ĀCƐ UHÍBRU 6 - Ubáyíbu kú Idɔma

¹ Ohígbū ɔ́ɔmā ká ālɔ̄ yɛ gɔbū, ga ɔdā nēé ī nwū aíjínkpa ā cɛ́ɛ́ kú ālɔ̄ kwú igbīhi kú alɔ ú cē kwu ɔdā aflɛ́yí nēé nwū ācɛ o hútu ō jé olɛhɔ̄ kú ācɔ̄lóhɔ́nyɛtá ŋmá ajɛ ā. Alɔ í cíkā ō hútu ō nwū aá ŋmáajɛ olɛhɔ̄ lɛyíkwu ocīgbīhi ŋmá úklɔ́ icííci, cɛ́ɛ́ kú aá cɛ̄ɛ̄lā Ɔwɔicō ɛ́ɛ́ gɛ ŋ́.

² Ó cɛgbá kéē nwū aá ɔdā dúú lɛyí ubatísim gɛ ŋ́, abɔ̄ ō lɛ ce ɔ̄cɛ ɛyí, ohéyī ŋmá ɔlékwū kú ācɛ nēe gekwú, mɛ́mla ɛpɔ̄ nɛ̄ Ɔwɔicō í ka tū ācɛ nōó lɛ ō pīyabɔ̄ ŋ́.

³ Ɔ́dāŋ́ ka Ɔwɔicō cɛ̄, alɔ yɛ gɔbū. Ɛ̄nyā kē wɛ ɔdā nɛ̄ alɔ géē yá á.

⁴ Ohígbū ka ɔwɛ nyá nēé í je ācɛ nēe tá ka aá cɛ̄ɛ̄lā Ohɔ́nyɛtá gɛ ŋ́ mā cīgbīhi kéē le pīyabɔ̄ kpɔ́ ɛ́ɛ́ mā? Ācɛ nēe cɛ̄ ka olɛhɔ̄ nōo ŋmá ɛgiyí Ɔwɔicō wɛ ɔkwɛ̄yi ā, ācɛ nēe lɛ ígblɛ́nyī tū ɛhi kú ɔkpáncō klla mīyɛ Alelékwū Ihɔ ŋmá ɛgiyí Ɔwɔicō ā,

⁵ ācɛ nēe jé ŋmá ɔdā nēé tɛtɛ jé ka ɛlā kú Ɔwɔicō ɔ́ɔ lɔhi, ācɛ nēe pó ofu kú ɔfú kú Ɔwɔicō nōo í wā í cɔcɛ́ ipú ɛcɛ nyā ā.

⁶ Anɔ́ɔ é tá ka aá cɛ̄ɛ̄lā kú Ɔwɔicō gɛ ŋ́! Ó tɔ́ɔtɛ́ kéē le uwá cīgbīhi cɛ́ɛ́ kéē pīyabɔ̄ glá gɛ ŋ́, ohígbū ka é yɔ̄ ī je Ɔyínɔ̄yīlɔ kú Ɔwɔicō nyɔ́kpá igbɔhá kpɔ́, cɛ́ɛ́ kéē kpó uwē tū ɔ̄ ɛyí ipéyī ójila igbɔɔ́mpa kpɔ́.

⁷ Ɔwɔicō ī hɔ́hā ce ajɛ nōo ī gwá éŋkpɔ̄ ɔwɔ nōo ī yá tū ɔ̄ ojigógó ā kóō yá ɔdɛ̄hɔ̄ nōo í tīile lɛ ācɛ nēé hí lɛ uwá ā.

⁸ Amáŋ ɔ́dāŋ́ kóō le bū ujē mɛ́mla ɛpɛ̄, ó tīile dúúmā ŋ́, Ɔwɔicō lɔfú tokónu lɛ ɔ́ cɛ́ɛ́ ɔlá kóō kwú ɔ̄ í yi tāajɛ glá.

⁹ Amáŋ ɔ́dāŋ́ ka alɔ kā o ka lɛ ā, aóklóbīya ohe alɔ ɔtū, alɔ jé kpɔ́cíí ka ɛlā ā í liyē kwu aá ŋ́. Alɔ jé ka aá géē lɛ aɔ́da olɔhi fíyɛ́ nōo ī wā eko nɛ̄ Ɔwɔicō nya aá tá ā.

