UJÓWƐ̄LU 3 - Ubáyíbu kú Idɔma

Óndú géē kɛpɔ̄ tū aéwo ɔhá ā

¹ Óndú ā kahíníī, “Eko nɛ̄ n géē je agbénú kú Ujúda mla Ujerúsālɛm cīgbīhi lɛ uwá ā,

² N géē tá odúúdú aéwo ā bá, cɛ́ɛ́, n lɛ uwá kpó wā ɔpɛ́ kú Ujɛhósāfati ā. Abɔ́ɔ ā, nɛ̄ n géē kɛpɔ̄ tū uwā ohígbū odúúdú ɔdā nēé yá ācɛ ɔlɛ́ um ā. É le ācɛ kú Ísrɛ̄lu pahīla ga ipú aéwɔhá. É kwú ajɛ kú um ú kpó kɔ̄.

³ É le ūlī tá cɛ́ɛ́ kéē jé ācɛ nōo í kpó ācɛ ɔlɛ́ um ā. É kwú ayípɛ̄ ācɛnyīlɔ mla ayípɛ̄ nɔ̄nyā ú kpó lá ga ɔfiyɛ cɛ́ɛ́ kéē bī ije nū lɛ cikpó akwuna mla ō bī lɛ gwá ejé.

⁴ Ɔdí nɛ̄ aá dɔɔ̄kā ō yá um ā? Utáya, Usídɔn, mla aípɔ́lɛ́ dóódu kú ajɛ kú Ufilístiya? Ɔ́dāŋ ka aá gē cíla um ulé nɛɛ, n géē je ulé ā cīgbīhi lɛ aá fíyaa.

⁵ Aá kwú oje nɛ̄hɛ́ mɛ́mla ugóolu (oje ɔdɔ) mɛ́mla agbénú kú um ú kpó ga agbla kú ɛcí kú aá.

⁶ Aá lɛ ācɛ kú Ujúda mla ācɛ kú Ujerúsālɛm kpó ŋmá ajɛ kú ɔlɛ́ uwā ga ɛga oligbo nɛ̄hi, anɔ́ɔ aá kwú uwā í kpó lá lɛ ācɛ kú Ugríisi.

⁷ Abālɔbányā ā, n géē kpó uwā bɛ̄cɛ ŋmá ɛga nɛ̄ aá kpó uwā lá nyɔ̄ ā. N klla géē yá aá ɔdā nɛ̄ aá yá uwā ā.

⁸ N géē cɛ̄ kéē kwú ayí aá nɔ̄nyīlɔ mɛ́mla ayí aá nɔ̄nyā ú kpó lá lɛ ācɛ kú Ujúda. Ācɛ kú Ujúda kē í je uwá kpó lá lɛ ācɛ kú Usábīya, éwo nōo ligbo nɛ̄hi ā, Ami nōo wɛ Óndú ā le ɛlā ka ɛɛ́.”

⁹ “Aá lɛ ɔna nyā tá ipú aéwo dóódu. Aá le tútū kú aá kpɛ́fú, aá lɛ ācokpɛ́fú kú aá tútū, aá lɛ odúúdú aícɔ́ɔja kú aá tútū kú aá nɔɔwɔ nyɔ̄!

¹⁰ Aá kwú ɛnū ō hɛ́hɔ̄ kú aá ú na ɔkpacaŋ́gelī. Aá kwú ɛ̄wā ō bī cē īkpɔ̄dɛ̄hɔ̄ kú aá ú na óbō. Ɔ̄cɛ nōo kwáahi fíyɛ́ dúú ipú aá ā, géē nuunu piíí.

¹¹ Aá ŋmúleyīkwū kú aá wā fíyaa, odúúdú éwo, nēe yɛ alɔ jīla tá ā, aá le túbā ɔpɛ́ ā. Óndú, lɛ aícɔ́ɔja kú uwɔ tɛ̄hɔ̄ wā í nuunu tá uwā.

