ƆDĀ NĒÉ MAFÚ LƐ UJƆ́ƆNI 21 - Ubáyíbu kú Idɔma

Ɔkpáncō ɛ̄yīpɛ̄ mɛ́mla ɛcɛ ɛ̄yīpɛ̄

¹ Anɔ́ɔ n má ɔkpáncō ɛ̄yīpɛ̄ mɛ́mla ɛcɛ ɛ̄yīpɛ̄ á. Ɔkpáncō kú aflɛ́yí mɛ́mla ɛcɛ kú aflɛ́yí ā mɛ tāajɛ ɛɛ́, ísu kē gebí táajɛ dúú

² Anɔ́ɔ n má Igelī nɛ̄hi kú ɔlɛ́ Ɔwɔicō, nōo wɛ Ujerúsālɛm ɛ̄yīpɛ̄ ā, yɔ̄ ī wāajɛ ŋmá ɔkpáncō ɛgiyí Ɔwɔicō. É lɛ ɔ́ tútū bɛ̄ɛka ɔnyā nōo lɛ ifa yá gē gbēyī ɔbá nōo gáā lɛ ɔ́ ā.

³ Anɔ́ɔ n pó ɔkɔ éyi nōo kɛlā gbōmgbōm ŋmá akpa kú ɔcɛ́ ā yɔ̄ ī ka kahíníī, “O ŋmá abālɔbányā gɔbū Ɔwɔicō géē lā mɛ́mla alɛɛcɛ. Ó géē lā pī uwā, é géē wɛ ācɛ ɔlɛ́ nū. Ɔwɔicō abɔ̄yī nū kē í yɔ pī uwā, ó kē í wɛ Ɔwɔicō kú uwā.

⁴ Ó géē nya ɛjɛ̄ɛ̄jī agīje ŋmá īkpēyī kú uwā. Ikwū í gáā yɔ̄ gɛ ŋ́, ācɛ í gáā yēkwu gɛ ŋ́, ācɛ í gáā jikwū gɛ ŋ́, ācɛ í kē gáā jɔ́ɔnɔ gɛ ŋ́. Ohígbū ka aɔ́dā otɛtɛ ā le pɛ́ i yɛ ɛɛ́.”

⁵ Anɔ́ɔ anú nōo cīīce ɛyí akpa kú ɔcɛ́ ā kahíníī, “N yɔ̄ ī je ɛjɛ̄ɛ̄jī ɔdā dóódu yá ɛ̄yīpɛ̄!” Ó klla da um kahíníī, “Lɛ ɛ̄nyā tá tāajɛ, ohígbū ka ɛlā nēe bá ā wɛ ɔkwɛ̄yi, nōo tōō lɔtūce.

⁶ Anɔ́ɔ ó klla kahíníī, “Ó le yá kwɛyí ɛɛ́! Ami wɛ aflɛ́yí mɛ́mla ámōōmɛ á. Ami wɛ ohútu mɛ́mla oŋmɛ́yí ā. N géē je éŋkpɔ̄ nōo ī je oyēeyī ā lɛ ɔ̄cɛ nɛ̄ ijēnyi gē ŋmó ɔ̄ ŋmá njɔlɔ kú énkpɔ̄ nōo ī je oyēeyī ā alahá.

⁷ Ɔ̄cɛ dúúmā nōo le ɔfú kú ebilíi yálé, n géē kpó aɛ́hi ɔ́ɔmā lɛ ɔ́. N klla géē wɛ Ɔwɔicō kú nū, Ó kē í wɛ ɔyí um

⁸ Amáŋ ācoyúufi, mɛ́mla ācɛ nēe kwúcē ŋmá ō yɛce Ohɔ́nyɛtá ā, mɛ́mla ācɛ nēe ī yá ucē ɛbí, mɛ́mla ācoŋmɔ́ɔ̄cɛ, mɛ́mla ācɛ nēe ī cikpó ɔnyā nōo wɛ ɔnyā uwā ŋ́ mā, mɛ́mla ācoyíimabɔ̄ mɛ́mla aɔ́hɛ, mɛ́mla odúúdú ācokɛ̄mgbɛ̄ géē ŋmɛ́yí ipú ókpoó nɛ̄ ɔlá mɛ́mla ɛcōwō bá ī yi ipú nū ā. Ɔ́ɔmā kē wɛ ikwū ɔ́mpa ā á.”

