OHÚTU 48 - Ubáyíbu kú Idɔma

Ujékɔ̄pu hɔ́hā ce Umanásɛ mɛ́mla Ɛfrém

¹ Igbīhi ɛ̄nyā ā, é le ka lɛ Ujósɛ̄fu ka ádā ɔ́ɔ yɔ̄ ī doōcē. Anɔ́ɔ ó le ayí nū ɛpa ā, Umanásɛ mɛ́mla Ɛfrém kpó mla īyī nū ga ɛgiyí ádā nū á.

² Eko nēé le da Ujékɔ̄pu ka ɔyí nū, Ujósɛ̄fu ɔ́ɔ wā gaá mā ɔ̄ ā, ó bī odúúdú ɔfú kú nū má cīce ɛyí agōdō.

³ Anɔ́ɔ Ujékɔ̄pu da Ujósɛ̄fu kahíníī, “Ɔwɔicō nōo lɔfú fíyɛ́ dúú ā, wā ɛgiyí um ajɛ kú Ulús, ipú ajɛ kú Ukénan. Anɔ́ɔ ó le ɔhā hɛ́ ce um á.

⁴ Ó da um kahíníī, ‘N géē je ayí alɛwa gā uwɔ, cɛ́ɛ́ ipɔ́ɔma kú uwɔ géē je pīya aéwo alɛwa. N géē je ajɛ nyā lɛ ipɔ́ɔma kú uwɔ kóō wɛ ákú uwā piyóó.’”

⁵ Ujékɔ̄pu yɔ̄ ī kɛlā gɔbū kahíníī, “Ayí uwɔ ɛpa nēé ma gā uwɔ ajɛ kú Íjīpiti ɛ́ɛ́ nɛ̄ n wā ɛgiyí uwɔ amānyā ā, wɛ ákú um. Ɛfrém mɛ́mla Umanásɛ géē wɛ ákú um ɛ́gɛ́nɛ̄ Urúbɛn mɛ́mla Usímīyɔn wɛ ákú um ā.

⁶ Ayí ɔhá nēé géē ma ga uwɔ igbīhi uwā ā, gáā wɛ ákú uwɔ á. É géē lúgwū kú uwā ŋmá ɛgiyí Ɛfrém mɛ́mla Umanásɛ.

⁷ N géē yá ɛ̄nyā ohígbū ɛ́nɛ́ uwɔ, Urécɛ̄lu. Eko nɛ̄ n ŋmá Umɛsopotámīya ā, ó gekwú ajɛ kú Ukénan, ɛga nōo kwu Ɛ́frāti ajaajɛ ā. Ɔtū le bīya gā um nɛ̄hi ohígbū ɔdā nōo yá ā. N kwú ɔ̄ ú nyi ɔwɛ kú Ɛ́frāti (Ubɛ́tlɛhɛ̄m) abɔ́ɔ.

⁸ Eko nɛ̄ Ujékɔ̄pu le ayí kú Ujósɛ̄fu má ā, ó dɔɔ̄ka kahíníī, “Ayí kú ɔ̄nyɛ bá yɔ̄ ā?”

⁹ Ujósɛ̄fu da ádā nū kahíníī, “É wɛ ayí um nɛ̄ Ɔwɔicō kpó gā um ajɛ kú Íjīpiti amānyā ā.” Anɔ́ɔ ó kahíníī, “Lɛ uwá kpó gé um ká n̄ lɛ ɔhā hɛ́ ce uwá.”

¹⁰ Abɔ̄ Ujékɔ̄pu le hīla nɛ̄hi ā, ó mɛ́ɛbɛ lɔhi gɛ ŋ́. Anɔ́ɔ Ujósɛ̄fu le ayí ā kpó wā ajaajɛ ɛgiyí nū, anɔ́ɔ ó le uwá kwú bɔ́tū.”

¹¹ Anɔ́ɔ Ujékɔ̄pu da Ujósɛ̄fu kahíníī, “N gbɛlá ka ń gáā má eyī kú uwɔ igbɔhá ɛ́ɛ́ gɛ ŋ́ nɛ. Amáŋ, mɔ́ɔ̄, Ɔwɔicō klla cɛ̄ ká n̄ lɛ ayí uwɔ má dúú.”

¹² Anɔ́ɔ Ujósɛ̄fu le ayí ā kpó ŋmá átákwū kú nū, anɔ́ɔ ó túkpɛɛ́ lɛ eyī pīya kláajɛ iyɔ̄bū nū á.

