ƆDĀ NĒÉ MAFÚ LƐ UJƆ́ƆNI 19 - Ubáyíbu kú Idɔma

É gwíijē kú oyálé ɔkpáncō

¹ Abɔ̄ ɛ̄nyā le yɛ āa, n pó ɔdā nōo lɛbɛ̄ɛka ekwukwu nɛ̄hi kú ɛwa nɛ̄hi kú ācɛ ipú ɔkpáncō. É bá gē ka kahíníī, “Álɔ̄ cɛ̄tra Ɔwɔicō! Anú ī nya alɔ tá ā. Ó lóofu klla lɔfú nɛ̄hi!

² Ɛpɔ̄ nōó ī ka ā wɛ ɔkwɛ̄yi, ó klla le kpaakpa. Ó lɛ ɛpɔ̄ ka tū akwuna nɛ̄hi nōo bī ajā nōó ī gbo ā le odúúdú ācɛ kú ipú ɛcɛ kpó bīya ā lɛ ɔ́ ŋmɛ́pɔ̄bí ɛɛ́. Ɔwɔicō lɛ italā yá ɔ̄ ohígbū koó ŋmó ācocɛ̄hɔ̄ kú Ɔwɔicō.”

³ É dɛ̄gba igbɔhá kahíníī, “Álɔ̄ cɛ̄tra Ɔwɔicō! Ɔlá nōo je Obábīlɔn, igelī nɛ̄hi ɔ́ɔmā yi tāajɛ í yɔ̄ ī yi piyóó piyóó.”

⁴ Anyākwɔ́cɛ ɔfucɛnɛ ā mɛ́mla aɔ́dā oyēeyī ɛnɛ ā má gbo klá ajɛ, anɔ́ɔ é le ɛ̄gbā gbā Ɔwɔicō nōo cīīce ɛyí akpa kú ɔ̄cɛ ā á. É kahíníī, “Aamí! Ālɔ̄ cɛ̄tra Ɔwɔicō!”

Ucɛ kú ɔny­ā nɛ̄ Ɔyí álá ā lɛ ā.

⁵ Anɔ́ɔ ɔkɔ éyi ŋmá ɛgiyí akpa kú ɔ̄cɛ ā yɔ̄ ī ka kahíníī, “Aá cɛ̄tra Ɔwɔicō kú alɔ, odúúdú ācocɛ̄hɔ kú nū, mɛ́mla ɛjɛ̄ɛ̄jī ācɛ nēe gē yúúfi nū ā, kwu ācɛ nɛ̄hi mɛ́mla ācɛ nɛ̄ŋ́cɛ́!”

⁶ Anɔ́ɔ n pó ɔdā nōo lɛbɛ̄ɛka ɔkɔ kú ɛwa nɛ̄hi ā, nōo klla kɛlā bɛ̄ɛka owuluwulu kú éŋkpɔ̄ nōo gē pɛ́ ŋmá icō wāajɛ, mɛ́mla ɔkɛ̄lā kú akpáabana nɛ̄hi nōo yɔ̄ ī gbo klla gbo ā. Ó yɔ̄ ī ka kahíníī, Ālɔ cɛ̄tra Ɔwɔicō! Ohígbū ka Óndú ā, nōo wɛ Ɔwɔicō nōo lɔfú fíyɛ́ dúú kú alɔ ā wɛ ɔcɛ́ á!

⁷ Ká ālɔ̄ gwéeyē ka ɔtū kóō he alɔ nɛ̄hi, cɛ́ɛ́ ká alɔ̄ cɛ̄tra ɛ́gɛ́nɛ̄ ó lɔfú lɛ ā ā! Eko nɛ̄ Ɔyí álá ā gáā lɛ ɔnyā ā le yá ɛɛ́, ɔnyā nōó gáā lɛ ā kē lɛ īyī nū tútū ī gbēyī nū ɛɛ́.

⁸ Ɔwɔicō lɛ ɛga je lɛ ɔ́ kóō bī īlī ŋmlɛ́ ŋmlɛ́ ɛnɛ̄hɛ́ olɔhi le yíifa.” (Īlī ŋmlɛ́ ŋmlɛ́ ɔ́ɔmā kwɛyí ucē olɔhi nɛ̄ ācɛ ɔlɛ́ Ɔwɔicō yá ā á.)

⁹ Anɔ́ɔ alelékwū ōtɛ̄hɔ̄ ā da um kahíníī, Lɛ ɛ̄nyā tá tāajɛ. Ákú ācɛ nēe hīgwú wā ucɛ kú ɔnyā ō lɛ kú Ɔyí álá ā lɔhi.” “Anɔ́ɔ o klla da um kahíníī, “Aɛ́nyā wɛ ɛlā ɔkwɛ̄yi kú Ɔwɔicō á!”

¹⁰ Anɔ́ɔ n gaá gbo klá ajɛ iyɔ̄bū nū gáā gbā ɔ̄ ɛ̄gbā, amáŋ ó da um kahíníī, “Á híīī yá lɛ ā ŋ́! N wɛ ɔ̄cocɛ̄hɔ̄ kú Ɔwɔicō bɛ̄ɛka awɔ mɛ́mla ācɔ̄lóhɔ́nyɛtá ɔ́mpa awɔ, nēe lɛ abɔ̄ bī ɔkwɛ̄yi nɛ̄ Ujísɔ̄si mafú ā. Gbā Ɔwɔicō ɛ̄gbā!” Ohígbū ka ɔkwɛ̄yi nɛ̄ Ujísɔ̄si mafú ā gē je ɔfú lɛ ācɛ nēe ī kɛlā Ɔwɔicō tɛ́ɛcɛ ā á.

