ĀCƐ UHÍBRU 13 - Ubáyíbu kú Idɔma

Ɔdā olɔhi ō yá

¹ Aá yɔ̄ ī yíihɔtū tá ayínɛ́ ācɔ̄lóhɔ́nyɛtá ɔ́mpa aá.

² Aá bla ká aá mīyɛ ugbɔga wā ɔlɛ́ aá. Ó lɛ ācɛ nēe yá lɛ ā nēe mīyɛ alelékwū-ōtɛ̄hɔ̄ wā ɔlɛ́ nēé jé ŋ́ dúú ɛɛ́.

³ Aá gbɛlá kwu ācɛ nēe yɔ̄ inu agbá ā bɛ̄ɛka ɔdā nɛ̄ aá yɔ̄ inu agbá mla uwá ā. Aá kē gbɛlá kwu ācɛ nēé gē yá ōwē ā bɛ̄ɛka aá nēé yɔ̄ ī yá ōwē ā.

⁴ Ɔbá mɛ́mla ɔnyā, aá lɛ ojīlīmā ce ɔlɛ́ aá, aá cíkā ō yɛ yɔ̄ ī dɔɔ̄kā ɔ̄cɛ o gwutá mla anú ŋ́. Ohígbū ka Ɔwɔicō géē kɛpɔ̄ tū ācɛ nēe gē yá ucē ɛ́gɔ́ɔmā.

⁵ Aá lɛ iyī aá tū cíí ŋmá ihɔtū kú ije ō yá. Ɔdā nɛ̄ aá lɛ ā kóō jɛ̄ aá eyī, ohígbū ka Ɔwɔicō le ka kahíníī, “Ń gáā leyī gwū aá bónū ŋ́, ń kē gáā cīgbīhi kwu aá gbóógbóō ŋ́.”

⁶ Ālɔ̄ lɛ ɔtū yéékpó cɛ́ɛ́ kú ālɔ̄ ka ka Óndú alɔ wɛ ɔ̄cɛ otá alɔ abɔ̄, alɔ í kē gáā yúufi ŋ́. Ɔdí nyá nɛ̄ ɔ̄cɛ yá alɔ glá ā.”

Ɛyí ō táajɛ lɛ aótrɛ̄yí

⁷ Aá gbɛlá kwu aótrɛ̄yí kú aá nēe kɛlā kú Ɔwɔicō lɛ aá ā. Aá gbɛlá kwu ɛ́gɛ́nɛ̄ é yēeyī klla kwú lɛ ā, cɛ́ɛ́ kú aá gbla ɛ́gɛ́nɛ̄ é kpɔ́tū Ɔwɔīcō lɛ ā yá.

⁸ Ujísɔ̄si Ohɔ́nyɛtá í gē pīyabɔ̄ ŋ́, ɛ́gɛ́nɛ̄ ó lɛ tɛtɛ ā nɛ̄ ó wɛ eko dóódu á, kwu ícɛ kwu óócí.

⁹ Aá híī cɛ̄ ká ɛdɔ kú ɔdā ɛ̄kɛ̄mgbɛ̄ ɛyɛ́ɛyɛ́yí nēé gē nwū ā kóō lɛ aá nyíleyī ŋmá ɔwɛ okpaakpa ā ŋ́. Ogbonɛnɛ kú Ɔwɔicō lɛ alɔ gē lɛ ɔfú tū alɔ ɔtū klla ī tá alɔ abɔ̄, amáŋ o yɔ̄ ī lɛyítáajɛ lɛ íne kú ɔdōlé í tá alɔ abɔ̄ glá ŋ́.

¹⁰ Alɔ lɛ ede nɛ̄ ācogwɛ́ɛya ɛyí nū abālɔbányā í lɔfú lé ɔdā nēé gwɛ́ɛya ɛyí nū ā glá ŋ́.

¹¹ Ohígbū ka aótrɛ̄yí kú ācogwɛ́ɛya gē bī oyī kú aɛ́bɛ́ ā ga ipú ɛga otīihɔ fíyɛ́ dúú kóō je ɔ́ gwɛ́ɛya kú íneoōbīya, amáŋ ɔkpíyē kú ɛbɛ́ abɔ̄yī nū ā, é gē tū uwā ɔlá eyɛ̄ɛ̄cɛ kú igelī ā.

¹² Ohígbū ɛ́gɛ́nyā Ujísɔ̄si gekwú eyɛ̄ɛ̄cɛ kú igelī ā dúú, o yá ɛ́ɛ́ kú ō bī oyī kú nū le alɔ iyē gwu ŋmá íne nɛ̄ alɔ bīya ā.

¹³ Ohígbū ɔ́ɔmā, ālɔ̄ gā ɛgiyí nū eyɛ̄ɛ̄cɛ kú igelī nɛ̄hi, cɛ́ɛ́ kú uwēyī nōo kwú ɔ̄ ā kóō lɛ ālɔ̄ kwú dúú.

