ISÍKƐ̄LU 48 - Ubáyíbu kú Idɔma

¹ “Iyē kú aípɔ́ɔma ā yɔ̄ ā. Ɛhícō ā, Udán géē lɛ ajɛ āyā éyi. Ajɛ kú nū ā géē gaá bū ɔwɛ kú Uhɛ́tlɔn ga ɔwɛ nōo yɛ ga Uhámati ā, jāā ga igelī nōo lé ka Énɔn, ga ɛhícō kú Udamáskɔsi, ɛga nōo tɛ̄jī mɛ́mla Uhamáti ā. Ɔ́ɔmā géē wɛ ɛjī kú nū ŋmá āyā ɛnɔ̄ɔ̄cī ga āyā ɛnɔ̄ɔ̄nɛ̄ ā.

² Ássa géē lɛ ukpɛ́ éyi. Anú í tū ɛjī kwú Udán ŋmá ɛnɔ̄ɔ̄cī ga ɛnɔ̄ɔ̄nɛ̄ á.

³ Unáfutāli géē lɛ ukpɛ̄ éyi, nōo gboce Ássa ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

⁴ Umanásɛ géē lɛ ukpɛ̄ éyi, nōo gboce Unáfutāli ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

⁵ Ɛ́frem géē lɛ ukpɛ́ éyi, nōo gboce Umanásɛ ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

⁶ Urúbɛn géē lɛ ukpɛ̄ éyi, nōo gboce Ɛ́frem ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

⁷ Ujúda géē lɛ ukpɛ̄ éyi gboce Urúbɛ̄n ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

Ɔtāhɛ̄ kú Ajɛ ā

⁸ Ajɛ ɔhá nōo gboce Ujúda ā, é géē je ɔ́ tá cíí kú úklɔ́ ɛyɛ́ɛ́yí. Ɔwá kú nū ŋmá ɛhícō ā ga ɛháajɛ ā géē wɛ ukilómīta igwɛ́ɛpa ce āyā. Īkpō kú nū ŋmá ɛnɔ̄ɔ̄cī ga ɛnɔ̄ɔ̄nɛ̄ ā, géē wɛ ékpónú mɛ́mla īkpó kú odúúdú ajɛ nēé kɔ̄ lɛ aípɔ́ɔma ā. Agblīihɔ-nɛ̄hi kú Óndú ā géē kwu ipú ajɛ ɔ́ɔmā.

⁹ Ipú ajɛ nēé cē tá ɛyɛ́ɛ́yí ɔ́ɔmā ā, é géē hɛ́ ajɛ tá lɛ Óndú ā ŋmá ipú ɔtāhɛ̄ kú nū ā, nɛ̄ īkpō kú nū géē wɛ ukilómīta igwɛ́ɛpa ce āyā, ɔwá kú nū kē ī wɛ ukilómīta igwó.

¹⁰ Ācogwɛ́ɛya ā géē lɛ āyā kú ajɛ nēé hɛ́ tá lɛ Ɔwɔicō nyā dúú. Ajɛ kú uwá gbɔɔ́ ŋmá ɛnɔ̄ɔ̄cī ga ɔnɔ̄ɔnɛ̄. Ó géē wɛ ukilómīta igwɛ́ɛpa ce āyā, ɔwá kú nū ŋmá ɛhícō ga ɛháajɛ géē wɛ ukilómīta ɛhɔ̄. Agblīihɔ-nɛ̄hi kú Óndú ā géē kwu ɔtāhɛ̄ kú ajɛ nyā.

¹¹ Ɛga nōo wɛ ákú Ɔwɔicō nyā géē wɛ ákú ācogwɛ́ɛya nēe ŋmá ipɔ́ɔnū kú Usádɔ̄ku ā. Uwá gbā um kpaakpa, í kē kwɔhá mɛ́mla ācɛ kú Ísrɛ̄lu ká e yá ɔdōbɔ̄bí ɛ́gɛ́nɛ̄ ayí kú ipɔ́ɔma kú Ulífāyi ohile ā yá ŋ́.

¹² Ohígbū ɔ́ɔmā uwā géē lɛ ɛga ɛyɛ́ɛ́yí nōo kwu ɛga nōo wɛ ákú ayí ulífāyi ohile ā. Abɔ́ɔ kē í wɛ ákú Ɔwɔicō fíyɛ́ dúú á.

