ĀCƐ URÓM 14 - Ubáyíbu kú Idɔma

Ā híī ŋmó ɔ́mpa awɔ ɔ̄cɔ̄lóhɔ́nyɛtá okónu ŋ́

¹ Aá mīyɛ ācɔ̄lóhɔ́nyɛtá nēé lɔfú ipú ɔtū nēé kpóce ā ŋ́ mā, aá híī táafú mla uwá lɛyíkwu ɔdā nēé cíkā ō yá mɛ́mla ɛ̄nɛ̄ é cíkā ō yá ŋ́ mā ŋ́.

² Ɔ̄cɛ éyi cɛ̄ ka anúɔ lɔfú lé ɔdā dóódu glá. Amáŋ ɔ̄cɛ nōó lɔfú ipú ɔtū nōó kpóce ā ŋ́ mā ī lé ēpēēpū.

³ Ɔ̄cɛ nōo ī lé ɔda dóódu ā, kóō híī leyī gwō ɔ̄cɛ nōó ī lé ŋ́ mā bónū ŋ́. Ɔ̄cɛ nōó kē ī lé ŋ́ mā, kóō híī ŋmó ɔ̄cɛ nōo ī lé ā okónu ŋ́, ohígbū ka Ɔwɔicō mīyɛ anú ɛɛ́.

⁴ A cíkā ō kɛpɔ̄ tū ɔ̄cocɛ̄hɔ̄ kú ɔ̄cɛ ɔhá ā? Óndú nū ōfūnū lɔfú ka kóō yá lɔhi, amáŋ ka ó yá lɔhi ŋ́ má, ohígbū ka Óndú ā lɔfú í má kéē lɛ ɔdā olɔhi yá á.

⁵ Ācɛ ōhī gbɛlá ka ɛ̄cī éyi ɔ́ɔ cɛgbá fíyɛ́ ɛ̄cī ɔhá á, ɛ́ɛ́ nɛ̄ ācɛ ɔhá ā kē gbɛlá ka ɛ̄cī dóódu ɔ́ɔ kē wɛ ékpónú. Ɔnyɔɔnyɛ kóō lɛ ɔtū kú nū yéékpó lɛyíkwu ɛlā nyā.

⁶ Ɔ̄cɛ dúúmā nōo je ɛ̄cī ōhī odée ī yá lɛ ā ohígbū kóō lɛ ojīlīmā cɛ Óndú ā. Ɔ̄cɛ dúúmā nōo kē ī lé ɔdā dóódu ā ī lé, o yá ɛ́ɛ́ kóō lɛ ojīlīmā ce Óndú ā, ohígbū kéē gē le ahínyá tá Ɔwɔicō gbɔbū ɛ́ɛ́ nēé gē lé ɔdōlé ā á. Ɔ̄cɛ dúúmā nōó kē ī lé ŋ́ mā, ó lé ŋ́ o yá ɛ́ɛ́ kóō lɛ ojīlīmā ce Óndú ā, ohígbū ka é gē tá Ɔwɔicō ahínyá.

⁷ Ɔ̄cɛ dúúmā ká alɔ í yēeyī lɛ iyī nū ōfūnū ŋ́. Ɔ̄cɛ dúúmā nōo kē gekwú, ó kwú lɛ iyī nū ōfūnū ŋ́.

⁸ Ɔ́dāŋ ka alɔ kōō yēeyī, alɔ yēeyī lɛ Óndú ā, ámāŋ ɔ́dāŋ ka alɔ gekwú, alɔ kwú lɛ Óndú ā. Ó lɛ ā mɛ́ɛ̄ ā, ɔ́dāŋ́ ka alɔ kōō yēeyī ámāŋ nɛ̄ alɔ gekwú, alɔ wɛ ákú Óndú ā.

⁹ Ohígbū ɔdā nyā nɛ̄ Ohɔ́nyɛtá kwú klla le héyī ŋmá ɔlékwū á. O yá kóō le pīya Óndú ká ācɛ nēe yēeyī mɛ́mla ācɛ nēe gekwú.

¹⁰ Aá ā, nēe ī lé ēpēēpū ā, ɔdíyá nɛ̄ aá ī kɛpɔ̄ tū ɔyínɛ́ aá ɔhá ā? Aá nēe ī lé ɔdā dóódu ā, ɔdíyá nāa gē leyī gwō ayínɛ́ aá o hile bónū ā? Ohígbū ka odúúdú alɔ géē háyi iyɔ̄bū Ɔwɔicō kóō hɛ́pɔ̄ kú alɔ.

¹¹ Ohígbū kéē tá ɔ̄ ipú ɔkpá kú ɛlɔ̄ɔwɔicō ā ka Óndú ā kahíníī, “Ɔdā nōo yá ɛ́ɛ́ nɛ̄ n wɛ Ɔwɔicō nōo yēeyī ā, ɛjɛ̄ɛ̄jī ācɛ dóódu géē lɛ okwúukwu kwajɛ gā um. Ɛjɛ̄ɛ̄jī ācɛ dóódu kē í cɛ̄ tɛ́ɛcɛ ka n wɛ Ɔwɔicō.”

¹² Ɔnyɔɔyɛ kú alɔ géē kɔkɔ kú iyī nū lɛ Ɔwɔicō.

