ĀCƐ UGALÉSĪYA 6 - Ubáyíbu kú Idɔma

¹ Ayínɛ́ um, ɔ́dāŋ ka ɔ̄cɛ dúúmā le íne bīya nɛ̄ aá le jé, ācɛ ōhī kú aá nɛ̄ Alelékwū kú Ɔwɔicō gē nā tɔ́ɔwɛ ā ká aá lɛ ɔ́ nā tɔ́ɔwɛ mla ɔtū ogbonɛnɛ. Aá kē leyī kwɛcɛ kú aá abɔ̄yī aá ká aá ga ipú ojámá kú íne ōbīya ŋ́ dúú.

² Aá tá ɔ̄cɛ dúúmā nōo yɔ̄ ipú unwalu abɔ̄, cɛ́ɛ́ aá yɔ̄ ī yá íne nɛ̄ Ohɔ́nyɛtá nwū ā gajaajɛ.

³ Ɔ́dāŋ́ ka ɔ̄cɛ dúúmā nɛ̄ ó wɛ ɔdā dúúmā fúlufúlu ŋ́, gbɛlá ka anúɔ wɛ odée, ayíka ó gē plla iyī nū icííci.

⁴ Ɔnyɔɔnyɛ kóō jila úklɔ́ nɛ̄ ó yá ā má kóō má ɔ̄ ɔ́dāŋ koó lɔhi, cɛ́ɛ́ kóō lɔfú gwō kú ɔdā nɛ̄ ó yá abɔ̄yī nū ā. Ó gáā lɛ ɔdā nɛ̄ ó yá ā gbla ɛ̄nɛ̄ ɔ̄cɛ ɔhá yá ā ŋ́.

⁵ Ohígbū ka ɔnyɔɔnyɛ géē bī iyó kú iyī nū.

⁶ Ɔ̄cɛ nēé ī nwū ɔ̄ ɛlā Ɔwɔicō ā, kóō lɛ odúúdú ɔdā olɔhi nɛ̄ ó lɛ ā kɔ̄ mla ɔ̄cɛ nōo ī nwū ɔ̄ ā.

⁷ Aá híī plla iyī aá ŋ́. É gē yá Ɔwɔicō ɛbɛ́ ŋ́, ohígbū ka ɔdā nɛ̄ ɔ̄cɛ nyi ā, ɔdā ɔ́ɔmā nɛ̄ ó gē ce á.

⁸ Ɔ́dāŋ keé nyi īkpɔ̄dā kú unwū kú ɔdā kú ɛcɛ, é géē cē ɔdɛ̄hɔ̄ kú ikwū, ɔ́dāŋ keé nyi ipú ɛhɔ̄ kú alelékwū kú Ɔwɔicō, é géē cē ɔdɛ̄hɔ̄ kú oyēeyī opiyóó ŋmá ɛgiyí alelékwū.

⁹ Ɛ̄jɛ̄ kú ɔdā olɔhi ōyá kóō jɛ̄ alɔ ŋ́, ohígbū ka ɔ́dāŋ́ nɛ̄ alɔ í gbagbafú je cīgbīhi ŋ́, eko géē wā nɛ̄ alɔ géē cē ɔdɛ̄hɔ̄ kú nū.

¹⁰ Ohígbū ɛ́gɔ́ɔmā eko dúú nɛ̄ alɔ lɛ ɛga, alɔ yá ɔdā olɔhi lɛ ācɛ dóódu, o fíyɛ́ dúú ālɔ̄ yá lɛ ācɛ nēe cɛ̄ɛlā kú Ohɔ́nyɛtá tɔ̄há mla alɔ ā.

Ɛlā ōŋmɛyí

¹¹ Aá má īkpɛlā nɛ̄hi nɛ̄ n bī le tɔ́kpá fú aá abɔ̄yī um ā.

¹² Ācɛ nēe gē pi aá abɔ̄fú kú aá lɛ apī hɛ́ ā, wɛ ācɛ nēe gē bī ɔkpíyē kú uwā gwō ā, kéē híī yá uwā ŋmó ohígbū keé gē tɔ́ɔna kú ikwū kú Ujísɔ̄si Ohɔ́nyɛtá nēé nyɔ́kpá playi ɔcí ā ŋ́.

¹³ Ohígbū ka ācɛ nēe hɛ́ apī nááná ā, í lɛ íne ā tū abɔ̄yī uwā ŋ́. Amáŋ é tíne ká aá lɛ apī hɛ́ o yá ɛ́ɛ́ kéē gwō ka aá cɛ̄ɛ̄lā kú uculo kú ɔkpíye ā.

¹⁴ Ákú um mā, n géē gwō ohígbū Óndú alɔ Ujísɔ̄si Ohɔ́nyɛtá ɛyí ɔcóonyɔ́kpá ā ōfōōfūnū. Ohígbū ikwū kú nū ɛyí ɔcóonyɔ́kpá ā, aɔ́dā kú ɛcɛ gekwú ɛgiyí um, ami abɔ̄yī um kē gekwú ɛgiyí aɔ́dā kú ɛcɛ ā.

¹⁵ Ka ɔ̄cɛ le apī hɛ́ ámāŋ koó hɛ́ apī ŋ́ ɔ́ɔmā í wɛ ɔdā dúúmā ŋ́. Amáŋ ɔdā nōo wɛ odée ā wɛ ɔ̄cɛ nēé yá ɛ̄yīpɛ̄ ā.

¹⁶ Ɛbɔ́ mla eyīnyinyi kóō yɔ̄ lɛ ācɛ dóódu nēe í bī ɔdā nēé nwū nyā le yúklɔ́, ācɛ ɔ́ɔmā lé ka Ísrɛ̄lu kú Ɔwɔicō á.

¹⁷ Ɛlā ámōōmɛ kú um yɔ̄ á: ɔ̄cɛ dúúmā kóō junwalu gā um fíyɛ́ gɛ ŋ́, ohígbū ka ofu ágbe nōo bá um ɔkpíyē ā mafú ka n wɛ ɔfiyɛ kú Ujísɔ̄si.

¹⁸ N gē gbɔ̄ɔkɔ kú Óndú alɔ Ujísɔ̄si Ohɔ́nyɛtá kóō ményinyi odúúdú aá, ayínɛ́. Aamí.