¹² “Aéwo ā géē tútū piíí, cɛ́ɛ́ kéē wā ɔpɛ́ kú Ujɛhósāfati, abɔ́ɔ ā, ami Óndú ā géē cīce kú n kɛpɔ̄ tū odúúdú éwo nēe yɛ jīla aá tá ā.

¹³ É bɔ̄bíipú nɛ̄hi, aá lɛ uwá hɛ́ klá ajɛ bɛ̄ɛka ɔcí igbāmkpa, eko nēé ī cē ɔdɛ̄hɔ̄ ā. Aá lɛ uwá ca báajɛ ɛ́gɛ́nɛ̄ é gē ca ɔcí ufáyin báajɛ, ɛga nēé gē pí ejé dúúdú ā, jāā gbéeko nɛ̄ ejé ā gbɔɔ́ ō pɛ́ bónū ŋmá anú.”

¹⁴ Ācɛ úlúúlā bá ɔpɛ́ kú Ujɛhósāfati. “Ɔpɛ́ kú ɛpɔ̄ ōhɛ́” ā, abɔ́ɔ nɛ̄ eko nɛ̄ Óndú ā í hɛ́pɔ̄ yɔ̄ ī wā fíyaa á.

¹⁵ Eko ɔ́ɔmā, ɛnɔ mɛ́mla ɔyā í kē gáā fíyajɛ gɛ ŋ́, aínyílɔ́wɔ í kē gáā fíyajɛ gɛ ŋ́ dúú.

Óndú ā géē hɔ́hā ce ācɛ ɔlɛ́ nū

¹⁶ Óndú ā tōoji bɛ̄ɛka ágábá ā ŋmá ɛfu kú Usáyɔn, ɔkɔ kú nū gbakpáabana ŋmá Ujerúsālɛm, í cɛ̄ lɛ ɔkpáncō mɛ́mla ɛcɛ kéē jíliyē. Amáŋ, Óndú ā géē gbō ācɛ ɔlɛ́ nū Ísrɛ̄lu ŋmá unwalu.

¹⁷ “Cɛ́ɛ́, aá nēe wɛ ācɛ Ísrɛ̄lu ā, géē jé ka ami ɔ́ɔ wɛ Óndú, Ɔwɔicō kú aá á. N lā Usáyɔn, ɛyí ɛfu otīihɔ kú um ā. Ujerúsālɛm kē í wɛ igelī nɛ̄hi otīihɔ, nɛ̄ aílɔ́wā í klla gáā mīyɛ ɔ́ igbɔhá glá ɛ́ɛ́ gɛ ŋ́.

¹⁸ Eko ɔ́ɔmā ā, ɔcí ufáyin géē tá ɔkɔ klá odúúdú ɛfu ā dúúdú, ɛna géē bá ɛyí ɛfu dóódu, éŋkpɔ̄ kē í yɔ̄ odúúdú ɔ́kpá kú Ujúda ā. Ɔkpá éyi géē pɛ́ ŋmá Agblīihɔ-nɛ̄hi kú Óndú ā ga ɔpɛ́ kú Ussítim.

¹⁹ “Íjīpiti géē tá alácɛ̄, cɛ́ɛ́ Ɛ́dɔm kē í je pīya ígbíli, í tá alácɛ̄ dúú. Ohígbū keé kpɛ́fú tá ācɛ kú Ujúda ā, anɔ́ɔ é le ācɛ Ujúda nēé yá ɔdā dóódu ŋ́ mā, kpó ŋmó bónū icííci á.

²⁰ Amáŋ, ācɛ kú Ujúda ā géē lā Ujúda piyóó ipú ɛcɛ nyā. Ayááyí ā kē í lā Ujerúsālɛm piyóó.

²¹ Amáŋ, N géē gwɔ̄ɔ́ci kú ācɛ kú Ujúda nēé kpó ŋmó ā. Ācɛ nēe lɛ́pɔ̄bí kú ācɛ o ŋmó icííci ā, ń gáā mā uwā tá nyɔ̄ icíící glá ŋ́. Ami nōo wɛ Óndú ā je Ujerúsālɛm pīya ɛga nɛ̄ n géē lā piyóó á.