ĀCƐ UGALÉSĪYA 3 - Ubáyíbu kú Idɔma

¹ Aá, ācɛ kú Ugalésīya, aá lɛ ikpɛ̄yí ō bī gbɛlá ŋ́! Ɔ̄nyɛ yá aá ɔhɛ āa? Iyɔ̄bū aá nɛ̄ n yá ocābɔ̄ kú ɛ́gɛ́nɛ̄ é je Ujísɔ̄si Ohɔ́nyɛtá nyɔ́kpá lɛ ā á.

² Ɛ̄nyā wɛ ɔdā nɛ̄ n tíne ká n jé ŋmá abɔ̄ aá á. O ŋmá lɛ úklɔ́ kú íne nɛ̄ Alelékwū Ihɔ wā ipú oyēeyī kú aá nɛɛ, kɛ̄ɛ ka aá le Ɔ̄kōōlɔhi ā pó anɔ́ɔ aá kē mīyɛ ɔ́ cɛ̄ á?.

³ Aá wɛ ɔdāhá lɛ ā nɛɛ? Aá gbo oyēeyī ɛ̄yīpɛ̄ kú aá ŋmá ɛgiyí Alelékwū kú Ɔwɔicō, ɔwɛ nyá nɛ̄ aá gbɛlá ka aá í yēeyī gaajɛ mla ɔfú kú abɔ̄yī aá glá āa?

⁴ Aɔ́dā alɛwa nɛ̄ aá má ohígbū Ɔ̄kōōlɔhi ā wɛ icííci nɛɛ? Ó tīile gbóó.

⁵ Ɔwɔicō í je Alelékwū lɛ aá klla yúklɔ́ ō hídáagó ɔtāhɛ̄ ohígbū ka aá le ɔdā nēé tá ipú íne ā yá ŋ́, ikɔɔkɔ ɔ́ɔmā ó je Alelékwū lɛ aá klla yúklɔ́ ō hídáagó ɔtāhɛ aá ohígbū ka aá le Ɔ̄kōōlɔhi ā pó klla mīyɛ ɔ́ cɛ̄.

⁶ Aá gbɛlá kwu Ébrahām abālɔbányā; ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō kahíníī, “Ébrahām cɛ̄ɛ̄lā Ɔwɔicō, anɔ́ɔ ohígbū ɔtū nɛ̄ ó kpóce Ɔwɔicō ā, ó lɛ ɛpɔ̄hi hɛ́ lɛ ɔ́ á.”

⁷ Aá cíkā ō jé ka ācɛ nēe kpɔ́tūce Ɔwɔicō ā, wɛ ayínɔ̄nyīlɔ ɔkwɔ̄ɔ̄kwɛ̄yi kú Ébrahām fíyɛ́ ayí nɛ̄ ó ma abɔ̄yī nū á.

⁸ Ó lɛ ɛga kú ɔkpá ɛlɔ̄ɔwɔicō nēé ka ka Ɔwɔicō ɔ́ɔ géē ka aílɔ́wá gwó mla iyī nū ohígbū keé le ɔtūkpóce ɔ́. Anɔ́ɔ é lɛ ɔkōōlɔhi ā kā Ébrahām gbɔbū ka “Ɔwɔicō géē bī uwɔ le yá kú ō lɛ ogbonɛnɛ kú nū mafú lɛ odúúdú ācɛ nēe bá ipú ɛcɛ ā.”

⁹ Ohígbū ka Ébrahām le ɔtūkpóce Ɔwɔicō ā, ó lɛ ɔhā hɛ́ ɔ́. Ɛ́mā nɛ̄ ó hɔ́hā ce odúúdú ācɛ nēe cɛ̄ɛ̄lā nū ɛ́gɛ́nɛ̄ Ébrahām cɛ̄ɛ̄lā nū ā á.

¹⁰ É lɛ okónu tá lɛ ācɛ nēe gbɛlá ka Ɔwɔicō í ka uwá gwó mla iyī nū ohígbū keé le ɔdā nɛ̄ íne ka ā yá gaajɛ. Ohígbū ka ɛ́gɛ́nɛ̄ é tá ɔ̄ ipú ɔkpá kú ɛlɔ̄ɔwɔicō lɛ ā, “ Ɔwɔicō lɛ ɔ̄cɛ dúúmā nɛ̄ ó yɔ̄ ī lɛ odúúdú aɔ́dā nēe bá ipú ɔkpá kú íne ā tū ojigógó ŋ́ mā ŋmɛ́pɔbí.

¹¹ Ó le cāā ka Ɔwɔicō í gáā hɛ́pɔ̄hi lɛ ɔ̄cɛ dúúmā ohígbū ka ó yɔ̄ ī yá ɔdā nēé tá ipú íne ā ŋ́. Ohígbū keé tá ipú ɔkpá kú ɛlɔ̄ɔwɔicō kahíníī, “Ɔ̄cɛ nɛ̄ Ɔwɔicō lɛ ɛpɔ̄hi hɛ́ lɛ ɔ́ ohígbū koó lɛ ɔtū kpóce ɔ́ ā géē yēeyī.”

