Ɛ́STA 8 - Ubáyíbu kú Idɔma

É lɛ ɔfú je lɛ ācɛ Ujíyu

¹ Ícíícɛ ɔ́ɔmā, ɔcɛ́ Ahásɛ̄rɔ̄si, kwú odúúdú agbénú kú Uháman olɛlā kú ācɛ Ujíyu ā ú kpó lɛ Ɛ́sta, ɔcányā ā. Ɛ́sta klla le da ɔcɛ́ ā ka Umɔ́dɛkāyi ɔ́ɔ wɛ ɔmáapu ádā anúɔ. Anɔ́ɔ ó ŋmá eko ɔ́ɔmā, é lɛ ɛga je lɛ Umɔ́dɛkāyi kɔ́ɔ̄ wā iyɔ̄bū ɔcɛ́ eko dóódu.

² Ɔcɛ́ kwú eliká kú nū, nɛ̄ ó gē le bá ɔkpá ā, nɛ̄ ó mīyɛ ŋmá ɛgiyí Uháman ā, anɔ́ɔ ó kwú lɛ Umɔ́dɛkāyi á. Ɛ́sta klla kwú agbénú kú Uháman ā ú kpó tū Umɔ́dɛkāyi abɔ̄.

³ Anɔ́ɔ Ɛ́sta má kwōkwū iyɔbū ɔcɛ́ ā, le ɔkɔ gbā lɛ ɔ́, klla le ɛlā ka lɛ ɔ́ igbɔhá á. Ó da ɔ́ kɔ́ɔ̄ lɛ odée yá, cɛ́ɛ́ ká ɔ̄ lɛ ojuju obɔ̄bí mɛ́mla ujɔ̄ kú ikwū nɛ̄ Uháman, ɔ̄cɛ ipɔ́ɔma kú Ágāgi, miya tū ācɛ Ujíyu ā ci.

⁴ Anɔ́ɔ ɔcɛ́ je okwutɛ kú ɔcɛ́ kú nū gicō lɛ ɔ́, anɔ́ɔ Ɛ́sta cāŋjɛ anɔ́ɔ ó kahíníī,

⁵ “Ágábáidu, ɔ́dāŋ́ koó he uwɔ ɔtū, nɛ̄ n kē he uwɔ ɔtū, nɛ̄ ó kē le kpaakpa iyɔ̄bū uwɔ nɛɛ, kócōō lɛ ɔ́da je cɛ́ɛ́ kú ā lɛ ɔ́da kú Uháman ā ci. Cɛ́ɛ́ ɔ́da nɛ̄ ɔyí kú Uhamedáta kú ipɔ́ɔma kú Ágāgi je kéē kwú ācɛ Ujíyu í kpó yíífi dúúdú ŋmá ipú ajɔ̄ɔ̄cɛ́nɛ̄hi kú uwɔ ā, kóō híī yúklɔ́ ɛgiyí ācɛ Ujíyu gɛ ŋ́.

⁶ Iní nɛ̄ n géē leyīkwu ɔ́dāŋ kéē le ācɛ ɔlɛ́ um kpó yíífi ā?”

⁷ Anɔ́ɔ ɔcɛ́ da Ɛ́sta, ɔcányā mɛ́mla Umɔ́dɛkāyi mɛ́mla ācɛ Ujíyu ā kahíníī, “Áa má ɔ̄, n kwú Uháman ú tōolī, ohígbū ojuju obɔ̄bí mɛ́mla ujɔ̄ nɛ̄ ó tū tū ācɛ kú Ísrɛ̄lu ā ɛɛ́. N klla kwú odúúdú agbénú kú nū ú kpó lɛ Ɛ́sta ɛɛ́.

⁸ Amáŋ, íne dóódu nēé le tū ipú iyē kú ɔcɛ́, nɛ̄ ɔcɛ́ klla kwú abɔ̄ ú bá ɔ̄ ɛɛ́, é gáā je íne ɔ́ɔmā pīyabɔ̄ gbóógbóō glá ɛ́ɛ́ gɛ ŋ́. Amáŋ a lɔfú bī iyē kú um, mɛ́mla eliká kú um le tɔ́kpá fu ācɛ Ujíyu ā glá. Ɔdā dúúmā nōo he uwɔ ɔtū ā nāa géē tá á.”

