AÍJĒ KÚ Ɛ̄GBĀ 5 - Ubáyíbu kú Idɔma

Ɔkɔ ōōgbā kú ɔ̄cɔ̄ɔ̄cī (Udéfīdi gwíijē nyā á)

¹ Óndú, jāhɔ̄ lɛ ɔkɔ nɛ̄ n gē gbā ā. Jāhɔ̄ ká ā pó ifu nɛ̄ n yɔ̄ ī tá ā.

² Awɔ nōo wɛ Ɔwɔicō nōo klla wɛ ɔcɛ́ kú um ā, jāhɔ̄ káā pó ikwū nɛ̄ n yɔ̄ ī je ā, ohígbū ka awɔ nɛ̄ n yɔ̄ ī gbɔ̄ɔkɔ gā uwɔ á.

³ Óndú, a gē pó ɔkɔ nɛ̄ n gē gbā gā awɔ ɔ̄cɔ̄ɔ̄cī ā. N le ɛya gwó gā awɔ, anɔ́ɔ n kē yɔ̄ ī gbēyī ohi kú uwɔ á.

⁴ A wɛ Ɔwɔicō, nɛ̄ ɔdōbɔ̄bí mɛ́mla ɔbíipú í he uwɔ ɔtū ŋ́. Ācobɔ̄bíipú í klá ɛgiyí uwɔ glá ŋ́.

⁵ Ācɛ ō yɔ́bɔ́ɔ̄cɛ̄ í túblla awɔ ajaajɛ glá ŋ́. A gē wɔ́tū odúúdú ācobɔ̄bíipū.

⁶ A gē je odúúdú ācokɛ̄mgbɛ̄ kpɛ́mm ā kpó yíífi. A klla í tū ācoŋmɔ́ɔcɛ mɛ́mla ācopllācɛ ā eyījii.

⁷ Amáŋ, abɔ̄ n le he uwɔ ɔtū nɛ̄hi ā, n gē yɛ púúlú wā ɔlɛ́ uwɔ glá. N klla kē wā í gbā uwɔ ɛ̄gbā ipú Agblīihɔ-nɛ̄hi kú uwɔ glá.

⁸ Óndú, n lɛ aólɛlā alɛwa. Bī um jɔ́ɔwɛ ká n̄ yá ɔdā nāa tíne ā. Lɛ ɔdā nāa tíne kú n̄ yá ā yá tɔ́ɔtɛ́ péee gā um.

⁹ Ɔ̄cɛ í lɔtūce ɔdā nɛ̄ aólɛlā kú um gē ka ā ɔ́ glá ŋ́. Ɔ̄cɛ o je yíífi he uwá ɔtū á. Ɛlā olɔnyɛ nōo ī wɛ̄ɛcɛ ŋmá okónu kú uwā gē yá ɔ̄cɛ ɛbɛ́, amáŋ ó gē plla ɔ̄cɛ ga ɔlékwú.

¹⁰ Óndú, lɛ ɛ̄pɔ̄bí ŋmó uwā, cɛ́ɛ́ a klla lɛ italā yá uwā. Lɛ yá cɛ́ɛ́ kú ujɔ̄ mɛ́mla ojuju kú uwá piíí ā, kóō lɛ uwá kpó yíífi ŋmáajɛ. Óndú ā lɛ uwá nū ŋmá iyɔ̄bū uwɔ. Ohígbū īkpɛ̄yí olɔfū nēé yá ā mɛ́mla íne alɛwa nēé bīya ā.

¹¹ Amáŋ odúúdú ācɛ nɛ̄ Ɔwɔicō gē gbō ŋmá unwalu ā kéē gwéeye. É kéē bá ī gwíijē kú éeyē eko dóódu. Óndú, gbō ācɛ nɛ̄ ɛlā awɔ he uwá ɔtū ā, cɛ́ɛ́ kéē gwéeyē ohígbū ɔdā nāa yá lɛ uwá ā.

¹² A gē hɔ́ɔ́hā ce ācɛ nēe gē lɛyítáajɛ gā uwɔ ā. A gē gbō uwā ɛ́gɛ́nɛ̄ ɔkplɛ́fú gē gbō ɔ̄cɛ ā, ohígbū keé he uwɔ ɔtū.