AÍJĒ KÚ Ɛ̄GBĀ 2 - Ubáyíbu kú Idɔma

Ɔcɛ́ nɛ̄ Ɔwɔicō fu ā

¹ Ɔdíyá nɛ̄ aéwo ā gē tū ujɔ̄ obɔ̄bí tɔ̄há ā? É gē yá ojuju icííci.

² Aɔ́cɛ́ kú ɛcɛ ā le iyī uwā tútū kéē kpɛ́fú ɛɛ́. É yɔ̄ ī yá ujuju kéē bɛ́yíkwu Ɔwɔicō mɛ́mla ɔcɛ́ nɛ̄ ó fu ā. Anɔ́ɔ é gē ka kahíníī,

³ “Ālɔ̄ lɛ iyí alɔ hɛ́tá, ŋmá ipū abɔ̄ kú Óndú ā mɛ́mla ɔ̄cɛ nɛ̄ ó fu ā.” É klla kahíníī, “Ālɔ̄ lɛ agbá kú uwā hɛ́ ŋmá iyī alɔ ɔkɔ.”

⁴ Amáŋ Óndú ā nōo yɔ̄ Ɔkpáncō ā yɔ̄ ī yɛhɛ tū uwā klla yɔ̄ ī yá uwā okónu ŋmá ɛyí akpa kú ɔcɛ́ kú nū.

⁵ Óndú ā bī íwɔ́tū kú nū le ɛgba dɛ̄ tū uwā. Ó klla ī bī ícɔ̄nū nɛ̄hi kú nū le tū uwā ufi gē da uwá kahíníī,

⁶ “N kwú ɔcɛ́ nɛ̄ n fu ā í ce akpa kú ɔcɛ́, ɛyí ɛfu kú Usáyɔn, ɛfu otīihɔ ā ɛɛ́.”

⁷ Anɔ́ɔ ɔcɛ́ nɛ̄ Óndú fu ā kahíníī, “N géē ka ɔdā nōo wɛ ɔ́da nɛ̄ Óndú ā je ā tɛ́ɛcɛ.” Ó da um kahíníī, ‘Ícɛ nyā, a kwú pīya ɔyínɔ̄nyīlɔ kú um ɛɛ́, n kē kwú piya ádā uwɔ ɛɛ́.

⁸ Ba ɛ̄ba ŋmá ɛgiyí um, n kē í je odúúdú aéwo kú ɛcɛ nyā gā uwɔ ká ā gbō uwā, odúúdú ɛcɛ kē í je pīya ákú uwɔ.

⁹ A géē ca uwā tāajɛ mla okwutɛ kú oje kú uwɔ, a klla í je uwá kpó ca nyɛŋɛnyɛŋɛ bɛ̄ɛka ɛtɛ́ ā.’

¹⁰ Aɔ́cɛ́ kú ɛcɛ, aá jāhɔ̄ lɛ ahɔ̄ nēé yɔ̄ ī pi aá anú nyā, Aɔ́cɛ́ ogbāājɛ kú ɛcɛ, aá jéeyī káā jāhɔ̄ lɛ ɛlā nēé bá ī nwū aá ā.

¹¹ Aá yúufi Ɔwɔicō káā gbā ɔ̄ ɛ̄gbā. Aá gwéeyē ká aá tú iyī aá wāajɛ iyɔ̄bū nū.

¹² Aā gbo kláajɛ gblugudu iyɔ̄bū ɔyínɔ̄nyīlɔ kú nū ká aá gbā ɔ̄ ɛ̄gbā, ó lɛ ŋ́, ó í cɔ̄nū fíyaa, nɛ̄ aá géē je pɛ́ kwú gbɔ̄bū lɛ eko kú aá. Amáŋ ákú ācɛ nēe ī kwu ga ɛgiyí nū kóō gbō uwā ŋmá unwalu ā kwú lɔhi ɛɛ́.