ƆDĀ NĒÉ MAFÚ LƐ UJƆ́ƆNI 20 - Ubáyíbu kú Idɔma

É lɛ ebilíi gbo iháyí úlā ɛpa cofigwó

¹ Anɔ́ɔ n má alelékwū ōtɛ̄hɔ̄ éyi yɔ̄ ī wāajɛ ŋmá ɔkpáncō á. Ó bī ɔyígodó kú ɔ̄gɔ̄ nōó lɛ oŋmɛ́yí ŋ́ mā mɛ́mla agbá nɛ̄hi éyi abɔ̄.

² Ó lɛ ɛbɛ́ obɔ̄bí nɛ̄hi ā, nōo wɛ ɛgwā kú ígblé ɔ́ɔmā, nōo wɛ alelékwū obɔ̄bí nēé hi ka ebilíi ámāŋ ka Usétan ā, kwú abɔ̄fú. Anɔ́ɔ ó kwu agbá ā ú kwu ɔ́, nōó ī yɔ̄ lɛ ā iháyí úlā ɛpa cofigwó

³ Ó kwú ɔ̄ í tɛ́cɔ̄ ga ipú ɔ̄gɔ̄ nōo lɛ oŋmɛ́yí ŋ́ mā kwú igodó ú kwu ɔ̄, klla lɛ ɔja he klá anú kóō yɔ̄ abɔ́ɔ iháyí úlā ɛpa cofigwó ɔ́ɔmā. Ó yá lɛ ā cɛ́ɛ́ ka ebilíi kóō wā í plla ācɛ glá gɛ ŋ́ jāā gbéeko nɛ̄ iháyí úlā ɛpa cofigwó le yā. Igbīhi nɛ̄ iháyí úlā ɛpa cofigwó ā yá, é géē hɛ́ ɔ̄ tá eko lígíí.

⁴ Anɔ́ɔ n má aákpa kú ɔ̄cɛ alɛwa á. Ācɛ nēé je ɔfú lɛ uwá kéē hɛ́pɔ̄ ā cīīce ɛyí uwā. N má odo kú ācɛ nēé hɛ́ uwā īkpɛ̄yí ohígbū ɔkwɛ̄yi nɛ̄ Ujísɔ̄si mafú ā, mɛ́mla ohígbū ɛlā Ɔwɔicō nēé tɔ́ɔna nū ā dúú. É tá ō gbā ɛbɛ́ obɔ̄bí mɛ́mla ojibó kú nū ɛ̄gbā. É kē cɛ̄ kéē fu uwā ukɔ̄ kú ɛbɛ́ obɔ̄bí ā abɔ̄ ámāŋ ka udɔ̄bū kú uwā ŋ́. Ɔwɔicō kwú uwā í héyī ŋmá ɔlékwū yēeyī, anɔ́ɔ é kē cɔcɛ́ mla Ohɔ́nyɛtá bá ī gbāajɛ iháyí úlā ɛpa cofigwó á.

⁵ (Ācɛ ohile nēe kwú ā í héyī gɛ ŋ́ jāā gbéeko nɛ̄ iháyí úlā ɛpa cofigwó ā le gla.) Ɛ̄nyā wɛ ohéyī ŋmá ɔlékwū kú aflɛ́yí āá.

⁶ Ákú ācɛ nēe wɛ ipú ācɛ aflɛ́yí nēe géē héyī ŋmá ɔlékwū ā lɔhi nɛ̄hi! Ācɛ ɛ́gɔ́ɔmā wɛ ákú Ɔwɔicō abāābɔ̄yī nū. Ikwū ɔ́mpa ā í gáā lɔfú ɛgiyí ācɛ ɔ́ɔmā gɛ ŋ́. Amáŋ, é géē je pīya ācogwɛ́ɛya lɛ Ɔwɔicō mɛ́mla Ohɔ́nyɛtá. É kē í cɔcɛ́ mɛ́mla anú iháyí úlā ɛpa cofigwó.