Ā cɛ̄ lɛ ɔ̄cɔ̄lóhɔ́nyɛtá ɔ́mpa awɔ bī íne kú Ɔwɔicō ŋ́

¹³ Ó lɛ ā, ālɔ̄ híī ŋmó iyī alɔ ɛpɔ̄bí gɛ ŋ́. Ikɔkɔ ɔ́ɔmā, ālɔ̄ lɛ ɔ́ kaŋmó ipú ɔtū kú alɔ ká alɔ í gáā yá ɔdā nōo í yá kú ɔ́mpā alɔ kóō bīyíne kú Ɔwɔicō ŋ́.

¹⁴ Ɔdā nōo yá ɛ́ɛ́ nɛ̄ n cɛ̄ɛ̄lā Óndú Ujísɔ̄si ā, n jé cāā ka ɔdōlé dúúmā í bɔ̄bí abɔ̄yī nū ŋ́, amáŋ ɔ́dāŋ ka ɔ̄cɛ éyi ka ɔdōlé ōhī ɔ́ɔ ī bɔ̄bí, ó lɛ ā ó kē í bɔ̄bí lɛ ɔ̄cɛ ɔ́ɔmā.

¹⁵ Ɔ́dāŋ ka a ī yá ká ayínɛ́ uwɔ kéē lɛ íne kú Ɔwɔicō bīya ohígbū ka a ī lɛ abɔ̄ kwɔtū ō lé ɛdɔ kú ɔdōlé éyi piíí, ó lɛ ā ɔdā nāa ī yá ā mafú ka á yíihɔtū tá ɔyínɛ́ ɔ̄ ɔ́ɔmā gɛ ŋ́. Ā híī cɛ̄ lɛ ɔdōlé nāa ī lé ā lɛ ɔ̄cɛ nɛ̄ Ohɔ́nyɛtá kwú ohígbū ā yíífi ŋ́.

¹⁶ Ohígbū ɔ́ɔmā aá híī yá kú ācɛ kéē ŋmó aá okónu ohígbū ka aá yɔ̄ ī yá ɔdā nɛ̄ aá gbɛlá ka ɔ́ɔ lɔhi ā ŋ́.

¹⁷ Ohígbū ka eko nɛ̄ ɔ̄cɛ ī kɛlā ajɛ ō gbō kú Ɔwɔicō, ɔ̄cɛ í yɔ̄ ī kɛlā lɛyíkwu íne kú ɔdōlé mɛ́mla ɔdā ō gwá ŋ́, amáŋ ɔ̄cɛ ī kɛlā lɛyíkwu o yá ɔdā nɛ̄ Ɔwɔicō dɔɔ̄kā, o bá ɛbɔ́ mla anú, mɛ́mla o lɛ ɔtūnɛhɛ̄ nɛ̄ Alelékwū Ihɔ ī je ā.

¹⁸ Ɔ̄cɛ nōo ī yúklɔ́ lɛ Ohɔ́nyɛtá ɔwɛ ɛ́gɛ́nyā kē í yá kú ɔtū kóō he Ɔwɔicō, ó klla kē í yá kú ācɛ kéē cɛ̄tra anú.

¹⁹ Ohígbū ɔ́ɔmā alɔ í yɔ̄ ī cēyītīkwū ká ālɔ̄ yá ɔdā nōo í yá kú ācɛ kéē bá ɛbɔ́ mla iyī uwā mɛ́mla o yá ɔdā nōo í tá ɔ́mpa uwā abɔ̄ kéē le lɔfú iyē.

²⁰ Ā híī lɛ ɔdā nɛ̄ Ɔwɔicō yá ā bīya ŋ́, ohígbū ka a ī gbɛlá ka anúɔ lɔfú lé ɛdɔ kú ɔdōlé dóódu glá. Ɔdōlé dóódu lɔhi ō lé ɔkwɛ̄yi, amáŋ ó bɔ̄bí kú ɔ̄cɛ dúúmā kóō yá ɔdā nōo í yá kú ɔ̄cɛ ɔhá kóō bīya íne kú Ɔwɔicō.

²¹ Ɔdā nōo lɔhi ā wɛ ka aá lɛ iyī aá tū ŋmá o yɔ̄ ī lé ɔdōlé, yɔ̄ ī gwá ejé, ámāŋ ka o yɔ̄ ī yá ɔdā dúúmā nōo í yá kú ayínɛ́ aá kéē bīya íne kú Ɔwɔicō.

²² Aá lɛ abɔ̄ bī ɔdā nɛ̄ aá cɛ̄ lɛyíkwu ɔdā nyā ā, amáŋ ɛ̄nyā kóō yɔ̄ ɔtāhɛ̄ kú aá mɛ́mla Ɔwɔicō. Ɔtū ī he ɔ̄cɛ ɔkwɔ̄ɔ̄kwɛ̄yi ɔ́dāŋ kóō ŋmó iyī nū ɛpɔ̄bi ŋ́, eko nōó ī lé ɔdā nōó gbɛlá ka ɔ́ɔ lɔhi ā.

²³ Amáŋ ɔ́dāŋ ka ɔtū kú ɔ̄cɛ ī bɛ́ɛpa lɛyíkwu ɔdā nōó lé ā, Ɔwɔicō lɛ ɛpɔ̄bí ŋmó uwā eko nēé lé ā, ohígbū ká ucē kú uwā í yɛ ŋmá ɔtōkpóce Ɔwɔicō ŋ́. Ɔdā dóódu nōó kē yɛ ŋmá ɔtōkpóce Ɔwɔicō ŋ́ mā wɛ ínoōbīya.