¹² Amáŋ eko nɛ̄ ɔ̄cɛ ī yá ɔdā nēé tá tāajɛ ipú íne ā, ó wɛ ɔdā ékpó fúlufúlu mla eko nɛ̄ ɔ̄cɛ lɛ ɔtūce Ɔwɔicō ā ŋ́. Ɛ́gɛ́nɛ̄ é tá ipú ɔkpíihɔ ka lɛ ā “Ɔ̄cɛ nōo gē yá ɛjɛ̄ɛ̄jī ɔdā nēé tá ipú íne ā géē yēeyī.”

¹³ Amáŋ oŋmá lɛ ō je pīya ɔ̄cɛ nēé tokónu lɛ ɔ́ Ohɔ́nyɛtá lɛ alɔ fūla ŋmá okónu nɛ̄ Íne ŋmó alɔ ā. Ohígbū keé lɛ ɔ́ tá ipú ɔkpá kú ɛlɔ̄ɔwɔicō kahíníī, “ É lɛ okónu tá lɛ ɔ̄cɛ nēé lɛ ɔ́ tōlī playi icō ɔcí.”

¹⁴ Ohɔ́nyɛtá yá ɛ̄nyā cɛ́ɛ́ ká Ɔwɔicō kóō géē lɛ ɔhā nɛ̄ ó cokónu ō hɛ́ ce Ébrahām ā hɛ́ ce aílɔ́wá o ŋmá lɛ opīyatɔ̄há mla Ohɔ́nyɛtá Ujísɔ̄si, cɛ́ɛ́ o ŋmá lɛ o cɛ̄ɛ̄lā Ɔwɔicō ó lɔfú yá kú Alelékwū Ihɔ nɛ̄ ó cokónu ō je lɛ alɔ ā kóō wā í bī alɔ tá glá.

Íne í pīya okónu ōce abɔ̄ glá ŋ́

¹⁵ Ayínɛ́, n gáā lɛ okónu nɛ̄ Ɔwɔicō ce ā gbla ɔdā nōo ī yá ɔtāhɛ alɛɛcɛ eko dóódu. Eko nɛ̄ ācɛ cɛ̄ tɔ̄há lɛyíkwu odée lɛ abɔ̄ bá ɔkpá, ɔ̄cɛ dúúmā í bīya ámāŋ ka o tá ɔdā ɔhá tū ɔ̄ glá gɛ ŋ́.

¹⁶ Ɔwɔicō cokónu igbɛ alɛwa lɛ Ébrahām mla ɔyí nū. É ka ipú ɔkpá kú ɛlɔ̄ɔwɔicō ā ka ka awɔ mɛ́mla ayááyí uwɔ ā ŋ́, bɛ̄ɛka ɔdā nōo yɔ̄ ī kɛlā lɛ ācɛ alɛwa ā ŋ́, amáŋ ó ka ka awɔ mɛ́mla éyi kú ayí uwɔ, ó kɛlā nēe bá abɔ́ɔ ā lɛyíkwu ɔ̄cɛ ékpónú, ɔ̄cɛ ɔ́ɔmā kē wɛ Ohɔ́nyɛtá á.

¹⁷ Ɔdā nɛ̄ n yɔ̄ ī ka wɛ ka Ɔwɔicō le ɛka gbo lɛ Ébrahām anɔ́ɔ ó kē lɛ okónu ce ka anúɔ í lɛ ɔ́ tū. Íne nēé je iháyí úlā cofu cigwó Igbīhāajɛ ā, í lɔfú ŋmó ɛka nɛ̄ Ɔwɔicō tɛtɛ ī gbo ā nyí klla lɛ okónu nēé ce ā bīya glá ŋ́.

¹⁸ Ohígbū ka ɔ́dāŋ ka ɔdā nɛ̄ Ɔwɔicō ī je lɛ ɔ̄cɛ ā ī wā abɔ̄ kú ɔ̄cɛ ohígbū koó lɛ íne tū nɛɛ, ayíka ó wā abɔ̄ ɔ̄cɛ ohígbū ka Ɔwɔicō tɛtɛ lɛ okónu ce lɛ Ébrahām ka anúɔ í hɔ́hā ce ɔ́ ŋ. Amáŋ oŋmá lɛ okónu nōo ce ā nɛ̄ Ɔwɔicō je ɔdā nɛ̄ ó cokónu nū ā lɛ Ébrahām á.

Ile kú Íne

¹⁹ Ó lɛ āa ayíka ɔdí nɛ̄ Íne nēé je lɛ Umósīsi ā cíkā ō yá mɛ́ɛ́ āa? É le íne ā katū ɛka ā o yá ɛ́ɛ́ kóō mafú lɛ ācɛ ka ɔdōbɔ̄bí nēé bá ī yá ā wɛ íne nēé bá ī bīya ɔkwɛ̄yi á. Ɔwɔicō yá íne ā o yá ɛ́ɛ́ kóō ī tīile jāā gbéeko nɛ̄ ɔyí kú Ébrahām ɔ́ɔmā nɛ̄ Ɔwɔicō cokónu lɛ ɔ́ ā gā. Ɔwɔicō lɛ íne ā tū aálekékwū ōtɛ̄hɔ̄ ɛhɔ̄ fu Umósīsi nōo wɛ ɔ̄cɛ otá-ɔtāhɛ̄ ā.

