ĀCƐ UHÍBRU 2 - Ubáyíbu kú Idɔma

Ɔwɛ nɛ̄hi nēé bī le nya ācɛ tá ā

¹ Ɔ́ɔmā yá ɛ́ɛ́ nɛ̄ alɔ cíkā ō lɛ abɔ̄ bī ɛlā ɔkwɛ̄yi nɛ̄ alɔ pó ā lɔɔlɔhi á, o yá ɛ́ɛ́ kú ɔdā dúú kóō je alɔ ɔtū ŋmá anú ŋ́.

² É le mafú ka olɛhɔ̄ kú Ɔwɔicō nɛ̄ aálelékwū otɛ̄hɔ̄ cɛ̄ lɛ aádáádā alɔ ā wɛ ɔkwɛ̄yi, é le ācɛ dóódu nēé lɛyítáajɛ lɛ ɔ́ ŋ́ mɛ́mla ācɛ nēé bī ɔ̄ yúklɔ́ ŋ́ mā, yá ɛdɔ kú italā nōo cíkā lɛ ɔdā nēé yá ā.

³ Ɔwɛ nyá nɛ̄ alɔ géē kwu ŋmá italā nēé í yá alɔ, ɔ́dāŋ́ ka alɔ í lɛ ɔtū kú alɔ tá ɔwɛ kú idáagó nɛ̄ Ɔwɔicō dɔɔ̄kā ō bī le nya alɔ tá ā ŋ́ mā a? Óndú ā abɔ̄yī nū ka ɔwɛ nōó le nya ācɛ tá ā tɛ́ɛcɛ aflɛ́yí á. Anɔ́ɔ ācɛ nēe pó ɛlā kú nū cɛ̄ ka óo wɛ ɛlā ɔkwɛ̄yi.

⁴ Ɔwɔicō kē cɛ̄ uwá ijáalí oŋmá lɛ ō yá ɔdā ocābɔ̄ mɛ́mla úklɔ́ ō hídáagó ɛyɛ́ɛyɛ́yí, mɛ́mla o kɔ̄ ɛhi kú Alelékwū Ihɔ lɛ ācɛ nēe he ɔ́ ɔtū ā.

⁵ Ɔwɔicō í le aálelékwū otɛ̄hɔ̄ ā yá ācɛ ogbō ɛcɛ ɛ̄yīpɛ̄ nōo í wā nɛ̄ alɔ kɛlā lɛyíkwu ɔ́ ā ŋ́.

⁶ Ikɔkɔ ɔ́ɔmā, ɛ́gɛ́nɛ̄ é ka ipú ɔkpá kú ɛlɔ̄ɔwɔicō kahíníī, “Ɔdí nɛ̄ alɛɛcɛ wɛ ā, Ɔwɔicō, nāa kōō gē gbɛlá kwu uwá ā, ámāŋ ka alɛɛcɛ icííci, nāa ī lɛ ɛlá kwu uwá ā?

⁷ A le uwá yá nyɛ́ fíyɛ́ aálelékwū otɛ̄hɔ̄ ā eko kpií a, a kwú ɔfulā kú ofú mɛ́mla ojīlīmā ú kwu ɔ́ ɛyí, a klla kwú uwā ú yá otrɛ̄yí kú ɔdā dóódu nɛ̄ abɔ̄ kú uwɔ yá ā.

⁸ A kwú ɔdā dóódu ú kpó tū uwā abɔ̄.” O ka ka Ɔwɔicō kwú uwā ú yá aótrɛ̄yí kú ɔdā dóódu, ɔdā dúúmā í yɔ̄ nɛ̄ ó kpó tū uwā abɔ̄ ŋ́ nɛɛ ŋ́. Amáŋ, abālɔbányā, alɔ má ka alɛɛcɛ í wɛ otrɛ̄yí kú ɔdā dóódu ɛ́ɛ́ ŋ́.

