Ɛ́STA 7 - Ubáyíbu kú Idɔma

¹ Anɔ́ɔ ɔcɛ́ mla Uháman klla le yɛ gáā lé ucɛ mla Ɛ́sta.

² Igbo ɔ́mpa ā, eko nēé bá ī gwá ejé ā, ɔcɛ́ da Ɛ́sta kahíníī, “Ɔdā dúúmā nāa tíne ā, da um. N géē yá ɔ̄ gā uwɔ. Ó kōō wɛ āyā éyi kú ajɔ̄ɔ̄cɛ́ kú um nááná, n géē je gā uwɔ.”

³ Anɔ́ɔ Ɛ́sta, ɔcányā ā da ɔcɛ́ kahíníī, “Ɔ́dāŋ́ ka Ágábáidu géē yá ɔdā lígíí nɛ̄ n gáā ba ā gā um glá, ó géē wɛ ɔdā ō he um ɔtū nɛ̄hi. Ɔcɛ́ ā kóō cɛ̄ kú ami mɛ́mla ācɛ ɔlɛ́ um kóō yēeyī.

⁴ É kwú ami mɛ́mla ācɛ ɔlɛ́ um ú kpó lá lɛ ikwū ɛɛ́. Ɔ́dāŋ́ keé kwú alɔ ú kpó lá kú ɔfiyɛ nɛɛ, ń gáā lɛ ɛlá wu ɔ́ ɛ́ɛ́, nɛ̄ n gē je unwalu lɛ ɔcɛ́ ŋ́. Amáŋ é gáā je alɔ kpó ŋmó dúúdú ɛɛ́. É klla géē je alɔ kpó yíífi ŋmá ajɛ.”

⁵ Anɔ́ɔ ɔcɛ́ da Ɛ́sta ɔ̄kā kahíníī, “Ɔnyɛ gáā yá ɔdā ɛ́gɛ́nyā glá ā? Iní nōó yɔ̄ ā?”

⁶ Ɛ́sta tá ɔ́ ohi kahíníī, “Uháman nyā wɛ olɛlā kú alɔ mɛ́mla ɔ̄cɛ obɔ̄bíipú tú alɔ á.” Anɔ́ɔ ufi nɛ̄hi le Uháman kwú iyɔ̄bū ɔcɛ́ mɛ́mla Ɛ́sta, ɔcányā ā.

⁷ Ɔcɛ́ cāŋjɛ gbúlu, le tɛ́ɛcɛ ga ipú ɛhɔ̄ kú agblɔ̄cɛ́ ā gaá māháyi cíí. Abɔ̄ Uháman le má ka ɔcɛ́ ɔ́ɔ le cɔ̄nū nɛ̄hi, ɔ́ɔ klla í yá anúɔ italā piíí ā, ó le tá ɛgiyī Ɛ́sta, ɔcányā ā, gaá yɔ̄ ī gbɔ̄ɔkɔ lɛ ɔ̄ ohígbū oyēeyī kú anū abɔ̄yīnū.

⁸ Uháman gaá gbo klá ɔdōcīce kú Ɛ́sta pī ɔ̄, yɔ̄ gē gbɔ̄ɔkɔ lɛ ɔ́, kóō ményīnyinyi anúɔ. Eko nɛ̄ Ágábáidu pīyɛyí ŋmá ipú ɛhɔ̄ ā. Abɔ̄ nōó le ɔdā nōo yɔ̄ ī yá ā má ā, ó le ɛgba dɛ̄ kahíníī, “Ɛhɛ́ɛ. Ó gáā hɛ́ ɔcányā ā báajɛ, kóō gwutá mla anú ipéēyī um, agblɔ̄cɛ́ kú um amānyā kɛ̄ɛ?” Ɔkwɔɔkwu nɛ̄ ɛlā nyā le bɛ̄cɛ ŋmá okónu kú ɔcɛ́ ā, aídibo gaá bī Uháman báajɛ, kwú īlī ú pi wu ɔ́ ɛyí gblu.

⁹ Anɔ́ɔ éyi kú uwā nēé hī ka, Uhabóna ā da ɔcɛ́ ā kahíníī, “Uháman yɛ jāā gaá lɛ ákanaba nɛ̄ olicō kú nū wɛ ikpó ofɛtá ce igwɛ́ɛhɔ̄, bū tū ɔlɛ́ nū, lɛ ogbló pīya cílá anú ɛyí kóō géē je Umɔ́dɛkāyi, nōo nya oyēeyī kú ɔcɛ́ tá ā, tōoli playi anú dúú.” Anɔ́ɔ ɔcɛ́ ā le ɔ́da je kahíníī, “Aá lɛ Uháman abɔ̄yī nū tōolī playi anú.”

¹⁰ Anɔ́ɔ é lɛ Uháman tōolī playi ákanaba ɛpa, nɛ̄ ó bū tū, lɛ ogbló pīya cíla anú ɛyí ā. Ɔdā nɛ̄ ó tútū kóō le ŋmó Umɔ́dɛkāyi ā, kwú pīya ɔdā nōo ŋmó anú abɔ̄yīnū. Anɔ́ɔ ɔtū kú ɔcɛ́ kwú gbo á.