OBADÍYA 1 - Ubáyíbu kú Idɔma

¹ Ɛlā nyā wɛ ɛbɛ nɛ̄ Obadíya má á. Ɛlā nɛ̄ Óndú ā Ɔwɔicō ā ka lɛyíkwu Ɛ́dɔm ā. Óndú ā le ɔ̄cocɛ̄hɔ̄ kú nū tɛ̄hɔ̄ ga ipú aéwo ɛɛ́, alɔ kē le olɛɛhɔ̄ kú nū ā pó ɛɛ́. Ó ka, “Aá lɛ tútū, ká alɔ̄ í kpɛ́fú tá Ɛ́dɔm!”

Óndú ā géē yá Ɛ́dɔm italā

² Óndú ā da Ɛ́dɔm ka, “N géē tá uwɔ wāajɛ ipú aéwo ā, ɛjɛ̄ɛ̄jī ācɛ géē lɛ eyī gwō uwɔ bónū dúúdú.

³ Ɔbɔ́ɔ̄cɛ kú uwɔ ā le uwɔ plla ɛɛ́, awɔ nōo gwó ɔlɛ́ wu ɛplá ápátɛ́cɔ̄, awɔ nōo lā ɛyí ɛfu généé ā, anɔ́ɔ a gē da iyī uwɔ ka, Ɔ̄nyɛ pi um wāajɛ glá āā?

⁴ Ɔ́dāŋ nāa kōō le ɔlɛ́ uwɔ gwó ɛga nōo lico bɛ̄ɛka ɔlɛ́ kú okpé ā, nōó lɛbɛ̄ɛka ó kwu ɔtāhɛ̄ kú ayínyílɔ́ɔwɔ ā, nááná, n géē bī uwɔ wāajɛ.

⁵ Eko nɛ̄ aúwī gā ɛgiyí ɔ̄cɛ otú, ɔdā nēé dɔɔ̄kā ā nēé gē je á. Eko nɛ̄ ācɛ le oōpīya kú ɔcí ufáyin kpó gbúlla, é gē habɔ̄ ōhī tá kwu ɔcí icō piíí. Amáŋ, aólɛlā kú uwɔ lɛ uwɔ kpó yíífi ŋmá ajɛ dúúdú.

⁶ Aipɔ́ɔma kú Ísɔ, é le agbénú kú aá kpó wu ɛɛ́.

⁷ Ācɛ nāa tīipú mla uwá ā, le uwɔ plla ɛɛ́. É kē lɛ uwɔ nū ŋmá ajɛ kú ɔlɛ́ uwɔ. Ācɛ nēe tɛtɛ bá ɛbɔ́ mla uwɔ ā le ɔfú kpó kwu uwɔ ɛɛ́, aóklóbīya uwɔ nāa lɔtūce ā lɛ ukpa kpla tá ajɛ gā uwɔ, é gē ka, ‘Ini nɛ̄ odúúdú íjééyī kú uwɔ ā yɔ̄ gɛ?’

⁸ Ɛ̄cī ɔ́ɔmā, n géē yá ācɛ kú Ɛ́dɔm italā, n géē kpó odúúdú ācɛ ojéeyī kú uwá ā yíífi, ɔ̄cɛ dóódu í gáā jéeyī ipú uwā gɛ ŋ́.

⁹ Ufi yá ācokpɛ́fú kú Utéman nɛ̄hi, é géē kpó ɛjɛ̄ɛ̄jī aícɔ́ɔja kú Ɛ́dɔm ŋmó.

Ɔdā nōo yá ɛɛ́ nɛ̄ Ɔwɔicō yá ācɛ kú Ɛ́dɔm italā ā

¹⁰ Ɛ́dɔm, ohígbū ka a lɔnɔɔtū lɛ aɔ́máapú uwɔ nēe wɛ ayááyí kú Ujékɔ̄pu ā, é géē je aá kpó yíífi nɛ̄ aá í gáā lɛ ojīlīmā gɛ ŋ́ piyóó.

¹¹ A géē hāyí leyīkwu cɔɔ ɛ̄cī nɛ̄ aólɛlā géē wā í ca aódūngwɔ̄wɛ kú igelī kú aá cā tāajɛ ā. Aá kē bɔ̄bí bɛ̄ɛka aéwɔhá nēe bá abɔ́ɔ ā, ācɛ nēe kpó agbénú kú Ujerúsālɛm nyɔ̄, nēe gwó ɛbā anwa kéē lɛ agbénú ā kpó kɔ̄ ŋmá ajɛ lɛ iyī uwā ā.

¹² Amáŋ, aá cíkā ō gwéeyē, ohígbū ɔdōbɔ̄bí nōo wā í klá ayínɛ́ aá nɔ̄nyīlɔ kú Ujúda ā ŋ́. Aá yɛ í yɛɛhɛ tū ācɛ Ujúda ipú ɛ̄cī nēé je uwá kpó yíífi ā ŋ́.

