ƆDĀ NĒÉ MAFÚ LƐ UJƆ́ƆNI 3 - Ubáyíbu kú Idɔma

Olɛhɔ̄ nōó tū fu Icɔ́ɔ́ci kú Usádisi ā

¹ Anɔ́ɔ o da um kahíníī, “Le tá fu ɔ̄cotɛ̄hɔ̄ kú icɔ́ɔci kú Usádisi ka ami nōo lɛ íkwu ɛyí kú aálelékwū ahāapa nēe ī cɛ̄ Ɔwɔicō ɛhɔ̄ ā mɛ́mla aínyílɔ́ɔwɔ ahāapa ā kahíníī, ‘N jé ucē nɛ̄ aá gē yá ā. Aá lé iyē ka aá yēeyī amáŋ aá gekwú ɛɛ́!

² Aá le héyī ŋmá ɔlékwū, kú aá lɔfu tū ɔdā nōo hile lɛ aá ā iyē ohígbū nōo géē kwú dúúdú. Ohígbū ka n le má ka aá í yá aɔ́dā nɛ̄ aá ī yá ā gaajɛ ɛ̄nɛ̄ Ɔwɔicō tíne ā ŋ́.

³ Aá bla kwu ɔkwɛ̄yi kú Ohɔ́nyɛtá nēé nwū aá ā. Aá bī ɔ̄ le yúklɔ́ cɛ́ɛ́ kú aá le pīyabɔ̄ ŋmá íne nɛ̄ aá bá ī bīya ā. Ɔ́dāŋ́ ka aá héyī ŋ́, n géē wā ɛgiyí aá bɛ̄ɛka uwī ā, nɛ̄ aá kōō gáā jé eko nɛ̄ n gáā wā ā ŋ́.

⁴ Amáŋ ācɛ ōhī bá ipú aá Usádisi nēe lɛ īyī uwā tū yēŋēē ŋmá íne o bīya. Ācɛ ɛ́gɔ́ɔmā géē bī úwé nɛ̄hɛ́ yɛ mɛ́mla um, ohígbū kéē cíkā.

⁵ Ɔ̄cɛ nōo le ɔfú kú ebilíi yálé géē bī úwé nɛ̄hɛ́ bɛ̄ɛka ācɛ mbá ā. Ń kē gáā nya iyē nū ŋmá ɔkpá kú ācɛ nēe yēeyī ā ŋ́. N géē ka tɛ́ɛcɛ iyɔ̄bū kú Ádā um mɛ́mla aálelékwū-ōtɛ̄hɔ̄ kú nū koó wɛ ɔ̄cɛ ɔlɛ́ um.

⁶ Ɔ̄cɛ nōo ī páhɔ̄ kóō pó ɔdā nɛ̄ Alelékwū Ihɔ gē ka lɛ aícɔ́ɔci ā ā.

Olɛhɔ̄ nōó tū fu Icɔ́ɔ́ci kú Ufiladɛ́lfiya ā

⁷ Anɔ́ɔ ó da um kahíníī, “Le tá fu ɔ̄cotɛ̄hɔ̄ kú Icɔ́ɔ́ci kú Ufiladɛ́lfiya ka ami kwú īyī um ú lɛ Ɔwɔicō dúúdú, kē ī cɛ̄ ɔ̄ ɛhɔ̄ kpaakpa ā. Ami klla bī ɔyíigodó kú Udéfīdi á. Ɔ́dāŋ́ nɛ̄ n lɛ ɔwɛ nwūla ɔ̄cɛ dúú í gwū ɔ̄ glá ŋ́. Ɔ́dāŋ́ nɛ̄ n kē le ɔwɛ gwū, ɔ̄cɛ dúú í nwūla anú glá ŋ́.

⁸ N jé ɔdā nɛ̄ aá ī yá ā. Nááná nɛ ɔfu kú aá í nwuné ŋ́ mā, aá lɛyítáajɛ lɛ ɛlā kú um ā kē háyi kpaakpa ga um. Ohígbū ɔ́ɔmā, n lɛ ɔwɛ nwūla tɔ́ɔtɛ́ lɛ aá ɛɛ́. Ɔ̄cɛ dúú í kē gwū ɔ̄ glá ŋ́.

⁹ Aá Jāhɔ̄! Ācɛ nēe gē gbā ebilíi ɛ̄gbā lɛbɛ̄ɛka ācɛ ɛgogbɔ̄ɔkɔ kú ebilíi, amáŋ nēe ī kɛ̄kɛ̄mgbɛ̄ ka aá wɛ ācɛ Ujíyu ā, n géē yá kéē wā í lɛ okwúukwu kwaajɛ iyɔ̄bū aá cɛ́ɛ́ kéē le jé ka aá he um ɔtū.

¹⁰ Ohígbū ka aá lɛ ɔ́da nɛ̄ n je lɛ aá kú aá kóō lɔtūlé eko kú ōwē ā yá ā, n géē lɛ aá tū ŋmá eko kú ojámá nōo géē wā lɛ odúúdú ācɛ kú ipú ɛcɛ nyā ā.

¹¹ N yɔ̄ ī wā ānāānā. Lɛ abɔ̄ bī ɔdā nɛ̄ a lɛ ā lɔfúlɔfú cɛ́ɛ́ ká ɔ̄cɛ dúúmā kóō híīī nú ukata nɛ̄ n géē je ga uwɔ ka a le yálé ɛɛ́ mā ŋ́.