⁹ Amáŋ alɔ jé odée lɛyíkwu Ujísɔ̄si, nɛ̄ eko kpií Ɔwɔicō le ɔ́ yá nyɛ́ fíyɛ́ aálelékwū otɛ̄hɔ̄ ā, cɛ́ɛ́ ohígbū eyīnyinyi alɔ nɛ̄ Ɔwɔicō má icííci ā, kóō gekwú ohígbū ɛjɛ̄ɛ̄jī ācɛ. Alɔ jé ka Ɔwɔicō kwú ɔfulā kú ofú mɛ́mla ojīlīmā í kwu ɔ́ ɛyí.

¹⁰ Ó le kpaakpa ká Ɔwɔicō, nōo yá odúúdú aɔ́dā dóódu klla lɛ uwá tū ā, cíkā ō lɛ Ujísɔ̄si yá kpaakpa oŋmá lɛ ōwē ō má nɛ̄hi, o yá ɛ́ɛ́ kóō lɛ ācɛ alɛwa nēe ī yɛce ɔ́ ā bī wā kéē lɛ ojīlīmā nɛ̄hi mɛ́mla ɔfú kú nū lɛ. Ohígbū ka Ujísɔ̄si le uwá tɔ́ɔkwu ɛ́ɛ́ nɛ̄ Ɔwɔicō nya uwá tá á.

¹¹ Ó le ācɛ iyē gwu ŋmá ine nēé bīya ā, anɔ́ɔ anú mɛ́mla ācɛ nōó gwu uwá iyē ā le ádā ékpó á. Anú yá nōó tū ɔ̄ uwēyī kóō hī uwā ka ayínɛ́ nū ŋ́ má.

¹² Ó da Ɔwɔicō kahíníī, “N géē da ācɛ ɔlɛ́ um ɔdā nāa yá ā, n géē cɛ̄tra awɔ ipú ōjīla kú uwā.”

¹³ Ó klla kahíníī, “N géē kpɔ́tūce Ɔwɔicō.” Ó klla kahíníī, “Ami yɔ̄ á, mla ayípɛ̄ nɛ̄ Ɔwɔicō kpó gā um ā.”

¹⁴ Ohígbū ka ayípɛ̄ ā, ɛ́gɛ́nɛ̄ ó hī uwā lɛ ā, wɛ alɛɛcɛ nēe lɛ ɛ́nɛ́bɛ́ iyē mɛ́mla oyī kú ācɛ ɔlamu, Ujísɔ̄si abɔ̄yī nū kwú pīya bɛ̄ɛka ɔlɛɛcɛ ā. Ohígbū ka ipú ɔkpíyē kú ɔlɛɛcɛ ā nōó kwú glá á, o yá kóō lɛ Ebilíi, nōo bī ɔfú kú ikwū ā yíífi.

¹⁵ Ɔwɛ nyā nōó gáā bī lɛ hɛ́ ɛjɛ̄ɛ̄jī ācɛ nēe wɛ ɔfiyɛ ipú oyēeyī kú uwā dúúdú ohígbū ufi ikwū ō yá ā tá glá á.

¹⁶ Ohígbū kóō tá cāā ka Ujísɔ̄si wā gaá hɛ́ ayípɛ̄ ɔlɛ́ Ébrahām tá, ó wɛ aálelékwū otɛ̄hɔ̄ ā nōó wā í hɛ́tá ā ŋ́.

¹⁷ Ɛ̄nyā cābɔ̄ ka ó cɛgbá kéē lɛ ɔ́ yá gbla ayínɛ́ nū ɔwɛ dóódu, o yá ɛ́ɛ́ kóō le pīya otrɛ̄yí kú ācogwɛ́ɛya o ményinyi ācɛ nōo ī yúklɔ́ kú nū ŋmá ɔtū ékpónú lɛ Ɔwɔicō ā. Cɛ́ɛ́ kóō lɛ inyílɔ́lɛ́ kú ācɛ ɔlɛ́ nū gwu.

¹⁸ Ohígbū ka, ɛ́gɛ́nɛ̄ ó lɛ ōwē má ɛ́ɛ́ mā, mɛ́mla ɛ́gɛ́nɛ̄ é lɛ ojámá yá ɔ̄ ɛɛ́ mā, ó lɔfú tá ācɛ nēe ī yá uwā ojámá ā abɔ̄ glá.