ƆDĀ NĒÉ MAFÚ LƐ UJƆ́ƆNI 7 - Ubáyíbu kú Idɔma

Ɔwɔicō lɛ ācɛ Ísrɛ̄lu úlā ofigwáahātá fukɔ̄ údɔ̄bū

¹ Igbīhi ɛjɛ̄ɛ̄jī ɔdā nyā, n má aálelékwū-ōtɛ̄hɔ̄ ɛnɛ māháyi ɔ́kíkā ɛnɛ kú ɛcɛ a, lɛ aówu nēe tá ŋmá ɔ́kíkā ɛnɛ kú ɛcɛ ā kwútū cɛ́ɛ́ kú owu kóō tá klá ɛcɛ, ámāŋ ísu ámāŋ ɔcí dúúmā ŋ́.

² Anɔ́ɔ n má alelékwū-ōtɛ̄hɔ̄ ɔhá yɔ̄ ī wā ŋmá ɛnɔ̄ɔ̄cī bī ɔdā o le fu ɔdā ukɔ̄ kú Ɔwɔicō nōo yēeyī ā abɔ̄. Ó lɛ ɔkɔ cɛyí dɛ̄gba hī aálelékwū-ōtɛ̄hɔ̄ ɛnɛ nɛ̄ Ɔwɔicō je ɔfú lɛ uwá kéē lɛ ɛcɛ mɛ́mla ísu kpó bīya ā.

³ Ó yɔ̄ ī ka kahíníī, “Aá híīī bīya ɛcɛ, ámāŋ ísu nɛ̄hi ā ámāŋ aɔ́cí ɛ́ ŋ́ jāā gbéeko nɛ̄ alɔ lɛ ācocɛ̄hɔ̄ kú Ɔwɔicō fukɔ̄ údɔ̄bū.”

⁴ Anɔ́ɔ é da um ka áluka kú ācɛ nēé fukɔ̄ kú Ɔwɔicō údɔ̄bū ā wɛ úlā ofigwáahātá. É ŋmá ipɔ́ɔma igwɛ́ɛpa kú Ísrɛ̄lu ā.

⁵ É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Ujúda. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Urúbɛ̄n. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Ugádi.

⁶ É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Ássa. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Unáfutāli. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Umanásɛ.

⁷ É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Usímīyɔn. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Ulífāyi. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Ísāka.

⁸ É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Usébūlɔn. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Ujósɛ̄fu. É le ācɛ úlā ofucigwó (12,000) fukɔ̄ údɔ̄bū ŋmá ipú ācɛ ipɔ́ɔma kú Ubénjamīn.

Ɛbɛ lɛyíkwu ɛwa nɛ̄hi kú ācɛ nēé fla ā

⁹ Igbīhi ɛ̄nyā, n pīyeyī, anɔ́ɔ n má ɛwa nɛ̄hi kú ācɛ, nɛ̄ ɔ̄cɛ dúú í gbaálūka glá ŋ́, nēe ŋmá éwo mɛ́mla ipɔ́ɔma mɛ́mla ācɛ mɛ́mla ucē ɛyɛ́ɛyɛ́yí dóódu á. É hayi iyɔ̄bū akpa kú ɔcɛ́ mɛ́mla iyɔ̄bū kú Ɔyí álá ā lɛ awulú nɛ̄hɛ́ wiyē. Ɔnyɔɔnyɛ kú uwā bī ánkpálī abɔ̄.

¹⁰ É lɛ ɔkɔ cɛyí dɛ̄gba kahíníī, “Ɔwɔicō kú alɔ nōo cīce akpa kú ɔcɛ́ ā mɛ́mla Ɔyí álá lɛ alɔ nyatá ɛɛ́.”

¹¹ Ɛjɛ̄ɛ̄jī aálelékwū-ōtɛ̄hɔ̄ ā māháyi lɛ akpa kú ɔcɛ́ ā, mɛ́mla anyākwɔ́cɛ ā, mɛ́mla aɔ́dā oyēeyī ɛnɛ ā yɛjīlatá biílí. Anɔ́ɔ é gaá gbo klá ajɛ lɛ eyī pīya klá ajɛ iyɔ̄bū akpa kú ɔcɛ́ ā, le ɛ̄gbā gbā Ɔwɔicō á.

¹² É bá ī ka kahíníī, “Aamí! Alɔ cɛ̄tra Ɔwɔicō kú alɔ klla tá ɔ̄ ahínyá piyóó piyóó. Ohígbū koó jáglīmā nɛ̄hi, jéeyī nɛ̄hi, lɛ ojīlīmā nɛ̄hi, lɛ íkwu nɛ̄hi, klla lɛ ɔfú iyē nɛ̄hi. Aamí.”

¹³ Anɔ́ɔ éyi kú anyākwɔ́cɛ ā da um ɔ̄kā kahíníī, “Ānyɛ bá lɛ awulú nɛ̄hɛ́ wiyē yɔ̄ ā. Ini nēé kē ŋmá ā?”

¹⁴ N da ɔ́ kahíníī, “Ɔkpani, awɔ jé uwā ā.” Anɔ́ɔ ó da um kahíníī, “Aɛ́nɛ̄ e bá nyā wɛ ācɛ nēe wi ŋmá eko kú ákanya nɛ̄hi ā á. É lɛ awulú kú uwā kpó na, klla le yá kóō le pīya ɛnɛ̄hɛ́ ipú oyī kú Ɔyí álá ā ɛɛ́.

¹⁵ Ɔ́ɔmā yá ɛ́ nēé māháyi iyɔ̄bū akpa kú ɔcɛ́ kú Ɔwɔicō, gē cɛ̄ ɔ̄ ɛhɔ̄ ɔlɛ́ɛnɔ mɛ́mla otú ipú Agblīihɔ-nɛ̄hi kú nū á. Anú nōo cīīce akpa kú ɔcɛ́ ā géē yɔ̄ pī uwā klla í gbō uwā.

¹⁶ Ɛmiyɛ mɛ́mla ijēēnyi í gáā ŋmó uwā gɛ ŋ́. Ɛnɔ ámāŋ ka iyē okwɔ́ɔlá í kē gáā je unwalu lɛ uwá gɛ ŋ́.

¹⁷ Ohígbū ka Ɔyí álá ā nōo klá ɔtāhɛ̄ akpa kú ɔcɛ́ ā, géē wɛ ɔ̄cɛ nōo gē leyīkwu uwá bɛ̄ɛka ɛ́gɛ́nɛ̄ ɔ̄cogbāálá gē yá aálá ā. Ó kē í gbō uwā ga njɔɔlɔ kú éŋkpɔ̄ nōo gē je oyēeyī. Ɔwɔicō kē géē nya odúúdú agīje ŋmá uwā eyī.”