ĀCOHƐ́PƆ̄ 2 - Ubáyíbu kú Idɔma

Alelékwū-ōtɛ̄hɔ̄ kú Óndú gā Ubókim

¹ Alelékwū-ōtɛ̄hɔ̄ kú Óndú ā ŋmá Ugílgalu wā Ubókim gāá da ācɛ kú Ísrɛ̄lu ka amúɔ kwú uwā ú kpó bɛ̄cɛ ŋmá Íjīpiti, lɛ uwá kpó wā ipú ajɛ nɛ̄ anúɔ cokónu nū lɛ ádáádā uwā ā. Ó ka anúɔ í gáā nyílá ɛka nɛ̄ amúɔ gbo mla uwá ā ŋ́.

² Ó kéē híī cokónu dúúmā mla ācɛ nēe lā ipú ajɛ ā ŋ́. Ó kéē kwú aéde kú aɛ́cí kú ācɛ ɔ́ɔmā í catāajɛ. Amáŋ, ɔdā nɛ̄ anúɔ da uwá ā, é yá ɔ̄ ɛ́ɛ́ ŋ́, ɔdā nɛ̄ anúɔ da uwá kéē híī yá ŋ́ mā, nēé gē yá á.

³ Ohígbū ɔ́ɔmā ā, anúɔ í gáā nū ācɛ nēe hile bá abɔ́ɔ ā bɛ̄cɛ hīla uwá ɛ́ɛ́ gɛ ŋ́. Ó kéē géē wɛ aólɛlā kú uwā. Ó klla ka ka ɛ́ɛ kéē géē pi uwá tū ɛ̄gbā ō gbā aɔ́wɔ kú uwā bɛ̄ɛka ukpa nōo ī kwú ɛbɛ́ ā.

⁴ Eko nɛ̄ alelékwū-ōtɛ̄hɔ̄ ā lɛ ɛlā nyā ka kwɛyí ā, ācɛ kú Ísrɛ̄lu gbɔɔ́ ō jikwū.

⁵ Ɔdā nōo yá ɛ́ɛ́ nēé hī abɔ́ɔ ka Ubókim ā yɔ̄ á. É le ɛya gwó lɛ Óndú abɔ́ɔ.

Ikwú kú Ujósuwa

⁶ Ujósuwa da ācɛ kú Ísrɛ̄lu kéē ga ɔlɛ́ uwā, anɔ́ɔ ɔnyɔɔnyɛ le yɛ gaá kwú ukpɛ̄ kú ajɛ kú nū ú á.

⁷ Eko nɛ̄ Ujósuwa yēeyī gāá kwu lɛ ā, ācɛ kú Ísrɛ̄lu yɔ̄ gē gbā Óndú ā ɛ̄gbā. Igbīhi nōó gekwú ā, é klla bá ī gbā Óndú ā ɛ̄gbā jāā gbéeko nɛ̄ anyākwɔ́cɛ, nēe má ɔdā ohídáagó nɛ̄ Óndú ā yá ā lɛ pɛ́ gekwú.

⁸ Ɔ̄cocɛ̄hɔ̄ kú Óndú ā, Ujósuwa, ɔyí kú Unún, gekwú eko nōó wɛ iháyí ofɛhɔ̄ ce igwó ā.

⁹ É le ɔ́ nyi ipú āyā nōo wɛ ajɛ kú nū ā, ɛ̄nɛ̄ o yɔ̄ ajɛ kú Utímatisɛ́ra, ɔlɛ́ kú ɛyí ɛfu kú Ɛ́frem, ɛhíícō kú ɛfu kú Ugáassi ā.

¹⁰ Odúúdú ācɛ nēe wɛ ɛgɔ kú nū eko ɔ́ɔmā le pɛ́ gekwú dúú. Anɔ́ɔ aɛ́gɔ́ ohile nēe wā igbīhi ūwā ā, í jé Óndú ā gɛ ŋ́, ɛ́ɛ́ nēé kōō ī jé ɛdɔ kú úklɔ́ nōó yá lɛ ācɛ kú Ísrɛ̄lu ā ŋ́.

Ācɛ Ísrɛ̄lu í gbā Óndú ā ɛ̄gbā gɛ ŋ́

¹¹ Anɔ́ɔ ācɛ kú Ísrɛ̄lu le íne kú Óndú ā bīya, anɔ́ɔ é gbɔɔ́ ō gbā aójibó kú Ubáalu ɛ̄gbā á.

¹² É klla gbā Óndú ā nōo wɛ Ɔwɔicō kú ádáádā uwā, ɛ̄gbā gɛ ŋ́. Ɔwɔicō kē kpó uwā bɛ̄cɛ ŋmá Íjīpiti á. É gbɔɔ́ ō gbā aɔ́wɔ ɔhá ɛ̄gbā. Aɔ́wɔ kú ācɛ nēé lā mla uwá ā. É gē túkpɛɛ́ lɛ uwá, anɔ́ɔ é cɛ̄ lɛ Óndú ā le cɔ̄nū á.

