OŌYƐBƐ̄CƐ 4 - Ubáyíbu kú Idɔma

Ɔwɔicō je ɔdōcābɔ̄ lɛ Umósīsi

¹ Anɔ́ɔ Umósīsi tóohi kahíníī, “Ɔ̄cɛ í jé ŋ́ nɛ̄ ācɛ kú Ísrɛ̄lu í cɛ̄ ɛlā kú um ŋ́ klla tá kóō jāhɔ̄ lɛ ɛlá nɛ̄ n ka ā bɛ́ɛ? Ɔdí nɛ̄ n géē yá, ɔ́dāŋ nēé ka ka awɔ í hɛ́wɛ̄ɛcɛ ɛgiyí um ŋ́ bɛ́ɛ?”

² Anɔ́ɔ Ɔwɔicō da Umósīsi ɔ̄kā kahíníī, “Ɔdí nāa bī abɔ̄ abɔ́ɔ ā?” Ó kahíníī, “Okwutɛ nɛ̄.”

³ Anɔ́ɔ Ɔwɔicō da ɔ́ kahíníī, “Lɛ ɔ́ tá fīyajɛ.” Abɔ̄ Umósīsi le ɔ́ tá fīyajɛ ā, ó kwú pīya ɛgwā. Anɔ́ɔ Umósīsi le kwu ŋmá ɛgiyí nū á.

⁴ Amáŋ, Ɔwɔicō da Umósīsi kahíníī, “Túkpɛɛ́ kú ā lɛ abɔ̄ bī ɔ̄ ugbé kú ā kwú ɔ̄ ú.” Anɔ́ɔ Umósīsi túkpɛɛ́ kwú ugbé ŋmá ajɛ á, anɔ́ɔ ó kwú pīya okwutɛ abɔ̄ kú nū á.

⁵ “Yá ɛ̄nyā kóō mafú lɛ uwá ka Ɔwɔicō kú aádáádā ūwā, Ɔwɔicō kú Ébrahām, Áyísīki, mɛ́mla Ujékɔ̄pu, le hɛ́wɛ̄ɛcɛ ɛgiyí uwɔ.”

⁶ Ɔwɔicō klla le ɛlā ka lɛ Umósīsi igbɔhá kpɔ́ kahíníī, “Kwú abɔ̄ kú uwɔ ú wu awulú kú uwɔ.” Umósīsi kwú abɔ̄ kú nū ú wu awulú kú nū. Eko nɛ̄ ó kwú ɔ̄ ú wɛ̄ɛcɛ ā, ó le má ka abɔ̄ ā ɔ́ɔ le gbagwú kwúláá bɛ̄ɛka áfū ā.

⁷ Anɔ́ɔ Ɔwɔicō kahíníī, “Kwú abɔ̄ kú uwɔ ú cīgbīhi í wu awulú ā kpɔ́.” Eko nɛ̄ ó kwú ɔ̄ ú ŋmá ipú awulú ā, ó le má ka, ó kwú yá lɔhi mɛ́ɛ́lɛ́ bɛ̄ɛka ɛga o hile kú ɔkpíyē kú nū ā.

⁸ Anɔ́ɔ Ɔwɔicō kahíníī, “Ɔ́dāŋ ka uwá í cɛ̄ɛ̄lā kú uwɔ ŋ́, nɛ̄ ɔdā nɛ̄ ō ī hɛ́ ācɛ idáagó kú áflɛ́yí ā í cɛ̄ uwā eyīgēdēe ŋ́, úklɔ́ ōhídáagó ámōōmɛ nyā géē pī ɔtū kú uwā abɔ̄.

⁹ Ɔ́dāŋ ka nááná nāa le ɔdā ōhídáagó ɛ́plɛ́ɛpa ā kpó yā, nēé nē é cɛ̄ɛ̄lā kú uwɔ ŋ́ kpɔ́, anɔ́ɔ é tá ō jāhɔ̄ lɛ ɔ̄dā nāa ka ā, lɛ éŋkpɔ̄ ōhī hɛ́ ŋmá Unáyilu cɛ́ɛ́ a lɛ cē bá ajɛ. Éŋkpɔ̄ ā í je pīya oyī.”

