AÍJĒ KÚ Ɛ̄GBĀ 7 - Ubáyíbu kú Idɔma

Ɔkɔ kú ɛpɔ̄ okpaakpa ō hɛ́

Ijē kú Udéfīdi nɛ̄ ó gwó lɛyíkwu Ukússi ɔ̄cɛ ipɔ́ɔma kú Ubénjamīn ā

¹ Óndú, Ɔwɔicō kú um, n wā ɛgiyí uwɔ, káā gbō um. Lɛ um hɛ́tá káā lɛ oyēeyī kú um nya ŋmá abɔ̄ kú odúúdú ācɛ nēe gē nū um inya ā.

² Ámāŋ, é géē wā í kwú um bɛ̄ɛka ágábá ā, é géē je um ga ɛga nɛ̄ ɔ̄cɛ dúúmā í yɔ̄ ŋ́ mā, cɛ́ɛ́ é kwú um yíífi ɛ́gɛ́nɛ̄ ágábá gē je ɛbɛ́ fā lé ā.

³ Óndú, Ɔwɔicō kú um, ɔ́dāŋ ka n lɛ ɔdōbɔ̄bí yá ɔ̄cɛ dúúmā,

⁴ ámāŋ ka n bī obɔ̄bí le cílá oklóbīya um dúúmā ulé ámāŋ ka n le ɔdā olɔnɔ yá olɛlā kú um icííci, nɛ̄ ó yá um ɔdā dóódu ŋ́,

⁵ ó lɛ ā, ayíka aólɛlā kú um kéē nū um inya, kéē lɛ um kwú. Cɛ́ɛ́ kéē lɛ um daŋmó. Cɛ́ɛ́ kéē kwú okwū kú um u tá ajɛ áncā.

⁶ Óndú, cāŋjɛ ipú íwɔ́tū kú uwɔ lɛyíkwu aólɛlā nēe bá ī bɛ́yíkwu um ā. Óndú, cāŋjɛ ká ā wā í tá um abɔ̄, ohígbū ka okpaakpa nāa tíne á.

⁷ Lɛ odúúdú ācɛ kpó wā ī jīla iyɔ̄bū uwɔ, ká ā gbō uwā ŋmá ɔkpáncō.

⁸ Óndú, awɔ gē kɛpɔ̄ ká alɛɛcɛ á. Óndú, lɛ ɛpɔ̄hi hɛ́ gā um, ohígbū okpaakpa kú um. Ohígbū ka ń yá ɔdōbɔ̄bí dúúmā ŋ́.

⁹ A wɛ Ɔwɔicō nōo le yēŋēē klla le kpaakpa nɛ, a kē ī já ɔdā nɛ̄ ɔ̄cɛ ī gbɛlá mla ɔdā nɛ̄ ɔ̄cɛ ī tíne ā má. Lɛ ɔbíipú kú ācobɔ̄bíipú ci. Cɛ́ɛ́ ká ā lɛ ulé cílá ācɛ okpaakpa mɛ́mla ācɛ olɔhi ā.

¹⁰ Ɔwɔicō lɛbɛ̄ɛka ɔkplɛ́fú kú um nōo gē gbō um á, ó kē ī nya ācɛ nēe ī lɛyítáajɛ lɛ ɔ́ kpaakpa ā tá.

¹¹ Ɔwɔicō gē kɛpɔ̄ okpaakpa nɛ, ó ī ŋmō ācobɔ̄bíipū ɛ̄pɔ̄bí eko dóódu.

¹² Ɔ́dāŋ ka ɔ̄cɛ í pīyabɔ̄ ŋ́, Ɔwɔicō yɔ̄ ī tū ɛ̄wā kú nú ulé ó kē lɛ ɔtā kú nū tū ce ɛɛ́.

¹³ Ó lɛ ɔyī kú nū kpó gwó ɛ́fa bá ajɛ ɛɛ́. Ó klla kwú ɔyī ú kwu ɔtā yɔ̄ ī kpó abɔ̄ ɔtā ŋanaa ɛɛ́.

¹⁴ Má ɛ́gɛ́nɛ̄ ɔ̄cobɔ̄bíipú ā gē gbɛlá ɔdōbɔ̄bí ā. Ó gē yá ojuju ō bī unwalu gē lɛ ācɛ, ó klla ī kɛ̄mgbɛ̄ lɛ ācɛ.

¹⁵ Ɔ̄cobɔ̄bíipú ā lɛ ukpa kpla lɛ ācɛ ɔhá, amáŋ ukpa ā le anú abɔ̄yī nū kwú.

¹⁶ Unwalu nōó je lɛ ācɛ ɔhá piíí ā gē kwúcē wā í yá ɔ̄. Ɔwɛ nɛ̄ ó yá ācɛ ɔhá ɔdā olɔnɔ abɔ̄fú ā, ɛ́gɔ́ɔmā nēé gáā yá anú abɔ̄yīnū á.

¹⁷ N tá Óndú ahínyá ohígbū ucē okpaakpa kú nū. N géē gwíijē yɔ̄ ī cɛ̄tra Óndú, Ɔwɔicō nōo fíyɛ́ dúú ā.