OHÚTU 6 - Ubáyíbu kú Idɔma

¹ Eko nɛ̄ ācɛ gbɔɔ́ ō nyīla bá ɛbɛɛbɛ kú ipú odúúdú ɛcɛ ā, é kē bá ī ma ayínɔ̄nyā.

² Ōhī kú aálelékwū nēe bá ɔkpáncō nēé hī ka ayí kú Ɔwɔicō ā, le má ka ayínɔ̄nyā kú alɛɛcɛ ā héyīfuú, é le pɛ́ wā gaá gbɔɔ́ ō lɛ aɛ́nɛ̄ o he uwá ɔtū ā ɔnyā.

³ Anɔ́ɔ Óndú ā kahíníī, “Alelékwū kú um ī gaá yɔ̄ ipú alɛɛcɛ piyóó gɛ ŋ́, ohígbū koó wɛ ɔkpíyē nōo gē kwú. Amáŋ, ɛ̄cī kú nū géē wɛ iháyí ofɛhīlī.”

⁴ O ŋmá eko ɔ́ɔmā gɔbū ā, aɔ́gbágwu nɛ̄hi gbɔɔ́ ō lā ipú ɛcɛ. É wɛ ayí aálelékwū nēé hī ka ayínɔ̄nyīlɔ kú Ɔwɔicō, ayí nɛ̄ ācɛnyā kú alɛɛcɛ ma lɛ aálelékwū nɛ̄ é hī ka ayínɔ̄nyīlɔ kù ɔwoicō ā. Ayí ā wɛ aógbējūwā olɔfū nɛ̄hi mɛ́mla ācɛ olófu nɛ̄hi kú íkée ā á.

⁵ Óndú ā le má ɛ́gɛ́nɛ̄ ɛjɛ̄ɛ̄jī ācɛ nēe bá ipú ɛcɛ ā bɔ̄bíipú lɛ ā mɛ́mla ɛ́gɛ́nɛ̄ ɛlá nēé gē gbo ā bɔ̄bí eko dóódu lɛ ā

⁶ Ó kē le kwɔ́ɔ iyē nɛ̄ɛ̄nɛ̄hi lɛyíkwu ɔ̄cɛ nōó yá wā ipú ɛcɛ ā. Íjémā le mu ɔ́ ɔtū nɛ̄hi.

⁷ Anɔ́ɔ Óndú ā kahíníī, “N géē je alɛɛcɛ, aɛ́bɛ́ mɛ́mla aígbáanɔ nɛ̄ n yá ā kpó yíífi bónū ŋmá ipú ɛcɛ. Ohígbū koó kwú um iyē nɛ̄ɛ̄nɛ̄hi nɛ̄ n yá uwā ā dɛ̄ɛ̄ ā.”

⁸ Amáŋ Unówa, wɛ ɔ̄cɛ nōo he Ɔwɔicō ɔtū nɛ̄hi.

Unówa

⁹ Ɛ́gɛ́nɛ̄ ɔ̄kā kú Unówa lɛ ā yɔ̄ á. Unówa ōfōōfūnū wɛ ɔ̄cɛ okpakpa nōó lɛ ɛnyá ŋ́, nōo yá ɔdā nōo he Ɔwɔicō ɔtū eko ɔ́ɔmā á. Ó yɛ́ɛma klla létɔ̄há mla Ɔwɔicō

¹⁰ Unówa lɛ ayínɔ̄yīlɔ ɛtá, nēe lé ka Ussɛ́m mɛ́mla Uhám mɛ́mla Ujáfɛ̄ti.

¹¹ Alɛɛcɛ ohile kē le kpó bīya ohígbū ucē ō yá kú uwā. Ucē kú ɔ́bíipú kē le mu ācɛ ipú ɛbɛɛbɛ.

¹² Ɔwɔicō le má ka ɛcɛ le bīya ɛɛ́, ohígbū ka ucē obɔ̄bí kú ɛjɛ̄ɛ̄jī alɛɛcɛ kwú uwā í kpó bīya ipú ɛcɛ ā.

¹³ Anɔ́ɔ Ɔwɔicō da Unówa kahíníī, “N le tútū ká n̄ kpó odúúdu alɛɛcɛ ŋmó ɛɛ́. Abɔ̄ alɛɛcɛ le mu mla ɔ́bíipú ā, n géē je uwá mɛ́mla ɛcɛ kpó yíífi dúúdú.

¹⁴ Lɛ úgbéenyi gbā lɛ īyī uwɔ, ŋmá ɔcí olɔfú. Lɛ aínu gwó tū ipú úgbéenyi ā. A géē ma unɛ plla eyīpú mɛ́mla eyīyɛ̄ce kú nū.

¹⁵ Ɛ́gɛ́nɛ̄ ā géē yá ɔ̄ lɛ ā yɔ̄ á. Īkpō kú nū kóō wɛ ikpó úlā ce ofɛpa cigwó. Ɔwá kú nū kóō wɛ ikpó ofɛtá ce igwɛ́ɛhɔ̄. Olicō kú nū kóō wɛ ikpó ofɛpa cɛhɔ̄.

¹⁶ Lɛ ɔ́ fīyɛ̄ bɛ̄ɛka inu ā. Cɛ́ɛ́ kú ā kwú ɛpá kú ikpó éyi ce āyā ú tá ɔtāhɛ̄ kú aflá ā mɛ́mla ɔdɔ ā, jīla tá. Lɛ ipú nū hɛ́ ɛga ɛtá ce ɔhá icō bɛ̄ɛka ɔda kú icīīcō, ɔda kú icō mɛ́mla ɔda kú ɛháajɛ ā. Cɛ́ɛ́ a kwú ɔwɛ ú tá áklō kú nū.

¹⁷ N gáā tū éŋkpɔ̄ nɛ̄hi ɛhɔ̄ wɛ̄ɛcɛ nōo géē cēenyi klá odúúdú ɔdā oyēeyī nēe í kpó uwā yíífi. Ɔdā dóódu nōo yɔ̄ ipú ɛcɛ ā géē pɛ́ kwú.

¹⁸ Amáŋ n cokónu lɛ awɔ mɛ́mla ɔnyā awɔ, mɛ́mla ayínɔ̄nyīlɔ kú uwɔ mɛ́mla anyā uwā, ka n géē nyā aá tá.

¹⁹ Lɛ ɛdɔ kú ɛbɛ́ dóódu o yēeyī nōo wɛ ɔbá mɛ́mla ɔnyā nēe bá ipú ɛcɛ nyā kpó wā ipú úgbéenyi ā. O yá kú ugbɛ kú uwā kóō mɛ ŋ́.

²⁰ Aígbáanɔ, aɛ́bɛ́ mɛ́mla aɔ́dā ō lɛ ipú piyajɛ ɛpɛɛpa ɛ́gɛ́nɛ̄ ɛdɔ kú uwā lɛ ā géē wā ɛgiyí uwɔ. Cɛ́ɛ́ ká ā lɛ uwā tū oyēeyī.

²¹ Lɛ ɛdɔ ɔdōlé dóódu nɛ̄ awɔ mɛ́mla uwá géē lé glá ā kpó tū ipú úgbenyi ā.”

²² Unówa le ɔdā dóódu nɛ̄ Ɔwɔicō da ɔ́ ā kpó yá.