UJÓWƐ̄LU 2 - Ubáyíbu kú Idɔma

Aéfūma ā, lɛbɛ̄ɛka ahɔ̄ ō pi kú ɛ̄cī kú Óndú

¹ Aá lɛ opo tá ipú ɔlɛ́ kú Usáyɔn, aá lɛ agidigbé gwō ɛyí ɛfu otīīhɔ kú Óndú ā. Odúúdú ācɛ kú Ujúda ā kéē fīyégbúlú! Ohígbū ka ɛ̄cī kú Óndú ā yɔ̄ ī wā, ó kē má kwajaajɛ ɛɛ́.

² Ó géē wɛ ɛ̄cī kú ajɛ odobū mɛ́mla ajɛ odɔɔlúú, ɛ̄cī kú ojuja mla ajɛ odobú. Ɛwa nɛ̄hi kú aícɔ́ɔja le nāŋdaa klá aɛ́fu ā bɛ̄ɛka ɔ́wá nɛ̄ɛ̄nɛ̄hi kú aéfūma nēe yɔ̄ gē pɛ́ wā a. É le nyīla bá ɛyí ɛfu bɛ̄ɛka ajɛ odobū nɛ̄hi ā. Ɔdā dúú bɛ̄ɛka ɛ̄nyā í yɔ̄ jééjéē ɛ́ɛ́ ŋ́. Ɔdā dúú lɛbɛ̄ɛka ɛ̄nyā í kē gáā yɔ̄ ɛ́ɛ́ gɛ ŋ́.

³ É kwú ácí mla ɔdɛ̄hɔ̄ ú kpó lé ŋmá ajɛ bɛ̄ɛka ɔlá ā. Gbɔbū kéē wā í kpó ɔfú kwu ajɛ ā, ó lɔhi bɛ̄ɛka ɛhɔ̄ kú Ídɛn ā, amáŋ igbihi ō wā kú uwā ā, ajɛ ā kwú pīya bɛ̄ɛka ajɛ íkpākplā kú ígbíli ā. Ɔdā dúúmā í hɛ́ uwā abɔ̄ táajɛ glá ŋ́.

⁴ Oōmá eyī kú uwā lɛbɛ̄ɛka aɔ́nya ā. É gē kwinya fíyaa bɛ̄ɛka ācɛ o ce ɔnya o bī kpɛ́fú ā.

⁵ Abɔ̄ uwá bā ī tómbli ɛyí aɛ́fu ā, ikpó kú uwā gē yúuya nɛ̄hi bɛ̄ɛka úgbɔ́ɔnya kú ɛfú ā. Uya kú uwā gē wā wūūū bɛ̄ɛka uya kú ɔlá kú ipú ūpū nɛ̄hi nōo ī je ácí ō hɛ́ kwaajɛ dóódu kpó yi ā. É le hɔ́ɔ́gba bɛ̄ɛka aícɔ́ɔja nɛ̄hi nēe gáā kpɛ́fú ā.

⁶ Abɔ̄ uwá bá ī wā ā, ācɛ dóódu bá ī yúufi, bá ī fīyégbúlú. Īkpēyī kú ācɛ dóódu yɔ̄ ī yá loóloó ipú ufi.

⁷ Aéfūma ā gē nuunu bɛ̄ɛka ācokpɛ́fú ā. É gē tīīcō ɔdɔ bɛ̄ɛka aícɔ́ɔja ā. É bá ī yɔ̄ ī nɔwɔ gɔbū kpaakpa, é fōbeé ŋmá ɔwɛ ŋ́,

⁸ ámāŋ ka o gbájí tū iyī wā ikpó ŋ́. Ɔnyɔɔnyɛ jé ɔwɛ kú nū. É gē cēgbɔɔ bū ipú ɔbā bɛ̄ɛcɛ. ɔdā dúúmā í ŋmó ɔwɛ tū uwā ō bū ɔbā ā bɛ̄ɛcɛ glá ŋ́.

⁹ É kwu lɛyíkwu ipú igelī nɛ̄hi ā. É bá í tóómbli gla ɛyí igá ā, é tīicō ga ipú aínu ā, klla ī yɛ bū uwíndo bɛ̄ɛka aúwī ā.

¹⁰ Ajɛ yɔ̄ ī jíliyē abɔ̄ é bá gē wā ā, ɔkpáncō yɔ̄ ī fīyégbúlú, ɛnɔ mla ɔyā kwú dobū kpúm. Anɔ́ɔ aínyílɔ́wɔ í klla fíyajɛ gɛ ŋ́.

¹¹ Óndú ā yɔ̄ ī je ɔ́da lɛ aícɔ́ ja kú nū. Aícɔ́ɔja nēe lɛyí táajɛ lɛ ɛlā kú Óndú ā, lɛwa nɛ̄hi, é klla lɔfú nɛ̄hi. Ɛ̄cī nɛ̄ Óndú ā í wā ā wɛ ɛ̄cī ō tūufi nɛ̄hi. Ɔ̄nyɛ géē bū ɛ̄cī ɔ́ɔmā glá?

