AÍJĒ KÚ Ɛ̄GBĀ 6 - Ubáyíbu kú Idɔma

Ɔkɔ oōgbā kú otábɔ̄ eko kú unwalu (Udéfīdi gwíijē nyā á)

¹ Óndú, nááná nāa le cɔ̄nū ā, ā híī ŋmó um ɛpɔ̄bí ŋ́. Ā híī bī ɔnū nɛ̄ a cɛ̄ ā lɛ yá um italā ŋ́.

² N le gbagbafú ɛɛ́, Óndú, ményīnyinyi um. Ohígbū ka odúúdú iyē kú um le catīpú.

³ Unwalu yɔ̄ ipú ɔtū kú um mɛ́mla odúúdú iyē kú um nɛ̄hi. Óndú, eko nyá nāa gē gbēyī gaá kwu ɛ́ɛ́ ká ā tá um abɔ̄ āa?

⁴ Pīyeyī, Óndú káā lɛ oyēeyī kú um nyatá, lɛ um hɛ́tá ohígbū ihɔtū nāa lɛ gā um eko dóódu ā.

⁵ Ɔ̄cɛ ī gáā blakwu uwɔ ɔlékwú gɛ ŋ́, ɛ́ɛ́ nɛ̄ ɔ̄cɛ dúúmā gē cɛ̄tra uwɔ ŋmá únóji glá gɛ ŋ́.

⁶ Ɔnɔ nɛ̄ n jé ā, cɛ̄ lɛ ɛ̄jɛ̄ le jɛ̄ um. Otú dóódu, agīje le cēnyi tá agōdō kú um ɛ́gɛ́nɛ̄ ɔkpā gē cēenyi ā, ohígbū ikwū nɛ̄ n yɔ̄ ī je ā. Upílo kú um klla kwú gbenyi cɛkpɛɛ mla agīje kú um.

⁷ Eyī kú um kwú kpó mi, n mɛ́ɛbɛ lɔhi glá gɛ ŋ́, ohígbū ikwū nɛ̄ aólɛlā kú um gē cɛ̄ gā um je ā.

⁸ Aá nyɛ̄ɛ̄ ŋmá ɛgiyí um, odúúdú aá nēe wɛ ācobɔ̄bíipú ā. Ohígbū ka Óndú ā gē pó ikwū kú otábɔ̄ nɛ̄ n gē je ā.

⁹ Óndú gē pó ɔkɔ kú otábɔ̄ nɛ̄ n gbā ā, ó kē mīyɛ ɔkɔ nɛ̄ n gbā ā.

¹⁰ Óndú ā géē je uwēyī lɛ odúúdú aólɛlā kú um. Cɛ́ɛ́ acígilí, ígbájí cɛ̄ lɛ uwá lɛ pɛ́ kwu ŋmá ɛgiyí um.