¹³ Ayí kú Ulífāyi géē lɛ ajɛ ɛyɛ́ɛ́yí dúú ɛháajɛ kú ákú ācogwɛ́ɛya ā. Ajɛ kú uwā ɔ́ɔmā géē wɛ ukilómīta igwɛ́ɛpa ce āyā ŋmá ɛnɔ̄ɔ̄cī ga ɛnɔ̄ɔ̄nɛ̄, klla í wɛ ukilómīta ɛhɔ̄ ŋmá ɛhícō ga ɛháajɛ.

¹⁴ Ɛga nēé je lɛ Óndú ā lɔhi fíyɛ́ dúú ipú ajɛ ā á. É gáā je āyā dúúmā kú ajɛ kú Óndú ā lá, ɛ́ɛ́ nɛ̄ uwá gē je ɔ́ fllabɔ̄ lɛ ɔ̄cɛ dúúmā ŋ́. Ajɛ ā wɛ ákú Óndú ā abɔ̄yī nū nɛ̄.

¹⁵ Amáŋ āyā ohile kú ajɛ kú Óndú nyā, nɛ̄ īkpō kú nū wɛ ukilómīta igwɛ́ɛpa ce āyā, nɛ̄ ɔwá kú nū kē wɛ ukilómīta ɛpa ce āyā ā, í wɛ ákú Ɔwɔicō abɔ̄yī nū ŋ́. Amáŋ ó géē wɛ ákú odúúdú ācɛ ā. É géē lā abɔ́ɔ, í kpó aɔ́dāajɛ kú uwā lúlé ipácí kú nū klla bī ajɛ ɔ́ɔmā yá ɔdā dóódu glá. Igelī ā kē géē kwu ɔtāhɛ̄ kú nū.

¹⁶ Ābɔ̄ ɛnɛ kú nū ā géē jōonjīlɛ, nɛ̄ ōmīya kú abɔ̄ dóódu ā wɛ umíta úlā ɛhɔ̄ ce ofigwɛ́ɛ́pa cigwó (2,250).

¹⁷ Ajɛ géē tá áncā yɛ igelī ā jīla tá biílí. Ajɛ nōo géē tá áncā ābɔ̄ dóódu kú igelī ā géē wɛ umita ofu ɛhīlī cɛhɔ̄ (125).

¹⁸ Ajɛ géē tá ajɛ eko nēé lɛ igelī ā gwó ā, ga ɛháajɛ kú ajɛ kú Ɔwɔicō ā. Īkpō kú nū wɛ ukilómīta ɛhɔ̄, nɛ̄ ɔwá kú nū wɛ ukilómīta ɛpa ce āyā ga ɛnɔ̄ɔ̄cī. Ó kē lɛ ā ga ɛnɔ̄ɔ̄nɛ̄ dúú. Ɔ́ɔmā géē wɛ ajɛ ɛhɔ̄ kú odúúdú ācɛ nɛ̄ ē lā igelī ā á.

¹⁹ Ɔ̄cɛ dúúmā nōo lā igelī ā, ipɔ́ɔma dúúmā nɛ̄ ó ŋmá ā, géē bī ajɛ ɔ́ɔmā le hɛ́hɔ̄ kú nū.

²⁰ Oōmiya kú odúúdú ajɛ kú ɔtāhɛ̄ nyā nēé géē hɛ́tá ajɛ ā géē wɛ ukilómīta igwɛ́ɛpa cē āyā, abɔ̄ ɛnɛ kú nū ā. Āyā nɛ̄ igelī ā kwu ā géē yɔ̄ anú dúú.

²¹ O ga ɛnɔ̄ɔ̄cī mɛ́mla ɛnɔ̄ɔ̄nɛ̄ kú ɛga nɛ̄ Agblīihɔ-nɛ̄hi géē kwu ā, ajɛ kú ācogwɛ́ɛya, ajɛ kú ācɛ Ulífāyi, mɛ́mla ajɛ kú igelī ā, ajɛ ohile nōo wɛ ákú ɔcɛ́ ā. Ajɛ kú ɔcɛ́ ā géē gbɔɔ́ lɛyíkwu ɛnɔ̄ɔ̄cī ga ɛjī kú ɛnɔ̄ɔ̄cī ā. Ó kē tá lɛyíkwu ɛnɔ̄ɔ̄nɛ̄ ga ísu nɛ̄hi kú Umeditarénīya ā.

²² Ó gaá kwu ɛjī ɛhícō ɛgiyí ajɛ kú Ujúda, ó kē gaá kwu ɛjī ɛháajɛ ɛgiyí ajɛ nōo wɛ ákú Ubɛ́njamīn ā.

