Ɛ́STA 5 - Ubáyíbu kú Idɔma

Ɛ́sta le ucɛ yá lɛ ɔcɛ́ mɛ́mla Uháman

¹ Ɛ̄cī ɔ́mɛtá kú okónu nēé gwū nyā, Ɛ́sta le ifa kú ɔcɛ́nyā kú nū yá le tá ipú agblɔ̄cɛ́, gaá háyi lɛ eyī pīya kwu akpa kú ɔcɛ́ ā kpaakpa. Ɔcɛ́ ā yɔ̄ ipú inu, cīce ɛyí akpa kú nū, leyī pīya kwu ɔwɛ.

² Eko nɛ̄ ɔcɛ́ le Ɛ́sta, ɔcányā ā má hāyi ɛcɛ ā, ihɔtū kú Ɛ́sta gā ɔtū kú nū bōōbū, anɔ́ɔ ó je okwutɛ kú ugóolu (oje ɔdɔ) kú nū ā gicō lɛ ɔ́. Anɔ́ɔ Ɛ́sta le bēhé wā inu gaá le abɔ̄ kwu ɛhícō kú okwutɛ kú ɔcɛ́ ā á.

³ Anɔ́ɔ ɔcɛ́ da ɔ́ ɔ̄kā kahíníī, “Ɔdí nɛ, Ɛ́sta, ɔcányā kú um? Ɔdā dúúmā nāa tíne ā, da um. N géē yá ɔ̄ gā uwɔ. Ɔ́dāŋ́ ka ó wɛ ka n̄ kwú āyā éyi kú ajɔ̄ɔ̄cɛ́ kú um ú gā uwɔ nááná, n géē je gā uwɔ.”

⁴ Anɔ́ɔ Ɛ́sta tóohi kahíníī, “Ɔ́dāŋ́ koó he ɔcɛ́ ɔtū nɛɛ, n tíne ka Ágábáidu mɛ́mla Uháman kéē wɛ aúgbɔga kú um ícɛ nyā ɔnū ucɛ nɛ̄ n yɔ̄ ī yá lɛ ɔcɛ́ mɛ́mla Uháman ɔlɛ́ um ā.”

⁵ Anɔ́ɔ ɔcɛ́ le ɛhɔ̄ tū fu Uháman fíya, kɔ́ɔ̄ ɔ̄ wā kú aá gaá wɛ aúgbɔga kú ucɛ kú Ɛ́sta, nōó yɔ̄ gē yá lɛ aá ā. Anɔ́ɔ ɔcɛ́ mɛ́mla Uháman le tá ɔnū ucɛ kú Ɛ́sta, nōó yá lɛ uwá ā.

⁶ Eko nɛ̄ ɔcɛ́ lɛ ejé gwá mu eyī ā, ó da Ɛ́sta kahíníī, “Ɔdā dúúmā nāa tíne klla cɛgbá ā, da um. N géē yá ɔ̄ ga uwɔ. Ó kōō wɛ ō je āyā éyi kú ajɔ̄ɔ̄cɛ́ kú um nāa tíne á, n géē je ɔ́ gā uwɔ.”

⁷ Anɔ́ɔ Ɛ́sta tá ɔcɛ́ ohi kahíníī,

⁸ “Ɔ́dāŋ́ koó he ɔcɛ́ ɔtū nɛ̄, ó géē he um ɔtū cɛ́ɛ́ ka ɔcɛ́ mɛ́mla Uháman kéē klla wɛ aúgbɔga kú ucɛ nɛ̄ n géē yá lɛ aá óócí ā kpɔ́. Ɛgiyí ucɛ ā mɛ́mla eko ɔ́ɔmā ā nɛ̄ n géē ka ɔdā nɛ̄ n tíne klla cɛgbá ā lɛ ɔcɛ́ á.”

Uháman le ujɔ̄ tū kóō kwú Umɔ́dɛkāyi ú ŋmó

⁹ Eko nɛ̄ Uháman ŋmá ɔnū ucɛ ā yɔ̄ í ga ɔlɛ́ ā, ɔtū he ɔ́ nɛ̄hi. Amáŋ ó lɛ Umɔ́dɛkāyi má okómpinu ɔlɛ́ ɔcɛ́ abɔ́ɔ. Umɔ́dɛkāyi í kōō cāŋjɛ ɛ́ɛ́ nɛ̄ ó kōō ī túkpɛɛ́ iyɔ̄bū nū kóō hókónu tū ɔ̄ ŋ́ kpó. Anɔ́ɔ Uháman kwú cɔ̄nū nɛ̄hi lɛyíkwu ɔ́.

¹⁰ Amáŋ ó lɛ īyī nū kwú klla le yɛ tá ɔlɛ́ nū. Anɔ́ɔ ó lɛ aóklóbīya nū mɛ́mla ɔnyā nū Usɛ́rɛ̄ssi kpɔ́ hīgwú wā í jīla anú eyī ɔlɛ́ nū.

¹¹ Ó gwō, klla kokónu lɛ uwā nɛ̄hi. Ó gwō kú agbénú, áluka ayí nōó ma, āhɔ̄ kú úklɔ́ kú nū, mɛ́mla ɛ́gɛ́nɛ̄ ó lɛ ojīlīmā klla fāajɛ fíyɛ́ odúúdú aígabɔ̄ ohile kú ɔlɛ́ ɔcɛ́ āa.

¹² Amáŋ ó kahíníī, “Aɔ́dā nɛ̄ n ka bá í kōō wɛ ɔdā dúúmā ɛ́ɛ́ ŋ́, ɔcányā, Ɛ́sta í yá ucɛ lɛ ɔ̄cɛ ɔhá dúúmā jéejée ɛ́ɛ́ ŋ́, ayíka ami mɛ́mla ɔcɛ́ ā ōfōōfū alɔ. Oócí, alɔ klla í nyɔ̄ ɔnū ucɛ ɔhá, ɔlɛ́ nū kpɔ́ ɛ́ɛ́.

¹³ Amáŋ ɔdā dúúmā í lɔnyɛ tū um ŋ́, ohígbū Umɔ́dɛkāyi nōo ī wā í cīce okómpíinu kú ɔlɛ́ ɔcɛ́ eko dóódu ɔ́ɔmā ā.”

¹⁴ Anɔ́ɔ ɔnyā nū mɛ́mla odúúdú aóklóbīya, nōo hīgwú ā tá ɔ̄ ohi kahíníī, lɛ ákanaba ɛpa bū tū kú ā lɛ ogbló pīya cíla anú, cɛ́ɛ́ ká olikpō kú nū kóō wɛ ikpó ofɛtá ce igwɛ́ɛhɔ̄. Ká ā le da ɔcɛ́, cɛ́ɛ́ ká ā kwú Umɔ́dɛkāyi ú tōōlī playi anú ɔcɔ̄ɔ̄cī óócí. Cɛ́ɛ́ a lɔfú ga ɔnū ucɛ ā mla ɔtū nɛ̄hɛ́. Uháman má ka ɛlā nē é nwū anúɔ nyā ɔ́ɔ lɔhi. Anɔ́ɔ ó le ákanaba ɛpa ā bū kwaajɛ le ogbló pīya cíla anú ɛyí á.