɔicō ā, ó géē nya alɔ tá ohígbū ka ó yēeyī!

¹¹ Ó wɛ ɔ́ɔmā ōfūnū ŋ́, Ɔwɔicō gē yá ká ālɔ̄ gwéeyē, ohígbū ɔdā nɛ̄ Óndú alɔ Ujísɔ̄si Ohɔ́nyɛtá nōo yɔ̄ ī lɛ alɔ pīya aóklóbīya Ɔwɔicō ā yá ā.

Ogblɔhá kú Ádām mɛ́mla Ohɔ́nyɛtá

¹² Íne kú Ɔwɔicō ō bīya wā ipú ɛcɛ nyā ŋmá iyē ɔ̄cɛ ékpónú, ikwū kē wā ŋmá lɛ íne nōó bīya ā, anɔ́ɔ ikwū le nyīla ɔwɛ ékpónú ɔ́ɔmā gé lɛ odúúdú ācɛ ā ohígbū ka odúúdú ācɛ le íne bīya.

¹³ Ó wɛ ɔkwɛ̄yi keé tɛtɛ yɔ̄ ī bīyíne ɛ́ɛ́ nɛ̄ Ɔwɔicō je íne lɛ Umósīsi á. Amáŋ ɛga nɛ̄ íne í yɔ̄ ŋ́, é gē tá íne nɛ̄ ācɛ bīya tāajɛ ŋ́.

¹⁴ Amáŋ odúúdú ācɛ nēe yēeyī eko kú Ádām í tá eko nɛ̄ Umósīsi yēeyī ā, le pɛ́ gekwú, nááná nɛ̄ ācɛ nēe bá abɔ́ɔ ā í bīyíne ɛ́gɛ́nɛ̄ Ádām bīya eko nōó tá kóō lɛyítáajɛ lɛ íne piíí nɛ̄ Ɔwɔicō je lɛ ɔ́ ā ŋmā. Ádām wɛ ɔwɛ éyi lɛbɛ̄ɛka ɛdɔ kú ɔ̄cɛ nōo gē wā ā, ɔwɛ ɔhá, ó kē lɛbɛ̄ɛka anú ŋ́.

¹⁵ Amáŋ ācɛ ɛpa ā wɛ ɛyɛ́ɛyɛ́yí ohígbū ka ɔwɛ nɛ̄ Ɔwɔicō í je ɛhi alahá lɛ ācɛ ā í wɛ ékpónú mla íne nɛ̄ Ádām bīya ā ŋ́. Ó wɛ ɔkwɛ̄yi ka ācɛ alɛwa le pɛ́ gekwú ohígbū íne nɛ̄ ɔ̄cɛ ékpónú bīya ā. Amáŋ ɔwɛ nɛ̄ Ɔwɔicō ī ma eyīnyinyi kú nū fú ā lɔfú fíyɛ́, ɛ́gɔ́ɔmā nɛ̄ ɔwɛ nōó bī le je ɛhi alahá lɛ ācɛ alɛwa nɛ̄ɛ̄nɛ̄hi o ŋmá lɛ ɔwɛ nɛ̄ Ujísɔ̄si, Ohɔ́nyɛtá, ɔ̄cɛ ékpónú ā, bī le ma eyīnyinyi fú ā.

¹⁶ Anɔ́ɔ ɔwɛ nɛ̄ Ɔwɔicō ī bī le je ɛhi lɛ ācɛ alahá ā wɛ ɛyɛ́ɛ́yí gwū ɔwɛ nɛ̄ ɔ̄cɛ ékpónú ā bīyíne ā. Íne nɛ̄ Ádām bīya ā yá ɛ́ɛ́ nēe ŋmó ācɛ “ɛpɔ̄bí” á. Amáŋ eko nɛ̄ ācɛ alɛwa le íne bīya ā, Ɔwɔicō le ɔdā nēé leyī ce ŋ́ mā yá lɛ uwá, o ŋmá lɛ ɛlā nōó ka kahíníī, “Aá lɛ ɛpɔ̄hi lé!”

¹⁷ Ó wɛ ɔkwɛ̄yi ka ohígbū íne nɛ̄ ɔ̄cɛ ékpónú, Ádām, bīya ā nɛ̄ ikwū wā í gbɔɔ́ ō ŋmó alɛɛcɛ piíí á. Amáŋ ɔdā nɛ̄ ɔ̄cɛ ékpónú, Ujísɔ̄si Ohɔ́nyɛtá, yá ā lɔfú nɛ̄ɛ̄nɛ̄hī fíyɛ́ ɔdā nɛ̄ ɔ̄cɛ ékpónú nōo bīyíne ā yá ā. Ɔwɔicō le odúúdú ācɛ nōó ményinyi uwā nɛ̄ɛ̄nɛ̄hi ā kagwó mla iyī nū icííci. É géē yɔ̄ í lɔfú iyē nɛ̄hi ohígbū ɔdā nɛ̄ Ohɔ́nyɛtá yá ā.

¹⁸ Anɔ́ɔ abɔ̄ íne nɛ̄ ɔ̄cɛ ékpónú bīya ā le odúúdú ācɛ ŋmɛ́pɔ̄bí ā, ɔwɛ ékpónú ɔ́ɔmā é le odúúdú ācɛ hɛ́tá ohígbū ka Ohɔ́nyɛtá le ucē okpaakpa yá, nōo yá ká ācɛ kéē yēeyī.

¹⁹ Ohígbū ka ɔ̄cɛ ékpónú yá ikpɛ̄yí olɔfú tá Ɔwɔicō á, anɔ́ɔ odúúdú ācɛ le pīya ācobīyíne á. Ɔwɛ ékpó ɔ́ɔmā Ɔwɔicō í hɛ́ ɛpɔ̄hi lɛ odúúdú ācɛ ohígbū ka ɔ̄cɛ éyi lɛyítáajɛ lɛ ɔ́.

²⁰ Ɔwɔicō tū íne ā, o yá ɛ́ɛ́ kú ācɛ kéē yá ɔdōbɔ̄bí tōōtɔ̄ɔ̄, eko nɛ̄ ācɛ ī yá ɔdōbɔ̄bí tōōtɔ̄ɔ̄ ā, nɛ̄ eyīnyinyi kú nū ī nwuné fíyɛ́ á.

²¹ Ámōōmɛ ɛlā ā wɛ ka abɔ̄ nɛ̄ odúúdú ācɛ í kwú ohígbū íne nēé bīya ā, ɛ́gɔ́ɔmā nɛ̄ ɔwɛ nɛ̄ Ɔwɔicō ī bī le méyīnyinyi ācɛ ā lɔfú lɛ á, ohígbū kóō le ācɛ kagwó mla iyīnū, nōo ŋmɛ́yí tá oyēeyī nɛ̄ ó gē mɛ ŋ́, ohígbū ɔdā nɛ̄ Ujísɔ̄si Ohɔ́nyɛtá Óndú alɔ yá ā.