Ɔ̄cɛ nōo ce ɔnya nɛ̄hɛ́ ā

¹¹ N má ɔkpáncō le nwūla, anɔ́ɔ n má ɔnya nɛ̄hɛ́ éyi háyi abɔ́ɔ á! É hī ɔ̄cɛ nōo cɛyí ɔnya ā lé ka Ɔ̄cɛ nōo tōō lɔtūce mɛ́mla Ɔ̄cɛ ɔkwɛ̄yi. Ɔwɛ okpaakpa nōo gē le hɛ́pɔ̄ klla ī le kpɛ́fú kú nū á.

¹² Īkpēyī kú nū ī cɛ̄ bɛ̄ɛka ɔlá ā, ó lɛ ukata kú ɔcɛ́ alɛwa kwɛyí. Ó lɛ iyē éyi nēe tá tū ɔ̄ iyē nɛ̄ ɔ̄cɛ dúú í jé ɛyí nū ŋ́, ń táafú ŋ́ anú abɔ̄yī nū.

¹³ Awulú nōó le wiyē ā wɛ oyōōyī cɛnyii. Iyē nēé ī hī ɔ̄ ā wɛ, ‘Ɛlā kú Ɔwɔicō.’

¹⁴ Aícɔ́ɔja kú ɔkpáncō ā tū ɔ̄ ɔkwu. É cɛyí ɔnya nɛ̄hɛ́ lɛ úwé oŋmlɛ́ ŋmlɛ́ nɛ̄hɛ́ péee wiyē.

¹⁵ Ɔkpacaŋ́gelī olulé éyi yɔ̄ ī bɛ̄cɛ ŋmá okónu kú nū. Ɔ́ɔmā nōó gáā bī le yá aéwo ā lé á. Ó géē bī ogbló kú oje le gbō uwā. Ó géē ŋmá ācɛ ipú ícɔ̄nū kú Ɔwɔicō nōo lɔfú fíyɛ́ dúú ā bɛ̄ɛka ɔ̄cɛ nōo ī le ikpó wú aíkpɔ̄cí ufáyin ɛga nēe ī yá ejé ā.

¹⁶ É lɛ iyē tátū awulú mɛ́mla át á kwū abɔ̄lɔ́ná kú nū. Iyē ā lé kahíníī, “Ɔ̄cɛ kú aɔ́cɛ́ mɛ́mla Óndú kú aóndú’.

¹⁷ Anɔ́ɔ n má alelékwū ōtɛ̄hɔ̄ éyi háyi ɛyí ɛnɔ. Ó lɛ ɔkɔ cɛyí dɛ̄gba hī odúúdú aígbáanɔ nēe ī wu iciico ā kahíníī, “Aá wā gaá le túbá ohígbū ucɛ nɛ̄hi nɛ̄ Ɔwɔicō gáā yá ā!

¹⁸ Aá wā gaá lé ɛbɛ́ kú aɔ́cɛ́, mɛ́mla ɛbɛ́ kú aógbēnjūwā, mɛ́mla ɛbɛ́ kú aícɔ́ɔja, mɛ́mla ɛbɛ́ kú aɔ́nya mɛ́mla ɛbɛ́ kú ācɛ nēe ī cɔnya ā, mɛ́mla ɛbɛ́ kú odúúdú ācɛ, kwu aɔ́fiyɛ mɛ́mla ācɛ nēe lɛ īyī uwā ā, kwu ācɛ nɛ̄hi mɛ́mla ācɛ nɛ̄ŋ́cɛ́.”

¹⁹ Anɔ́ɔ n má ɛbɛ́ obɔ̄bí ā mɛ́mla aɔ́cɛ́ kú ɛcɛ ā mɛ́mla aícɔ́ɔja kú ɔlɛ́ uwā le túbá. É le túbá kéē kpɛ́fú tá ɔ̄cɛ nōo cɛyí ɔnya nɛ̄hɛ́ ā mɛ́mla aícɔ́ɔja kú ɔlɛ́ nū.

²⁰ É lɛ ɛbɛ́ obɔ̄bí ā mɛ́mla ɔ̄comɛ́ɛbɛ ɛ̄kɛ̄mgbɛ̄ nōo yúklɔ́ o hídáagó ipēeyī nū ā kpó kwú. Úklɔ́ o hídáagó nyā nōó bī le plla ācɛ nēé fukɔ̄ lɛ ɛbɛ́ obɔ̄bí ā mɛ́mla ācɛ nēe gbā ojíbó kú ɛbɛ́ obɔ̄bí ā ɛ̄gbā ā á. É lɛ ɛbɛ́ obɔ̄bí ā mɛ́mla ɔ̄comɛ́ɛbɛ ɛ̄kɛ̄mgbɛ̄ kú nū tɛ́cɔ̄ oyēeyī tū ipú ɔlíkɔtɔ nōo gē yi mla ɛcōwō ā.

²¹ Ɔ̄cɛ nōo cɔnya ā bī ɔkpacaŋ́gelī nōo ī bɛ̄cɛ ŋmá okónu kú nū ā lɛ aícɔ́ɔja kú ɛbɛ́ obɔ̄bí ā kpó ŋmó. Anɔ́ɔ odúúdú aígbáanɔ ā le ɛbɛ́ kú uwā jāā gbéeko nōó le jɛ̄ uwā á.