⁹ Ɔdā nyā yá ɛ̄cī ɔ́mofu ce ɛtá kú ɔyā ɔ́mɛtá nēé hī ka Usífan ā. Umɔ́dɛkāyi, lɛ odúúdú aɔ́málɛ kú ɔlɛ́ ɔcɛ́ kpó hīgwú, anɔ́ɔ ó le ɔdā nēé í tá kpó ka lɛ uwá kéē lɛ ɔkpá tá gé lɛ ācɛ Ujíyu mɛ́mla odúúdú aígbómína mɛ́mla aígabɔ̄, ofu ɛhīlī ce ahāapa kú ajɛ kú Upɛ́siya, nōo gbɔɔ́ ŋmá Índīya jāā ga Etiyópīya ā. É tɔ́kpá nyā okónu ucē kú ācɛ dóódu, mɛ́mla ɔwɛ nēé gē tɔ́kpá okónu kú ɔlɛ́ uwā ā. Ó klla le ɔkpá nyā tá fu ācɛ Ujíyu okónu Uhíbru dúú.

¹⁰ Ofíyɛ́ dúú ā, é tá ɔkpá nyā ipú iyē kú ɔcɛ́, Ahásɛ̄rɔ̄si. É klla le eliká kú nū gbo ɔ́. Anɔ́ɔ é lɛ ācɛ o ce ɔnya kú ɔlɛ́ ɔcɛ́ ā kpó kéē lɛ ɔkpá nyā kpó tɛ̄hɔ̄ ga ɛga dóódu kú ajɛ ā.

¹¹ É tɔ́kpá ka, ɔcɛ́ lɛ ɛga je lɛ ācɛ Ujíyu ɛga dóódu kú ipú ajɔ̄ɔ̄cɛ́ kú nū ā, kéē lɛ īyī uwā túbá, cɛ́ɛ́ kéē gbō īyī uwā ɛyí. Ɔ́dáŋ ka ācɛ dúúmā bī iyɔ́fú gaá le unu nu tá uwá, ācɛ Ujíyu ā lɛ íkwu kéē nuunu tá ɔ̄cɛ ɔ́ɔmā. É klla le ɔfú je kéē lɛ ācɛ ɔ́ɔmā mɛ́mla anyā uwā mɛ́mla ayí uwā kpó ŋmó, kéē klla lɛ iyó kú uwá kpó wu.

¹² Ɔ́da nyā géē gbɔɔ́ kóō yúklɔ́ ŋmá ɛ̄cī igwɛ́ɛtá kú ɔyā nēé hī ka Áda ā, nōo wɛ ɔyā igwɛ́ɛpa ā. Ɛ̄cī ɔ́ɔmā nēé tū kéē kpó ācɛ Ujíyu ŋmó á.

¹³ É kwú ɛ̄nyā ú pīya íne, lɛ ɔ́ jé lɛ ācɛ dóódu ipú ajɛ kú Upɛ́sīya mɛ́mla Umɛ́dīya. Cɛ́ɛ́ ka ācɛ Ujíyu ā kéē géē lɔfú nuunu tá aólɛlā kú uwā glá, ipú ajɛ ɛga dóódu nēé géē wā kéē gaá je uwá kpó ŋmó ā.

¹⁴ Ɔcɛ́ ā klla le ɔ́da je lɛ ācɛ o ce ɔnya fíya ā. Anɔ́ɔ é le ɔnya ce gaá le ɔ́da nyā kpó kɔ̄ ɛga dóódu kú ajɛ ā. É klla lɛ íne ā jé klla kwú ɔ̄ u bá ɛcɛ Usúsa, ɔlɛ́ ɔtāhɛ̄ kú Upɛ́sīya mɛ́mla Umɛ́dīya ā.

¹⁵ Anɔ́ɔ Umɔ́dɛkāyi bɛ̄cɛ ŋmá agblɔ̄cɛ́ ā, le awulú kú ɔcɛ́ kú nū wiyē. Awulú ā ína nɛ̄hɛ́ mɛ́mla odufā. Ó klla lɛ ijɛɛlɛ kú ɔcɛ́ ce ɔkɔ. Ó klla le ɔflā kú ugóolu (oje ɔdɔ) kú ɔcɛ́ kwɛyí. Odúúdú uláyi kú Usúsa le hútú. Ācɛ bá ī dɛ̄gba klla bá ī tɔ́ɔga.

¹⁶ Ɔtū kú ācɛ Ujíyu gāajɛ. Ɔtū klla he uwā nɛ̄hi bɛ̄ɛka ɔdā nēé le ɛfú yálé ā.

¹⁷ Igelī dóódu kú ajɛ kú Upɛ́sīya mɛ́mla Umɛ́dīya nēé le ɔ́da mɛ́mla íne kú ɔcɛ́ ā jé tɛ́ɛcɛ nɛɛ, ācɛ Ujíyu gbɔɔ́ ō tɔ́ɔga. É lɛ omlɛ́nyɔ́ je lɛ iyī uwā, klla bá ī gwéeyē yɔ̄ gē lé ucɛ. Igbīhāajɛ ā, ācɛ alɛwa kwú pīya ācɛ Ujíyu, ohígbū ka é bá i yúufi ācɛ Ujíyu ā eko ɔ́ɔmā.