Ujerúsālɛm ɛ̄yīpɛ̄ ā

⁹ Éyi kú aálelékwū-ōtɛ̄hɔ̄ nōo bī aócíbú ahāapa nɛ̄ aámíyā nɛ̄hi ámōōmɛ ā bá ipú uwā ā, gā ɛgiyí um yɔ̄ ī ka kahíníī, “Wā cɛ́ɛ́ ka n lɛ ɔnyā nɛ̄ Ɔyí álá ā gáā lɛ ā mafú ga awɔ.

¹⁰ Alelékwū Ihɔ kwú um, anɔ́ɔ ó kwú um ga ɛyí ɛfu olicō nɛ̄hi éyi á. Ó lɛ Ujerúsālɛm, Igelī kú ɔlɛ́ Ɔwɔicō ā mafú ga um abɔ̄ ó yɔ̄ ī wāajɛ ŋmá ɔkpáncō ɛgiyí Ɔwɔicō

¹¹ Ó kē yɔ̄ ī fíyáajɛ mɛ́mla ɛgahi nɛ̄hi kú Ɔwɔicō. Igelī ā yɔ̄ ī ceyī bɛ̄ɛka ɛcɔ̄ ōgbɔɔ́lá nɛ̄hi ā, bɛ̄ɛka Ujáspa ā, ó klla le péee bɛ̄ɛka ogigo nɛ̄ ɔ̄cɛ í mɛ́ɛbɛ bū ɔ̄ ā.

¹² Ó lɛ ɔdɔ nɛ̄hi nōo licō nɛ̄hi. Ó lɛ okonɔɔwɛ igwɛ́ɛpa, nɛ̄ aálelékwū-ōtɛ̄hɔ̄ igwɛ́ɛpa gē gbō uwā ā. É le iyē kú aípɔ́ɔma igwɛ́ɛpa kú Ísrɛ̄lu ā éyééye tá tū aókónɔɔwɛ ā éyééye

¹³ Okónɔɔwɛ ɛtá yɔ̄ ābɔ̄ éyééye kú abɔ̄ ɛnɛ ā. Ɛtá bá ɛnɔɔ̄cī, ɛtá bá ɛnɔɔ̄nɛ̄, ɛtá bá ɛhícō, ɛtá kē bá ɛháajɛ.

¹⁴ É ma ɔdɔ kú igelī ā ce ɛyí aɛ́cɔ̄ kú ikpíinu igwɛ́ɛpa. É le iyē kú ācotɛ̄hɔ̄ igwɛ́ɛpa kú Ɔyí álá ā éyééye tá tū aɛ́cɔ̄ ā éyééye.”

¹⁵ Alelékwū-ōtɛ̄hɔ̄ nōo kɛlā ga um ā bī ogbló kú ugóolu nēé ī le miya odée abɔ̄ kóō le miya Igelī ā, mɛ́mla aókónɔɔwɛ kú nū mɛ́mla ɔdɔ kú nū

¹⁶ Igelī ā lɛ ɔ́gɔgɔ́ ɛnɛ nēe jōnjīlɛ̄ déyídéyí. Olɔwá mɛ́mla olīkpō kú nū jōnjīlɛ̄. Alelékwū-ōtɛ̄hɔ̄ ā bī ogbló nēé ī le miya odée ā lɛ ɔ́ miya. Olīkpō kú nū, olɔwá kú nū, mɛ́mla olicō kú nū wɛ ukilómīta úlā ɛhīlī.

¹⁷ Alelékwū-ōtɛ̄hɔ̄ ā lɛ olicō kú ɔdɔ kú igá ā miya, anɔ́ɔ ó wɛ umíta ofɛtá ɛ́gɛ́nɛ̄ ācɛ gē miya odée ā.