¹³ Anɔ́ɔ Ujósɛ̄fu kwú uwā ɛpɛlɛ́ɛpa ú háyi pī iyī nū. Ɛ́frem háyi abɔ̄lɔ́ná kú nū, Umanásɛ kē háyi abɔ̄lúfīyē kú nū.

¹⁴ Amáŋ Ujékɔ̄pu le abɔ̄ kú nū pīya gla ɔhá, kwú abɔ̄lɔ́ná kú nū ú ce Ɛ́frem nōo wɛ ɛnɛ̄ŋcɛ́ fíyɛ́ ā ɛyí, anɔ́ɔ ó kwú abɔ̄lúfīyē kú nū ú ce Umanásɛ nōo wɛ ɔnyākwɔ́cɛ ā ɛyí.

¹⁵ Anɔ́ɔ ó le ɔhā hɛ́ ce Ujósɛ̄fu á “Ká Ɔwɔicō nɛ̄ aádáádā ūm, Ébrahām mɛ́mla Áyísīki cɛ̄ ɔ̄ ɛhɔ̄ ā kóō hɔ́hā ce ayínɔ̄nyā nēe bá ā! Ɔwɔicō nōo bī um odúúdú oyēeyī kú um jāā í kwu ícɛ nyā ā, kóō hɔ́hā ce uwá!

¹⁶ Ká alelékwū-ōtɛ̄hɔ̄ nōo hɛ́ um tá ŋmá obɔ̄bí dóódu ā, kóō hɔ́hā ce ayípɛ̄nɔ̄nyīlɔ nyā. Ká iyē kú um mɛ́mla iyē kú ádáádā um, Ébrahām mɛ́mla iyē kú Áyísīki, ádā um kéē yɔ̄ ī gɔbɔ̄ɔ̄bū oŋmá ɛgiyí ayípɛ̄nɔ̄nyīlɔ nēe bá ā! Kéē ma ayí lɛwa, kéē lɛ ayááyí alɛwa ipú ɛcɛ nyā!”

¹⁷ Eko nɛ̄ Ujósɛ̄fu le má ka, ádā anúɔ ɔ́ɔ lɛ abɔ̄lɔ́ná ce Ɛfrém ɛyí ā, ó he ɔ́ ɔtū ŋ́. Anɔ́ɔ ó kwú abɔ̄lɔ́ná kú ádā nū ú ŋmá ɛyí kú Ɛfrém gaá ce ɛyí kú Umanásɛ.

¹⁸ Ujósɛ̄fu da ádā nū kahíníī, “Ó lɛ ā ŋ́, ádā um, ɛ̄nyā wɛ ɔ́kplá á, kwú abɔ̄lɔ́ná kú uwɔ ú ce ɔ́ ɛyí.”

¹⁹ Amáŋ ádā nū tá, anɔ́ɔ ó kahíníī, “N jé ɔyí um. N jé. Ayááyí kú Umanásɛ ā géē pīya éwo nɛ̄hi. Amáŋ ɔyínɛ́ nɛ̄ŋcɛ́ géē nwuné fíyɛ́ ɔ̄ á. Ayááyí kú nū géē je pīya aéwo nɛ̄hi.”

²⁰ Anɔ́ɔ ó le ɔhā hɛ́ ce uwá ɛcī ɔ́ɔmā, yɔ̄ ī ka kahíníī, “Ācɛ kú Ísrɛ̄lu í bī iyē kú aá eko nēé yɔ̄ ī hɔ́hā ce ācɛ. É géē ka ká Ɔwɔicō kóō lɛ uwɔ yá bɛ̄ɛka Ɛfrém mɛ́mla Umanásɛ ā.’” Ɔwɛ ɛ́gɛ́nyā nɛ̄ Ujékɔ̄pu je Ɛ́frém gbɔ̄bū lɛ Umanáse á.

²¹ Anɔ́ɔ Ujékɔ̄pu da Ujósɛ̄fu kahíníī, “Abɔ̄ a yɔ̄ ī má um nyā, n gaá kwú ɛɛ́. Amáŋ Ɔwɔicō géē yɔ̄ mla uwɔ, klla í bī uwɔ kwúcē ga ajɛ kú aádā uwɔ, igbɔhá kpɔ́ ɛ́ɛ́.

²² Awɔ nɛ̄ n yɔ̄ ī je ajɛ kú Ussɛ́kɛm, ajɛ olɔhi nɛ̄hi nɛ̄ n bī ɔtā mɛ́mla ɔkpacaŋgelī mīyɛ ŋmá ɛgiyí ācɛ Ámɔ̄ri ā, ga uwɔ á. Ó wɛ ayínɛ́ uwɔ ŋ́”