¹² Ɔ̄cɛ dúúmā nōo le ɔfú kú ebilíi yálé, n géē je ɔ́ yá upíla ipú Agblīihɔ-nɛ̄hi kú Ɔwɔicō kú um. Ó gáā nyɛ̄ɛ̄ ŋmá ipú nū gɛ ŋ́. N géē tá iyē kú Ɔwɔicō kú um, mɛ́mla iyē kú igelī kú Ɔwɔicō kú um ā tū ɔ̄ iyē nōo lé ka Ujerúsālɛm ɛ̄yīpɛ̄ nōo í wāajɛ ŋmá ɔkpáncō ɛgiyí Ɔwɔicō kú um ā. N kē í tá iye ɛ̄yīpɛ̄ kú um ā tū ɔ̄ iyē dúú.

¹³ Ɔ̄cɛ nōo ī páhɔ̄ kóō jāhɔ̄ lɛ ɔdā nɛ̄ Alelékwū Ihɔ gē ka lɛ aícɔ́ɔci ā ā!

Olɛhɔ̄ nōó tū fu Icɔ́ɔ́ci kú Ulawodésiya ā

¹⁴ Anɔ́ɔ o da um kahíníī, “Le tá fu ɔ̄cotɛ̄hɔ̄ kú icɔ́ɔci kú Ulawodésiya ka ami nōo wɛ Aamí, nōo ī cījáalí kú ɔkwɛ̄yi kú Ɔwɔicō ā kpaakpa ā ka ɛlā nyā á. Ami nɛ̄ ɔdā dúúmā nɛ̄ Ɔwɔicō yá ā ŋmá ɛgiyí um ā kahíníī,

¹⁵ ‘N jé ɛjɛ̄ɛ̄jī ɔdā nɛ̄ aá ī yá ā. N jé ka aá hīlaŋdɔ́ ŋ́ mā aa, aá kē kwɔ́ɔ́lá ŋ́. Ó géē yɛ í he um ɔtū nɛ̄hi ka aá le kwɔ́lá ámāŋ ka aá le hīlaŋdɔ́.

¹⁶ Abɔ̄ aá lɛbɛ̄ɛka éŋkpɔ̄ nōo le wulɔwulɔ, í kē kwɔ́lá ŋ́ ámáŋ kē hīlaŋdɔ́ ŋ́ mā, n géē tá aá tónū ɛ́gɛ́nɛ̄ ɔ̄cɛ gē tá éŋkpɔ̄ nōo he ɔ́ ɔtū ŋ́ wɛ̄ɛcɛ ŋmá okónu kú nū ā.

¹⁷ Aá bá ī ka kahíníī, ‘N le gbagbénú, ó kē le lɔhi ga um ɛɛ́. Aɔ́dā nēe ce um ɛgbá ā, n ké lɛ uwá kpó lɛ ɛɛ́.’ Amáŋ aá jé ɛ́gɛ́nɛ̄ aá táncā, tēyīnyinyi, gbɛhá, peyī, klla tóohɛ́ɛwa lɛ ā ŋ́.

¹⁸ Ń gē kɛlā lɛ aá ka aá lɛ ugoolu nēé bī ɔlá le na lá ŋmá abɔ̄ um, cɛ́ɛ́ ká aá le gbagbénú ɔkwɔ̄ɔ̄kwɛ̄yi. Aá lɛ úwé nɛ̄hɛ́ lá kú aá le wiyē, cɛ́ɛ́ ká aá tóohɛ́ɛwa ɛ́ nɛ̄ uwēyī gē kwú aá gɛ ŋ́. Aá lɛ anɔ̄ otēeyī lá dúú, cɛ́ɛ́ ká aá le tū eyī kú aá mɛ́ɛbɛ lɔhi.

¹⁹ Ācɛ nēe he um ɔtū, nɛ̄ n gē dɛ̄gba tū uwā, klla gē yá uwā italā dúú á. Ohígbū ɔ́ɔmā, aá cēyītīkwū ká aá le pīyabɔ̄ ŋmá íne nɛ̄ aá ī bīya ā.

²⁰ Aá jāhɔ̄! N hayi pī okompīinu gē lɛ abɔ̄ gbo ɔwɛ. Ɔ́dāŋ́ ka ɔ̄cɛ dúú lɛ ɔkɔ kú um pó, anɔ́ɔ ó lɛ ɔwɛ nwūla ga um, n géē bēhé wā ipíinu ɛgiyí nū. N géē le ɔdōlé mɛ́mla anú, ó kē í lé mɛ́mla um.

²¹ Ɔ̄cɛ nōo le ɔfú kú ebilíi yálé, n géē je ɛga lɛ ɔ́ kóō cɔɔcɛ́ mɛ́mla um ɛyí akpa kú ɔcɛ́ kú um, ɛ́gɛ́nɛ̄ n yá ɔfú kú ebilíi lé, kē cɔɔcɛ́ mɛ́mla Ádā um akpa kú ɔ̄cɛ kú nū ā.

²² Ɔ̄cɛ nōo ī páhɔ̄ kóō jāhɔ̄ lɛ ɔdā nɛ̄ Alelékwū Ihɔ gē ka lɛ aícɔ́ɔci ā ā!”