Ajɛ kú aípɔ́ɔma ohile ā

²³ Aípɔ́ɔmā ohile ā géē lɛ ukpɛ̄ ákú uwā ɛ́gɛ́nyā. Ubɛ́njamin géē lɛ ukpɛ̄ éyi nōo í gbɔɔ́ ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

²⁴ Usímīyɔn í lɛ ukpɛ̄ éyi nōo ī tū ɛjī mɛ́mla Ubɛ́njamīn ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

²⁵ Usáka í lɛ ukpɛ̄ éyi nōo ī tū ɛjī mɛ́mla Usímīyɔn ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

²⁶ Usébūlɔn í lɛ ukpɛ̄ éyi nōo ī tū ɛjī mɛ́mla Usáka ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

²⁷ Ugádi í lɛ ukpɛ̄ éyi nōo ī tū ɛjī mɛ́mla Usébūlɔn ŋmá ɛnɔ̄ɔ̄cī ga ɛnɔ̄ɔ̄nɛ̄ ā.

²⁸ Ɛjī kú ɛháajɛ kú Ugádu ā géē yɛ lɛyíkwu ɛháajɛ ŋmá Utáma ga aɔ́kpá kú Umɛ́rība Ukádes, gáā bū njɔlɔ kú Íjīpiti ga ɛga ísu nɛ̄hi kú Umeditarénīya.”

²⁹ Óndú nōo wɛ Ɔwɔicō ā kahíníī, “Odúúdú ɔ́ɔmā wɛ ajɛ nɛ̄ aá géē kɔ̄ lɛ aípɔ́ɔma kú Ísrɛ̄lu ká o wɛ ɔdā úgwū kú uwā á.”

Aókómpinu kú Ujerúsālɛm ā

³⁰ Aókómpinu igwɛ́ɛpa nēé gē bū bɛ̄cɛ ŋmá igelī kú Ujerúsālɛmā. Ó géē gbɔɔ́ ŋmá āyā ɛhícō kú igelī. Īkpō kú ɔwɛ nyā géē wɛ umíta úlā-ɛhɔ̄ ce ofigwɛ́ɛpa ce igwó (2,250) dúúdú.

³¹ Aókómpinu kú igelī nyā, géē lé iyē éyééye kú aípɔ́ɔma igwɛ́ɛpa kú Ísrɛ̄lu ā. Aókómpinu ɛtá kú āyā kú ɛhícō ā, géē lé iyē ka okómpinu kú Urúbɛ̄n, okómpinu kú Ujúda, mɛ́mla okómpinu kú Ulífāyi.

³² Abɔ̄ kú ɛnɔ̄ɔ̄cī nɛ̄ īkpō kú nū wɛ umíta úlā ɛ̄hɔ̄ ce ofígwɛ́ɛpa cigwó (2,250) ā, aókómpinu ɛtá í bá abɔ́ɔ. É géē lé iyē ka okómpinu kú Ujófɛ̄fu, okómpinu kú Ubɛ̄njamin mɛ́mla okómpinu kú Udán.

³³ Abɔ̄ kú ɛháajɛ kú igelī ā, nɛ̄ īkpō kú odúúdú nū wɛ umíta úlā ɛhɔ̄ ce ofigwɛ́ɛpa cigwó ā (2,250). Aókómpinu ɛtá í bá abɔ́ɔ. É géē lé iyē ka, okómpinu kú Usímīyɔn, okómpinu kú Usáka, mɛ́mla okómpinu kú Usébūlɔn.

³⁴ Abɔ̄ kú ɛnɔ̄ɔ̄nɛ̄ kú igelī ā, nɛ̄ īkpō kú odúúdú nū wɛ umíta úlā ɛhɔ̄ ce ofu igwɛ́ɛpa cigwó (2,250). Aókómpinu ɛtá í bá abɔ́ɔ. É géē lé iyē ká, okómpinu kú Ugádi, okómpinu kú Ássa, mɛ́mla okómpinu kú Unáfutāli.

³⁵ Odúúdú īkpō kú ɔdɔ ā, abɔ̄ ɛnɛ kú igelī ā, wɛ umíta úlā ofu ce ɛpa ce ofigwó (9,000). Iyē kú igelī ā ŋmá eko ɔ́ɔmā jāā gɔbū ā géē lé ka, ‘Óndú Yɔ̄ Amānyā.”