¹⁰ Ɔwɔicō gē yá ɔdā okpaakpa piyóó. Ó gáā mlanyī úklɔ́ nɛ̄ aá yá lɛ ɔ́ ā ŋ́, ámāŋ ka ɛ́gɛ́nɛ̄ aá ma ihɔtū nɛ̄ aá lɛ lɛ ɔ́ ā fú ipú o tá ācɔ̄lóhɔ́nyɛtá aɔ́mpa aá abɔ̄, nɛ̄ aá klla yɔ̄ ī yá lɛ uwá kpɔ́ ā.

¹¹ Ɔdā nōo kwu alɔ ɔtū nɛ̄hi ā wɛ ka éyééye ká aá kóō lɛ ɔtūcaaca kú nū bī gaajɛ, cɛ́ɛ́ kú ɔdā nɛ̄ aá ī leyīce ɔ́ ā kóō le yá ɔkwɛ̄yi.

¹² Alɔ í tíne ká aá kwáahi ŋ́, amáŋ alɔ tíne ká aá gbla ācɛ nēe cɛ̄ɛ̄lā ā nēe klla lɔtūlé, anɔ́ɔ é mīyɛ ɔdā nɛ̄ Ɔwɔicō cokónu ō je lɛ uwá ā á.

Okónu nɛ̄ Ɔwɔicō ī ce ā gē jɔfú lɛ eyīyōce

¹³ Eko nɛ̄ Ɔwɔicō cokónu lɛ Ébrahām ā, ó le eyīce ka anúɔ í yá ɔdā nɛ̄ anúɔ cokónu kú nū ā. Abɔ̄ ɔ̄cɛ nōo nwuné fíyɛ́ ɔ̄ ɔhá í yɔ̄ gɛ ŋ́ mā, iyē kú iyīnū nōó bī le cē oji á.

¹⁴ Ó kahíníī, “Ɔkwɛ̄yi nɛ, n géē hɔ́hā ce uwɔ, n géē yá kú ayááyí kú uwɔ kéē le nyīla.”

¹⁵ Abɔ̄ Ébrahām kē lɔtū lé piyóó ā, ó kē mīyɛ ɔdā nɛ̄ Ɔwɔicō cokónu ō je lɛ ɔ́ ā.

¹⁶ Ɔkwɛ̄yi eko nɛ̄ ācɛ le oji cē, é gē bī iyē kú ɔ̄cɛ nōo fíyɛ́ uwā lɛ cē oji ā, cɛ́ɛ́ áafú dúú í yɔ̄ gɛ ŋ́.

¹⁷ Ɔwɛ ékpónú ɔ́ɔmā, eko nɛ̄ Ɔwɔicō tíne kóō le mafú yēŋēē lɛ ācɛ nōó cokónu lɛ uwá ā, ka ɔtū kú anúɔ í gáā pīyaabɔ̄ ŋ́ mā ā, ó lɛ ɔkpá gbo.

¹⁸ Anɔ́ɔ Ɔwɔicō le ɔkpá gbo lɛ alɔ, ó klla kē le okónu ce lɛ alɔ dúú. Aɔ́dā ɛpa nēe bá ā í tōō pīyabɔ̄ glá ŋ́, ohígbū ka Ɔwɔicō í gē kɛ̄mgbɛ̄ ŋ́. Ohígbū ɔ́ɔmā, alɔ nēe kwu nyɔ̄ í tayínū ɛga iyínū ā, ká ālɔ̄ lɛ ɔtū ɛ̄yīpɛ̄ lɛ, ohígbū ka alɔ lɔfú fúla abɔ̄ tū okónu nōó ce ā nōo wɛ ɔdā nɛ̄ alɔ leyīce ɔ́.

¹⁹ Eyīyōce nɛ̄ alɔ lɛ nyā lɛbɛ̄ɛka ekli o kwajɛ kú oyēeyī kú alɔ ā. Ó cɛ̄ lɛ alɔ le jé kpɔ́cíí ka alɔ le nyatá, ó le alɔ bī bū īlī ō hókómpinu igbó kú Agblīihɔ-nɛ̄hi kú ɔkpáncō nēé ī bēhé nū ga ɛgotīihɔ fíyɛ́ dúú ā.

²⁰ Ɛga nɛ̄ Ujísɔ̄si bēhé nyɔ̄ ohígbū alɔ bɛ̄ɛka ɔ̄cɛ nōo gbɔbū, ɛ́gɛ́nɛ̄ ó kwú pīya otrɛ̄yí kú ācogwɛ́ɛya piyóó, bɛ̄ɛka Umɛlikísɛ̄dɛki ā.