OHÚTU 2 - Ubáyíbu kú Idɔma

¹ Ɔwɛ ɛ́gɔ́ɔmā nēé yá ɔkpáncō mɛ́mla ɛcɛ mɛ́mla aɔ́dā dóódu nēe bá ipú nū ā mɛ

² Abɔ̄ Ɔwɔicō le úklɔ́ nōó yɔ̄ ī yá ā yá mɛ ā, ó le mlɛ́nyɔ́ ɛ̄cī ɔ́mahāapa á.

³ Ɔwɔicō le ɔhā hɛ́ ce ɛ̄cī ɔ́mahāapa ā klla lɛ ɔ́ yá tīihɔ, ohígbū ka ɛ̄cī nyā nōó mlɛ́nyɔ́ ŋmá odúúdú úklɔ́ kú ɛcɛ mɛ́mla ɔkpāncō nōó yá ā á.

⁴ Ɔ́ɔmā ā wɛ ɔ̄kā kú ɔdā nōo yá eko nɛ̄ Ɔwɔicō yá ɛcɛ mɛ́mla ɔkpāncō á. Eko nɛ̄ Óndú ā nōo wɛ Ɔwɔicō yá ɛcɛ bōōbū ā,

Ádām mɛ́mla Íīfu

⁵ Ɔcí mɛ́mla ácí mɛ́mla ɔdɛ̄hɔ̄ dúúmā í bū ipú ɛcɛ ɛ́ɛ́ ŋ́. Ohígbū ka Ɔwɔicō í yá kú ɔwɔ kóō yā tū ajɛ ɛ́ɛ́ ŋ́. Ɔ̄cɛ nōo í hí ajɛ ā ɛhɔ̄ í kē yɔ̄ ɛ́ɛ́ ŋ́.

⁶ Amáŋ ébú gē cē ŋmá ipú ajɛ nōo ī kpó éŋkpɔ̄ tū ɛjɛ̄ɛ̄jī ajɛ ā.

⁷ Anɔ́ɔ Ɔwɔicō le ɔmɛ cē ŋmá ajɛ, le ɔlɛɛcɛ ma ŋmá anú, anɔ́ɔ ó le owu kú oyēeyī fu tū ɔ̄ ɔ̄gɛ̄nwū anɔ́ɔ ɔlɛɛcɛ má yēeyī á.

⁸ Óndú ā, nōo wɛ Ɔwɔicō ā lɛ ɛhɔ̄ éyi hí ɛga nēé hī ka Ídɛn ipú ajɛ kú ɛnɔ̄ɔ̄cī. Anɔ́ɔ ó kwú ɔlɛɛcɛ nōó yá ā ú tá abɔ́ɔ á.

⁹ Anɔ́ɔ ó klla le aɔ́cí ɛdɔ ɛyɛ́ɛyɛ́yí ō gwá īkpō nyi tū abɔ́ɔ á. Ɔcí nōo ī je oyēeyī mɛ́mla ɛ̄nɛ̄ o ī yá ɔ̄cɛ kóō jé ɔdā olɔhi mɛ́mla ɔdōbɔ̄bí kwu ipú ɛhɔ̄ ā dúú.

¹⁰ Ísu éyi gē pɛ́ ŋmá ajɛ kú Ídɛn nōo gē kpó éŋkpɔ̄ tū ɛhɔ̄ ā. O ŋmá ɛhɔ̄ ā ísu ā kwú kɔ̄ le pīya ísu ɛnɛ.

¹¹ Iyē kú ísu kú aflɛ́yí ā lé ka Upíssɔn. Ɛ̄nyā wɛ ísu nōo ī pɛ́ ipú ajɛ kú Uhafíla nōo lɛ ugóolu á.

¹² Ugóolu ɛ́nɛ́ɛ́nɛ̄ mɛ́mla aɛ́cɔ̄ ogbɔɔ́lá nēé hī ka óniks mɛ́mla ɔdā okpóocu nōo ī ŋá nēé hī ka udélīyum bá ajɛ ɔ́ɔmā.

¹³ Ísu ɔ́mpa ā lé ka ísu kú Ugíhɔn. Anú ā gē pɛ́ kɔ́nɔ̄kɔnɔ̄ bū ajɛ kú Ukúss á.