É lɛ Usétan yálé

⁷ Eko nɛ̄ iháyí úlā ɛpa cofigwó ā mɛ, é géē hɛ́ Usétan tá ŋmá agbá.

⁸ Ó géē ga ɛcɛ nyɔ̄ gaá plla aéwo nēe bá ɛbɛɛbɛ kú odúúdú ɛcɛ kpátá ā. É gē hī aéwo nēe bá nyā ka Ugɔ́gu mɛ́mla Umágɔ̄gu. Usétan géē tū uwa bá kéē gaá kpɛ́fú. Ācɛ okpɛ́fú ā géē lɛ ɛwa bɛ̄ɛka īkpɔ̄ɔjɛ kú okónu ísu ā.

⁹ Anɔ́ɔ é le pahīla klá ɛjɛ̄ɛ̄jī ɛga dóódu kú ɛcɛ ā, lɛ íbɔm ce tū ɛga nɛ̄ ācɛ ɔlɛ́ Ɔwɔicō bá ā mɛ́mla Igelī nōo he ɔ́ ɔtū nɛ̄hi ā. Amáŋ ɔlá wāajɛ ŋmá ɔkpáncō gaá lɛ uwá kpó yíífi.

¹⁰ Anɔ́ɔ é lɛ ebilíi nōo plla ācɛ ā tɛ́cɔ̄ ga ipú ókpoó kú ɔlá mɛ́mla ɛcōwō, ɛga nēé tá ɛbɛ́ obɔ̄bí ā, mɛ́mla ɔ̄comɛ́ɛbɛ ɛ̄kɛ̄mgbɛ̄ ɛcɔ̄ nyɔ̄ gbɔbū ā. É géē yɔ̄ ī móōwē ŋméeko téeko piyóó.

Ɛpɔ̄ ámōōmɛ nēé í ka ā.

¹¹ Anɔ́ɔ n lɛ akpa kú ɔcɛ́ ɛnɛ̄hɛ́ éyi má mɛ́mla ɔ̄cɛ éyi nōo cīīce ɛyí nū. Eko nōó le hɛ́wɛ̄ɛcɛ ā, ɔkpáncō mɛ́mla ɛcɛ gebítāajɛ dúúdú.

¹² Anɔ́ɔ n ma ācɛ nēe kwú ā, kwu ācɛnɛ̄hi mɛ́mla ācɛ nɛ̄ŋ́cɛ́, māháyi iyɔ̄bū akpa kú ɔcɛ́ ā. É lɛ aɔ́kpá ā nwūla. É klla lɛ ɔkpá ɔhá, nōo wɛ ɔkpá nɛ̄ iyē kú ācɛ oyēeyī ā bá ipú nū ā, nwūla. É lɛ ɛpɔ̄ ka tū ācɛ nēe gekwú ā oŋmá lɛ ɔdā nēé tɛtɛ yá ā, ɛ́gɛ́nɛ̄ é tá ɔ̄ tāajɛ ipú aɔ́kpá ā lɛ ā ā.

¹³ Ācɛ nēe pɛ́ gebí ipú éŋkpɔ̄ ā le pɛ́ nyɔ̄ kú Ɔwɔicō kóō kɛpɔ̄ tū uwā. Ikwu mɛ́mla ɔlékwū mabɔ̄ ācɛ nēe bá ipú uwā ā tá wɛ̄ɛcɛ dúú. Anɔ́ɔ Ɔwɔicō lɛ ɛpɔ̄ ka tū odúúdú uwā ɛ́gɛ́ ɔdā nɛ̄ ɔnyɔɔnyɛ yá ā.

¹⁴ Anɔ́ɔ é lɛ ikwū mɛ́mla ɔlékwū kpó tɛ́cɔ̄ ga ipú ókpoó kú ɔlá ā. (ókpoó kú ɔlá nyā wɛ ikwū ɔ́mpa āá.)

¹⁵ Ɔ̄cɛ dúúmā nēe tá iyē kú nū tū ɔkpá kú ācɛ nēe yēeyī ā ŋ́, é kwú ɔ̄ ú tá ga ipú ókpoó kú ɔlá.