¹⁸ É bī ɛcɔ̄ ogbɔlá nēé hī ka Ujáspa ā le yá ɔdɔ kú nū. Ɛ́nɛ́nɛ̄ ugóolu nōo le péee bɛ̄ɛka ogigo ā nēé bī le gwó ɔdā dóódu nōo yɔ̄ ipú igelī ā abɔ̄yī nū á.

¹⁹ É bī ɛdɔ ɛcɔ̄ ogbɔɔ́lá ɛyɛ́ɛyɛ́yí le yá ikpíinu nēé ma ɔdɔ kú igá kú igelī ā cɛyí uwá ā ifa. Ɛcɔ̄ aflɛ́yí kú ikpíinu ā wɛ ujáspa, ɔ́mpa ā wɛ usáfāya, ɔ́mɛtá ā wɛ ágēeti, ɔ́mɛnɛ ā wɛ ɛ́mɛ̄rāadi,

²⁰ ɔ́mɛhɔ̄ ā wɛ ónīisi, ɔ́mɛhili ā wɛ ukanélīyan, ɔ́mahāapa ā wɛ ukrísōlayíti, ɔ́mahātá ā wɛ ubɛríili, ɔ́mahāanɛ ā wɛ utɔ́pāasi, ɔ́migwó ā wɛ ukalsedɔ́ni, ɔ́migwóléyi ā wɛ utɔ́kwɔ̄yisi, ɔ́migwɛ́ɛpa ā kē wɛ amétísiti.

²¹ Aíhō igwɛ́ɛpa nēé bī le yá odūngwɔ̄ɔwɛ kú aókonɔɔwɛ igwɛ́ɛpa ā á. É bī íhō éyééye le yá odūngwɔ̄ɔwɛ éyééye. Ugóolu eyīnēēnū nōo gē ceyī bɛ̄ɛka ogigo ā nēé bī le yá úláyi kú igelī ā á.

²² Ń má Agblīihɔ-nɛ̄hi dúúmā ipú igelī ā ŋ́, ohígbū ka Óndú nōo wɛ Ɔwɔicō nōo lɔfú fíyɛ́ dúú ā mɛ́mla Ɔyí álá ā kwɛyí Agblīihɔ-nɛ̄hi ipú nū á.

²³ Igelī ā í cɛgbá ɛnɔ, ámāŋ ka ɔyā kéē fíyáajɛ ipú nū ŋ́, ohígbū ka ɛgahi ofíyajɛ nɛ̄hi kú Ɔwɔicō gē fíyáajɛ ipú igelī ā, Ɔyí álá ā kē wɛ agege kú nū á.

²⁴ Ɛjɛ̄ɛ̄jī ācɛ kú ɛcɛ ā géē lā ipú ofíyajɛ kú ɔlá nōo ŋmá igelī ā. Aɔ́cɛ́ kú ɛcɛ ā kē í bī agbénú kú uwā wā ipú nū

²⁵ Aókónɔɔwɛ kú igelī ā í gáā gwū ŋ́. É géē tɔ́ɔtɛ́ eko dóódu ohígbū ka otú í gáā bī abɔ́ɔ ŋ́.

²⁶ É géē bī aɔ́dā o tū ɛgahi mɛ́mla agbénú kú ācɛ kú ipú ɛcɛ ā wā ipú igelī ā.

²⁷ Amáŋ é gáā cɛ̄ ka ɔdā nōo ī nyíliyē dúú kóō bēhé ga ipú igelī ā ŋ́. Ɔ̄cɛ nōo ī yá ucē ɛbí bɛ̄ɛka ɛcí ō pā, ámāŋ ka ācokɛ̄mgbɛ̄ í gáā ga abɔ́ɔ glá ŋ́. Ācɛ nēé tá iyē kú uwā tū ipú ɔkpá kú ācɛ nēe yēeyī ā ōfōōfūwā géē bēhé ga ipú igelī ā glá á.