ĀCƐ UHÍBRU 10 - Ubáyíbu kú Idɔma

¹ Aíne nēé je lɛ ācɛ Ujíyu ā í lɛbɛ̄ɛka ɛ̄nɛ̄ o yɔ̄ ɔkpáncō ā ŋ́, é wɛ ofu kú ɔdā ɔkwɔ̄ɔ̄kwɛ̄yi nōo yɔ̄ ī wā ɛ̄cɔ̄bū ā. Ɛdɔ kú ɛya ékpó ā nēé gē gwó piyóó á, oŋmá iháyí éyi ga iháyí ɔhá. Amáŋ ó gwu ācɛ nēe ī wā ɛgiyí Ɔwɔicō ā iyē kpaakpa glá ŋ́.

² Ɔ́dāŋ́ ka é lɛ ācɛ nēe yɔ̄ ī gbā Ɔwɔicō ɛ̄gbā iyē gwu ŋmá íne nēé bīya ā nɛɛ, é géē yɛ í lɛ́pɔ̄bí kú ínoōbīya gɛ ŋ́, cɛ́ɛ́ ɛya dóódu nɛ̄ ācɛ gē gwó ā kē mɛ.

³ Amáŋ ɔdā nōo yá ɔkwɛ̄yi ā wɛ ka ɛya nēé gē gwó ŋmá iháyí ga iháyí ā gē tá ācɛ ɛlá kwu íne nēé gē bīya ā.

⁴ Ohígbū ka oyī kú ɔbá ɛna mɛ́mla ɛwū í na ínoōbīya glá gbóógbóō ŋ́.

⁵ Ɛ́gɔ́ɔmā eko nɛ̄ Ohɔ́nyɛtá wɛ̄ɛcɛ ā ó kahíníī, “Á tíne ɛya ō gwó mɛ́mla ɛhi ŋ́, amáŋ a lɛ ɔkpíyē tútū gā um.

⁶ Ɛya opá yɔɔlá dúúdú ɛyí ede ā ámāŋ ka ɛya ō gwó ká kpó íneōbīya nyɔ̄ ā í kē he uwɔ ɔtū ŋ́.

⁷ Anɔ́ɔ n ka, ‘Ami yɔ̄ á, n wā gaá yá ɔtū kú uwɔ nɛ̄ n Ɔwɔicō kú um, ɛ́gɛ́nɛ̄ é tá lɛyíkwu um ipú ɔkpá kú íne lɛ ā.”

⁸ Ohɔ́nyɛtá klla kahíníī, “Á tíne ɛya ōgwó mla ɛhi mɛ́mla ɛya oyɔlá dúúdú mɛ́mla ɛya ōgwó ohígbū íne ōbīya ŋ́. É klla wɛ ɔdā ō he uwɔ ɔtū ŋ́.” Ó ka ɛ̄nyā nááná nōó jé kéē gē gwɛ́ɛya nēe bá ā ɛ́gɛ́nɛ̄ íne ka lɛ ā.

⁹ Ó klla kahíníī, “Ami yɔ̄ á, n wā gaá yá ɔtū kú uwɔ nɛ̄ n.” Ó le odúúdú ɛya nēé ī gwó nɛ̄ncɛ̄ ā ŋmónyí, anɔ́ɔ ó kwú ɛya kú Ujísɔ̄si ā í kwɛyí nū á.

¹⁰ Abɔ̄ Ujísɔ̄si le ɔdā nɛ̄ Ɔwɔicō tíne ā yá kwɛyí ā, é le alɔ iyē gwu ŋmá íne nɛ̄ alɔ bīya ā, o ŋmá lɛ ō je ɔkpíyē kú nū gwɛ́ɛya igbeékpónú ōfōōfūnū.

¹¹ Ɔ̄cogwɛ́ɛya dóódu kú ācɛ Ujíyu gē yúklɔ́ kú nū ɛ̄cī dóódu, anɔ́ɔ ó ge gwó ɛdɔ ɛya ékpónú ā ɛ̄cī dóódu igbɛ alɛwa, amáŋ ɛya ōgwó nēe bá nyā í kpó íne nɛ̄ ācɛ bīya ā bónū gbóógbóō glá ŋ́.

¹² Amáŋ Ohɔ́nyɛtá le ɛya gwó igbeékpónú ohígbū íne nɛ̄ ācɛ bīya ā, ɛya ōgwó nōo tīile piyóó, anɔ́ɔ ó má cīce abɔ̄lɔ́ná kú Ɔwɔicō á.

