ĀCƐ UGALÉSĪYA 5 - Ubáyíbu kú Idɔma

¹ Ohɔ́nyɛtá lɛ alɔ hɛ́tá kú ālɔ̄ kē lɛ iyī alɔ lɛ. Ohígbū ɔ́ɔmā ālɔ̄ háyi lɔfú, kú ālɔ̄ klla je iyī alɔ yá ɔfiyɛ gɛ ŋ́.

Jila íne mla Ohɔ́nyɛtá kú aá je éyi

² Aá jāhɔ̄! ami, Upɔ́lu da aá ka, ɔ́dāŋ ka aá cɛ̄ lɛ uwá lɛ aá apī hɛ́, ɔ́ɔmā lé ka Ohɔ́nyɛtá í tīile lɛ aá fúlufúlu ŋ́.

³ N̄ pi aá ahɔ̄ kpɔ́, ɔ̄cɛ dóódu nōo cɛ̄ lɛ uwá lɛ ɔ́ apī hɛ́, ó í wɛ o piíí kóó lɛ odúúdú íne ā tū.

⁴ É lɛ aá, nēe gē lɛ íne ā tū cɛ́ɛ́ kú Ɔwɔicō kóō hɛ́pɔ̄hi lɛ aá hɛ́ ŋmá ɛgiyí Ohɔ́nyɛtá. Aá le hɛ́ ŋmá ɛga nɛ̄ Ɔwɔicō í ményinyi aá.

⁵ Ohígbū ka alɔ ā leyīce ka Ɔwɔicō géē ka alɔ gwó mla iyīnū, ɛ̄nyā wɛ ɔdā nɛ̄ alɔ gbēyī nū ŋmá lɔfu kú alelékwū kú Ɔwɔicō nōo yɔ̄ ī yúklɔ́ ɛlā nū nɛ̄ alɔ cɛ̄ ā.

⁶ Ohígbū ka eko nɛ̄ alɔ i pīya tɔ̄há mla Ohɔ́nyɛtá Ujísɔ̄si, apī ō hɛ́ ámāŋ ka apī á hɛ́ ŋ́, í tīile dúúmā ŋ́, amáŋ ɔdā nōo tīile ā wɛ o cɛ̄ɛ̄lā Ɔwɔicō nōo ī mafú ŋmá lɛ úklɔ́ ō yá.

⁷ Aá yɔ̄ ī yá lɔhi ɔwɛ nɛ̄ aá cɛ̄ɛ̄lā Ohɔ́nyɛtá ā, ɔ̄nyɛ ci aá o cɛ̄ ɛlā ɔkwɛ̄yi ā? Ɔwɛ nyá nɛ̄ ó pi ɔtū kú aá abɔ̄ āa?

⁸ O pīya ɔtū abɔ̄ nyā í ŋmá abɔ̄ Ɔwɔicō nōo hi aá igwú ā ŋ́.

⁹ Ɔdōonīgbō lígíí gē nū odúúdú ámú kú igbō á.

¹⁰ N jé aá lɔɔlɔhi, n lɛ ɔtūce aá, oyēeyī kú alɔ ipú opīyatɔ̄há mla Óndú ā gē yá ká n̄ lɛ ɔtūce aá ka aá gáā gbɛlá ɛyɛ́ɛ́yí hī um tá ŋ́, Ɔwɔicō í yá ɔ̄cɛ nōo ī junwalu lɛ aá ā italā.

¹¹ Ayínɛ́ um, ɔ́dāŋ ka n gē tɔ́ɔna kú ācɛ kéē lɛ apī hɛ́ kpɔ́, ɔdíyá nēé gē yá um ŋmó kpɔ́ ā? Ɔ́dāŋ́ ka ɔ́ɔmā lɛ a a, ayíka ɔna nɛ̄ n tá keé le Ujísɔ̄si nyɔ́kpá playi ɔcí ā í tīile ŋ́.

¹² Ó géē he um ɔtū ɔ́dāŋ ka ācɛ nēe ī junwalu lɛ aá ā, lɛ iyī uwá nū ŋmá ɛgiyí aá!

Ihɔtū kóō gbō aá fíyɛ́ íne

¹³ Ayínɛ́, é hī aá igwú kú aá le pīya ācɛ ō lɛ iyī aá, ó lé ka aá híī bī iyī aá ō le ā lɛ je ɛga lɛ unwū kú ɔkpíyē kóō gbō aá ŋ́. Ikɔkɔ ɔ́ɔmā aá jɛga lɛ ihɔtū kóō cɛ̄ lɛ aá tá iyī aá abɔ̄.