²⁰ Ɔ̄cɛ otá-ɔtāhɛ̄ í cɛgbá ŋ́, ohígbū ka Ɔwɔicō ōfōōfūnū ge yúklɔ́ nyā á, ó lɛ ɔ̄cɛ ota-ɔtāhɛ̄ ŋ́.

²¹ Ɔdā nēé ka ipú Íne ā í ka ɔdā ɛyɛ́ɛ́yí gwū ɔdā nɛ̄ Ɔwɔicō cokónu nū igbɛ alɛwa ā ŋ́. Ohígbū ka, ɔ́dāŋ ka ācɛ mīyɛ íne nōo lɔfú ka uwá gwó mla Ɔwɔicō glá nɛɛ ó lɛ ā a ayíka ɛjɛ̄ɛ̄jī ācɛ géē yēeyī piyóó oŋmá lɛ o lɛ íne ā tū.

²² Amáŋ ɔ̄cɛ lɔfú jé ŋmá ipú ɔkpá kú ɛlɔ̄ɔwɔicō ka, ɛjɛ̄ɛ̄jī ācɛ kú ipú ɛcɛ lɛ únwū olɔfú kéē bīyíne, anɔ́ɔ ɔdā nɛ̄ Ɔwɔicō cokónu ō je lɛ uwá ɔ́dāŋ keé lɛ ɔtū kpóce Ujísɔ̄si Ohɔ́nyɛtá ā ŋmá ɔtoce ipú Ujísɔ̄si Ohɔ́nyɛtá ā, ó kwú ɔ̄ ú lɛ ācɛ nēe cɛ̄ɛ̄lā Ɔwɔicō ā.

²³ Gbɔbū kú ācɛ kéē kpɔ́tūce Ujísɔ̄si Ohɔ́nyɛtá ā, íne nɛ̄ Umósīsi je ā, ɛ́gɛ́nɛ̄ ɔ̄cɛ ī kɛlā ā, lɛbɛ̄ɛka Ācogbāājɛ nēe gwū ɔwɛ tū alɔ ipú agbá jāā gbéeko nɛ̄ Ɔwɔicō lɛ eko nɛ̄ ācɛ í yɔ̄ ī kpɔ́tuce Ujísɔ̄si nōo yɔ̄ ī wā ā mafú.

²⁴ Anɔ́ɔ jāā gbéeko nɛ̄ Ohɔ́nyɛtá wā ā, íne ā lɛbɛ̄ɛka ɔ̄cɛ nōo yɔ̄ gē nā alɔ tá ɔwɛ ā cɛ́ɛ́ kéē lɛpɔ̄ɔhi hɛ́ lɛ alɔ ŋmá lɛ o cɛ̄ɛ̄lā kú Ohɔ́nyɛtá.

Ɔdā nɛ̄ ɔtōkpóce gē yá ā

²⁵ Amáŋ abālɔbányā eko nɛ̄ ācɛ ī kpɔ́tūce Ujísɔ̄si Ohɔ́nyɛtá ā lɛyá ɛɛ́, íne ā í wɛ ɔkpani kú alɔ gɛ ŋ́.

²⁶ O ŋmá lɛ ɔtōkpóce Ujísɔ̄si Ohɔ́nyɛtá nɛ̄ odúúdú aá je pīya ayí kú Ɔwɔicō á. Ɛ̄nyā lé ka aá má bɔ́há píyɔ́ɔ́ mla Ohɔ́nyɛtá Ujísɔ̄si.

²⁷ É le ubatísim yá odúúdú aá, anɔ́ɔ aá yɔ̄ ī pīyatɔ̄há mla Ohɔ́nyɛtá á, abālɔbányā aá le pīya bɛ̄ɛka Ohɔ́nyɛtá abɔ̄yīnū ā.

²⁸ Ohígbū ɔ́ɔmā ɔ̄cɛ ujíyu ámāŋ ka Ugríisi dúú í yɔ̄ gɛ ŋ́, ɔfiyɛ ámāŋ ɔ̄cɛ abɔ̄yīnū dúú i yɔ̄ gɛ ŋ́, ɔ̄cɛnyā ámāŋ ka ɔ̄cɛnyīlɔ dúú í yɔ̄ gɛ ŋ́. Odúúdú aá le pīya ācɛ ékpónú ipú o bɔ́há píyɔ́ɔ́ mla Ohɔ́nyɛtá Ujísɔ̄si.

²⁹ Ohígbū ka abɔ̄ nɛ̄ aá wɛ ákú Ohɔ́nyɛtá ā, ó lɛ ā, aá le pīya ayááyí kú Ébrahām ɛɛ́, aá kē í mīyɛ ɔdā nɛ̄ Ɔwɔicō cokónu ō je lɛ ayááyí kú Ébrahām ā.