Ɛ́SRA 1 - Ubáyíbu kú Idɔma

Ɔ́da kú Usáyírɔ̄si

¹ Ipú iháyí aflɛ́yí nɛ̄ Usáyírɔ̄si wɛ Ɔcɛ́nɛ̄hi kú Upɛ́sīya ā, Óndú ā le yá kú ɛlā nōó ka bū okónu kú Ujeremíya ɔ̄comɛ́ɛbɛ ā kóō le yá jīla. Óndú a yá ka Usáyírɔ̄si kóō lɛ ɔ́da je, kóō klla lɛ ɔ́da ā tá tū ɔkpá, lɛ ɔ́ tɛ̄hɔ̄ ga odúúdú kú ipú ajɔ̄ɔ̄cɛ́ kú nū.

² “Ɛnyā wɛ ɔ́da kú Usáyírɔ̄si, Ɔcɛ́nɛ̄hi kú Upɛ́sīya á. Óndú, Ɔwɔicō kú ɔkpáncō ā, kwú um ú lé ɔcɛ́ kú odúúdú ɛcɛ. Ó klla le úklɔ́ je gā um ka ami ɔ́ lɛ Agblīihɔ-nɛ̄hi gwó lɛ anúɔ Ujerúsālɛm ipú ajɛ kú Ujúda.

³ Ɔwɔicō kóō yɔ̄ mla odúúdú aá nēe wɛ ācɛ kú nū ā. Aá géē pɛ́ nyɔ̄ ga Ujerúsālɛm, kú aá gaá lɛ Agblīihɔ-nɛ̄hi kú Óndú, Ɔwɔicō kú Ísrɛ̄lu ā túgwó. Ɔwɔicō nōo yɔ̄ Ujerúsālɛm nēé gē gbā ɔ̄ ɛ̄gbā ā, kóō yɔ̄ mla aá.

⁴ Ɔ́dáŋ ka, ācɛ ɔlɛ́ nū dúúmā nēe hile bá ɛga dúúmā kú ajɛ nyā cɛgbá ō tábɔ̄ ɛ́ɛ́ kóō géē kwúcē nyɔ̄ nɛɛ, aóladógbe kú uwā gēe tá uwā abɔ̄. Ācɛ kú ɛga nēé lā ā, gēe je ugóolu (oje ɔdɔ), oje nɛ̄hɛ́, udɔ, iyó ɔhá, mla aɛ́bɛ́ ō bī iyó lɛ uwá, ɛ́ɛ́ nēé klla géē je ɛhi o ŋmá ɔtū éekpó lɛ uwá kéē bī ga Agblīhɔ-nɛ̄hi kú Óndú ā nōo yɔ̄ Ujerúsālɛm ā.”

⁵ Anɔ́ɔ aótrɛ̄yí kú ipɔ́ɔma kú Ubénjamīn, mɛ́mla Ujúda, mɛ́mla ācogwɛ́ɛya, mɛ́mla ayí kú Ulífāyi, mɛ́mla odúúdú ācɛ nɛ̄ Óndú ā le ɔtū tū uwā ɔtū kéē nyɔ̄ ā, le tútū kéē nyɔ̄ ga Ujerúsālɛm, gáā lɛ Agblīihɔ-nɛ̄hi kú Óndú ā túgwó.

⁶ Ācɛ kú Ubábīlɔn, ɔ́mpa uwá ā, tá uwá abɔ̄ nɛ̄hi, klla kpó ɔdā alɛwa lɛ uwá. Oje nɛ̄hɛ́, ugóolu (oje ɔdɔ), oje udɔ, aálá, aɛ́na, aɛ́wū, iyó ɔdōlé, mla agbénú alɛwa ɔhá lɛ uwá kéē bī nyɔ̄ gaá gwó Agblīihɔ-nɛ̄hi kú Óndú ā.

⁷ Usáyírɔ̄si, ɔcɛ́nɛ̄hi ā kwú iyó kú Agblīihɔ-nɛ̄hi kú Óndú ā, dóódu nɛ̄ Unebúkádinēsa kpó ŋmá Agblīihɔ-nɛ̄hi nōo yɔ̄ Ujerúsālɛm, gāa bá inu ɛcí kú nū ā, ī kpó kwúcē igbīhi lɛ uwá.

⁸ Usáyírɔ̄si lɛ uwá kpó wɛ̄ɛcɛ, anɔ́ɔ Umítrēdati ɔ̄cɛ o bī ije kú Ubábīlɔn ā le uwá gbaálúka klla kwú kpó lɛ Ussɛssibássa, igbómína kú Ujúda ā.

⁹ Áluka kú ɔdā nēé kpó lɛ ɔ́ ŋmá Ubábīlɔn ā wɛ, ocíbú kú ugóolu (oje ɔdɔ) kóō bī le mīyɛ ɛhi ā wɛ, ofu cigwó. Ocíbú kú oje nɛ̄hɛ́ ō bī le mīyɛ ɛhi ā wɛ úlā ɛpa ce ofigwó. Aócíbú ɔhá wɛ ofu cahāanɛ.

¹⁰ Ocíbú nɛ̄hɛ́ kú ugóolu (oje ɔdɔ) wɛ, ofu cigwó, ocíbú nɛ̄hɛ́ kú oje nɛ̄hɛ́ wɛ, úlā cigwó, iyó ɔhá ɛyɛ́ɛyɛ́yí bɛ̄ɛka, ukɔ̄, ɛ̄wā mɛ́mla aíkókwū ā wɛ, úlā ɛpa ce ofigwó.

¹¹ Odúúdú iyó kú ugóolu (oje ɔdɔ), oje nɛ̄hɛ́, mɛ́mla udɔ mɛ́mla ukɔ̄ ɔhá dóódu kú Agblīihɔ-nɛ̄hi nēé kpó lɛ Ussɛssibássa mɛ́mla ācɛ ɔhá nōo pīyɛyí wā Ujerúsālɛm ŋmá Ubábīlɔn ā, wɛ úlā igwɛ́ɛtá ce ofigwó.