Igwú nēé hī kú ācɛ kéē le pīyabɔ̄ ā

¹² “Nááná ā, abālɔbányā” Óndú kahíníī, “Aá lɛ pīyabɔ̄ cɛ́ɛ́ kú aá kwúcē wā ɛgiyí um aá gwōkónu kú aá jikwū kú aá yɔ́tūnōbí.

¹³ Aá lɛ ɔtū kú aá pīyabɔ̄, úwé kú aá ō híla kóō mafú ɔtūnōbí ō yá kú aá ōfōōfūnū í jɛ ŋ́.” Aá lɛ ɔtū tú wāajɛ, cɛ́ɛ́ kú aá kwúcē wā ɛgiyí ami nɛ̄ wɛ Óndú, Ɔwɔicō kú aá. N gbonɛnɛ klla gē ményinyi ɔ̄cɛ. Ń klla gē cɔ̄nū fíyaa ŋ́, n klla gē yíihɔtū tá ɔ̄cɛ gbojī ajɛ. N klla kē le tútū eko dóódu kú n̄ je ɔ́bíipu nɛ̄ ācɛ bī ā, yá uwā ɛhi. Ó wɛ ka o yá uwā italā ŋ́.

¹⁴ Eko ōhī, ami, Óndú, Ɔwɔicō kú aá géē pīya ɔtū kú um abɔ̄, cɛ́ɛ́ n lɛ ɔhā hɛ́ ce aá, o ŋmá lɛ o je īkpɔ̄dɛ̄hɔ̄ nɛ̄hi lɛ aá. Cɛ́ɛ́ aá lɔfú gwɛ́ɛya kú igwu mɛ́mla ejé gā um.

¹⁵ Aá lɛ opo tá ɛyí ɛfu kú Usáyɔn, aá lɛ ɛ̄cī kú okónu ō gwū tū, cɛ́ɛ́ aá lɛ ojīleyī kú ɔkɔ ō gbā hī.

¹⁶ Aá lɛ ācɛ ā túbá, le tútū kú ojīleyī otīihɔ, aá lɛ anyākwɔ́cɛ túbā, aá lɛ ayípɛ̄ túbá. Kwu ayí ō gwá amɛ̄ dúú, kwu aɔ́bá kú ɔnyā ɛ̄yīpɛ̄ mɛ́mla anyā uwā, í nyɛ̄ɛ̄ ŋmá inu ɔlɛ́ uwā wɛ̄ɛcɛ.

¹⁷ Acogwɛ́ɛya nēe yúklɔ́ kú ɛya ō gwó lɛ Óndú ā ipú Agblīihɔ-nɛ̄hi ā, kéē tū ɛgíkwū klla í gbɔ̄ɔkɔ lɛ Óndú ka, “Óndú, ményinyi ācɛ ɔlɛ́ uwɔ. Ā cɛ̄ lɛ aéwɔhá leyī gwō alɔ bónū klla yá alɔ okónu yɔ̄ ī ka, ‘Íní nɛ̄ Ɔwɔicō kú aá yɔ̄ ā ŋ́.’”

Ɔwɔicō lɛ ɔhā hɛ́ ce ajɛ ā

¹⁸ Ɛlā kú ajɛ kú Óndú ā kwú ɔ̄ iyē, anɔ́ɔ ó le eyīnyinyi ācɛ ɔlɛ́ nū má.

¹⁹ Óndú le ohi tá ācɛ ɔlɛ́ nū ka, “N géē kpó īkpɔ̄dɛ̄hɔ̄, ejé mla anɔ̄ lɛ aá. Ó kē í jɛ̄ aá klla í nū aá ipú. Ń gáā cɛ̄ lɛ uwēyī kwú aá iyɔ̄bū kú aéwɔhá igbɔhá ɛ́ɛ́ gɛ ŋ́.”

²⁰ “N géē nū ācɛ nēe ŋmá ɛhícō ā, ŋmá ɛgiyí aá ligbó, n géē nū ācɛ ōhī kú uwá ga ipú ígbíli. N géē nū aígwu ō gbɔbū kú uwā ā ga ipú ísu kú ɛnɔ̄ɔ̄cī, n klla í nū aɛ́nɛ̄ e tá igbīhi uwā ā ga ísu kú ɛnɔ̄ɔ̄nɛ̄. Okwū kú uwā géē wā báajɛ géē yɔ̄ ī níípī. N géē je uwá yíífi ohígbū ɔdā nēé yá aá ā.”

²¹ Óndú ā klla ka, “Aá híī yúufi ŋ́, amáŋ ɔtū kóō he aá kú aá gwéeyē, ohígbū odúúdú ɔdā nɛ̄hi nɛ̄ ami, Óndú ā yā lɛ aá ā.

