AÍJĒ KÚ Ɛ̄GBĀ 3 - Ubáyíbu kú Idɔma

Ɔkɔ ōgbā kú ɔ̄cɔ̄ɔ̄cī kú otábɔ̄ (Udéfīdi gwíijē nyā eko nɛ̄ ó le kwu ŋmá ɛgiyí Ábsālɔm, ɔyínɔ̄nyīlɔ kú nū ā)

¹ Óndú, n lɛ aólɛlā alɛwa. Aólɛlā alɛwa bɛ́yíkwu um.

² É yɔ̄ gē lɛ okónu kwu um iyē, klla ī ka kahíníī, “Ɔwɔicō í kē gáā tá ɔ̄ abɔ̄ ŋ́.”

³ Amáŋ, awɔ Óndú ā, húmáyī gbō um ŋmá unwalu ɛ́gɛ́nɛ̄ ɔkplɛ́fú gē gbō ɔ̄cɛ ā á. Awɔ gē yá nɛ̄ n gē yá aólɛlā kú um lé, cɛ́ɛ́ kú um lɛ ojīlīmā lɛ á.

⁴ N jikwū gbōmgbōm klá Óndú ā kóō tá um abɔ̄, ó kē le ikwū nɛ̄ n je ā pó. Anɔ́ɔ ó kē le um tábɔ̄ ŋmá ɛyí ɛfu kú ɔlɛ́ nū á.

⁵ Óndú ā kē gbō um otū gbó ɔ̄cī eko nɛ̄ n gwutá yɔ̄ ī gbiyɔ̄lā ā, anɔ́ɔ n kē le héyī ɛbɔ́ á.

⁶ Ń yúufi aólɛlā úlúúlā nēe le um yɛ jīla tá ā ŋ́.

⁷ Óndú, Ɔwɔicō kú um, wā káā gá lɛ um nyatá. A gē yá odúúdú aólɛlā kú um italā. Ohígbū ka, é klla lɔfú dúúmā nēé ī yá um ɔdā dúúmā glá gɛ ŋ́.

⁸ Óndú ā gē hɛ́ ɔ̄cɛ tá á. Ká Óndú ā kóō lɛ ɔhā hɛ́ ce ācɛ ɔlɛ́ nū.