ƆDĀ NĒÉ MAFÚ LƐ UJƆ́ƆNI 22 - Ubáyíbu kú Idɔma

¹ Alelékwū-ōtɛ̄hɔ̄ ā lɛ ísu kú énkpɔ̄ nōo ī je oyēeyī ā mafú ga um. Ó le yēŋēē nɛ̄ ɔ̄cɛ ī má ɛháajɛ nū bɛ̄ɛka ogigo ā. Ó pɛ́ ŋmá akpa kú ɔcɛ́ kú Ɔwɔicō mɛ́mla Ɔyí álá ā.

² Ó yɔ̄ ī pɛ́ wāajɛ bū ɔtāhɛ́ úláyi nɛ̄hi kú igelī ā. Aɔ́cí nɛ̄ īkpō kú uwā gē je oyēeyī nēe gē gwá aíkpō igbigwɛ́ɛpa iháyí ā yɔ̄ ābɔ̄ ɛplɛ́ɛpa kú ísu ā. É kē ī gwá īkpō igbéyi ɔyā dóódu. Ēpū kú aɔ́cí ā wɛ ɔdā nōo gē hɛ́ aéwo dóódu tá ŋmá ōcē

³ Ɔdā dúú nɛ̄ Ɔwɔicō lɛ okónu tá lɛ ɔ́ í gáā yɔ̄ ipú igelī ɔ́ɔmā glá ŋ́. Akpa kú ɔcɛ́ kú Ɔwɔicō mɛ́mla Ɔyí álá géē yɔ̄ ipú igelī, cɛ́ɛ́ ācocɛ̄hɔ̄ kú nū géē bá ī gbā ɔ̄ ɛ̄gbā

⁴ É géē bī īkpēyī kú abɔ̄yī uwā má īkpēyī kú Ɔwɔicō abɔ̄yī nū. É géē tá iye nū bá uwā udɔ̄bū.

⁵ Otú í gáā bī abɔ́ɔ ŋ́, agege ámāŋ ka ɛnɔ í kē gáā cɛgbá gɛ ŋ́. Ohígbū kú Óndú Ɔwɔicō géē wɛ ɔlá ofíyajɛ kú uwā ā. É kē í cɔcɛ́ oŋméeko téeko piyóó.

Ujísɔ̄si cokónu ō pīyɛyí wɛ̄ɛcɛ

⁶ Anɔ́ɔ alelékwū-ōtɛ̄hɔ̄ ā da um kahíníī, “Odúúdú ɛlā nēe bá nyā wɛ ɔkwɛ̄yi nɛ n. É kē tōō lɔtūce. Óndú ā nōo wɛ Ɔwɔicō nōo gē je Alelékwū kú nū lɛ ācomɛ́ɛbɛ ā lɛ alelékwū-ōtɛ̄hɔ̄ kú nū tɛ̄hɔ̄ kóō lɛ ɔdā nōo í yá piíí eko kpiíí nōo í wā ā mafú lɛ ācocɛ̄hɔ̄ kú nū.”

⁷ Ujísɔ̄si kahíníī, “Aá jāhɔ̄! N géē wā ānāānā.” Ákú ācɛ nēe lɛyítáajɛ lɛ ɛlā kú ɛbɛ́ nēe má nyā ā lɔhi nɛ̄hi.

⁸ Ami, nōo wɛ Ujɔ́ni ā, wɛ ɔ̄cɛ nōo pó klla má aɔ́dā nēe bá nyā á. Eko nɛ̄ n lɛ aɔ́dā mbá ā pó klla lɛ uwá má ā, n má gbo klá ajɛ iyɔ̄bū alelékwū-ōtɛ̄hɔ̄ nōo ma aɔ́dā nēe bá ā fú ga um ā. N gáā gbā ɔ̄ ɛ̄gbā dúú.

⁹ Amáŋ ó da um kahíníī, “Ā híīī yá lɛ ā ŋ́! N gē cɛ̄ Ɔwɔicō ɛhɔ̄, bɛ̄ɛka awɔ mɛ́mla ayínɛ́ awɔ, ācomɛ́ɛbɛ ā, mɛ́mla odúúdú ācɛ nēe ī lɛyítáajɛ lɛ ɛlā kú ɔkpá nyā ā dúú. Gbā Ɔwɔicō ɛ̄gbā!”

¹⁰ Anɔ́ɔ ó da um kahíníī, “Ā híīī lɛ ɛlā kú ɛbɛ nɛ̄ a má tá ipú ɔkpá nyā tayínū lɛ ɔ̄cɛ dúúmā ŋ́. Ohígbū ka eko nɛ̄ aɔ́dā nyā géē yá ā má kwajaajɛ ɛɛ́.