¹³ Ó yɔ̄ ī gbēyī jāā gbéeko nēé lɛ aólɛlā kú nū yá ɔdā ōlikpó ce ɔ́ kú nū.

¹⁴ Ohígbū ka oŋmá lɛ ɛya nōō gwó igbo ékpó ā, ó le ācɛ nēé gwu uwá iyē ŋmá íneoōbīya ā yá yēŋēē piyóó.

¹⁵ Alelékwū Ihɔ ā kē cɛ̄ ijáalí lɛ alɔ dúú. Eko aflɛ́yí ó kahíníī,

¹⁶ “Ɛ̄nyā wɛ ɛka nɛ̄ n géē gbo mla uwá. Eko nɛ̄ eko ɔ́ɔmā le yɛ, n géē kpó íne kú um tū ipú ɔtū kú uwā, n klla géē tá íne ā bá ɔtū kú uwā.”

¹⁷ Anɔ́ɔ ó klla kahíníī, “Ń gáā blakwu íne nēé bīya ā gɛ ŋ́.”

¹⁸ Anɔ́ɔ eko nɛ̄ Ɔwɔicō kwú íne nɛ̄ ācɛ bīya ā í yá uwā ɛhi, ó cɛgbá kéē gwɛ́ɛya ohígbū ínoōbīya gɛ ŋ́.

Ɔtū ō tū kwu ɔtū mɛ́mla ukɔ́ ō tū

¹⁹ Ohígbū ɔ́ɔmā, ayínɛ́ um, abālɔbányā alɔ lɔtū lɛ ká alɔ nyɔ̄ ipú inu eyīpú otīihɔ fíyɛ́ dúú ā o ŋmá lɛ ikwū kú Ujísɔ̄si ā ɛɛ́.

²⁰ Ó le ɔwɛ ɛ̄yīpɛ̄ nwūla lɛ alɔ ga ɛgiyí Ɔwɔicō nōo yēeyī, ŋmá lɛ ō le ukɔ́tim ā híla lɛ alɔ, ɔ́ɔmā wɛ oŋmá lɛ ɔkpíyē kú nū ā.

²¹ Abɔ̄ alɔ le ɔ̄cogwɛ́ɛya nɛ̄hi o leyīkwu ācɔ̄lóhɔ́nyɛtá lɛ ɛɛ́ mā a,

²² ālɔ̄ túblá Ɔwɔicō mɛ́mla ɔtū ɔ̄kwɛ̄yi mɛ́mla ɔtū ékpó mɛ́mla ɔtū nēé le gwu yēŋēē ŋmá ɔtū ō ŋmó ɔ̄cɛ ɛpɔ̄bí mɛ́mla iyē nēé le na mla éŋkpɔ̄ oyēŋēē.

²³ Ālɔ̄ lɛ ɔtū kú alɔ yéékpó cɛ́ɛ́ kú ālɔ̄ lɛ abɔ̄ bī eyīyōce nɛ̄ alɔ lɛ ā, ohígbū ka alɔ kpɔ́tūce ka Ɔwɔicō í lɛ okónu nōó ce ā tū.

²⁴ Ālɔ̄ gbɛlá ɔwɛ nɛ̄ alɔ í tá aɔ́mpa alɔ ɔtū kwu ɔtū, cɛ́ɛ́ ká ālɔ̄ yíihɔtū tá ācɛ ɔhá mɛ́mla o yá kéē yúklɔ́ olɔhi.

²⁵ Ālɔ̄ híī habɔ̄ ucē kóō tū iyī alɔ bá tɔ̄há ā tá ŋ́, ɛ̄nɛ̄ o le pīya ucē kú ācɛ ōhī ɛɛ́ mā ŋ́. Amáŋ ālɔ̄ lɛ ɔtū tá aɔ́mpa alɔ ɔtū, ofíyɛ́ dúú ā ɛ́gɛ́nɛ̄ aá jé ka ɛ̄cī ā le bá ɛɛ́ mā.

²⁶ Ohígbū ka ɔ́dāŋ́ ka alɔ jégēdēē le íne bīya eko nɛ̄ alɔ lɛ ɔkwɛ̄yi ā jé ɛɛ́ mā, ó lɛ ɛya dúú nēé géē gwó lɛ Ɔwɔicō kóō jé ɔ́ yá alɔ ɛhi glá ŋ́.

²⁷ Ikoko ɔ́ɔmā ɔdā nōo hile ā wɛ o yɔ̄ ī gbēyī ɛpɔ̄ nōo yɔ̄ ī wā ipú ufi, mla ɔlá manya-manya nōo gē yi ācɛ nēe ī bɛ́yíkwu Ɔwɔicō ā.