²² Aɛ́bɛ́ kú ipácí, aá yúufi ŋ́. Ohígbū ka ɔdōlé kú aá nōo yɔ̄ ipácí ā wɛ ɛ̄mɛ̄ɛ̄mɛ̄ cɔŋgɔdɔ́ɔ́, aɔ́cí kē bā ī gwá īkpō kú uwā, ɔcí kú ufígi mla ɔcí ufáyin kē í gwá ikpó nɛ̄hi.

²³ Ācɛ kú Usáyɔn, aá gwéeyē, ɔtū kóō he aá, ohígbū ɔdā nɛ̄ Óndú, Ɔwɔicō kú aá yá lɛ aá ā. Ó le ɔwɔ aflɛ́yí je lɛ aá ɛɛ́, n klla cɛ̄ lɛ ɔgwā le gbo nɛ̄hi ɛɛ́. Ó klla le ɔwɔ aflɛ́yí mɛ́mla ákú igbīhāajɛ ā je lɛ aá, bɛ̄ɛka eko otɛtɛ ā.

²⁴ Ɔ̄gɔ̄ nēé gē wú īkpɔ̄dā ā géē mu mla īkpɔ̄dɛ̄hɔ̄, ejé géē mu ɔ̄gɔ̄ kú ɛga ō yá ejé ā.

²⁵ N géē kpó ɛjɛ̄ɛ̄jī ɔdā nēe cɛ̄ aá úfu kpɛ́m, ipú iháyí nɛ̄ ɛdɔ ɛyɛ́ɛyɛ́yí kú aéfūma, kpó aɔ́dɛ̄hɔ̄ kú aá lé ā, cīgbīhi lɛ aá. Ami tū aéfūma, o tómbli, aóbīya ɔdā mɛ́mla aóhɛ́ ɔdā lé, nēe wɛ aícɔ́ɔja nɛ̄hi kú um a ɛhɔ̄ wā ɔlɛ́ aá á.

²⁶ Abālɔbányā aá géē lɛ ɔdōlé nɛ̄hi nɛ̄ aá géē lé nōo géē jɛ̄ aá. Cɛ́ɛ́ aá géē cɛ̄tra ami nōo wɛ Óndú, Ɔwɔicō kú aá, nɛ̄ o yá ɔdā idáagó nyā lɛ aá ā. Uwēyī í gáā kwú ācɛ ɔlɛ́ um igbɔhá ɛ́ɛ́ gɛ ŋ́.

²⁷ Cɛ́ɛ́ aá nēe wɛ ācɛ kú Ísrɛ̄lu ā, géē jé ka ami ɔ́ɔ yɔ̄ mla aá, aá klla í jé ka ami Óndú ā, wɛ Ɔwɔicō kú aá á. Ɔwɔ ɔhá í yɔ̄ gwū um tá ŋ́ má. Uwēyī í klla gáā kwú ācɛ ɔlɛ́ um igbɔhá gɛ ŋ́.”

Ɛ̄cī kú Óndú ā

²⁸ “Igbīhāajɛ ā, N géē cē Alelékwū kú um klá ācɛ dóódu. Anɔ́ɔ ayínɔ̄nyīlɔ mɛ́mla ayínɔ̄nyā kú aá géē kɛlā kú um tɛ́ɛcɛ, anyākwɔ́cɛ kú ɔlɛ́ aá kē í nɔ̄ɔ̄na, ayípɛ̄ oklóbīya kú aá kē í má ɔdā nɛ̄ eyī ɔlamu í má glá ŋ́ mā,

²⁹ Eko ɔ́ɔmā n géē cē owu kú Alelékwū kú um klá ācocɛ̄hɔ̄ nɔ̄nyīlɔ mɛ́mla ācocɛ̄hɔ̄ nɔ̄nyā kú um.

³⁰ N kē í ma ɔdā ōcābɔ̄ ōhídáagó kú ɛ̄cī ɔ́ɔmā fú ɔkpáncō mɛ́mla ipú ɛcɛ. É géē kpó ɛfú tá aá, kē kpó ācɛ ŋmó, ɔlá géē yi mla ódūdū nɛ̄hi.

³¹ Ɛnɔ í gáā fíyajɛ gɛ ŋ́, í cɛ̄ lɛ ajɛ í je dobū, ɔyā géē je pīya ɔnɔ̄wá gɔɔ bɛ̄ɛka oyī ā. Aɔ́dā nēe bá ā géē yá gbɔbū, ɛ́ɛ́ ká ɛ̄cī nɛ̄hi mɛ́mla ɛ̄cī obɔ̄bí nɛ̄hi kú Óndú ā kóō wā.

³² Amáŋ, ɔ̄cɛ dúúmā nōo lɛ ɛgba dɛ̄ hī Óndú ā, ó géē hɛ́ ɔ̄ tá Ohígbū ka ācɛ ōhī bá ɛyí ɛfu kú Usáyɔn mɛ́mla Ujɛrúsālɛm nēe géē kwu, ācɛ nɛ̄ Óndú ā fu ā géē wɛ ācɛ nēe í hile oyēeyī á.”