¹⁴ Ohígbū ka ipú ɛcɛ amānyā alɔ í lɛ igelī nɛ̄ alɔ ī lā piyóó glá ŋ́, amáŋ alɔ gē tíne igelī nōo gē wā ā.

¹⁵ Ohígbū ɔ́ɔmā, ká ālɔ̄ yɔ̄ ī cɛ̄tra Ɔwɔicō ojigógó kóō lɛbɛ̄ɛka ɛya nɛ̄ alɔ yɔ̄ ī gwó, o ŋmá lɛ iyē kú Ujísɔ̄si ā.

¹⁶ Aá híī mlanyī olɔhi ō yá lɛ ācɛ ŋ́, ká aá kɔ̄ ɔdā nɛ̄ aá lɛ ā mla ācɛ ɔhá. Ohígbū ka ɛ̄nyā wɛ ɛdɔ kú ɛya ogwó nōo gē he Ɔwɔicō ɔtū á.

¹⁷ Aá lɛyítáajɛ lɛ aótrɛ̄yí ká aá o ŋmá o yá ɔdā nēé da aá ka aá yá ā. Ohígbū kéē gē mlɛ́nyɔ́ ō leyikwu aá ŋ́, ohígbū kéē géē kɔ́kɔ lɛ Ɔwɔicō kú ɛ́gɛ́nɛ̄ é leyīkwu aá lɛ ā. Ɔ́dāŋ́ ka aá lɛyítáajɛ lɛ uwá é géē yúklɔ́ kú uwā mla éeyē, ɔ́dāŋ́ nɛ̄ aá kē lɛyítáajɛ lɛ uwá ŋ́, é géē yúklɔ́ kú uwā mla ɔtūnōbí, ɔ́ɔmā í kē gáā tīle lɛ aá ŋ́.

¹⁸ Aá yɔ̄ ī gbɔ̄ɔkɔ lɛ Ɔwɔicō ohígbū alɔ. Alɔ jé péee ka ɔtū kú alɔ í ŋmá alɔ ɛpɔ̄bí ŋ́, ohígbū ka alɔ dɔɔ̄kā ō yá ɔdā nōo lɔhi eko dóódu.

¹⁹ N bī odúúdú ɔtū kú um le gbɔ̄ɔkɔ lɛ aá kú aá gbɔ̄ɔkɔ lɛ Ɔwɔicō, cɛ́ɛ́ kú Ɔwɔicō kóō cɛ̄ lɛ uwá lɛ um hɛ́tá gé lɛ aá fíyaa.

Ɔkɔ ámōōmɛ nēé gbā mɛ́mla okónu ō hɛ́

²⁰ Abālɔbányā Ɔwɔicō kú ɛbɔ́, kwú Óndú alɔ Ujísɔ̄si nōo lɛbɛ̄ɛka ɔ̄cogbāálá nɛ̄hi kú álá ā í héyī ŋmá ɔlékwū ohígbū kóō kwú ikwū ɛya nēé je ɔ̄ gwó ā, o ŋmá lɛ ikwū nyā ó kwú ɛka nōo í yɔ̄ piyóó ú kwajɛ.

²¹ N gbɔ̄ɔkɔ lɛ Ɔwɔicō nōo ī je ɛbɔ́ ā kóō lɛ odúúdú ɔdā olɔhi nɛ̄ aá cɛgbá o yá ɛ́ɛ́ kú aá yá ɔdā nōó tíne kú aá yá ā kpó lɛ aá. Ká Ujísɔ̄si kóō tá aá abɔ̄ ká aá yá ɔdā nōo he Ɔwɔicō ɔtū ā. Ɛgahi mɛ́mla ojīlīmā kóō yɔ̄ lɛ Ujísɔ̄si o ŋmá eko tá eko. Aamí.

²² N gbɔ̄ɔkɔ lɛ aá, ayínɛ́ um, kú aá lɛ ahɔ̄ jē lɛ olɛhɔ̄ ō tá ācɛ ɔtū kwu ɔtū nɛ̄ n tá tū ipú ɔkpá kpií nɛ̄ n tá nyā a.

²³ N tíne ká aá jé kéē lɛ ɔyínɛ́ alɔ Utímōti hɛ́tá ɛɛ́. Ɔ́dāŋ́ kóō gā amānyā fíyaa, ami mɛ́mla anú géē wā gaá má aá.

²⁴ Aá hokónu tū ɛjɛ̄ɛ̄jī aótrɛ̄yí kú aá mɛ́mla ɛjɛ̄ɛ̄jī ācɔ̄lóhɔ́nyɛtá ā. Ācɛ nēe ŋmá Ítāli ā hokónu tū aá.

²⁵ N gbɔ̄ɔkɔ kú Ɔwɔicō kóō ma ihɔtū mɛ́mla ogbonɛnɛ kú nū ā fú lɛ aá. Aamí.