²⁸ Ɔ́dāŋ́ ka ɔ̄cɛ dúúmā lɛ íne kú Umósīsi bīya, nɛ̄ ācɛ ɛpa ámāŋ ācɛ ɛtá lɛ ijáalí cɛ̄ tū ɔ̄, eyīnyinyi dúúmā í gáā yɔ̄ lɛ ɔ́ ŋ́, é géē ŋmó ɔ̄ piíí.

²⁹ Ɔdí nɛ̄ aá gbɛlá kéē géē yá ācɛ nōo leyī gwū Ɔyínɔ̄nyīlɔ kú Ɔwɔicō bónū ā? Ācɛ nōo je oyī kú ɛka kú Ɔwɔicō nōo gwu uwá iyē ŋmá íne nēé bīya ā kóō wɛ ɔdā icííci ā. Ācɛ nēe le ɛcá cá Alelékwū Ihɔ nōo bī eyīnyinyi kú Ɔwɔicō gé lɛ ācɛ ɔlɛ́ nū ā. Aá gbɛlá kwu ɛ́gɛ́nɛ̄ italā nōo cíkā lɛ ɔdā nēé yá ā géē bɔ̄bí lɛ uwá lɛ ā.

³⁰ Ohígbū ka alɔ jé ka Ɔwɔicō kahíníī, “N géē gwɔ̄ɔ́ci, n géē gwɔ̄ɔ́ci kú ɔdōbɔ́bí nɛ̄ aá yá ā.” Ó klla kahíníī, “Óndú alɔ géē kɛpɔ̄ tū ācɛ ɔlɛ́ nū.”

³¹ Ó wɛ ɔdā otūufi nɛ̄hi ká ɔ̄cɛ kóō gwō tá ipú abɔ̄ kú Ɔwɔicō nōo yēeyī ā.

Ɛlā nēé nwū lɛyíkwu ɔtōlɛ piyóó

³² Aá blakwu ɔdā nōo yá aá gbɔbū lɛ eko nyā ā. Eko ɔ́ɔmā ā, nɛ̄ aá cɛ̄ɛ̄lā kú Ɔ̄kōōlɔhi aflɛ́yí ā, aá móōwē nɛ̄hi, nááná oōnya ā í yá alɔ lé ŋ́.

³³ Eko ōhī é cá aá ɛcá klla yá aá ōwē ipéēyī ɛjɛ̄ɛ̄jī ācɛ. Ekōhī aá kwú iyī aá ú kpó tū ipú ācɛ nēé gē yá uwā lɛ ā ā.

³⁴ Ohígbū ka aá móówē mɛ́mla ācɛ nēe bá ipú agbá ā, eko nɛ̄ aábɔ̄nōlajɛ kpó agbénú kú aá ŋmá ɛgiyí aá abɔ̄fú ā, aá cɛ̄ mla ɔtū ékpó, ohígbū ka aá jé ka aá abɔ̄yī aá lɛ agbénú nōo lɔhi fíyɛ́, nōo gē yɔ̄ piyóó.

³⁵ Aá híī je ɔtū nɛ̄ aá kpóce Óndú ā tónū ŋ́, ohígbū ɔ́dāŋ́ ka aá yɔ̄ ī lɔtū, aá géē mīyɛ ulé nɛ̄hi.

³⁶ Ó cɛgbá kú aá lɔtūlé, o yá ɛ́ɛ́ ká aá yá ɔdā nōo he Ɔwɔicō ɔtū, cɛ́ɛ́ ká aá klla géē mīyɛ ɔdā nōó cokónu ō je lɛ aá ā.

³⁷ Ohígbū ka ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō ā kahíníī, “Eko kpií nōo ī wā, ɔ̄cɛ nōo yɔ̄ ī wā ā géē wāajɛ, ó gáā gbojī ɛ́ɛ́ kōō wā ŋ́.

³⁸ Ācɛ ɔlɛ́ um nēe gē yá ɔdā nɛ̄ n tíne kéē yá ā, géē kpɔ́tūce um, cɛ́ɛ́ kéē yēeyī, Amáŋ ɔ́dāŋ́ ka ɔ̄cɛ dúúmā kú uwā kwúcē igbīhi ɔtū kú um í gáā lɔhi ɛgiyí nū ŋ́.”

³⁹ Amáŋ alɔ í gáā wɛ ɛdɔ kú ācɛ nēe kwúcē igbīhi, nēé lɛ uwá yíífi ā ŋ́. Ikoko ɔ́ɔmā, alɔ kpɔ́tūce Ɔwɔicō anɔ́ɔ ó le alɔ nyatá.