¹⁰ Amáŋ, Umósīsi kahíníī, “Óndú Ɔwɔicō kú um, Ń jé ō kɛlā lɔɔlɔhi ŋ́. Ń kē je pīya ɔ̄cɛ ō jé ō kɛ̄lā ŋmífī nāa gbɔɔ́ ō kɛlā gā um ā ɛ́ɛ́ ŋ́. N gē kɛlā ɛmɛɛma klla ī hɔ́gwū.”

¹¹ Anɔ́ɔ Ɔwɔicō da ɔ́ kahíníī, “Ɔ̄nyɛ yá okónu kú ɔ̄cɛ ā? Ɔ̄nyɛ ī je ɔ̄cɛ pīya odokónu, ámāŋ odahɔ̄ ā? Ɔ̄nyɛ géē yá kú ɔ̄cɛ kóō mɛ́ɛbɛ, ámāŋ gē je ɔ́ pīya opeyī ā? Ó wɛ ami nōo wɛ Óndú ā ŋ́ nɛɛ?

¹² Nyɔ̄ abālɔbányā, N géē tá uwɔ abɔ̄ kú ā kɛlā, n kē í dā uwɔ ɛlá nāa í ka ā.”

¹³ Amáŋ, Umósīsi kahíníī, “Óndú um, ‘Kóócōō’ tū ɔ̄cɛ ɔhá ɛhɔ̄ nyā.’”

¹⁴ Ɔwɔicō kwú cɔ̄nū mla Umósīsi, anɔ́ɔ ó kahíníī, “Árɔ̄ni ɔyínɛ́ uwɔ í wɛ ɔ̄cɛ Ulífāyi ŋ́ nɛɛ? N jé kóō jé ɔ̄ kɛlā lɔhi. Ó yɔ̄ ī wā gáā jīla uwɔ ɔwɛ dúú ɛɛ́, eko nɛ̄ ó ī má uwɔ ā, ɔtū géē he uwɔ.

¹⁵ A lɔfú da ɔ́ ɛlā nɛ̄ n da uwɔ ā glá. N géē tá aá ɛplɛ́ɛ́pa abɔ̄ kú aá kɛlā, n kē í da aá ɛpɛplɛ́ɛpa ɔdā nɛ̄ aá í yá ā.

¹⁶ Ó géē wɛ ɔkɛ̄lā kú uwɔ. Anú géē kɛlā lɛ ācɛ ā kwɛyí uwɔ á. Cɛ́ɛ́ a géē lɛbɛ̄ɛka Ɔwɔicō ā, a géē da ɔ́ ɔdā nɛ̄ ó í ka ā.

¹⁷ A kē í bī okwutɛ nyā abɔ̄, nāa géē bī yá ɔdā ō hídáagó.”

¹⁸ Umósīsi le cīgbīhi ga ɛgiyí ohilí nū Ujɛ́tro, anɔ́ɔ ó da ɔ́ kahíníī, “N tíne ká n̄ nyɔ̄ gaá lɛ ācɛ ɔlɛ́ um nēe bá ajɛ kú Íjīpiti ā jila. Ká n̄ lɛ jé ɔ́dāŋ ka é yēeyī kpɔ́ ɛ́ɛ́.” Anɔ́ɔ Ujɛ́tro da ɔ́ kóō nyɔ̄ ɛbɔ́.

¹⁹ Anɔ́ɔ Ɔwɔicō da Umósīsi, eko nɛ̄ ó yɔ̄ Umídiya ā kahíníī, “Lɛ cīgbīhi ga Íjīpiti ohígbū ka odúúdú ācɛ nēe tíne kéē ŋmó uwɔ ā, le pɛ́ gekwú ɛɛ́.”

²⁰ Anɔ́ɔ Umósīsi kwú ɔnyā nū mɛ́mla ayí nū nɔ̄nyilɔ ú kpó cɛyí ijakī, kwú okwutɛ nɛ̄ Ɔwɔicō da ɔ́ kóō je ā ú bī abɔ̄. Anɔ́ɔ é kwúcē le tá Íjīpiti á.

