ĀCƐ UHÍBRU 5 - Ubáyíbu kú Idɔma

¹ Ohígbū ka Ɔwɔicō gē fu otrɛ̄yí kú ācogwɛ́ɛya ŋmá ipú ācɛ ā kéē cɛ̄ ɔ̄ ɛhɔ̄ kwɛyí ācɛ ā, cɛ́ɛ́ kóō gwɛ́ɛya lɛ Ɔwɔicō kwɛyí ācɛ ā ohígbū íne nēé bīya ā.

² Abɔ̄ anú abɔ̄yīnū í lɔfú ipú ɔtū ŋ́ ɔwɛ dóódu ā, ó gē gbonɛnɛ lɛ aógwuda nēé je ka ɔdā nɛ̄ áa yá ā óo wɛ ɔdōbɔ̄bí ŋ́ mā ā.

³ Anɔ́ɔ ohígbū ka abɔ̄ anú abɔ̄yīnū í lɔfú ipú ɔtū ŋ́ mā, ó cɛgbá kóō lɛ ɛya gwó lɛ Ɔwɔicō, ó wɛ ohígbū íne nɛ̄ ācɛ ɔlɛ́ nū bīya ōfōōfūnū ŋ́, amáŋ ohígbū ákú anú abɔ̄yīnū dúú.

⁴ Ɔ̄cɛ dúúmā í gē lɛ ojīlīmā kú igabɔ̄ kú ɔ̄cogwɛ́ɛya ce iyīnū glá ŋ́, ń táafú ŋ́ Ɔwɔicō ōfōōfūnū nōo ī fu ɔ̄cogwɛ́ɛya lɛ iyī nū glá ā lɛ ɔ́ fu, ɛ́gɛ́nɛ̄ ó fu Árɔ̄ni ā.

⁵ Ɔwɛ ékpó ɔ́ɔmā, Ohɔ́nyɛtá í je ojīlīmā kú igabɔ̄ kú ɔ̄cogwɛ́ɛya lɛ iyī nū ŋ́. Ikɔkɔ ɔ́ɔmā, Ɔwɔicō da ɔ́ kahíníī, “Awɔ wɛ Ɔyínɔ̄nyīlɔ kú um á, ícɛ nyā n le pīya Ádā uwɔ ɛɛ́.”

⁶ Ɔwɔicō klla le ka ɛgɔhá kahíníī, “A wɛ ɔ̄cogwɛ́ɛya piyóó, bɛ̄ɛka Umɛlikísɛ̄dɛki ā.”

⁷ Eko nɛ̄ Ujísɔ̄si yēeyī ipú ɛcɛ nyā ā, ó lɛ ɔkɔ cɛyí gbōō le ikwū je nɛ̄hi mla agīje, le ɔkɔ gbā lɛ Ɔwɔicō nōo lɔfú hɛ́ ɔ̄ tá ŋmá ikwū. Anɔ́ɔ Ɔwɔicō le ɔkɔ nōó gbā a pó ohígbū kóō gbonɛnɛ klla lɛ iyī nū túwāajɛ lɛ Ɔwɔicō.

⁸ Amáŋ nááná nōó wɛ Ɔyínɔ̄nyīlɔ kú Ɔwɔicō ā, ōwē nōó má ā, lɛ ɛlā nwū ɔ̄ kóō lɛyí túwāajɛ.

⁹ Eko nōó le ɔdā nōó cíkā ō yá ā yá kwɛyí ā, abālɔbányā ó lɔfú nya odúúdú ācɛ nēe lɛyítáajɛ lɛ ɔ́ ā tá piyóó glá.

¹⁰ Ɔwɔicō le ka tɛ́ɛcɛ ka ɔ́ɔ le pīya otrɛ̄yí kú ācogwɛ́ɛya bɛ̄ɛka Umɛlikísɛ̄dɛki ā.

Ó cɛgbá kú ālɔ̄ yɛ gɔbū ɔwɛ kú Ohɔ́nyɛtá

¹¹ Alɔ lɛ ɔdā alɛwa nɛ̄ alɔ gē ka lɛyíkwu ɛ̄nyā, amáŋ ó lɔnɔ ká ɔ̄cɛ kóō ka ɔ́ yēŋēē ohígbū ka aá bū ahɔ̄ ga ipú ŋ́.

¹² Ɛga nɛ̄hi yɔ̄ lɛ aá kú aá je pīya Itíca abālɔbányā, nááná aá klla cɛgbá kú ɔ̄cɛ éyi kóō klla nwū aá ŋmáajɛ kpɔ́ ɔdā aflɛ́yí nēé nwū aá kú ɛlɔ̄ɔwɔicō ā. Ikoko nɛ̄ aá í lé ɔdōlé olɔfú ā, ó cɛgbá ká aá gwá amɛ̄ kpɔ́, ɛ́gɛ́nɛ̄ ɔ̄cɛ ī kɛlā ā.

¹³ Ohígbū ka ɔ̄cɛ dúúmā nōo ī gwá amɛ̄ kpɔ́ wɛ ɔyípɛ̄ olugwulugwu, nōó jé ɔdā nōo wɛ ɛyɛ́ɛyɛ́yí kú ɔdā o lɔhi mɛ́mla ɔdōbɔ̄bí ŋ́.

¹⁴ Amáŋ ɔdōlé olɔfú wɛ ákú ācɛ nēe le jɛ̄, é lɛ ɔtū kú uwā nwū jé ŋmá lɛ úklɔ́ cɛ́ɛ́ kéē jé ɔdā nōo lɔhi mɛ́mla ɔdā nōo bɔ̄bí.