¹⁴ Iyē kú ísu ɔ́mɛɛtá ā lé ka ísu kú Utígīrīsi, nōo gē pɛ́ ga ɛnɔ̄ɔ̄cī kú Asírīya ā. Ísu ɔ́mɛɛnɛ ā lé ka ísu kú Uyúfārétīisi.

¹⁵ Óndú ā, nōo wɛ Ɔwɔicō ā kwú ɔlɛɛcɛ nōó yá ā ú tá ipú ɛhɔ̄ kú Ídɛn ā kóō hí ɔ̄ ɛhɔ̄ kóō klla leyīkwu ɔ́.

¹⁶ Anɔ́ɔ Ɔwɔicō lɛ íne je lɛ ɔlɛɛcɛ ā kahíníī, “A géē lé īkpō ɔcí dóódu kú ipú ɛhɔ̄ ā,

¹⁷ amáŋ á gáā lé īkpō kú ɔcí nōo ī yá kú ɔ̄cɛ kóō jé ɔdā olɔhi mɛ́mla ɔdōbɔ̄bí ā ŋ́ Ohígbū ka ɛ̄cī nɛ̄ a i lé, a géē kwú.”

¹⁸ Anɔ́ɔ Óndú ā, nōo wɛ Ɔwɔicō ā, kahíníī, “Ó lɔhi kú ɔlɛɛcɛ ā kóō yɔ̄ ōfōōfūnū ŋ́. N géē lɛ ɔ̄cɛ otábɔ̄ nōo cíkā lɛ ɔ́ yá lɛ́ ɔ́.”

¹⁹ Anɔ́ɔ Ɔwɔicō le odúúdú aɛ́bɛ́ kú ipácí mɛ́mla aígbáanɔ nēe ī wu icō ā yá ŋmá ajɛ á. Ó le uwá kpó gé lɛ ɔlɛɛcɛ ā kóō í má iyē nōó géē le ce uwá ā.

²⁰ Anɔ́ɔ ɔlɛɛcɛ ā le iyē kpó ce odúúdú aɛ́bɛ́ ā mɛ́mla aígbáanɔ nēe ī wu icō ā á. Amáŋ ipú uwā, odóódu í yɔ̄ nōo ī wɛ otábɔ̄ nōo cíkā lɛ ɔlɛɛcɛ ā ŋ́.

²¹ Ohígbū ɔ́ɔmā ā, Óndú ā, nōo wɛ Ɔwɔicō ā. le ɔlɛɛcɛ ā ŋmíyɔ̄lā lipú lipú. Eko nōó yɔ̄ ī gbiyɔ̄lā ā, Ɔwɔicō kwú ikpokwú kú íkélí kú nū éyi ú, anɔ́ɔ ó le ɛgiyí nū gwū mɛ́mla ícɛ̄bɛ́ á.

²² Ó le ɔ̄cɛnyā yá ŋmá ikpokwú kú íkélí nōó je ŋmá ákló kú ɔ̄cɛnyīlɔ ā. Anɔ́ɔ ó kwú ɔ̄cɛnyā ā í bī gé lɛ ɔ̄cɛnyīlɔ ā á.

²³ Anɔ́ɔ ɔ̄cɛnyīlɔ ā kahíníī, “Kulɔ́dɔ́ɔ́ nɛ̄ n má ɔ̄cɛ nōo ŋmá ikpokwú mɛ́mla ɛ́nɛ́bɛ́ iyē kú um á. N géē hī ɔ̄ ka “ɔ̄cɛnyā” ohígbū keé je ɔ́ ŋmá iyē kú ɔ̄cɛnyīlɔ.”

²⁴ Ɛ̄nyā yá ɛ́ɛ́ nɛ̄ ɔ̄cɛnyīlɔ géē nyɛ̄ɛ̄ ŋmá ɛgiyí ádā nū mɛ́mla ɛ́nɛ́ nū, gaá le pīya tɔ̄há mla ɔnyā nu, cɛ́ɛ́ uwá kwú pīya ɔkpíyē ékpónú á.

²⁵ Ɔlɛɛcɛ ā mɛ́mla ɔnyā nū kē tá ohɛ́ɛwa, amáŋ é kē yúwēyī ŋ́.