²¹ Óndú ā da Umósīsi igbɔhá kpɔ́ kahíníī, “Eko nāa le tá Íjīpiti, má ka a lɛ odúúdú aɔ́dā ō hidáagó dóódu, nɛ̄ n je gā uwɔ ā yá ipéyī Uféro. Amáŋ n géē je ígbɔ́tū lɛ ɔ́, cɛ́ɛ́ kú ɔ̄ híī cɛ̄ lɛ ācɛ ā nyɔ̄ ŋ́.

²² A géē da Uféro kahíníī, “Ami Óndú ā kahíníī, “Ísrɛ̄lu wɛ ɔyínɔ̄nyīlɔ aflɛ́yí kú um á.

²³ N da uwɔ kahíníī, “Habɔ̄ ɔyínɔ̄nyīlɔ kú um tá kóō nyɔ̄ gáā gbō um ɛ̄gbā. Ɔ́dāŋ ka a tá kú ō híī nyɔ̄ ŋ́, n géē ŋmó ɔyínɔ̄nyīlɔ aflɛ́yí kú uwɔ.”

²⁴ Óndú ā le jīla mla Umósīsi ɛga nēé gbo otú ɔwɛ o yɛ ga Íjīpiti ā, anɔ́ɔ Ɔwɔicō tíne ō lɛ ɔ́ ŋmó.

²⁵ Anɔ́ɔ Usipóra kwū ɛcɔ̄ ō lulé ú, le ufíyé kú apī kú ɔyí nū hɛ́, anɔ́ɔ ó kwú ɔ̄ kwu Umósīsi ikpó. Anɔ́ɔ ó da Umósīsi kahíníī, “A wɛ ɔbá um ipú oyī nɛ.”

²⁶ Ohígbū uculo kú apī nēé hɛ́ nyā ā, ó da Umósīsi kahíníī, “Awɔ wɛ ɔbá kú oyī gā um á.” Anɔ́ɔ Ɔwɔicō í ŋmó Umósīsi gɛ ŋ́ má.

²⁷ Anɔ́ɔ Óndú ā da Árɔ̄ni kahíníī, “Nyɔ̄ ga ipú ígbíli kú ā gáā jīla Umósīsi ɔwɛ.” Anɔ́ɔ ó le yɛ gáā jīla Umósīsi ɛyí ɛfu kú Ɔwɔicō ā, ó lɛ ɔ́ kwú bɔ́tū.

²⁸ Anɔ́ɔ Umósīsi lɛ odúúdú ɛlā nɛ̄ Ɔwɔicō ka lɛ ɔ́ eko nɛ̄ ó kóō kwúcē ga Íjīpiti ā kpó ka lɛ Árɔ̄ni. Ó le ɔdā ō hídáagó nɛ̄ Óndú ā da ɔ́ kóō yá ā kpó ka lɛ ɔ́ dúú.

²⁹ Anɔ́ɔ Umósīsi mɛ́mla Árɔ̄ni le pɛ́ i yɛ tá Íjīpiti á. Anɔ́ɔ é le odúúdú anyākwɔ́cɛ kú ācɛ kú Ísrɛ̄lu ā kpó hīgwú wā í le jīla ɛga éyi.

³⁰ Anɔ́ɔ Árɔ̄ni lɛ odúúdú ɛlā nɛ̄ Ɔwɔicō ka lɛ Umósīsi ā kpó ka lɛ uwá klla lɛ odúúdú ɔdā ō hídáagó ā kpó yá ipéyī uwā.

³¹ Anɔ́ɔ odúúdú ācɛ ā cɛ̄ɛ̄lā ā eko nēé klla le pó ka Óndú ā ɔ́ɔ gā ɛgiyí ācɛ ɔlɛ́ nū Ísrɛ̄lu, klla lɛ ōwē kú uwā má ɛɛ́ ā. É túkpɛɛ́ lɛ eyī pīya kláajɛ le ɛ̄gba gbā Ɔwɔicō.