¹³ É tá ka aá gbā Óndú ā ɛ̄gbā ŋ́, anɔ́ɔ é gbɔɔ́ ō gbā aójibó kú Ubáalu mɛ́mla Ásitātɛsi ɛ̄gbā á.

¹⁴ Anɔ́ɔ Óndú ā kwú cɔ̄nū nɛ̄hi mla ācɛ kú Ísrɛ̄lu, anɔ́ɔ ó cɛ̄ le ācɛ o yúfú wā í gbɔɔ́ ō wúla uwá tāajɛ, ī hɛ́ uwā éjulúgwu á. Ó cɛ̄ lɛ aólɛlā ā lɔfú fíyɛ́ uwā, anɔ́ɔ ācɛ Ísrɛ̄lu í lɔfú nēe gē gbō iyī uwā ɛyí ŋmá ɛgiyí aólɛlā kú uwā gɛ ŋ́ má.

¹⁵ Eko dúúmā nēé le tá ɔgbɛ́ɛ́fú nɛɛ, Óndú ā gē bɛyíkwu uwá ɛ́gɛ́nɛ̄ ó tɛtɛ tū uwā ukɔ́ ka anúɔ géē yá lɛ ā. Anɔ́ɔ uwá bā ipú ákanya nɛ̄hi á.

¹⁶ Óndú ā gē kpó aótrɛ̄yí nēe wɛ ācɛ Ísrɛ̄lu lɛ uwá nēe ī nya uwá tá ŋmá abɔ̄ kú ācɛ nēe gē wā ī wu ɔlɛ́ uwā ā.

¹⁷ Nááná ācɛ Ísrɛ̄lu í lɛyítáajɛ lɛ aótrɛ̄yí kú uwā ŋ́ kpɔ́. É klla gbā Óndú ā kpaakpa ŋ́ kpɔ́. É klla gbɔɔ́ ō gbā aɔ́wɔ ɔhá ɛ̄gbā kpɔ́. Ádáádā uwā lɛyítáajɛ lɛ íne kú Óndú ā, amáŋ uwá nēe wɛ ayááyí uwā igbīhi uwā ā, tá kéē lɛyítáajɛ lɛ Óndú ā.

¹⁸ Eko dúú nɛ̄ Óndú ā lɛ ɔ̄cohɛ́pɔ̄ je lɛ uwá nɛɛ, ó gē tábɔ̄ kóō lɛ ācɛ kú Ísrɛ̄lu nyatá ŋmá abɔ̄ kú aólɛlā kú uwā jāā gbéeko nɛ̄ ɔ̄cohɛ́pɔ̄ ɔ́ɔmā gē yēeyī gaá kwu ā. Óndú ā gē ményīnyi uwā ohígbū nēé géē bá ī tíifu ipú ōwē mɛ́mla abɔ̄ nēé le da uwá ɛyí tāajɛ ā.

¹⁹ Amáŋ eko nɛ̄ otrɛ̄yí ā gekwú, ācɛ kú Ísrɛ̄lu ā gē kwúcē ga ɔwɛ nɛ̄ńcɛ̄ kú uwā ā kpɔ́. Cɛ́ɛ́ é klla gē yá ɔdōbɔ̄bí nɛ̄hi fíyɛ́ otɛtɛ nēé yá ā. É gē bá ī pā aɛ́cí kú aéwɔhá. É gē mā ɔdōbɔ̄bí kú uwā tá ŋ́.

²⁰ Cɛ́ɛ́ Óndú ā klla le cɔ̄nū mla uwá kpɔ́ gē ka ka éwo ā le ɛka nɛ̄ anúɔ gbo mla ádáádā uwā tá nyílá ɛɛ́, ohígbū kéē lɛyítáajɛ lɛ anúɔ ŋ́.

²¹ Ó ka anúɔ í gáā nū aéwo dúúmā nēe bá ipú ajɛ kú uwā eko nɛ̄ Ujósuwa ɔ́ɔ yēeyī ā bɛ̄cɛ gɛ ŋ́.

²² Ó ka anúɔ géē bī uwā le yá kú anúɔ jé ɔ́dāŋ ka ācɛ kú Ísrɛ̄lu ɛ́ɛ gē yɛce ɔwɛ kú anúɔ ɛ́gɛ́nɛ̄ ádáádā uwā yɛce ā.

²³ Anɔ́ɔ Óndú ā cɛ̄ le aéwo ɔ́ɔmā lā ipú ajɛ ā á. Ɔ́ɔmā yá ɛ́ɛ́ nōó cɛ̄ le Ujósuwa yá uwā lé ŋ́ má, nɛ̄ anú, nōo wɛ Óndú ā í kē nū uwā bɛ̄cɛ obōōbū nɛ̄ Ujósuwa kwú ā ŋ́ má.