ƆDĀ NĒÉ MAFÚ LƐ UJƆ́ƆNI 4 - Ubáyíbu kú Idɔma

Ɛbɛ kú Ɔwɔicō abɔ̄ ó cīīce akpa kú ɔcɛ́ ɔkpáncō ā

¹ Abɔ̄ ɔ́ɔmā le yá i yɛ ā, n má ɛbɛ ɔhá abɔ̄ ɔdūngwɔ̄ɔwɛ éyi le nwūla tɔ́ɔtɛ́ ɔkpáncō. Anɔ́ɔ ɔkɔ nōo kɛlā bɛ̄ɛka opo nɛ̄ n pó yɔ̄ ī kɛlā ga um aflɛ́yí ā kahíníī, “Wā icō amānyā, cɛ́ɛ́ ká n lɛ ɔdā nōo géē yá igbīhāajɛ ā mafú ga uwɔ.”

² Ikpííkpó ɔ́ɔmā, alelékwū kú Ɔwɔicō wā í kwú um, anɔ́ɔ n má akpa kú ɔcɛ́ éyi nɛ̄ ɔ̄cɛ éyi cīīce anú ipú ɔkpáncō.

³ O má eyī kú ɔ̄cɛ ā gē fíyáajɛ bɛ̄ɛka o má eyī kú aɛ́cɔ̄ ō gbɔɔ́lá nēé hī ka ujáspa mɛ́mla Ukanéliyan ā. Ɔwohɔgwa nōo yɔ̄ ī fíyáajɛ lɛbɛ̄ɛka ɛ́mɛ̄radi lɛ akpa kú ɔcɛ́ ā yɛjīlatá.

⁴ Aákpa kú ɔcɛ́ ofucɛnɛ ɔhá le hɔ́ɔgba tū akpa kú ɔcɛ́ kú aflɛ́yí ā biílí. Anyākwɔ́cɛ ofucɛnɛ nēe lɛ úwé nɛ̄hɛ́ wiyē klla lɛ ukata kú ugóolu kwɛyí ā cīīce ɛyí aákpa kú ɔcɛ́ ā kpɛmm.

⁵ Ɔwolímanya yɔ̄ ī cɔ̄ɔlá wɛ̄ɛcɛ manya manya ŋmá akpa ɔcɛ́ ā. Akpáabana kē yɔ̄ ī gbo gblágádáá ŋmá anú dúú. Ɛmu ahāapa nēe wɛ aálelékwū kú Ɔwɔicō ā bá ī cɔ̄ɔlá iyɔ̄bū akpa kú ɔcɛ́ ā.

⁶ Ɔdée nōo lɛbɛ̄ɛka ɔkpá nɛ̄ éŋkpɔ̄ kú nū wɛ ogigo, nōo tá pāā á tá iyɔ̄bū kú akpa kú ɔcɛ́ ā. Aɔ́dā oyēeyī ɛnɛ nēe lɛ aíkpēyī alɛwa kɔ̄ klá uwá iyɔ̄bū mɛ́mla igbīhi ā le yɛ akpa kú ɔ̄cɛ ā jīlatá ɔkíka éyééye.

⁷ Ɛbɛ́ kú aflɛ́yí ā lɛbɛ̄ɛka ágábá ā. Ɔ́mpa ā gbla ɔbɛ́ɛna. Ɔ́mɛtá ā lɛ eyī nōo gbla ákú ɔlɛɛcɛ ā. Ɔ́mɛɛnɛ ā gbla okpé nōo yɔ̄ gē wu ā.

⁸ Ɔnyɔɔnyɛ kú aɔ́dā oyēeyī ɛnɛ ā lɛ aácá ɛhīlī. Aíkpēyī bá ɛga dóódu kú iyē kú uwā, kwu ɛháajɛ mɛ́mla eyīyɛ̄ɛcɛ kú aácá ā dúú. Kwu ɔlɛ́ɛnɔ kwu otú, é bá gē gwíije piyóó. É gē gwó kahíníī, “Ihɔ, Ihɔ, Óndú ā nōo wɛ Ɔwɔicō nōo lɔfu fíyɛ́ dúú ā tīihɔ̄. Anú yɔ̄ tɛtɛ ikée á, anú yɔ̄ abālɔbányā á, anú kē í wā ɛcɔ̄bū á.”

⁹ Eko dúúmā nɛ̄ aɔ́dā oyēeyī ā cɛ̄tra Anú nōo cīīce akpa kú ɔcɛ́ ā, je ojīlīmā lɛ ɔ́, klla tá ɔ̄ ahínyá nɛɛ,

¹⁰ anyākwɔ́cɛ ofucɛnɛ ā má gbo klá ajɛ iyɔ̄bū Ɔwɔicō nōo cīīce akpa kú ɔcɛ́ ā gē gbā ɔ̄ ɛ̄gbā. Cɛ́ɛ́ é lɛ ukata kú uwā fu ŋmá ɛyí kwú uwā í kpó tá bá ajɛ iyɔ̄bū akpa kú ɔcɛ́ ā. cɛ́ɛ́ é gē gwííjē kahíníī,

¹¹ “Óndú mɛ́mla Ɔwɔicō kú alɔ, A cíkā nēe ī cɛtra uwɔ, lɛ ojīlīmā ce uwɔ, klla cɛ̄tra uwɔ ohígbū ɔfú nɛ̄hi kú uwɔ. Ohígbū ka awɔ yá ɛjɛ̄ɛ̄jī odée á. Abɔ̄ a tíne kéē yɔ̄ ā nɛ̄ a kē yá odúúdú uwā á.”