OHÚTU 5 - Ubáyíbu kú Idɔma

Aipɔ́ɔma kú Ádām

¹ Aɛ́nyā wɛ aípɔ́ɔma kú Ádām á. Eko nɛ̄ Ɔwɔicō yá alɛɛcɛ á, ó ya uwā gbla īyī nū

² Ó yā uwā ɔ̄cɛnyīlɔ mɛ́mla ɔ̄cɛnyā. Ó le ɔhā hɛ́ ce uwá, anɔ́ɔ ó hī uwā ka ɔlɛɛcɛ á.

³ Eko nɛ Ádām le pīya iháyí ɔfu ɛhīlī ce igwó ā, ó le ɔyí ɔ̄cɛnyīlɔ ɔhá nōo kē gbla anú ā ma. Ó le iyē ce ɔ́ lé ka Usɛ́ti.

⁴ Igbīhi ɛ̄nyā ā, Ádām klla lɛ iháyí úlā ɛpa ɔhá lé. Ó lɛ ayínɔ̄nyīlɔ mɛ́mla ayínɔ̄nyā ɔhá dúú.

⁵ Anɔ́ɔ ó gekwú eko nōó le pīya iháyí úlā ɛpa ce ofu ɛhīlī ce igwó ā á.

⁶ Eko nɛ̄ Usɛ̄ti le pīya iháyí ofɛhɔ̄ ce ɛhɔ̄ ā, ó le ɔyínɔ̄yīlɔ éyi lɛ nɛ̄ iyē nū lé ka Ɛ́nɔ̄ss.

⁷ Ó klla le iháyí úlā ɛpa ce ahāapa kpɔ́. Ó lɛ ayínɔ̄nyīlɔ mɛ́mla ayínɔ̄nyā ɔhá dúú.

⁸ Anɔ́ɔ ó gekwú, eko nōó le pīya iháyí úlā ɛpa ce ofɛhɔ̄ ce igwɛ́ɛpa ā á.

⁹ Eko nɛ Ɛ́nɔ̄ss le pīya iháyí ofu ɛnɛ cigwó ā, ó lɛ ɔyīnɔ̄nyilɔ éyi lɛ nōó hī ka Ukɛnán.

¹⁰ Anɔ́ɔ ó klla yēeyī iháyí úla ɛpa ce igwó ɛhɔ̄ kpɔ́ á. Ó le ayínɔ̄nyīlɔ mɛ́mla ayínɔ̄nyā ɔhā dúú.

¹¹ Anɔ́ɔ ó gekwú, eko nōó le pīya iháyí úlā ɛpa ce ofɛhɔ̄ ce ɛhɔ̄ ā á.

¹² Eko nɛ Ukɛnán le pīya iháyí ofu ɛtá ce igwó ā, ó le ɔyínɔ̄nyīlɔ éyi lɛ nōo lé ka Umahálálɛ̄ɛlu.

¹³ Anɔ́ɔ ó klla yēeyī iháyí úla ɛpa ce ofɛpa kpɔ́ á. Ó lɛ ayínɔ̄nyīlɔ mɛ́mla ayínɔ̄nyā ɔhá dúú.

¹⁴ Anɔ́ɔ ó gekwú, eko nōó le pīya iháyí úla ɛpa ce ofɛhɔ̄ ce igwó ā á.

¹⁵ Eko nɛ̄ Umahālálɛ̄ɛlu wɛ iháyí ofɛtá ce ɛhɔ̄ ā, ó le ɔyīnɔ̄nyīlɔ éyi lɛ nōo lé ka Ujárɛ̄ɛdi.

¹⁶ Anɔ́ɔ ó klla yēeyī iháyí úla ɛpa ce ofuciigwó ɔhá kpɔ́ á. Ó lɛ ayínɔ̄nyīlɔ mɛ́mla ayínɔ̄nyā ɔhā dúú.

¹⁷ Anɔ́ɔ ó gekwú eko nōó le pīya iháyí úla ɛpa ce ofɛnɛ ce igwɛ́ɛhɔ̄ ā.

¹⁸ Eko nɛ Ujárɛ̄ɛdi wɛ iháyí ofahātá ce ɛpa ā, ó le ɔyīnɔ̄nyīlɔ éyi lɛ nōo lé ka Ɛ́nɔ̄ku.

¹⁹ Ó klla yēeyī iháyí úlā ɛpa ɔhā kpɔ́. Ó lɛ ayínɔ̄nyīlɔ mɛ́mla ayínɔ̄nyā ɔhá dúú.

²⁰ Anɔ́ɔ ó gekwú eko nōó le pīya iháyí úlā ɛpa ce ofɛhīlī ce ɛpa ā á.

²¹ Eko nɛ Ɛ́nɔ̄ku wɛ iháyí ofɛtá ce ɛhɔ̄ ā, ó le ɔyínɔ̄nyīlɔ éyi lɛ nōo lé ka Umɛtúsɛ̄la.

²² Igbīhi ɛ̄nyā, Ɛ́nɔ̄k yɛ́ɛma klla létɔ̄há mla Ɔwɔicō iháyí ofu igwɛ́ɛhɔ̄. Ó lɛ ayínɔ̄nyīlɔ mɛ́mla ayínɔ̄nyā ɔhá dúú.

²³ Ó yēeyī iháyí ofigwáahātá ce ɛhɔ̄.

²⁴ Ɛ́nɔ̄ku létɔ̄há mla Ɔwɔicō lɔɔlɔhi, anɔ́ɔ ó gebítāajɛ á, ohígbū ka Ɔwɔicō kwú ɔ̄ ú nyɔ̄ oyēeyī.

²⁵ Eko nɛ̄ Umɛtúsɛ̄la wɛ iháyí ofahāanɛ ce ahāapa ā, ó lɛ ɔyínɔ̄nyīlɔ éyi lɛ nōó hī ka Ulámɛ̄ki.

²⁶ Anɔ́ɔ ó klla yēeyī iháyí úlā ce ofigwáahāanɛ ce ɛpa ɔhá kpɔ́ á. Ó le ayínɔ̄nyīlɔ mɛ́mla ayínɔ̄nyā ɔhá dúú.

²⁷ Anɔ́ɔ ó gekwú eko nōó le pīya iháyí úlā ɛpa ce ofahātá ce ahāanɛ ā á.

²⁸ Eko nɛ̄ Ulámɛ̄ki wɛ iháyí ofahāanɛ ce ɛpa ā, ó le ɔyínɔ̄nyīlɔ éyi lɛ.

²⁹ Anɔ́ɔ ó kahíníī, “O ŋmá ajɛ nyā piíí ā nɛ̄ Óndú ā tá okónu lɛ ɔ́ ā, ɔyí nyā géē je omlɛ́nyɔ́ lɛ alɔ ŋmá úklɔ́ olɔfú kú alɔ dóódu á.” Anɔ́ɔ ó hī iyē kú ɔyí ā ka Unówa

³⁰ Ulámɛ̄ki yēeyī iháyí úlā ce ofahāanɛ ce igwɛ́ɛhɔ̄ ɔhá kpɔ́. Ó le ayínɔ̄nyīlɔ mɛ́mla ayínɔ̄nyā ɔhá dúú.

³¹ Anɔ́ɔ ó gekwú eko nōó le pīya iháyí úlā ce ofigwáahātá ce igwáahāapa āa.

³² Eko nɛ̄ Unówa wɛ iháyí úlā ce ofɛhɔ̄ ā, ó le ayí ɛtá nēé hī ka, Ussɛ́m mɛ́mla Uhám mɛ́mla Ujáfɛ̄ti.