¹⁴ Ohígbū ka odúúdú íne ā pīya tɔ̄há ipú ɛlā ékpó. Ɛlā ā kē yɔ á: “ Oladógbe kú uwɔ géē he uwɔ ɔtū bɛ̄ɛka iyī uwɔ ā.”

¹⁵ Amáŋ ɔ́dāŋ ka aá gē yɔ̄ bɛ̄ɛka ɛbɛ́ ipácí ā gē tɔ́ɔ́tɛ́ iyī aá klla gē kwú iyī aá lé, ayíka aá leyī kwɛcɛ, ámāŋ aá géē je iyī aá kpó yíífi ŋmá ajɛ dúúdú.

Alelékwū ā mɛ́mla ɔlɛɛcɛ

¹⁶ Amáŋ n kɛlā ka, aá jɛga lɛ Alelékwū kóō nā aá tɔ́ɔwɛ, cɛ́ɛ́ aá í gáā yá ɔdā nɛ̄ ō ī ŋmó ɔlɛɛcɛ unwū ā gɛ ŋ́.

¹⁷ Ohígbū ka ɔdā nɛ̄ alɔ alɛɛcɛ gē tíne ō yá ā gē bɛ́yí kwu ɔdā nɛ̄ Alelékwū kú Ɔwɔicō tíne ká ālɔ̄ yá ā, anɔ́ɔ ɔdā nɛ̄ Alelékwū kú Ɔwɔicō tíne ká ālɔ̄ yá ā gē bɛ́yí kwu ɔdā nɛ̄ alɔ alɛɛcɛ tíne ō yá ā á. Alɔ alɛɛcɛ mla Alelékwū kú Ɔwɔicō wɛ aólɛlā, gē bɛ́yí kwu iyī alɔ, ɛ̄nyā í cɛ̄ lɛ aá yá ɔdā nɛ̄ aá tíne ō yá ā glá gɛ ŋ́.

¹⁸ Amáŋ ɔ́dāŋ ka aá lɛ ɛga je lɛ Alelékwū kú Ɔwɔicō kú ō nā alɔ tɔ́ɔwɛ, ó lɛ ā íne ā í labɔ̄ lɛ aá gɛ ŋ́.

¹⁹ Ɔdā nɛ̄ alɛɛcɛ gē yá ā tá péee, é wɛ ajā ōgbo, īnyī ōblá, oyēeyī obɔ̄bí ō lā,

²⁰ ɛcí ōpa, imabɔ̄, eyījii ō tāācɛ, ikpɛ́lá ō yá, ímálanyī, ícɔ̄nū, oōkɔ̄ ígwíígwu útū ō hɛ́,

²¹ ímálanyī-ɔka, ejé oōgwá nwuné fíyɛ́ abɔ̄, ɔdīcíci kú uwū ō yá, mla ɔdā ō lɛbɛ̄ɛka aɔ́dā nēe bá ā. Ká n̄ tū aá ukɔ́ ohígbū ɔdā nēe bá ā, ɛ́gɛ́nɛ̄ n tɛtɛ tū aá ukɔ́ lɛ ā ā, ka ācɛ nēe ī yá ɔdā nēe bá ā í gáā lúgwū kú ajɔ̄ɔ̄cɛ́ kú Ɔwɔicō glá ŋ́.

²² Amáŋ īkpō kú Alelékwū ā wɛ ihɔtū, éeyē, ɛbɔ́, ɔtū oōlé, ogbonɛnɛ, olɔhi, ɔtōkpóce,

²³ otɛ́yí wāajɛ, ogbēyīcíí. Íne dúú í yɔ̄ nōo ī ci ɔ̄cɛ ō yá ucē ɔwɛ dúúmā nēe bá nyā ŋ́.

²⁴ Ācɛ nēe wɛ ákú Ohɔ́nyɛtá Ujísɔ̄si ā í gē jɛga lɛ unwū kú ɔlɛɛcɛ kóō bī uwā tá gɛ ŋ́.

²⁵ Abɔ̄ nɛ̄ Alelékwū ā gē yá kú ālɔ̄ yēeyī ā, Alelékwū kú Ɔwɔicō kóō bī alɔ tá dúú.

²⁶ Ālɔ̄ híī gwō icííci ŋ́, ámāŋ ka o yá ɔ́mpa alɔ cɔ̄nū ŋ́, ɛ́ɛ́ nɛ̄ alɔ gē mímálanyī ɔ́mpa alɔ ŋ́.