¹¹ Ɔ̄cɛ nōo ī yá ɔdōōbɔ̄bí ā, lɔfú yɔ̄ ī yá ɔdōōbɔ̄bí ā gɔbū kpɔ́. Ɔ̄cɛ nōo gē yá ucē icíci ā kē lɔfú yɔ̄ ī yá ucē icíci gɔbū kpɔ́. Ɔ̄cɛ dúú nōo ī yá ucē olɔhi kóō bēē yá ucē olɔhi gɔbū kpɔ́. Ɔ̄cɛ dúúmā nōo lā oyēeyī otīihɔ kóō bēē tīihɔ gɔbū kpɔ́.”

¹² Ujísɔ̄si kahíníī, “Aá jāhɔ̄! N géē wā ānāānā! N géē bī ulé kú um wā ká n cíla ɔnyɔɔnyɛ ulé kú ɔdā nōó yá ā.

¹³ Ami wɛ aflɛ́yí mɛ́mla ámōōmɛ á, ami kē wɛ ohútu mɛ́mla oŋmɛ́yí á.”

¹⁴ Ákú ācɛ nēe lɛ awulú kú uwā na péee ā lɔhi nɛ̄hi. É géē lɛ íkwu ō lé īkpō kú ɔcí nōo īkpō kú nū gē je oyēeyī ā. É klla géē bū aókonɔɔwɛ ā ga ipú igelī ā.

¹⁵ Ācɛ nēe ī yá ucē icíci ā, mɛ́mla ācoyíimabɔ̄ mɛ́mla ɔhɛ ā, mɛ́mla ācɛ nēe ī cikpo ɔnyā nōó wɛ ɔnyā uwā ŋ́ mā, mɛ́mla ācoŋmɔ́ɔ̄cɛ, mɛ́mla ācopɛ̄cí, mɛ́mla ɔ̄cɛ dúúmā nɛ̄ ɛ̄kɛ̄mgbɛ̄ he ɔ́ ɔtū nōo kē ī kɛ̄mgbɛ̄ ā géē bá eyīyɛ̄ɛcɛ kú igá kú igelī ā.

¹⁶ “Ami nōo wɛ Ujísɔ̄si ā lɛ alelékwū ōtɛ̄hɔ̄ kú um tɛ̄hɔ̄ kóō gaá lɛ aɔ́dā nēe bá nyā ka tɛ́ɛcɛ lɛ aá nēe bá ipú aícɔ́ɔci ā. N wɛ ɔyɔ́ɔ́yí kú ipɔ́ɔmā kú Udɛ́fīdi. Ami wɛ ínyílɔɔ́ɔwɔ ofíyajɛ nɛ̄hi kú ɔ̄cɔ̄ɔ̄cī á.”

¹⁷ Alelékwū Ihɔ ā mɛ́mla Ɔnyā nɛ̄ Ɔyí álá ā gáā lɛ ā da Ujísɔ̄si kahíníī, “Wā!” Ɛjɛ̄ɛ̄jī ācɛ nēe gē pó ɛlā nyā ā kéē da Ujísɔ̄si dúú kahíníī, “Wā!” Wā, ɔ̄cɛ dúú nɛ̄ íjéényī ī ŋmó ɔ̄. Ɔ̄cɛ dúú nōo tíne kóō wā í mīyɛ éŋkpɔ̄ nōo ī je oyēeyī ā alahá.

Ahɔ̄ ámōōmɛ nēé pi ā mɛ́mla okónu ōce

¹⁸ Ami, Ujɔ́ni pi ɛjɛ̄ɛ̄jī ācɛ nēe ī pó olɛhɔ̄ kú ɛbɛ nɛ̄ um má klla tá tāajɛ ipú ɔkpá nyā ā. Ɔ́dāŋ́ ka ɔ̄cɛ dúúmā lɛ ɔdā dúú ɔhá ka tū ipú nū, Ɔwɔicō géē ka aámíyā nɛ̄hi nēé cābɔ̄ ipú ɔkpá nyā ā tū italā kú nū lɛ ɔ́

¹⁹ Ɔ́dāŋ́ ka ɔ̄cɛ dúúmā kē kwú ɔdā dúúmā ú ŋmá ɛbɛ nɛ̄ n má tá tū ipú ɔkpá nyā ā, Ɔwɔicō géē je íkwu nōó je lɛ ɔ́ kóō le īkpō kú ɔcí nɛ̄ īkpō kú nū gē je oyēeyī ā mɛ́mla o bēhé ga ipú igelī kú Ɔwɔicō nēé cābɔ̄ ipú ɔkpá nyā ā ŋmá ɛgiyí nū.

²⁰ Ɔ̄cɛ nōo ka aɔ́dā nēe bá nyā tɛ́ɛcɛ ā kahíníī, “Īī ɔkwɔ̄ɔ̄kwɛ̄yi! N géē wā ānāānā!” Kóō le lɛ ā. Wā, Óndú Ujísɔ̄si!

²¹ Óndú Ujísɔ̄si kóō je ɛhi nɛ̄hi kú nū ā lɛ ɛjɛ̄ɛ̄jī ācɛ ɔlɛ́ ƆwɔicōAamí