¹³ Aá yɛ í bēhé ga ipú igelī kú ācɛ ɔlɛ́ um, gaá yá uwā okónu ɛ̄cī nēé bá yɔ̄ ī móōwē ā ŋ́, aá yɛ í mīyɛ agbénú kú uwā tɔ̄ɔkwu abɔ̄fú, ɛ̄cī nɛ̄ ufu cē uwā ā ŋ́.

¹⁴ Aá yɛ í háyi ɔnyɛ̄ɛpa ɔwɛ kú aá kwu ācɛ nēe bá ī kwu ā ŋ́. Aá yɛ í kpó ācɛ nēe hile ā lɛ aólɛlā kú uwā ipú ɛ̄cī kú ɔtūnōbí kú uwā gɛ ŋ́.

Ɔwɔicō í kɛpɔ̄ tū aéwo kú ipú ɛcɛ

¹⁵ Ɛ̄cī nɛ̄ ami nōo wɛ Óndú ā, géē kɛpɔ̄ tū odúúdú aéwo kú ipú ɛcɛ ā, le kwa ajaajɛ ɛɛ́. Ɛ́dɔm, ɛ́gɛ́ ɔdā nāa yá ācɛ ā, ɛ́gɔ́ɔmā nēé gáā yá uwɔ á. Okoolo nāa le miya igwu lɛ ācɛ ā, nēé géē le miya ɔ́ gā uwɔ á.

¹⁶ Ācɛ ɔlɛ́ um kú Ujúda, n cɛ̄ lɛ aá lɛ ejé ohɔ́nɔ kú italā kú um gwá ŋmá ipú ikókwū kú um ɛyí ɛfu otīihɔ kú um. Amáŋ odúúdú aéwo nēe yɛ jīla aá tá ā géē gwá ejé kú italā ɛ̄nɛ̄ o hɔ́nɔ fíyɛ́ dúú ā. É géē gwá, géē bá ī ga ɔwɛ ga ácí, cɛ́ɛ́ é gebí tāajɛ icííci.

Ācɛ kú ísrɛ̄lu le yálé

¹⁷ Amáŋ, ācɛ nēe pɛ́ kwu ā géē bá ɛyí ɛfu kú Usáyɔn, ɛfu ɔ́ɔmā klla í wɛ ákú Ɔwɔicō abɔ̄yī nū. Ācɛ ɔlɛ́ kú Ujékɔ̄pu géē lɛ ajɛ nōo wɛ ukpɛ̄ kú uwā.

¹⁸ Ɔlɛ́ kú Ujékɔ̄pu géē lɛbɛ̄ɛka ɔlá, ɔlɛ́ kú Ujósɛ̄fu kē géē lɛbɛ̄ɛka ígblɛ́nyī ɔlá, cɛ́ɛ́ ɔlɛ́ kú Ísɔ í lɛbɛ̄ɛka ácí ō ŋmókókó ā. É í je uwá yɔlá klla í je uwā yíífi, cɛ́ɛ́ ɔ̄cɛ dúúmā í gáā hile ɔlɛ́ kú Ísɔ ā ŋ́. Ami, Óndú ā le ɛlā ka ɛɛ́.

¹⁹ Ācɛ kú ɛháajɛ kú Ujúda ā géē mīyɛ Ɛ́dɔm tābɔ̄, cɛ́ɛ́ é gaá lā abɔ́ɔ. Ācɛ nēe lā ikpó ɛfu kú ɛnɔ̄ɔ̄nɛ̄ ā, géē mīyɛ ajɛ kú Ufilístiya ā. Ācɛ kú Ísrɛ̄lu géē lā ipú ajɛ kú Ɛ́frem mɛ́mla ajɛ kú Usamérīya. Ācɛ kú Ubéjamīn ā géē lā ipú ajɛ kú Ugílɛ̄di.

²⁰ Ācɛ kú Ísrɛ̄lu nēe kwu ŋmá ɔlɛ́ ā géē kwúcē wā í lā, klla géē mīyɛ ajɛ kú Ufinísiya jāā ga ajɛ kú Usárefāti, cɛ́ɛ́ é gaá lā abɔ́ɔ. Ācɛ kú Ujerúsālɛm nēe bá ajɛ kú ɔfiyɛ ā, géē lā aígelī nɛ̄ŋcɛ́ kú Unɛ́gɛ̄bu ā.

²¹ Igbīhi nɛ̄ ācɛ kú Ísrɛ̄lu le yálé kpɛ́mm ā, é géē tīīcō ga ɛfu kú Usáyɔn gaá gbō ācɛ ɔlɛ́ Ísɔ nēe lā abɔ́ɔ ā. Cɛ́ɛ́ Óndú ā abɔ̄yī nū gaá cɔcɛ́ abɔ́ɔ.”