ƆDĀ NĒÉ MAFÚ LƐ UJƆ́ƆNI 5 - Ubáyíbu kú Idɔma

Ɔyí álá ā mīyɛ ɔkpá ā ŋmá ɛgiyí Ɔwɔicō

¹ N má ēpɔ̄kpá oōhā wu abɔ̄lɔ́ná kú anú nōo cīīce akpa kú ɔcɛ́ ā. É lɛ ɔkpá tá tū abɔ̄ ɛpɛplɛ́ɛpa kú ɔkpá ā. Anɔ́ɔ é lɛ ɔja hɛ́ bá ɔ̄ ɛga ahāapa á.

² Anɔ́ɔ n má alelékwū-ōtɛ̄hɔ̄ olɔfú éyi le ɔkɔ cɛyí yɔ̄ gē dɔɔ̄kā ka ɔnyɛ lɛ íkwu kóō lɛ ɔja ā fō ŋmá ēpɔ̄kpá oōhā ā, cɛ́ɛ́ kóō lɛ ɔ́ nwūla á.

³ Amáŋ ɔ̄cɛ dúúmā í yɔ̄ ipú ɔkpáncō amáŋ ɛcɛ amáŋ ɔlékwū nōo lɔfú nwūla ēpɔ̄kpá oōhā ā cɛ́ɛ́ kóō lɛ ipú nū má ŋ́.

⁴ N jikwū nɛ̄hi abɔ̄ é má ɔ̄cɛ dúúmā nōo cíkā kóō nwūla ēpɔ̄kpá oōhā ámāŋ kóō má ipú nū ŋ́ mā.

⁵ Anɔ́ɔ éyi kú anyākwɔ́cɛ ā da um kahíníī, “Ā jikwū ŋ́. Mɔ́ɔ̄, ɔ̄cɛ nēé hī ka ‘Ágábá nōo ŋmá ipɔ́ɔma kú Ujúda ā’, ‘Ɔ̄cɛ Olɔfú nɛ̄hi nōo wɛ Ɔyɔ́ɔ́yí kú Udɛ́fīdi, ɔcɛ́ ā’, le yálé ɛɛ́. Ohígbū ɔ́ɔmā, ó kē le íkwu lɛ nōó ī fō ɔja ahāapa ā, cɛ́ɛ́ kóō lɛ ēpɔ̄kpá oōhā ā nwūla.”

⁶ Anɔ́ɔ n má ɔyí álá māháyi ɔtāhɛ́ kú akpa kú ɔcɛ́ ā. Aɔ́dā oyēeyī ɛnɛ ā mɛ́mla anyākwɔ́cɛ ā le yɛjīla anú tá. Ó lɛbɛ̄ɛka ɔdā nēé tɛtɛ lɛ ɔ́ ŋmó ā. Ó lɛ ajī ahāapa. Ó kē lɛ aíkpēyī ahāapa. Aíkpēyī ā kē wɛ aálelékwū ahāapa kú Ɔwɔicō nōo tɛ̄hɔ̄ ga ɛga dóódu kú ɛcɛ ā á.

⁷ Ɔyí álá ā nyɔ̄ gáā mīyɛ ēpɔ̄kpá oōha ā ŋmá abɔ̄lɔ́ná kú ɔ̄cɛ nōo cīīce akpa kú ɔcɛ́ ā.

⁸ Abɔ̄ ó mīyɛ ēpɔ̄kpá oōhā ā, aɔ́dā oyēeyī ɛnɛ mɛ́mla anyākwɔ́cɛ ofucɛnɛ ā má gbo klá ajɛ iyɔ̄bū Ɔyí álá ā. Ɔnyɔɔnyɛ kú uwā bī ogwúmogwú mɛ́mla ocíbú ugóolu nēe le ɔtulalī tū ɔ̄ omoomu. Ɔtulalī ɔ́ɔmā wɛ ɔkɔ nɛ ācɔ̄lóhɔ́nyɛtá gē gbā ā.

⁹ Aɔ́dā oyēeyī ɛnɛ ā mɛ́mla anyākwɔ́cɛ ofucɛnɛ ā gwííjē kahíníī, A cíkā ō kwú ēpɔ̄kpá oōhā ā ú, cɛ́ɛ́ ká ā lɛ ɔja kpó fō ŋmá anú. Ohígbū keé lɛ uwɔ ŋmó, anɔ́ɔ a bī íkwu kú uwɔ nōo wɛ ɛya nɛ̄ a gwó ā lɛ ācɛ fūla lɛ Ɔwɔicō ŋmá Ipɔ́ɔma dóódu, ŋmá ucē dóódu mɛ́mla ewo dóódu mɛ́mla ɛdɔ ācɛ dóódu á.

¹⁰ A kē lɛ uwá yá kéē le pīya éwo kú ācogwɛ́ɛya nēe ī cɛ̄ Ɔwɔicō kú alɔ ɛhɔ̄. É kē í cɔcɛ́ ipú ɛcɛ.”

¹¹ Abɔ̄ n yɔ̄ ī mɛ́ɛbɛ ā, n pó ɔkɔ kú aálelékwū-ōtɛ̄hɔ̄ úlúúlā okoklo igbíngbídi! É hayi pī akpa kú ɔcɛ́ ā, mɛ́mla aɛ́bɛ́ oyēeyī ɛnɛ ā, mɛ́mla anyākwɔ́cɛ ā.

¹² Anɔ́ɔ é lɛ ɔkɔ cɛyí gwííjē kahíníī, “Ɔyí álá nēé ŋmó ā cíkā nēé ī cɛ̄tra ɔ́ ohígbū koó lɛ íkwu mɛ́mla agbénú, mɛ́mla íjééyī mɛ́mla ɔfú iyē, mɛ́mla ojīlīmā mɛ́mla ofu nɛ̄hi. Cɛ́ɛ́ ká alɔ klla cɛ̄tra anú.”

¹³ Anɔ́ɔ n pó ɔkɔ kú odúúdú aɔ́dā oyēeyī kú ipú ɔkpáncō mɛ́mla ipú ɛcɛ, mɛ́mla ɔlékwū mɛ́mla ipú aísu, kwu odúúdú aɔ́dā oyēeyī nēe bá ɛga dúúdú nɛ̄ Ɔwɔicō yá ā á. É bá gē gwííjē kahíníī, “Aá cɛtra anú nōo cīce ɛyí akpa kú ɔcɛ́ ā mɛ́mla Ɔyí álá ā. Ká aá je ojīlīmā mɛ́mla ofu lɛ uwá, klla cɛ̄tra ɔfú iyē kú uwā eko dóódu piyóó!”

¹⁴ Anɔ́ɔ aɔ́dā oyēeyī ɛnɛ ā tóohi kahíníī, “Aamí (Óō le yá lɛ ā)” Anɔ́ɔ anyākwɔ́cɛ ā má gbo klá ajɛ, le ɛ̄gbā gbā Ɔwɔicō mɛ́mla Ɔyí álá ā á.