Ɛ́STA 6 - Ubáyíbu kú Idɔma

Ɔcɛ́ lɛ ojīlīmā je lɛ Umɔ́dɛkāyi

¹ Otú ɔ́ɔmā piíí ā, ɔcɛ́ í gbiyɔ̄lā glá ŋ́. Anɔ́ɔ ó le ɔ́da je kéē lɛ odúúdú ɔkpá nē é ī tɔ́kpá kú ajɔ̄ɔ̄cɛ́nɛ̄hi ā tū ā kpó wā, cɛ́ɛ́ kéē lɛ ɔ́ jé tɛ́ɛcɛ lɛ anúɔ.

² Āyā nēé je mɛ́ɛ́ ā, kwú pīya āyā nɛ̄ Umɔ́dɛkāyi je ɔkwu ujɔ̄ nēé tū gāá ŋmó ɔcɛ́ ā tɛ́ɛcɛ ā. Ujɔ̄ kú Ubigītána mɛ́mla Utéresi, aídibo ɛpa, nēe gē gbō ɔwɛ kú inu ɔlɛ́ ɔcɛ́ ā.

³ Ɔcɛ́ ā da uwá ɔ̄kā kahíníī, “Ɔdí nɛ̄ alɔ yá, ámāŋ nɛ̄ alɔ bī le cílá Umɔ́dɛkāyi ulé kú ɔdā olɔhi nōó yá nyā ā?” Anɔ́ɔ aígabɔ̄ kú nū ā tá ɔ̄ ohi kahíníī, “Alɔ í yá ɔdā dúúmā lɛ ɔ́ ɛ́ɛ́ ŋ́.”

⁴ Anɔ́ɔ ɔcɛ́ ā da uwá ɔ̄kā kahíníī, “Igabɔ̄ kú um dúúmā yɔ̄ ipú agblɔ̄cɛ́ ā?” Eko nyā, Uháman yɔ̄ í wā agblɔ̄cɛ́ ā bōōbū, kóō gaá da ɔcɛ́, cɛ́ɛ́ kóō géē lɛ Umɔ́dɛkāyi tōolī playi ákanaba nōó bū kwaajɛ lɛ ogbló cíla anú ɛyí ā.

⁵ Anɔ́ɔ é tá ɔcɛ́ ohi kahíníī, “Uháman yɔ̄ amānyā, ó ī tíne kóō má ɔcɛ́.” Anɔ́ɔ ó da uwá ka “Aá da ɔ́ kóō le bēhé wā inu.”

⁶ Obōōbū nɛ̄ Uháman gā inu ā, ɔcɛ́ ā da ɔ́ kahíníī, “Ɔcɛ́ éyi yɔ̄ amānyā, nɛ̄ n tíne ō lɛ ojīlīmā ce ɔ́ nɛ̄hi. Ɔdí nɛ̄ n géē yá lɛ ɔ́ ā?” Eko nɛ̄ ɔcɛ́ ā lɛ ɔ̄kā nyā da ɔ́ ā, anɔ́ɔ Uháman gbɛlá ipú ɔtū kú nū ka anúɔ piíí nɔ́ɔ gáā ce ojīlīmā nyā á.

^7-8 Anɔ́ɔ ó kahíníī, “Lɛ awulú kú ɔcɛ́ kú uwɔ, nɛ̄ awɔ abɔ̄yī uwɔ gē le wu iyē ā kpó wu ɔ̄cɛ ɔ́ɔmā iyē. Cɛ́ɛ́ a lɛ ɔ́da je kéē kwú ɔnya kú ɔcɛ́ nēé lɛ ɔflā kú ɔcɛ́ kwu ɔ́ɔ ɛyí ā ú bī wā.

⁹ Cɛ́ɛ́ a lɛ éyi kú aígabɔ̄ nɛ̄hi kú uwɔ fu kóō kwú ɔ̄cɛ ɔ́ɔmā ú ce ɔnya kú ɔcɛ́ ā, yɛ Usúsa bilíbilí, cɛ́ɛ́ igabɔ̄ kú uwɔ ā kóō klla yɔ̄ í tɔ́ɔga tá ɔ̄ ɔkwu kahíníī, “Aá má ɛ́gɛ́nɛ̄ ɔcɛ́ gē lɛ ojīlīmā ce ɔ̄cɛ nōó tíne ō le ce ɔ́ ā.”

¹⁰ Anɔ́ɔ ɔcɛ́ ā da Uháman kahíníī, “Nyɔ̄ fíya kú ā lɛ awulú mɛ́mla ɔnya kú ɔcɛ́ ā kpó wā. Cɛ́ɛ́ kú ā lɛ aɔ́dā nāa ka ā yá lɛ Umɔ́dɛkāyi, ɔ̄cɛ Ujíyu ā. A géē má ɔ̄ cīce okómpinu kú agblɔ̄cɛ́ eyɛ̄ɛ̄cɛ abɔ́ɔ.”

¹¹ Anɔ́ɔ Uháman nyɔ̄ gaá le awulú mɛ́mla ɔnya kú ɔcɛ́ ā kpó, le Umɔ́dɛkāyi ɛyí gbō kú ɔcɛ́, klla le ɔnya ā yíifa, kwú Umɔ́dɛkāyi ú ce ɛyí nū. Anɔ́ɔ Uháman klla gbɔɔ́ ō bī ɔ̄ yɛ ipú igelī nɛ̄hi kú Usúsa bilíbilí yɔ̄ í kahíníī, “Aá má ɛ́gɛ́nɛ̄ ɔcɛ́ gē cíla ɔ̄cɛ nōó tíne ó lɛ ojīlīmā ce ɔ́ ulé lɛ ā.”

¹² Umɔ́dɛkāyi kwúcē le tá agblɔ̄cɛ́, anɔ́ɔ Uháman páápá le abɔ̄ pīya klá eyī mla uwēyī le yɛ tá ɔlɛ́ nū á.

¹³ Ó lɛ odúúdú ɔdā nōo yá ɔ̄ nyā kpó ka lɛ ɔnyā nū mɛ́mla odúúdú aóklóbīya nū ā. Anɔ́ɔ ɔnyā nū mɛ́mla aóklóbīya nū nōo jéeyī ā tá ɔ̄ ohi kahíníī, “Ɔfú kú uwɔ gbɔɔ́ ō hɛ́ uwɔ abɔ̄ ga ɛgiyí Umɔ́dɛkāyi ɛɛ́. Ó wɛ ɔ̄cɛ Ujíyu nɛ, á kē gáā yá ɔ̄ lé glá ŋ́. Ó géē yá uwɔ lé piíí.”

É lɛ Uháman ŋmó

¹⁴ Abɔ̄ é bá ī kɛlā mla Uháman kpɔ́ ɛ́ɛ́ mā, idibo kú agblɔ̄cɛ́ ā, nwúleyīkwū gaá kwú ɔ̄ ú bī ga ɔnū ucɛ nɛ̄ ɔcányā, Ɛ́sta, yá lɛ anú mɛ́mla ɔcɛ́ ā.